Miishɛɛ ni Aaana Kɛtsɔ Woji Tɛtrɛbii Babaoo Kɛhamɔ nɔ
1 Ale Yehowa jeŋ muu fɛɛ gbɛjianɔtoo lɛ kɛha yibii ni ewoɔ lɛ hewɔ. Yehowa etsɔ Yesu Kristo nɔ ena shikpɔŋ nɔ gbɛjianɔtoo ni nɔ ni akɛleɔ no hu ji nitsulɔi ni jɛɔ amɛsuɔmɔ mli amɛwoɔ yibii. (Lala 110:3; Mateo 9:37, 38) Kɛ wɔtsu wɔsɔɔmɔ lɛ hilɛ kɛ efalɛ he nii jogbaŋŋ lɛ, nɔ ni baajɛ mli aba ji miishɛɛ ni baafa babaoo. (Luka 10:17) Wɔnuɔ shishi akɛ woji tɛtrɛbii kɛhamɔ eba shi yɛ nɛkɛ be nɛɛ mli. Shi, etsɛŋ ni hegbɛi baagbele koni wɔkɛ woji tɛtrɛbii nɛɛ aha mɛi ni yɔɔ wiemɔ lɛ he miishɛɛ diɛŋtsɛ lɛ koni wɔkɛye wɔbua amɛ yɛ Nyɔŋmɔ Wiemɔ lɛ ni amɛkaseɔ lɛ mli. Mɛni obaakɛɛ kɛji akɛ mɔ ni yɔɔ wiemɔ lɛ he miishɛɛ lɛ bo kɛ miishɛɛ akɛ: “Shi enɛɛmɛi lɛ ehee ni!”
2 Woji tɛtrɛbii lɛ ajaa ji gbɛi titrii lɛ ekome ni atsɔɔ nɔ agbɛɔ Maŋtsɛyeli lɛ he sane lɛ ashwaa yɛ jeŋ fɛɛ. Wɔyɛ hiɛnɔkamɔ akɛ nyɛbaanyɛ ni nyɛkanya mɛi ni nyɛkɛ woji tɛtrɛbii lɛ haa amɛ daa lɛ ekoŋŋ. Wɔnanemɛi ni nyaa Biblia lɛ he lɛ baasumɔ ni amɛkane woji tɛtrɛbii lɛ shi ekolɛ amɛbaashashao shi fioo akɛ amɛaahe ekome. Maa nɔ mi oha amɛ akɛ yɛ bei abɔ ni amɛ diɛŋtsɛ amɛkaneɔ enɛ yɛ teemɔŋ lɛ, titri lɛ yɛ shia lɛ, nɔ ko bɛ ni esa akɛ amɛshe he gbeyei. Mla ko bɛ ni tsiɔ wolo ni mɔ ko ehala akɛ eeekane yɛ teemɔŋ yɛ lɛ diɛŋtsɛ eshia lɛ naa. Ni akɛni wɔmiisumɔ ni wɔtee mɛi ni heɔ woji tɛtrɛbii lɛ daa lɛ amiishɛɛ shi hewɔ lɛ, wɔbaanyɛ wɔbi sane nɛɛ jogbaŋŋ akɛ, Mɛni ji nibii komɛi ni he hiaa ni wɔbaanyɛ wɔha ehi wɔjwɛŋmɔ mli ni baaha wɔnyɛ wɔkɛ woji tɛtrɛbii lɛ babaoo aha?
JWƐŊMƆ KPAKPA NI WƆKƐAAYA MƐI LƐ AŊƆƆ
3 Klɛŋklɛŋ nifeemɔ kɛhA woji tɛtrɛbii anitsumɔ ni mɔɔ shi ji: FEEMƆ MƆ Nl HIƐ YƆƆ WOJI TƐTRƐBII KƐHAMƆ NƆ. Ewaaa akɛ wɔnine aaashɛ oti nɛɛ nɔ kɛji akɛ wɔ diɛŋtsɛ lɛ wɔji mɛi ni kaneɔ Buu-Mɔɔ lɛ kɛ Awake! lɛ daa. Kɛ wɔna wɔle emli saji lɛ pɛ lɛ, enɛ tsirɛɔ wɔ koni wɔkɛha. Woji tɛtrɛbii lɛ egbele mɛi pii ahiŋmɛi koni amɛyoo ni amɛle Yehowa gbɛjianɔtoo lɛ. Eha mɛi pii hu ele nii ejaakɛ ewieɔ saji sɔrɔtoi babaoo he. Hɛɛ, tsɔsemɔ ni yɔɔ wɔwoji tɛtrɛbii lɛ amli lɛ fa naakpa, yɛ mumɔŋ kɛ woloŋlee fɛɛ mli. Okɛ ŋaalee atsu sɔɔmɔ nitsumɔ lɛ fa nɛɛ he nii, shi tswaa ofai shi akɛ obaafee ogbɛfaŋnɔ ni Yehowa hu baajɔɔ omɔdɛŋbɔi lɛ anɔ.
4 Ŋaawoo ni ji enyɔ kɛha woji tɛtrɛbii anitsumɔ ni woɔ yibii ji: HA EFEE MLƐO. Shiɛlɔi komɛi ewie babaoo kɛ tɔlɛ yɛ woji tɛtrɛbii lɛ kɛhamɔ mli. Tsutsu lɛ, shiɛlɔi komɛi kɛ Saneyitso Kɛha Sanegbaa lɛ tsu nii yɛ be mli ni amɛkɛ amɛhe ewo woji tɛtrɛbii anitsumɔ mli. Shi, ajieee enɛ feemɔ yi. Yɛ be mli ni ewieɔ woji tɛtrɛbii babaoo ni akɛaaha he lɛ, December 1, 1956 Buu-Mɔɔ lɛ jaje akɛ: “Shiɛmɔ wiemɔ kuku ni kɔɔ sane kome he ji nɔ ni hi fe fɛɛ yɛ be mli ni akɛ woji tɛtrɛbii haa lɛ. Yiŋtoo lɛ ji ni akɛ woji tɛtrɛbii babaoo aha. Woji lɛ diɛŋtsɛ ‘baawie.’ Asafo lɛ miiwo miniti fa kɛmiiya miniti kome shiɛmɔ he ŋaa koni awie saji ni yɔɔ wolo tɛtrɛɛ lɛ mli lɛ ekome he jogbaŋŋ.” Nɛkɛ ŋaawoo nɛɛ hi jogbaŋŋ ŋmɛnɛ hu taakɛ eji yɛ afi 1956 mli lɛ.
5 Nɔ ni nyiɛ sɛɛ lɛ: FEEMƆ TSWAA. Okɛ shiɛmɔ wiemɔi fe ekome asaa ohe. Yɛ gbɛ kroko nɔ lɛ, ha mɛi ni okɛ amɛ kaseɔ Biblia lɛ ahi ojwɛŋmɔ mli yɛ be mli ni okaneɔ woji tɛtrɛbii lɛ. Mɛɛ wiemɔi baaŋɔɔ nikaselɔ pɔtɛɛ ko naa? Okɛ lɛ awie no he yɛ be mli ni okɛ wolo lɛ haa lɛ. Shi, saji lɛ pii ŋɔɔ mɛi pii anaa yɛ bei fɛɛ mli, ni esa akɛ enɛ afee mlɛo ni wɔnyɛ wɔkɛ woji tɛtrɛbii lɛ pii aha amɛ.
6 Naagbee ŋaawoo ko nɛ: OKƐ OTI KO AMA OHIƐ. Esa akɛ oti ni okɛmaa ohiɛ lɛ afee nɔ ni shishinumɔ yɔɔ he, susumɔ shihilɛ mli ni oyɔɔ lɛ he, kɛ bei ni onyɛɔ okɛwoɔ sɔɔmɔ nitsumɔ lɛ mli lɛ hu he.
7 Yehowa yaa nɔ ekɛ nɔ ni he hiaa wɔ koni wɔna babaoo feemɔ yɛ sɔɔmɔ nitsumɔ lɛ mli lɛ haa wɔ kɛtsɔɔ esafo loo egbɛjianɔtoo ni anaa lɛ nɔ. Wɔyɛ woji tɛtrɛbii fɛfɛji ni wɔkɛaatsu nii. Agbɛnɛ mɔdɛŋ ni wɔ aŋkroaŋkro wɔɔbɔ ni wɔkɛ asafo lɛ gbɛjianɔtoo kɛha woji tɛtrɛbii anitsumɔ atsu nii lɛ hu he baa sane lɛ mli. Akɛni nitsumɔ ni tamɔ nɛkɛ woɔ Yehowa hiɛ nyam hewɔ lɛ, wɔnine baashɛ miishɛɛ kpele ni baa kɛjɛɔ gbɛfaŋnɔ kpakpa ni wɔnaa yɛ sɔɔmɔ nitsumɔ lɛ mli yɛ woji tɛtrɛbii amli baa lɛ amli gbɛfaŋnɔ.—Yohane 15:8.