Tsiɛmɔ Ekaa Lɛ Hiɛ Kɛtsɔ Buu-Mɔɔ Lɛ Ŋaawoi Lɛ Kɛ Nitsumɔ Nɔ
1 Kristo Yesu ji mɔ ni kɛ ekaa jaje sanekpakpa lɛ he nɔkwɛmɔ nɔ ni yeɔ emuu. Bɔ ni eshweɔ waa akɛ efee e-Tsɛ suɔmɔnaa nii, kɛ miishɛɛ ni mli wa ni eyɔɔ yɛ gbɔmɛi ahe lɛ tsirɛ lɛ koni ejie mɔhedɔɔ kpo etsɔɔ mɛi krokomɛi. Ekɛ ekaa wo esɔɔmɔ nitsumɔ lɛ mli, ni yibiiwoo jɛ mli ba hu. Sɔɔmɔ nitsumɔ lɛ kɛ hejɔɔmɔ ha lɛ. Ebu enɛ akɛ “niyenii” ni haa enaa hewalɛ. (Yoh. 4:34) Ewie yiwalaheremɔ wiemɔi etsɔɔ mɛi krokomɛi yɛ be mli ni etsuɔ nitsumɔ ni e-Tsɛ kɛha lɛ akɛ etsu lɛ. Enɛ ha shishinumɔ kɛ yiŋtoo ba eshihilɛ mli.
2 Bɔfoi lɛ kɛ Kristo Yesu sɛɛnyiɛlɔi krokomɛi ni hi shi yɛ klɛŋklɛŋ afi oha lɛ mli lɛ kase ekaa ni eyɔɔ kɛha sɔɔmɔ nitsumɔ lɛ. Eyɛ mli akɛ bei komɛi lɛ awaa amɛ yi waa moŋ, shi enɛ nyɛɛɛ ajɔɔ ekaa ni amɛyɔɔ lɛ he. (Bɔfoi 5:28-32; 8:1, 4) Nakai nɔŋŋ eji ŋmɛnɛ hu. Aashiɛ sanekpakpa lɛ yɛ shikpɔŋ lɛ nɔ he fɛɛ he kɛtsɔ aŋkroaŋkroi ni nyiɛɔ Yesu Kristo nɔkwɛmɔ nɔ lɛ sɛɛ lɛ anɔ. Akɛ Yehowa Odasefoi lɛ, amɛji mɛi ni “hiɛ dɔɔ yɛ nitsumɔi kpakpai” ahe daa nɛɛ.—Tito 2:14.
3 Kɛ wɔbɛ ekaa lɛ, wɔnitsumɔ lɛ bafeɔ jabejabe, ni bɔ ni wɔkɛ wɔhe woɔ mli lɛ feɔ hiɛaŋhiɛaŋ nɔ kɛkɛ. Nɔ ni jɛɔ mli baa ji akɛ wɔnaaa wɔsɔɔmɔ lɛ he miishɛɛ dɔŋŋ. Kɛ wɔna akɛ wɔbaje shihilɛ tamɔ nɛkɛ mli lɛ, ehe baahia ni wɔtao gbɛi ni wɔɔtsɔ nɔ ni wɔtsiɛ ekaa ni wɔyɔɔ lɛ hiɛ ni wɔkpee shihilɛi ni wɔkɛkpeɔ yɛ wɔshiɛmɔ nitsumɔ lɛ mli lɛ naa. September 1, 1988 Buu-Mɔɔ lɛ mli saneyitso ni ji “Ohiɛ Ahi Otsɔɔmɔ lɛ Nɔ Daa” lɛ ma ŋaawoi ni anyɛɔ atsuɔ he nii ni baaye abua wɔ ni wɔwo wɔ ekaa ni wɔyɔɔ yɛ Maŋtsɛyeli Sɔɔmɔ lɛ mli lɛ mli hewalɛ loo wɔtsiɛ hiɛ lɛ anɔ mi.
NAAGBAI Nl WƆKƐKPEƆ
4 Shikpɔŋkukuji heei loo nɔ ni afɔɔɔ mli nitsumɔ fioo pɛ yɔɔ je lɛ mli hei babaoo. Yɛ maji wuji amli lɛ, efɔɔ kaa akɛ asafoi lɛ fɔɔ amɛshikpɔŋkuku lɛ mli nitsumɔ shikome yɛ daa nyɔŋ nɔ loo yɛ otsi mli po. Enɛ baanyɛ ekɛ kaa aba akɛni shiatsɛmɛi babaoo le mɛi ni wɔji ni yɛ bei babaoo mli lɛ amɛbɔɔ mɔdɛŋ ni amɛtsi sanegbaa lɛ naa dani wɔbaanyɛ wɔkɛ wolo ko atsɔɔ lɛ hewɔ. Ekolɛ amɛjieɔ amɛnaa akɛ ‘Odasefonyo ko ba biɛ nyɛsɛɛ otsi lɛ nɔŋŋ.’ Wɔkuuŋbii lɛ ateŋ mɛi babaoo bɛ shia, aloo wɔbaana akɛ mɛi ni yɔɔ wɔshikpɔŋkuku lɛ mli lɛ ateŋ mɛi babaoo bɛ wiemɔ lɛ he miishɛɛ. Nibii nɛɛ fɛɛ baanyɛ aha mɔ ko nijiaŋ aje wui. Shi ani okɛ ŋaawoi ni akɛha yɛ Buu-Mɔɔ ni atsɔɔ yɛ yiteŋgbɛ nɛɛ mli nikasemɔ lɛ mli kukuji 4-7 lɛ etsu nii?
5 Abua mɛi akpekpei abɔ naa afata “asafo babaoo” lɛ mli “tooi krokomɛi” lɛ ahe momo, ni akpekpei abɔ miiya nɔ amɛmiihere Maŋtsɛyeli lɛ he sanekpakpa lɛ nɔ. (Kpoj. 7:9; Yoh. 10:16) Shi kɛlɛ, gbɛi ni wɔtsɔɔ nɔ wɔkɛ wɔwiemɔ lɛ haa ni yeɔ omanye yɛ be ko ni eho lɛ eteŋ akɔnɔ shi yɛ wɔshikpɔŋkuku lɛ mli ŋmɛnɛ. Ehe miihia ni wɔhiɛ ahi wɔhe nɔ yɛ wiemɔ ni wɔkɛhaa, bɔ ni emli tseɔ ehaa, kɛ bɔ ni emɔɔ shi ehaa lɛ he, ni wɔfee klalo akɛ wɔbaafee tsakemɔi ni he hiaa lɛ.
6 Yɛ be mli ni ewieɔ sane nɛɛ he lɛ, Buu-Mɔɔ lɛ jie nibii komɛi ni yɔɔ miishɛɛ yɛ bɔ ni wɔɔfee ni wɔha wɔsɔɔmɔ lɛ aya hiɛ lɛ yi. Etsɔɔ gbɛi komɛi anɔ ni wɔɔnyɛ wɔtsɔ ni wɔye odase ni emɔ shi yɛ be mli ni wɔtsuɔ mɛi ni bɛ wiemɔ lɛ he miishɛɛ lɛ ahe nii, aloo wɔkɛ mɛi ni yɔɔ shikpɔŋkuku ni afɔɔ mli nitsumɔ lɛ mli lɛ wieɔ lɛ, kɛ agbɛnɛ kɛ shiatsɛmɛi ni jieɔ amɛnaa lɛ. Ani wɔkɛ nɛkɛ ŋaawoi nɛɛ miitsu nii, ni wɔtsakeɔ wɔwiemɔ lɛ koni esa shikpɔŋkuku lɛ hiamɔi lɛ? Ani wɔmiiŋɔ hegbɛi ni dɛŋdadei ni wɔyɔɔ ni wɔkɛaatsu enɛ lɛ kɛhaa wɔ lɛ? Kɛ wɔnyiɛ ŋaawoi ni akɛha wɔ lɛ esɛɛ lɛ, ebaaye ebua wɔ ni wɔkɛ wɔbe awo sɔɔmɔ lɛ mli waa wɔ diɛŋtsɛ. Yɛ be mli ni wɔjeɔ gbɛ wɔkɛ nibii ni atsɔɔ lɛ tsuɔ nii lɛ, ekanyaa wɔjwɛŋmɔi ni ehaa wɔkɛ wɔbe woɔ sɔɔmɔ nitsumɔ lɛ mli kwraa. No hewɔ lɛ, etsiɛɔ wɔ ekaa lɛ hiɛ ni ewoɔ mli hewalɛ.
7 Yɛ bɔ ni je lɛŋ shihilɛ lɛ ji amrɔ nɛɛ hewɔ lɛ, eyɛ faŋŋ agbɛnɛ akɛ amanehulu kpeteŋkpele lɛ miibɛŋkɛ kpaakpa diɛŋtsɛ. Enɛ haa wɔnaa bɔ ni wɔshɛɛ sane lɛ he hiaa ha kɛ bɔ ni ehe hiaa hu akɛ wɔɔkpɛ tamɔ ‘je lɛŋ la.’ (Mat. 5:14, 16) Nyɛhaa wɔkɛ ŋaawoi ni akɛha wɔ lɛ atsua nii kɛ ekaa koni wɔtsɔ nakai feemɔ nɔ wɔwo ekaa ni wɔyɔɔ kɛha sɔɔmɔ nitsumɔ lɛ mli hewalɛ.