Okɛ Woji Tɛtrɛbii lɛ Atsu Nii yɛ Oshiɛmɔ Nitsumɔ lɛ Mli
1, 2. Buu-Mɔɔ kɛ Awake! lɛ ená mɛi ashihilɛ nɔ hewalɛ yɛ mɛɛ gbɛ nɔ?
1 “Emli ŋɔɔ waa, eyɛ ebe naa, ni ewoɔ mɔ hewalɛ.” “Enɛɛmɛi ji woji tɛtrɛbii ni woɔ mɔ hewalɛ fe fɛɛ ni mikane pɛŋ.” Nɛkɛ wiemɔi nɛɛ tsɔɔ bɔ ni nikanelɔi ni yɔɔ je lɛŋ he fɛɛ he lɛ nuɔ he amɛhaa yɛ Buu-Mɔɔ kɛ Awake! lɛ he lɛ mli jogbaŋŋ. Yɛ anɔkwale mli lɛ wɔwoji tɛtrɛbii lɛ ahe eba sɛɛnamɔ waa diɛŋtsɛ ákɛ dɛŋdadei ni atsɔɔ nɔ akɛ sanekpakpa lɛ yaa “gbɔmɛi fɛɛ” aŋɔɔ.—1 Tim. 2:4.
2 Jarayeli nitsulɔ ko nine shɛ Awake! wolo tɛtrɛɛ lɛ eko nɔ, ni enya emli sane ni ekane lɛ he waa. Sɛɛ mli lɛ, ekane Buu-Mɔɔ ni fata he kɛha nakai nyɔŋ lɛ, ni sane ni yɔɔ mli lɛ ha epɛi Triniti tsɔɔmɔ ni ehe eye yɛ eshihilɛ mli fɛɛ lɛ mli jogbaŋŋ kɛmɔ shi. Enɛ tée emiishɛɛ shi. Nyɔji ekpaa sɛɛ lɛ, abaptisi lɛ. Nuu kroko hu nine shɛɔ woji tɛtrɛbii lɛ anɔ daa shi ekaneee. Yɛ gbɛ kroko nɔ lɛ, eŋa sumɔɔɔ ni ekɛ Odasefoi gbaa sane shi ekaneɔ woji tɛtrɛbii ni akɛhaa ewu lɛ. Biblia mli shiwoo ni kɔɔ shikpɔŋ nɔ paradeiso ni jalɔi baahi mli lɛ he lɛ ha emii shɛ ehe waa. Yɛ sɛɛ mli lɛ, ekɛ ebinuu, kɛ lɛ diɛŋtsɛ enyɛmi yoo batsɔmɔ Yehowa sɔɔlɔi.
3. Mɛɛ sɛɛnamɔ yɔɔ he akɛ wɔkɛ woji tɛtrɛbii enyɔ lɛ fɛɛ aaaha?
3 Okɛ Enyɔ lɛ Fɛɛ Aha: Taakɛ nɔkwɛmɔnii ni etsɔ hiɛ lɛ tsɔɔ lɛ, wɔnyɛŋ wɔle mɔ diɛŋtsɛ ni baakane wɔwoji tɛtrɛbii lɛ loo wɔwoji tɛtrɛbii lɛ amli nɔ ni baanyɛ atee mɛi lɛ amiishɛɛ shi. (Jaj. 11:6) Enɛ hewɔ lɛ, sɛɛnamɔ yɛ he akɛ wɔkɛ Buu-Mɔɔ kɛ Awake! lɛ fɛɛ aha yɛ be kome too lɛ nɔŋŋ mli, eyɛ mli moŋ akɛ bei pii lɛ wolo tɛtrɛɛ lɛ ekome pɛ he wɔbaawie yɛ wɔshiɛmɔ wiemɔ lɛ mli. Yɛ shihilɛi komɛi amli lɛ, eeefee nɔ ni sa akɛ wɔkɛ wɔwoji tɛtrɛbii lɛ srɔtoi babaoo aaatsɔɔ yɛ saramɔ be kome too lɛ nɔŋŋ mli.
4. Wɔbaanyɛ wɔto gbɛjianɔ kɛha woji tɛtrɛbii ajaa nitsumɔ lɛ yɛ mɛɛ gbɛ nɔ?
4 Sɛɛnamɔ yɛ he akɛ aaato gbɛjianɔ koni akɛ he awo woji tɛtrɛbii ajaa nitsumɔ lɛ mli gbi kome daa otsi. Akadi Hɔɔ fɛɛ ni yɔɔ 2005 Calendar of Jehovah’s Witnesses lɛ mli lɛ akɛ “Magazine Day” (Woji Tɛtrɛbii Agbi). Yɛ anɔkwale mli lɛ, akɛni esoro he fɛɛ he shihilɛ, ni esoro shihilɛ mli ni mɔ fɛɛ mɔ yɔɔ hewɔ lɛ, ekolɛ mɛi komɛi kɛ gbi kroko baatsu nii kɛha wɔwoji tɛtrɛbii lɛ jaa. Ani okɛ enɛ efata odaa otsi gbɛjianɔtoo lɛ he?
5. Mɛɛ hegbɛi esa akɛ wɔha wɔhiɛ ahi nɔ koni wɔkɛ woji tɛtrɛbii lɛ aha, ni mɛni baanyɛ aye abua wɔ koni wɔfee nakai?
5 Okɛ Oti ko Ama Ohiɛ: Oti ni wɔkɛaama wɔhiɛ daa nyɔŋ nɔ akɛ wɔkɛ woji tɛtrɛbii lɛ falɛ ko aaaha lɛ baanyɛ aye abua wɔ koni wɔkɛ woji tɛtrɛbii babaoo aha. Ani oyɛ mɛi ni oyahaa amɛ woji tɛtrɛbii lɛ daa? Ani okɛ woji tɛtrɛbii haa mɛi ni okɛ amɛ kpeɔ yɛ shiɛmɔ nitsumɔ lɛ mli lɛ? Ani obaanyɛ okɛ woji tɛtrɛbii aha yɛ gbɛjegbɛ nɔ odaseyeli nitsumɔ lɛ mli, yɛ jarayeli shikpɔŋkuku mli kɛ maŋ lɛŋ hei srɔtoi? Ani okɛ woji tɛtrɛbii fãa gbɛ, okɛyaa shwapoi anaa beni oyaahe nii, ni okɛ eko yaa beni oyaasara mɔ ko? Okɛ hegbɛ fɛɛ hegbɛ ni sa atsu nii koni okɛye obua mɛi krokomɛi ni amɛná Buu-Mɔɔ kɛ Awake! lɛ he sɛɛ.
6. Wɔbaanyɛ wɔkɛ woji tɛtrɛbii memeji lɛ atsu nii jogbaŋŋ kɛmɔ shi yɛ mɛɛ gbɛ nɔ?
6 Wɔbaanyɛ wɔkɛfee oti ni ma wɔhiɛ hu akɛ wɔkɛ ememeji ni wɔyɔɔ lɛ eko baaha. Kɛ nyɔŋ kome loo nyɔji enyɔ ho ni akɛ woji tɛtrɛbii lɛ haaa yɛ amɛnyɔji lɛ amli po lɛ, amɛmli saji lɛ ahe yɛ sɛɛnamɔ lolo. Ha mɛi ni yɔɔ he miishɛɛ lɛ anine ashɛ nɔ. Yɛ mɛi akpekpei abɔ agbɛfaŋ lɛ, Buu-Mɔɔ kɛ Awake! woji tɛtrɛbii lɛ efee “wiemɔ . . . yɛ be ni sa mli.” (Abɛi 25:11) Nyɛhaa wɔkɛtsua nii ni wɔkɛye wɔbua mɛi akpekpei abɔ lolo koni amɛbale Yehowa ni amɛbasɔmɔ lɛ.