Sanepakpa Lɛ Kɛhamɔ—Kɛ Sɔrɔtofeemɔi yɛ Shia-kɛ-Shia Nitsumɔ Iɛ Mli
1 Ani sɔrɔtofeemɔi babaoo bɛ Yehowa nibɔɔ lɛ mli? Lalatsɛ lɛ jaje akɛ: “Yehowa, kwɛ bɔ ni onitsumɔi lɛ fa ha! Nilee okɛfee fɛɛ; shikpɔŋ lɛ nɔ eyi tɔ kɛ onibɔɔ nii lɛ!” (Lala 104:24) Gbɛi sɔrɔtoi pii hu yɔɔ sanekpakpa lɛ ni efa wɔ akɛ wɔshiɛ lɛ mli. Ani okɛ sɔrɔtofeemɔ miitsu nii yɛ oshia-kɛ-shia sɔɔmɔ nitsumɔ lɛ mli bɔ ni afee ni onine ashɛ gbɔmɛi babaoo nɔ bɔ ni ooonyɛ?
Yɛ Woji Tɛtrɛbii Agbi Lɛ Nɔ
2 Asafo lɛ woɔ mɔ fɛɛ mɔ hewalɛ ni ekɛ ehe awo woji tɛtrɛbii ajaa mli daa Hɔɔ. Ni akɛ Saneyitso Kɛha Sanegbaa lɛ aaatsu nii lɛ, hiŋmɛitswaa 30 kɛyashi 60 ni akɛ woji tɛtrɛbii lɛ amli sane kome pɛ aaatsɔɔ ni akɛ woji tɛtrɛbii enyɔ aha kɛha ₵100 lɛ sa. Kɛji akɛ shiatsɛ lɛ bi saji loo ejie miishɛɛ babaoo kpo lɛ, ehe ehiaaa ni wɔnu he akɛ sa akɛ wɔkɛ oyaiyeli ashi jɛmɛ kɛya shia kroko.
3 Sɔrɔtoifeemɔ ebɔɔɔ mɔ yɛ Buu-Mɔɔ lɛ kɛ Awake! lɛ gbɛfaŋ. Yɛ bei babaoo mli lɛ, nyɛminuu ni tsuɔ klɛŋklɛŋ nifeemɔ yɛ Sɔɔmɔ kpee lɛ mli lɛ baagbala jwɛŋmɔ kɛya woji tɛtrɛbii lɛ amli saji otii anɔ. Bo toi; ŋmalamɔ ŋaawoi ni okɛbaatsu nii lɛ oshwie shi. Kɛ nɔkwɛmɔ nɔ fata Sɔɔmɔ kpee lɛ he lɛ, kadimɔ bɔ ni afeɔ lɛ ahaa lɛ, kaa efeemɔ lɛ okwɛ, ni okɛtsu nii yɛ shiɛmɔ mli yɛ Hɔɔ. Kɛji akɛ ona akɛ gbɔmɛi nyaaa woji tɛtrɛbii lɛ ahe lɛ, halamɔ sane kroko ni okɛtsɔɔ. Eko fɛɛ eko ni baa lɛ hiɛ saji sɔrɔtoi babaoo ni ato he gbɛjianɔ ni baaŋɔɔ gbɔmɛi ni nyaa nibii sɔrɔtoi ahe lɛ anaa. Kɛji akɛ ole woji tɛtrɛbii lɛ amli saji lɛ jogbaŋŋ lɛ, ebaafee mlɛo aha bo akɛ okɛ owiemɔ lɛ aaato nibii ni shiatsɛ lɛ nyaa he lɛ he.
Ha Sɔrɔtofeemɔ Aba Ohiɛkpamɔ Wiemɔ Mli
4 Yɛ bei komɛi amli lɛ, abaanyɛ akɛ Saneyitso Kɛha Sanegbaa lɛ atsu nii ni akɛ wolo ni akɛhaa lɛ aha. Wɔ Maŋtsɛyeli Sɔɔmɔ lɛ woɔ ŋaa akɛ akɛ Saneyitso Kɛha Sanegbaa sɔrɔtoi atsu nii yɛ be kɛ bei amli. Kɛ aatsɔse mɛi heei lɛ, ebaahi jogbaŋŋ akɛ akɛ Saneyitso Kɛha Sanegbaa hee lɛ atsu nii yɛ gbɛ ni yɔɔ mlɛo nɔ. Shi, yɛ bei komɛi amli hu lɛ, ebaahi akɛ oha tsakemɔi aba ohiɛkpamɔ wiemɔ lɛ mli. Ani obɔ mɔdɛŋ akɛ oooje osanegbaa lɛ shishi kɛtsɔ dɛhiɛmɔ woji bibii lɛ ni oootsɔ hiɛ okɛha akɛ nɔ ni ooodamɔ nɔ oje sanegbaa shishi lɛ nɔ?
5 Ŋwanejee ko bɛ he akɛ hiɛkpamɔ wiemɔi yɛ Reasoning wolo lɛ mli ni okɛtsuko nii okwɛko. Akɛ nɔkwɛmɔ nɔ lɛ, baafai 10-11 kɛ ŋaawoi ni damɔ saji heei ni eba nɔ haa. Le saji ni yaa nɔ lɛ, ni ole ŋmalɛi ni kɔɔ saji ni eba ehee lɛ ahe. Ani ofɔɔ oshikpɔŋkuku lɛ mli nitsumɔ? Kɛji nakai ni lɛ, ebaahi akɛ oooha sɔrɔtofeemɔ aba ohiɛkpamɔ wiemɔi lɛ amli, obaanyɛ okɛ nɔ ni yɔɔ Reasoning wolo lɛ baafa 15 lɛ atsu nii. Agbɛnɛ, ohiɛ akakpa ŋaawoi kpakpai ni yɔɔ July 15, 1998 Watchtower lɛ baafai 15-20 lɛ nɔ. Okɛ sanebimɔi ni asusu he jogbaŋŋ ni yɔɔ baafa 19, kuku 16 lɛ ekomɛi atsu nii ni okwɛ ni shiatsɛ lɛ hu atsɔɔ ejwɛŋmɔ.
6 Gbɔmɛi ni yɔɔ wɔshikpɔŋkuku lɛ mli lɛ jɛ shihilɛi sɔrɔtoi amli kɛ hei sɔrɔtoi. No hewɔ lɛ ehe miihia ni wɔha wɔhiɛkpamɔ wiemɔ lɛ afee sɔrɔtoi sɔrɔtoi koni eŋɔɔ mɛi fɛɛ ni baabo toi lɛ anaa, ni wɔfee nakai yɛ mɛi krokomɛi ahilɛ-kɛ-hamɔ hewɔ. (1 Kor. 9:19-23) Sɔrɔtofeemɔ ni wɔɔkɛaatsu nii yɛ wɔ shia-kɛ-shia sɔɔmɔ lɛ mli lɛ baaye abua wɔ ni ‘wɔhere wɔ diɛŋtsɛ kɛ mɛi ni boɔ wɔ toi lɛ fɛɛ yiwala.’—1 Tim. 4: 6.