Sanepakpa Lɛ Kɛhamɔ—Kɛ Woji Ni Amɛtsɛ Lɛ
1 Ní aaakpɛ yiŋ akɛ aaaja Nyɔŋmɔ lɛ he hiaa. Etsɔɔ wɔwala. No hewɔ lɛ, anɔkwale nilee ni wɔɔna kɛ ekɛ nitsumɔ lɛ ji oti ni sa jogbaŋŋ.—Abɛi 23:23; Yohane 17:3.
2 Bɔni afee ni wɔna nilee ni wɔda yɛ enɛ mli lɛ, esa akɛ wɔkɛ hiɛdɔɔ akase Nyɔŋmɔ Wiemɔ lɛ. Nɛkɛ gbɛ nɔ wɔtsɔɔ wɔbaleɔ ekitai, mlai, kaimɔi, kɛ ŋaawoo. Ehe miihia hu ni wɔsusu bɔ ni Yehowa kɛ ewebii ye ha lɛ he yinɔsane lɛ he. Yehowa jɛɔ esuɔmɔ mli ekɛ nilee kɛ sanesɛɛkɔmɔ babaoo haa mɛi ni kɛ anɔkwayeli taoɔ esɛɛgbɛ lɛ. Etsɔ egbɛjianɔtoo lɛ nɔ, yɛ afii ni eho lɛ amli, ekɛ woji babaoo ni kɔɔ Biblia mli nilee he yɛ gbɛi sɔrɔtoi anɔ eha. Enɛɛmɛi ahe baanyɛ aba sɛɛnamɔ babaoo aha mɛi ni leko Yehowa lɛ.
SƐƐNAMƆ NI YƆƆ WOJI MEMEJI LOO NƆ NI ETSƐ LƐ AHE
3 Yɛ February kɛ March mli lɛ, wɔkɛ woji ni hiɛ baafai 192 ni akala dani 1980 shɛ lɛ baatsu nii. Saji babaoo ni he yɔɔ sɛɛnamɔ yɛ nɛkɛ woji nɛɛ amli. Amɛhe baaba sɛɛnamɔ aha gbɔmɛi lɛ yɛ mumɔŋ. (Kwɛmɔ Mateo 5:14-16.) No hewɔ lɛ nyɛhaa wɔbɔa mɔdɛŋ, yɛ nɛkɛ nyɔji enyɔ nɛɛ amli, ni wɔkɛ woji ni etsɛ loo woji memeji ni yɔɔ wɔ asafo lɛ mli lɛ fɛɛ aha.
4 Abaanyɛ ana bɔ ni woji nɛɛ ni wɔkɛaawo gbɔmɛi lɛ adɛŋ lɛ he hiaa ha lɛ kɛtsɔ niiashikpamɔ ko ni kɔɔ wolo nɛɛ ekome ni ŋa ko ni ji Odasefonyo kɛmaje ewu akɛ nikeenii lɛ he. Kɛbashi nakai be lɛ mli lɛ, no mli lɛ nuu lɛ etsɔɔɔ miishɛɛ yɛ Biblia lɛ he. Nɔ ni ba yoo nɛɛ naa kpɛ ehe ji akɛ, nuu nɛɛ kane wolo muu lɛ fɛɛ kɛgbe naa gbɛkɛ kome. Enɛ tswa nuu nɛɛ hemɔkɛyeli yɛ Biblia lɛ mli akɛ eji Nyɔŋmɔ Wiemɔ lɛ ema shi ni yɛ enɛ hewɔ lɛ etee asafoŋ kpee ni nyiɛ no sɛɛ ba lɛ ni ebi ni akɛ lɛ akase Biblia lɛ. Yɛ nyɔji etɛ pɛ mli lɛ, nuu nɛɛ je shia-kɛ-shia sɔɔmɔ nitsumɔ lɛ shishi ni amrɔ nɛɛ abaptisi lɛ.
NA JWƐŊMƆ NI JA
5 Kaabu hewalɛ ni Nyɔŋmɔ Wiemɔ lɛ yɔɔ lɛ akɛ nɔ ko bibioo. Akɛni nɛkɛ woji ni etsɛ loo woji memeji nɛɛ maa Biblia mli anɔkwalei anɔ mi hewɔ lɛ, okɛ jwɛŋmɔ kpakpa atsu enɛɛmɛi ahe nii. Shi obaasumɔ ni okwɛ akɛ nɛkɛ woji ni amɛtsɛ nɛɛ hi jogbaŋŋ lo. Kɛji akɛ woji lɛ ahe ekpɔlɔ ni amɛtsu lɛ, esaaa akɛ akɛtsuɔ nii yɛ shia-kɛ-shia sɔɔmɔ lɛ mli, ejaakɛ enɛ baagbala gbɔmɛi ajwɛŋmɔ kɛjɛ wɔsane lɛ nɔ.
6 Kɛji akɛ nyɛ asafo lɛ bɛ woji ni hiɛ baafai 192 ni atsɔɔ akɛ akɛtsu nii yɛ nɛkɛ tafaa nɛɛ mli lɛ eko lɛ, belɛ nyɛbaanyɛ nyɛbi eko kɛjɛ asafo ni bɛŋkɛ nyɛ lɛ nɔ mli. Nyɛbaanyɛ nyɛna eko hu kɛjɛ nitsumɔ he nine lɛ. Kɛ eko bɛ hu lɛ, nyɛbaanyɛ ni nyɛkɛ woji heei ni hiɛ baafai 192 lɛ ekomɛi aha kɛha ¢250. Beni okɛ shiatsɛ lɛ esusu Kpojiemɔ 21:4 he lɛ, obaasumɔ ni okane Happiness wolo lɛ kuku 3 ni yɔɔ baafa 184 lɛ aloo ogbala ejwɛŋmɔ kɛya akrabatsa ni afo ni yɔɔ baafa 25 yɛ “Kingdom Come” wolo lɛ mli lɛ nɔ akɛ nɔ ni otsɔɔ nɔ okɛ wolo lɛ haa.
7 Eba akɛ wɔ fɛɛ wɔɔna sɔɔmɔ ni woɔ yibii lɛ mli gbɛfaŋnɔ kɛtsɔ nilee ni jɛ Nyɔŋmɔ Wiemɔ lɛ mli lɛ ni wɔɔtsɔ woji memeji loo nɔ ni etsɛ nɛɛ anɔ wɔkɛaaha lɛ nɔ! Enɛ baanyɛ aye abua mɛi ni wɔyeɔ amɛ odase lɛ koni ahi kɛha amɛ kɛya naanɔ.