Kpeei Ahe Baa Sɛɛnamɔ Kɛhaa Wɔbii Lɛ
1 Afa Israel maŋ lɛ akɛ “ha ni maŋ lɛ hii kɛ yei kɛ gbekɛbii kɛ ogbɔ ni yɔɔ ogboi lɛ amli lɛ abua amɛhe naa, koni amɛnu, ni amɛkase.” (5 Mose 31:12) Hɛɛ, gbekɛbii, kɛ gbekɛbii bibii po fata Israel kpee kɛha jamɔ lɛ he. Nakai nɔŋŋ hu ŋmɛnɛ. Yehowa Odasefoi asafoŋ kpeei ahe baa sɛɛnamɔ kɛhaa gbekɛbii.—Lala 148: 1, 12.
2 Shi, etsɛɛɛ ni nibii gbalaa gbekɛbii ajwɛŋmɔ. Ehe miihia ni otsɔɔ amɛ ni amɛka toi ni amɛnyɛ amɛbo wiemɔ toi jogbaŋŋ. Ehe miihia hu ni aye ebua amɛ yɛ nibii ni akɛhaa mɛi lɛ mli. Ŋaawoo ni nyiɛ sɛɛ nɛɛ baanyɛ aye ebua wɔbii lɛ koni amɛna Kristofoi akpeei ahe sɛɛ babaoo.
SAAMƆ OHE OHA KPEEI LƐ
3 Shia tsɔsemɔ kpakpa baaye abua gbekɛbii lɛ ni amɛhiɛ asɔ hegbɛ ni amɛna akɛ amɛkɛ mɛi krokomɛi aaakpe koni amɛja Yehowa. Esa akɛ eye ebua amɛ ni amɛnu shishi akɛ enɛ ji Nyɔŋmɔ suɔmɔnaa nii ni akɛ toiboo yɛ enɛ mli lɛ kɛ sɛɛnamɔi baa. Abaanyɛ aye abua bibii kwraa Iɛ po koni amɛnu shishi akɛ Kristofoi akpeei yɛ kɛha amɛ hu.—Lala 133:1: Yes. 48:17; Mat. 19:14.
4 Mɔ diɛŋtsɛ teemɔŋ hesaamɔ baaha gbekɛ lɛ ana kpeei lɛ ahe miishɛɛ waa. Eyeɔ ebuaa kɛji akɛ gbekɛbii lɛ yɛ amɛ diɛŋtsɛ amɛ Biblia, lala wolo, kɛ woji krokomɛi ni akɛkaseɔ nii ni amɛkɛbaatsu nii yɛ kpeei ashishi. Esɔ akɛ fɔlɔi aye ebua amɛbii bibii lɛ ni amɛsaa amɛhe kɛ hooo lɛ yɛ nikasemɔ ni abaafee yɛ kpee fɛɛ kpee shihilɛ fa ko mli. (Heb. 10:23) Abaanyɛ afee enɛ koni ekɛ gbekɛ lɛ nyɛmɔ ni ekɛaanu nibii ashishi ni ekɛ ehe aaawo kpeei amli lɛ akpa gbee. Eka shi faŋŋ akɛ, eji nɔ ni mɔ fɛɛ mɔ shweɔ, ni gbekɛbii fata he, akɛ aaato be ama shi aha hesaamɔ kɛha kpeei.—Heb. 13:15.
5 Gbekɛbii komɛi naa kpeei ahe sɛɛ kɛtsɔ nitsumɔi krɛdɛɛ ni akɛwoɔ amɛdɛŋ lɛ nɔ. Gbekɛbii bibii kwraa lɛ baanyɛ ana shii abɔ ni Nyɔŋmɔ gbɛi lɛ, Maŋtsɛyeli lɛ, aloo Biblia mli sane ko ni atsi ta kɛ nɔ ko ni awie yɛ he lɛ ni amɛaakadi shii abɔ ni awieɔ be lɛ he miishɛɛ. Abaanyɛ akɛ nitsumɔ awo gbekɛbii ni amɛdara fioo lɛ adɛŋ koni amɛŋmala ŋmalɛi ni atsɛɔ ni akaneɔ aloo atsɛɔ wiemɔ kɛjɛɔ mli lɛ amɛfɔ shi. Bɔ fɛɛ bɔ ni amɛnitsumɔ ji lɛ, kɛji akɛ ajie gbekɛbii lɛ ayi yɛ amɛmɔdɛŋbɔɔ hewɔ lɛ, ehe aaaba sɛɛnamɔ babaoo aha amɛ. Yɛ sɛɛ mli lɛ, abaanyɛ aha amɛ hegbɛ ni amɛwie saji otii ni amɛkase aloo bɔ ni amɛnya saji titrii ni atsu he nii yɛ kpeei lɛ ashishi lɛ ahe. Yiŋtoo lɛ ji ni aye abua gbekɛbii bibii lɛ kwraa ni amɛbo wiemɔi lɛ atoi ni amɛkase nɔ ko kɛjɛ mli. Afiteɔ nɛkɛ yiŋtoo nɛɛ kɛji akɛ ahaa amɛ shwɛmɔ nii aloo woji krokomɛi ni jeee nɔ ni akɛtsuɔ nii yɛ kpee lɛ shishi lɛ koni amɛkɛ enɛɛmɛi ashwɛ yɛ be mli ni kpee lɛ yaa nɔ lɛ.
6 Esa akɛ awo gbekɛbii fɛɛ ni baanyɛ akane nii lɛ hewalɛ ni aye abua amɛ ni amɛna amɛ diɛŋtsɛ amɛbe he gbɛjianɔtoo yɛ teemɔŋ kɛha Asafo lɛ woji lɛ akanemɔ. Yɛ gbekɛ lɛ nyɛmɔ naa lɛ, nɔ ni baanyɛ afata enɛ ni aaakane lɛ he ji Bible Stories, Tsɔɔlɔ Kpele Lɛ kɛ Youth woji lɛ, kɛ agbɛnɛ saji ni ahala yɛ woji tɛtrɛbii lɛ amli. Esa akɛ gbɛjianɔtoo ni tamɔ nɛkɛ lɛ aye abua obalaŋta lɛ koni enyɛ edamɔ teokrase woji hee ni eba nyɛsɛɛ nɛɛ lɛ fɛɛ naa.
ATADEWOO KƐ HESAAMƆ
7 Yɛ be babaoo mli lɛ, gbɔi anaa kpɛɔ amɛhe kɛ amɛna bulɛ gbɛ ni wɔ gbekɛbii lɛ tsɔɔ nɔ amɛsaa amɛhe ni amɛbaa amɛjeŋ yɛ Kristofoi akpeei ashishi lɛ. Ayoo akɛ gbɛ ni gbekɛ ko tsɔɔ nɔ esaa ehe kɛhaa kpee lɛ tsɔɔ nɔ ko yɛ esu kɛ baŋ yɛ kpeei ashishi lɛ he. Kɛ ooya oyasara Asafo lɛ nitsumɔ he yitso ni yɔɔ Brooklyn aloo nitsumɔ he nine ko lɛ, ebaafee nɔ ni sa jogbaŋŋ akɛ gbekɛbii kɛ agbɛnɛ onukpai fɛɛ aaasaa amɛhe tamɔ mɛi ni miiya Kristofoi akpeei.—om baafa 131.
8 Bɔ ni wɔ gbekɛbii Iɛ baa amɛjeŋ fɛfɛo yɛ kpeei ashishi lɛ hu kɛ yijiemɔ kɛ woo bahaa Yehowa gbɛi lɛ. No hewɔ lɛ, esa akɛ fɔlɔi ayoo akɛ gbekɛbii lɛ anɔ kwɛmɔ jogbaŋŋ yɛ kpeei ashishi lɛ he hiaa. Fɔlɔi ni susuɔ amɛbii ahe lɛ baato gbɛjianɔ amɛha weku lɛ koni amɛtara he kome yɛ kpeei ashishi koni amɛkwɛ ni amɛbii lɛ aba amɛjeŋ jogbaŋŋ yɛ bei fɛɛ mli. Nɔ ni akɛfataa ŋaawoo ni yeɔ buaa nɛɛ he ji akɛ, fɔlɔi baanyɛ ni amɛkɛ mɛi krokomɛi ni miiye omanye yɛ amɛbii bibii lɛ atsɔsemɔ mli lɛ agba sane.
9 Eji nɔ ni wɔshweɔ wɔhaa gbekɛbii lɛ akɛ amɛkɛ amɛhe aaawo jamɔ yɛ wɔ-Kristofoi akpeei ashishi lɛ mli kɛmɔ shi koni ‘amɛkɛwowoo mɛi krokomɛi ahewalɛ kɛya suɔmɔ kɛ nitsumɔi kpakpai amli.’ (Heb. 10:24) Yɛ Yehowa gbɛjianɔtoo mli lɛ, kpeei lɛ yɛ kɛha gbekɛbii hu.