Sanekpakpa lɛ kɛhamɔ—Shia-kɛ-Shia Kadimɔ Wolo lɛ ko Nitsumɔ
1 “Mishiɛ Kristo sanekpakpa lɛ migbe naa.” (Rom. 15:19) Nɛkɛ bɔfo Paulo wiemɔi nɛɛ tsɔɔ bɔ ni eyɔɔ ekaa yɛ nitsumɔ akɛ eshiɛ, etsɔɔ nii ni efee kaselɔi lɛ he.
2 Wɔmiisumɔ ni wɔye odase kɛmɔ shi yɛ wɔshikpɔŋkukuji lɛ amli. Bei ni wɔyɔɔ mli lɛ mli wa waa—oshara eba wala he. Kɛ wɔbɔɔɔ gbɔmɛi lɛ kɔkɔ lɛ, ebaaha wɔye la yi sɔ. (Ezek. 3:18, 19) Taakɛ bɔfo Paulo ji lɛ, wɔmiisumɔ ni wɔ hu wɔkɛɛ ekɛ “miyeee nyɛteŋ mɔ ko mɔ ko la yi nɔ.” (Bɔfoi 20:26) Te wɔɔfee tɛŋŋ wɔtsu wɔshikpɔŋkuku lɛ mli nii kɛmɔ shi hu? House-to-House Record loo Shia-kɛ-Shia Kadimɔ wolo lɛ baanyɛ aye abua.
BENI MƆ KO BƐ SHIA
3 Mɛi ni bɛ shia lɛ akadimɔ kɛ amɛhe saji aŋmalamɔ ni yeɔ emuu he hiaa koni anyɛ atsu shikpɔŋkuku lɛ mli nii kɛmɔ shi. Enɛ ji anɔkwale kɛji akɛ atsuɔ shikpɔŋkuku lɛ mli nii daa aloo afeee nakai. No hewɔ lɛ esa akɛ wɔbɔ mɔdɛŋ ni wɔnine ashɛ mɔ ko nɔ kɛ yɛ shiɔ fɛɛ shia mli. Kɛ mɔ ko bɛ jɛmɛ lɛ, esa akɛ wɔkadi shia-kɛ-shia kadimɔ wolo lɛ nɔ. Kɛkɛ lɛ esa akɛ wɔbɔ mɔdɛŋ ni wɔku wɔsɛɛ ni wɔbaye mɛi ni yɔɔ shia lɛ mli lɛ ateŋ mɔ ko odase.
4 Bɔni afee ni amɛnine ashɛ mɛi ni bɛ shia yɛ be mli ni amɛtee jɛmɛ klɛŋklɛŋ kwɛɛɛ lɛ nɔ Iɛ, mɛi komɛi kɛ amɛ shia-kɛ-shia kadimɔ wolo lɛ tsuɔ nii. amɛkuɔ sɛɛ amɛyaa shia-kɛ-shia nitsumɔ lɛ nɔ yɛ nakai gbi lɛ nɔŋŋ nɔ. Aloo amɛbɔɔ mɔdɛŋ ni amɛya jɛmɛ gbi kroko nɔ aloo yɛ gbi lɛ mli be kroko mli. Mɛi pii ena akɛ gbɛkɛnaashi saramɔ lɛ yeɔ omanye babaoo. Mɛi ni nyɛɛɛ amɛya shia-kɛ-shia lɛ yeɔ omanye yɛ telifon ni amɛtswaa loo woji ni amɛŋmalaa kɛ shiai ni mɛi krokomɛi yaa jɛmɛ shii abɔ lɛ yeee omanye lɛ.
KƐ ANA MƆ NI YƆƆ WIEMƆ LƐ HE MIISHƐƐ
5 Kɛ ona mɔ ni sumɔɔ ni ebo toi lɛ, kadimɔ lɛ ni oŋmala ehe saji oshwie shi. Ŋmaa gbɔmɔ lɛ gbɛi, adrɛs, kɛ saji krokomɛi ni baaye abaa ni odi miishɛɛ ni ena lɛ sɛɛ. Kɛ onine shɛɛɛ enɔ dɔŋŋ yɛ be mli ni otee eŋɔɔ shiiabɔ lɛ, ekolɛ tsakemɔ yɛ gbi loo bei ni oyaa jɛmɛ lɛ mli baahi. Onijiaŋ akaje wui yɛ mɔ ni ejie miishɛɛ kpo yɛ wiemɔ lɛ he lɛ nɔ mra.
6 Bɔfo Paulo to okadi kpakpa kɛha wɔ. ‘Eye odase kɛmɔ shi’ yɛ shikpɔŋkuku ni akɛwo edɛŋ lɛ mli. Shia-kɛ-shia kadimɔ wolo lɛ ni wɔkɛaatsu nii jogbaŋŋ lɛ baaye abua wɔ ni wɔye odase kɛmɔ shi yɛ shikpɔŋkuku ni akɛwo wɔdɛŋ lɛ mli. Ni mɛɛ miishɛɛ wɔbaana nɛkɛ yɛ be mli ni mɛi pii batsɔmɔɔ Yesu Kristo kaselɔi lɛ! Enɛ baaha wɔnyɛ wɔti Paulo wiemɔi lɛ amli: “Miyeee nyɛteŋ mɔ ko mɔ la yi sɔ.”—Bɔfoi 20:21, 26.