Naanɔ Wala—Eji Oti ni Ma Wɔhiɛ
1 Gbɔmɛi akpei abɔ ni Yesu tsɔɔ amɛ nii lɛ na okadii ni efee lɛ. Mɛɛ hegbɛ mli ŋɔɔmɔ amɛna nɛkɛ! Be ko lɛ eha asafoi lɛ tara shi, eda shi, ni ekɛ aboloo kɛ loo ni fa lɛ amɛ. Amɛyibɔ ji hii 5,000, ni yei kɛ gbekɛbii fataaa he. Yɛ be mli ni Yesu susu gbɔmɛi lɛ agbɔmɔtsoŋ hiamɔ nii ahe lɛ, nɔ ni he hiaa lɛ titri ji amɛmumɔŋ hiamɔ nii. No hewɔ lɛ, enɔ jetsɛremɔ lɛ ekɛɛ asafoi lɛ akɛ: “Nyɛkatsua ŋmaa ni fiteɔ lɛ he nii, shi moŋ ŋmaa ni hiɔ shi kɛyaa naanɔ wala mli.”—Yohane 6:27.
2 Akɛ anɔkwa Kristofoi lɛ, wɔmiisumɔ ni wɔnyiɛ Yesu ŋaawoo lɛ sɛɛ ni wɔtsu mumɔŋ nibii ni hiɔ shi kɛyaa naanɔ lɛ he nii. Enɛ tsɔɔ akɛ ni wɔɔha heloo gbɛfaŋ nibii asɛɛdii ahiɛ amɛgbɛhe ni wɔɔha Nyɔŋmɔ suɔmɔnaa nifeemɔ afee oti ni ma wɔhiɛ. No hewɔ lɛ, wɔkaseɔ Yesu ni wɔbɔɔ mɔdɛŋ bɔ ni wɔɔnyɛ ni wɔha mɛi krokomɛi anu anɔkwale lɛ he ni wɔye wɔbua amɛ ni amɛhiɛ asɔ mumɔŋ nibii ni amɛna naanɔ wala akɛ oti ni ma amɛhiɛ.
Shihilɛ Hee Ni Wɔba Mli Lɛ
3 Taakɛ bɔ ni wɔ fɛɛ wɔle lɛ, kɛjɛ June 14 kɛbaa nɛɛ Yehowa webii ni yɔɔ maŋ nɛɛ mli lɛ eba nɔnyɛɛ kpele shishi yɛ nɔyeli lɛ “naatsii” ni ekɛba wɔnitsumɔ lɛ nɔ lɛ hewɔ. Yehowa hiɛ nyam wɔwoɔ akɛ yɛ naagbai lɛ fɛɛ sɛɛ lɛ, nitsumɔ lɛ etsake ehe ewo shihilɛ hee lɛ mli yɛ ekaa naa. Onukpai lɛ kɛ gbɛtsɔɔmɔi krɛdɛɛ ni amɛnine shɛɔ nɔ lɛ miitsu nii ni amɛmiikwɛ tooi lɛ anɔ yɛ naanɔ wala hewɔ. Wɔhiɛ sɔɔ nɛkɛ su loo mumɔ kpakpa nɛɛ.
4 Wɔleee bei abɔ ni shihilɛ nɛɛ baaya nɔ ahi shi nakai shi esa akɛ wɔ fɛɛ wɔha ahi wɔjwɛŋmɔ mli akɛ kɛ Yehowa ŋmɛ gbɛ lɛ Abonsam baaya nɔ koni etsu nɔ fɛɛ nɔ ni eeenyɛ koni ebɔ mɔdɛŋ ni efite emuuyeli mli ni Yehowa webii hiɛ lɛ. (Hiob 2:4-6) No hewɔ lɛ ebaahi jogbaŋŋ akɛ wɔ fɛɛ wɔɔwaje wɔjwɛŋmɔi kɛ nibii tsake koni wɔtswa wɔfai shi shiŋŋ akɛ wɔbaahiɛ wɔ emuuyeli mli akɛ Yehowa, Nyɔŋmɔ hiɛkalɔ lɛ jalɔi ni yɔɔ ekaa.—Hiob 27: 5.
5 Enɛ etsɔɔɔ akɛ wɔbaafee mɛi ni hiɛ bɛ amɛhe nɔ ni bɛ yitseiaŋ yɛ gbɛ ni wɔtsɔɔ nɔ Wɔtsuɔ nii lɛ be, dabi. Ŋmalɛ ni wɔyɔɔ kɛha nɛkɛ be nɛɛ ji nɔ ni yɔɔ Mateo 10:16 lɛ. Yɛ nakai beaŋ nɔŋŋ lɛ, esa akɛ wɔ fɛɛ wɔbɔ mɔdɛŋ ni wɔkwɛ jogbaŋŋ ni wɔkwa gbɔmɔ he gbeyeishemɔ ni kumɔɔ mɔ ni fiteɔ hiɛnɔkamɔ lɛ. Ejaakɛ, kɛ nɛkɛ gbeyeishemɔ nɛɛ yɛ wɔhe lɛ, wɔnyɛŋ wɔmɔ emuuyeli mli ni wɔhiɛ kɛha Yehowa—lɛ mli. Biblia lɛ kɛɔ wɔ akɛ henyɛlɔ, Abonsam. “nyiɛ tamɔ jata ni huuɔ, eetao mɔ ni eeemi.” (1 Pet. 5:8) Jata huuɔ koni eha gbeyeishemɔ amɔmɔ tooi, ni eha amɛtsui afa kɛyashɛ he ni amɛaafee amɛnii basabasa, akɛ nɔkwɛmɔ nɔ lɛ, amɛgbɛ amɛshwa yɛ foijee mli aloo ni amɛaatumɔ kɛteke afabaŋ ni atswa awo amɛhe lɛ, tamɔ nɔ ni oookɛɛ hebuu nɔ ko yɛ afabaŋ lɛ sɛɛ. Nɛkɛ efeɔ koni ‘ena mɔ ni eeemi.’
6 Ehe miihia ni wɔ fɛɛ wɔbu jogbaŋŋ ejaakɛ Abonsam ehuu yɛ otsii fioo ni eho nɛɛ amli babaoo kɛtsɔ asɛmsro loo ‘akɛɛ-akɛɛ’ ni bɛ mli ni gbɛɔ shwaa asafoi lɛ amli lɛ nɔ. Nɔ ni yɔɔ mɔbɔ ji akɛ, efee enɛ kɛtsɔ wɔ diɛŋtsɛ wɔnyɛmimɛi lɛ anɔ. Yɛ be mli ni ewieɔ enɛ he lɛ, kpokpaa nɔkwɛlɔ ko bɔ amaniɛ akɛ: “Nɔ ni yeɔ nyɛmimɛi lɛ awui titri bianɛ ji asɛmsro loo ‘akɛɛ-akɛɛ’ nɛɛ. . . . Enɛ miiye awui babaoo fe sane ni ka shi [ni ji naatsii] lɛ diɛŋtsɛ. Naagba lɛ jɛɛhe lɛ jɛ nyɛmimɛi hii lɛ kɛ nyɛmimɛi yei lɛ diɛŋtsɛ. Yɛ enɛ sɛɛ lɛ, nɔ fɛɛ nɔ miiya nɔ fɛfɛo.” Ani obaaye obua Abonsam koni egbɛ gbeyeishemɔ mumɔ ni tamɔ nɛkɛ yɛ Nyɔŋmɔ webii ateŋ? Belɛ mɛni hewɔ esa akɛ ogbɛ asɛmsro loo ‘akɛɛ-akɛɛ’ nɛɛ oshwa? Aloo, nɔ ni ehiii kwraa lɛ, mɛni hewɔ esa akɛ oje eko ni ole akɛ ebɛ mli lɛ shishi?
7 Kaimɔ akɛ, gbɔmɛi ni susuɔ akɛ amɛkɛ nɔyelɔi lɛ yaa lɛ baawie nɔ ni amɛsusuɔ aloo amɛbaakɛɛ wɔ nɔ ni amɛkɛɛ amɛnu ni nɔyelɔi lɛ miito gbɛjianɔ ni amɛfee. Yɛ bei babaoo mli lɛ, enɛ damɔ bɔ ni amɛ diɛŋtsɛ amɛsusuɔ saji ahe loo bɔ ni amɛtsɔɔ shihilɛi komɛi ashishi lɛ nɔ. Kwɛmɔ jogbaŋŋ ni okagbɛ saji ni bɛ mli nihaa mɔ tsui faa lɛ oshwa.
8 Kɛji akɛ sane lɛ ji anɔkwale po lɛ, ani ehe miihia ni onyɛmi lɛ anu? Ani nɔ ko yɛ ni ebaanyɛ efee yɛ nɛkɛ sane nɛɛ he, ekolɛ akɛ onukpa? Ani oshara eba ehe ni yɛ enɛ hewɔ lɛ esa akɛ abɔ lɛ kɔkɔ koni ekwɛ jogbaŋŋ?
9 Kɛji akɛ nɔ ko bɛ ni ooodamɔ nɔ okɛ amaniɛbɔɔ ko ni tamɔ nɛkɛ aha lɛ, belɛ mɛni hewɔ esa akɛ klɛŋklɛŋ kwraa lɛ, owie he? Ani nɔ ni ogbaa nɛɛ baawo onyɛmimɛi lɛ hewalɛ ni amɛhiɛ amɛ emuuyeli mli aloo ebaawo amɛhe gbeyei ni egbɔjɔ amɛ ni amɛkpalaŋŋ kɛya sɛɛ koni Abonsam mli ashɛ ehe? (Bɔfoi 21:13; Heb. 10:89) Nɔ ni fe bei fɛɛ lɛ, gbɛnaa nii ka wɔnɔ akɛ wɔkɛ wiemɔi ni woɔ mɔ hewalɛ atswa wɔnyɛmimɛi lɛ wɔma shi. Kwɛmɔ jogbaŋŋ ni Satan kɛ bo akatsu nii ni etsɔ onɔ egbɛ huumɔ ni tamɔ wiemɔi ni woɔ mɔ he gbeyei oshwa kɛtsɔ asɛmsro loo ‘akɛɛ-akɛɛ’ nɛɛ nɔ.—Romabii 14:19; 15:2.
10 Nɔ fɛɛ nɔ ni baaba kɛ he ni nii nɛɛ baaya eyashɛ lɛ, esa akɛ wɔna hekɛnɔfɔɔ akɛ Yehowa miikwɛ. Esusuɔ nɔ ni yaa nɔ lɛ he. Eŋmɛ gbɛ koni enɛ aba lɛ nakai yɛ yiŋtoo kpakpa ko hewɔ. Yɛ wɔ diɛŋtsɛ wɔ gbɛfaŋ lɛ, ekɛ nɔ kpakpa ko eha wɔ, tsɔsemɔ ni sɛɛnamɔ yɔɔ he yɛ nɔ ni esa akɛ wɔfee yɛ kaai ni tamɔ nɛkɛ shishi. Wɔkpa nibii heei ashi, nɔkwɛmɔ nii ni anyɛɔ akɛtsuɔ nii diɛŋtsɛ ni kɔɔ ‘hiɛ ni akɛfɔɔ Yehowa nɔ’ lɛ he. (Lala 37:8) Yɛ wɔteŋ mɛi komɛi agbɛfaŋ lɛ, akpa wɔ gbɔjɔmɔi tamɔ gbeyeishemɔ kɛ hekɛnɔfɔɔ tuutu lɛ he mama, koni ajaje enɛɛmɛi aha wɔ. Yɛ fɛɛ mli lɛ, eji niiashikpamɔ ni sɛɛnamɔ yɔɔ he. Ní wɔyɛ hekɛnɔfɔɔ akɛ, ‘yɛ be mli ni wɔna nɔ yɛ bei fioo mli lɛ, musuŋtsɔlɛ fɛɛ Nyɔŋmɔ lɛ baagbe wɔtsɔsemɔ lɛ naa. Ebaaha wɔfi shi shiŋŋ, ni ebaaha wɔhe awa.’ Belɛ nyɛyaa nɔ, nyɛŋmaa nyɛtsui shi kɛ naanɔ wala akɛ oti ni ma nyɛhiɛ.—1 Pet. 5:10.