Ye Obua Mɛi Krokomɛi Ni Amɛle Ni Amɛhiɛ Asɔ Wɔ-Bɔlɔ Kpeteŋkpele Lɛ
1 Yɛ be mli ni wɔyɔseɔ nibɔɔ ni ebɔle wɔhe kɛkpe lɛ, ŋwanejee ko bɛ wɔjwɛŋmɔi amli akɛ Bɔlɔ ko yɛ ni akɛ eyɛ wɔ wɔsɛɛ be ko he miishɛɛ diɛŋtsɛ. (Rom. 1:20) Wolo, Life—How Did It Get Here By Evolution or by Creation? lɛ efee dɛŋdade ni eha wɔyoo ni wɔhiɛ esɔ wɔ-Bɔlɔ lɛ. Eye ebua wɔ hu ni wɔnyɛ wɔtsɔɔ bɔ ni fee ni wala ba shihilɛ mli lɛ mli wɔtsɔɔ mɛi krokomɛi.
2 Yɛ be mli ni ekane wolo lɛ egbe naa lɛ, mɔ ko ni ekase jeŋ nilee jogbaŋŋ lɛ tsɔɔ mli akɛ eji wolo ni hi fe fɛɛ ni ekane ni haa hiɛ sɔɔ shihilɛ. Kɔlegi mli nitsɔɔlɔ ko jaje akɛ: “Minako nibɔɔ he sanenaatsɔɔmɔ ni akɛha jogbaŋŋ ni tamɔ nɛkɛ da.” Eka shi faŋŋ akɛ, Creation wolo lɛ ji dɛŋdade fɛfɛo ni akɛyeɔ abuaa mɛi pii koni amɛle ni amɛhiɛ asɔ wɔ-Bɔlɔ kpeteŋkpele lɛ ni ji Yehowa Nyɔŋmɔ.
OKƐ HEGBƐ FƐƐ HEGBƐ NI BAA LƐ ATSU NII
3 Wɔbaana hegbɛ yɛ October nyɔŋ lɛ nɔ ekoŋŋ ni wɔkɛ wolo nɛɛ aha yɛ shiɛmɔ mli. Teemɔ mɛi ni okɛ amɛ gbaa Biblia lɛ he sane daa lɛ amiishɛɛ shi yɛ Creation wolo lɛ mli. Kɛ ehe ebahia ni okɛ wolo nɛɛ aya eshia lɛ, te ooofee tɛŋŋ ni okɛya ni anaaa?
4 Bɔni afee ni otee ekɔnɔ shi kɛha wolo lɛ ni oha ehiɛsɔɔ kɛha nibɔɔ aya hiɛ lɛ, obaanyɛ ogbala ejwɛŋmɔ kɛya wolo lɛ baafai 12 kɛ 13 nɔ. Nibii babaoo yɛ ni ebaanyɛ esusu he yɛ nɛkɛ baafai nɛɛ. Agbɛnɛ hu obaanyɛ ni otsɔɔ lɛ mfonirii ni yɔɔ yitso 9 loo 10 lɛ mli aloo ogbala ejwɛŋmɔ kɛya mfoniri ni yɔɔ baafai 251 lɛ nɔ. Okɛ mfonirii pii akatsu nii yɛ be kome mli ni kaawie babaoo hu. Feemɔ owiemɔ Iɛ kuku.
OKƐ SANEYITSO KƐHA SANEGBAA LƐ ATSU NII
5 Creation wolo lɛ kɛ wɔ Saneyitso Kɛha Sanegbaa, “Ja Wala-Halɔ Lɛ” yaa waa. Yɛ be mli ni okɛ wolo lɛ haa mɔ ni okɛ lɛ kaseɔ Biblia lɛ, obaanyɛ okɛɛ akɛ: “Mɛi pii yɛ miishɛɛ akɛ amɛaale bɔ ni fee ni wala je shishi. Ani osusu enɛ he pɛŋ?” [Ŋmɛɛ lɛ gbɛ ni eha hetoo.] Jwɛŋmɔi sɔrɔtoi yɔɔ ni kɔɔ wala shishijee he. Nyɛhaa wɔsusua Biblia lɛ mlitsɔɔmɔ ni shishinumɔ yɔɔ mli lɛ he. [Kanemɔ Hebribii 3:4.] No hewɔ lɛ yɛ sanenaatsɔɔmɔ ni ja naa lɛ, tso fɛɛ tso loo shia fɛɛ shia ni wɔnaa ni ebɔle wɔhe kɛkpe ŋmɛnɛ lɛ, mɔ ko kɛ ji mɔ ni tsɔ he ŋaa loo ema. Eka shi faŋŋ akɛ, jeŋ muu fɛɛ ni yɔɔ hwanyaŋŋ nɛɛ hu yɛ bɔlɔ. Taakɛ Hebribii 3:4 tsɔɔ lɛ, Bɔlɔ lɛ ji Nyɔŋmɔ. Ni te esa akɛ enɛ he anɔkwale nilee lɛ ana wɔnɔ hewalɛ ehe tɛŋŋ? [Kanemɔ Kpojiemɔ 4:11.] No hewɔ lɛ nilee gbɛ ni yɔɔ ni esa ekɛ atsɔ nɔ yɛ be mli ni be yɔɔ lolo lɛ ji ni akase Bɔlɔ lɛ suɔmɔnaa nifeemɔ he nii ni wɔhi shi yɛ naa.” Agbɛnɛ okɛ wolo lɛ aha ni otsɔɔ akɛ ebaatsɔɔ bɔ ni fee ni gbɔmɔ ba biɛ kɛ bɔ ni toiboo ni aaafee aha wɔ-Bɔlɔ lɛ baanyɛ ekɛ naanɔ wala aba lɛ mli.
6 Kwɛ miishɛɛ ni wɔna akɛ wɔhiɛ nɛkɛ wolo fɛfɛo kɛ emli mfonirii ni hiɛ baafai 256 nɛɛ ni tsɔɔ anɔkwale ni kɔɔ sutsakemɔ kɛ nibɔɔ he lɛ mli lɛ! Shi titri lɛ, wolo nɛɛ woɔ wɔ-Bɔlɔ kpeteŋkpele lɛ hiɛ nyam. Efeɔ nakai kɛtsɔɔ he ni ehaa wɔleɔ bɔ ni fee ni wala ba biɛ, Yehowa yiŋtoo ni yɔɔ naakpɛɛ ni ekɛaatse egbɛi lɛ he, kɛ eshiwoo akɛ ebaajɔɔ adesai kɛtsɔ Maŋtsɛyeli lɛ nɔ lɛ nɔ.