Kpojiemɔ—Enaagbee Kwraa lɛ Ebɛŋkɛ!
1 “Ajɔɔ mɔ ni kaneɔ lɛ kɛ mɛi ni nuɔ gbalɛ wiemɔi lɛ, kɛ mɛi ni ŋɔɔ nibii ni aŋma yɛ mli lɛ amɛtoɔ lɛ; ejaakɛ be lɛ eshɛ etã.” (Kpoj. 1:3) Sane nɛɛ maa bɔ ni Kpojiemɔ wolo lɛ he yɔɔ sɛɛnamɔ hã lɛ nɔ mi, titri lɛ akɛni be ni ato ni emli gbalɛi lɛ babaoo baaba mli lɛ mli wɔyɔɔ lɛ hewɔ. No hewɔ lɛ, ehi jogbaŋŋ akɛ kɛjɛ otsi ni jeɔ shishi yɛ January 8, afi 2007 lɛ, wɔbaakase Kpojiemɔ—Enaagbee Kwraa lɛ Ebɛŋkɛ! wolo lɛ yɛ Asafo Woloŋ Nikasemɔhe lɛ.
2 Kɛjɛ be ni wɔkase Kpojiemɔ Naagbee wolo lɛ yɛ Asafo Woloŋ Nikasemɔhe lɛ wɔgbe naa ni wɔkaseko dɔŋŋ lɛ kɛbashi amrɔ nɛɛ, nibii ni yaa nɔ yɛ je lɛŋ lɛ etsake yɛ gbɛ̀i babaoo nɔ. (1 Kor. 7:31) Kɛfata he lɛ, mɛi ni ebafata he kɛshiɛɔ Maŋtsɛyeli lɛ he sanekpakpa lɛ ateŋ mɛi babaoo fataaa he ni akase Kpojiemɔ wolo lɛ kuku fɛɛ kuku. Esa akɛ Kpojiemɔ Naagbee wolo lɛ ni wɔbaakase lɛ aye abua wɔ fɛɛ koni wɔya nɔ wɔshi kpe kɛmɛ nɔ ni kã wɔhiɛ ni baa lɛ.—Kpoj. 16:15.
3 Tswaa ofai shi akɛ obaahi nikasemɔhe lɛ otsi fɛɛ otsi. Wolo lɛ ni wɔbaakase lɛ baaye abua wɔ koni wɔya nɔ wɔshi kpe. Kɛfata he lɛ, shɛɛ saji ni Yesu kɛmaje asafoi kpawo lɛ hu baaye abua wɔ koni wɔtsi wɔhe kɛjɛ nifeemɔi kɛ shihilɛi ni baanyɛ afite wɔshiɛmɔyaa loo wekukpãa ni kã wɔ kɛ Nyɔŋmɔ teŋ lɛ ahe.—Kpoj. 1:11, 19.
4 Saamɔ Ohe Jogbaŋŋ: Dani obaaya woloŋ nikasemɔ lɛ shishi lɛ, tsɔ hiɛ ni okane kukuji ni abaasusu he yɛ Kpojiemɔ wolo lɛ mli lɛ. Kɛ́ ookase wolo lɛ, kadimɔ bɔ ni akɛ saji etsɔɔ Ŋmalɛ ni asusuɔ he lɛ mli aha lɛ. Bɔni afee ni nikasemɔ lɛ ata otsuiŋ lɛ, bɔɔ mɔdɛŋ ni onu saji otii ni yɔɔ mli lɛ ashishi jogbaŋŋ. (Neh. 8:8, 12) Hemɔ be ni ojwɛŋ nii ni okaseɔ lɛ nɔ, ni obi ohe akɛ: ‘Mɛni sane nɛɛ kɛɔ mi yɛ Yehowa kɛ eyiŋtoo lɛ ahe nitsumɔ he? Mɛɛ gbɛ nɔ matsɔ mahi shi yɛ eyiŋtoo lɛ kɛ gbeekpamɔ naa koni manyɛ maye mabua mɛi krokomɛi?’
5 Kɛjɛ be ni “Nuŋtsɔ lɛ gbi lɛ” je shishi yɛ afi 1914 lɛ, afii 92 eho. (Kpoj. 1:10) Etsɛŋ kwraa ni nibii ni yɔɔ naakpɛɛ ni Kpojiemɔ wolo lɛ gba akɛ ebaaba shikpɔŋ nɔ lɛ baaba. Kpojiemɔ Naagbee wolo ni wɔbaakase lɛ baakanya wɔtsui kɛ wɔjwɛŋmɔ, ni ebaawo hemɔkɛyeli ni wɔyɔɔ akɛ “Nyɔŋmɔ Ofe lɛ gbi wulu lɛ nɔ ta lɛ” kɛ jeŋ hee lɛ ebɛŋkɛ lɛ mli hewalɛ.—Kpoj. 16:14; 21:4, 5.