Adesa Bɔlɔ lɛ Mli Hemɔkɛyeli ni Aaatswa Ama Shi
1 Mɛi pii emu sane naa yɛ gbɛ ko nɔ yɛ wala shishijee he. Ni eyɛ dɔlɛ akɛ aaakɛɛ akɛ, awo mɛi pii ahewalɛ yɛ gbɛ ni ejaaa nɔ koni amɛkpɛlɛ sutsakemɔ nɔ akɛ no ji hetoo lɛ. Creation wolo lɛ pɛiɔ sane lɛ fai sɔrɔtoi enyɔ lɛ fɛɛ mli fitsofitso ni ekɛ odaseyeli ni mli wa ni fiɔ Biblia lɛ sɛɛ lɛ haa. Te wɔɔfee tɛŋŋ wɔye wɔbua mɛi ni hiɛ tsui kpakpai ni sumɔɔ akɛ amɛaabo toi lɛ? Kɛtsɔ sɛɛsaramɔi anɔ. Kɛ wɔku wɔsɛɛ wɔtee lɛ, ehi jogbaŋŋ akɛ wɔɔna nɔ ko pɔtɛɛ yɛ wɔjwɛŋmɔ mli ni wɔbaawie he ni baatswa Yehowa mli hemɔkɛyeli ama shi akɛ wɔ Bɔlɔ.
2 Kɛ mɔ lɛ tsɔɔ hemɔkɛyeli yɛ Biblia lɛ mli lɛ, no lɛ gbɛ ni tamɔ nɛkɛ baafee nɔ ni mɔɔ shi kɛha osanegbaa shishijee:
◼ “Yesaia 45:18 kɛ wiemɔ ni hewalɛ yɔɔ mli waa yɛ jeŋ muu fɛɛ shishijee he haa; masumɔ ni male nɔ ni osusuɔ yɛ he. [Kanemɔ ni oŋmɛ gbɛ ni ewie.] Yehowa jieɔ ehe kpo akɛ ŋwɛi kɛ shikpɔŋ Bɔlɔ. Ni wala ni yɔɔ shikpɔŋ nɛɛ nɔ hu? Yesaia 42:5 kɛ enɛ he yijiemɔ hu haa lɛ. [Kanemɔ.] Kɛ nɔ ni Biblia lɛ kɛɔ lɛ ji anɔkwale lɛ, no lɛ sutsakemɔ tsɔɔmɔ lɛ ji amale. Ani oheɔ oyeɔ akɛ obaanyɛ okɛ ohe afɔ Biblia lɛ nɔ?” Gbelemɔ kɛya Creation wolo lɛ yitso 17 lɛ, ni otsɔɔ lɛ yiŋtoi krokomɛi hu ni haa aheɔ Yehowa ayeɔ akɛ Bɔlɔ.
3 Obaanyɛ okɛ nɔ ko tamɔ nɛkɛ hu aje osanegbaa lɛ shishi:
◼ “Nyɛsɛɛ nɛɛ beni miba oŋɔɔ lɛ, atee sanebimɔ ko shi akɛ, Mɛni ji gbɔmɔ kɛ shikpɔŋ lɛ wɔsɛɛ be? Kwɛmɔ bɔ ni wolo ni mishi miha bo lɛ haa nakai sanebimɔ lɛ hetoo.” Gbelemɔ Creation wolo lɛ baafai 234-5 ni owo lɛ hewalɛ koni ekane kukuji 6 kɛ 7 lɛ. Kɛ etsɔɔ miishɛɛ babaoo lolo lɛ, obaanyɛ obi akɛ: “Mɛɛ tsakemɔi ni sa kadimɔ ji nɔ ni osusuɔ akɛ ebaaba shikpɔŋ nɔ?” Kɛ ebaahi lɛ, abaanyɛ agba oti nɛɛ he sane yɛ nakai be lɛ mli loo be kroko kɛ obasara lɛ kɛtsɔ Creation wolo lɛ kukuji ni yɔɔ saneyitso nɛɛ nɔŋŋ mli lɛ nɔtsamɔ nɔ.
4 Kɛ etamɔ nɔ ni shiatsɛ lɛ sumɔɔ jamɔ lɛ, obaanyɛ obi akɛ:
◼ “Ani okadi akɛ mɛi pii kɛ yijiemɔ haa adebɔɔ ni tamɔɔɔ gbɔmɔ loo ni afeɔ lɛ tamɔ gbɔmɔ ni atsɛɔ lɛ Adebɔɔ Nyɛ lɛ? [Ha ni eha hetoo.] Biblia lɛ shiii wɔ akɛ mɛi ni leee nɔ ko yɛ mɔ ni ji Bɔlɔ diɛŋtsɛ lɛ he.” Kanemɔ Kpojiemɔ 4:11. Kɛ akane ŋmalɛ lɛ agbe naa lɛ, ekolɛ shiatsɛ lɛ baatsɔɔ ejwɛŋmɔ. No sɛɛ lɛ obaanyɛ ogbala ejwɛŋmɔ kɛya oti kome loo enyɔ ko nɔ yɛ Creation wolo lɛ yitso 11 ni ekolɛ oma Bɔlɔ lɛ yiŋtoo akɛ ebaafee shikpɔŋ lɛ fɛɛ paradeiso yɛ Kristo Maŋtsɛyeli lɛ shishi lɛ nɔ mi.
5 Gbɛ kroko ni obaanyɛ otsɔ nɔ oje sɛɛsaramɔ lɛ shishi ji ni obaakɛɛ akɛ:
◼ “Adesai epiŋ kɛ awerɛho babaoo yɛ nɔ sha kɛ efɔŋ feemɔ hewɔ. Yehowa, shikpɔŋ nɛɛ Bɔlɔ lɛ, ewo shi akɛ shihilɛi nɛɛ baaba naagbee. [Gbelemɔ kɛya baafa 196 lɛ, ni okane Abɛi 2:21, 22.] Mɛi ni yɔseɔ lɛ akɛ amɛ Bɔlɔ ni amɛfeɔ esuɔmɔnaa nii lɛ baanyɛ akpa gbɛ akɛ amɛnine baashɛ jɔɔmɔi ni yɔɔ naakpɛɛ lɛ anɔ.” Kɛ ebaahi yɛ be lɛ mli lɛ, okɛ Kpojiemɔ 21:4, 5 ni yɔɔ baafai 197-8 lɛ he sanegbaa atsa nɔ.
6 Shiɛlɔi ni he esa lɛ ebale akɛ ni aaato bei ahe gbɛjianɔ kɛha sɛɛsaramɔi lɛ ji nɔ ni hi fe fɛɛ. Kɛ wɔto nitsumɔ nɛɛ he gbɛjianɔ jogbaŋŋ lɛ ebaaye ebua wɔ koni wɔdi miishɛɛ ni ajie lɛ kpo lɛ sɛɛ amrɔ nɔŋŋ. Esa akɛ ole be ni hi fe fɛɛ kɛha bo kɛ mɛi ni yɔɔ shikpɔŋkuku lɛ mli lɛ. Obaana miishɛɛ yɛ be mli ni otsuɔ famɔ akɛ “nyɛyafea . . . kaselɔi” lɛ he nii kɛtsɔ nitsumɔ nɛɛ ni okɛ ohe aaawo mli daa lɛ nɔ.—Mat. 28:19, 20.