Wɔbaakase Kpojiemɔ Naagbee Wolo Lɛ

¹ Baafa ni wieɔ Kpojiemɔ Naagbee wolo lɛ saneyitso lɛ he lɛ tsɛ Kpojiemɔ 1:3 lɛ sɛɛ akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi nɛɛ, kɛ mɛi ni yeɔ nibii ni aŋmala yɛ mli lɛ anɔ lɛ; ejaakɛ be ni ato lɛ eshɛ eta.” (NW) Eka shi faŋŋ akɛ gbalɛi ni yɔɔ Biblia wolo ni ji Kpojiemɔ lɛ mli lɛ amlibaa yɛ ŋmɛnɛŋmɛnɛ beaŋ lɛ eha Yehowa webii amiishɛɛ lɛ etee hiɛ waa diɛŋtsɛ. Atsɔɔ nibii ni baa yɛ nɛkɛ be ni ji “Nuntsɔ lɛ gbi” nɛɛ mli ni wɔɔnu shishi ŋmɛnɛŋmɛnɛ lɛ mli yɛ Kpojiemɔ​—⁠Enaagbee Kwraa lɛ Ebɛŋkɛ! lɛ mli. (Kpoj. 1:10) Wɔna je lɛŋ saji ni sa kadimɔ lɛ mli shishinumɔ babaoo, kɛtsɔ ekasemɔ nɔ, titri lɛ amɛteŋ nɔ ni kɔɔ jeŋ apasa jamɔ ni yeɔ nɔ kɛ majimaji lɛ ni nyiɛɔ kɛyaa Harmagedon he lɛ kɛ nɔ ni kɔɔ bɔ ni Yehowa kɛ ewebii yeɔ ehaa lɛ hu he lɛ.

² Yɛ mɛi fioo ni yɔɔ Blɔfo asafoi amli ni na hegbɛ lɛ ni amɛkase wolo nɛɛ yɛ 1991 lɛ agbɛfaŋ lɛ, wolo nɛɛ kasemɔ lɛ efeŋ nɔ ni baakai amɛ otii ni amɛsusu he momo lɛ kɛkɛ shi moŋ ebaaha bɔ ni amɛkwɛɔ ŋmɛnɛŋmɛnɛ beaŋ saji ni yaa nɔ kɛyaa Yehowa gbi ni ekɛaaye ehenyɛlɔi anɔ kunim lɛ nɔ amɛhaa yɛ mumɔŋ gbɛfaŋ lɛ aya hiɛ babaoo. Mɔ fɛɛ mɔ baaná Kpojiemɔ Naagbee wolo lɛ kasemɔ yɛ Asafo Woloŋ Nikasemɔ shishi lɛ he sɛɛ.

³ Kwɛmɔ ni osaa ohe jogbaŋŋ, koni ohi jɛmɛ, koni okɛ ohe awo mli daa otsi yɛ gbɛ ni shishinumɔ baa he lɛ nɔ, kɛjɛ October 3, 1994. Abaaha ona he sɛɛ babaoo ni abaajɔɔ bo babaoo hu yɛ be mli ni onaa je lɛŋ saji ni baa ni agbeleɔ naa atsɔɔ yɛ saji ni akɛha yɛ gbalɛ ni aŋmala yɛ Kpojiemɔ wolo lɛ mli lɛ he shishinumɔ ni mli ka shi faŋŋ lɛ mli lɛ. Eka shi faŋŋ akɛ, ehe miihia ni wɔkɛ hiɛdɔɔ asusu nakai nikasemɔ lɛ he waa, akɛni eba yɛ ebe naa diɛŋtsɛ fe be fɛɛ ni eho. Eba akɛ wɔɔna miishɛɛ ni awo shi yɛ he lɛ mli ŋɔɔmɔ, yɛ be mli ni wɔkaneɔ, ni wɔboɔ wɔbei nɛɛ amli gbalɛi ni haa mɔ mli filiɔ lɛ lɛ toi, ni wɔjwɛŋɔ nɔ hu lɛ!