Woji Tɛtrɛbii lɛ Tswaa Maŋtsɛyeli lɛ He Adafi
1 Ákɛ Yehowa Odasefoi lɛ, ale wɔ jogbaŋŋ yɛ ekãa ni wɔkɛshiɛɔ Nyɔŋmɔ Maŋtsɛyeli lɛ he sane lɛ hewɔ. Buu-Mɔɔ kɛ Awake! woji tɛtrɛbii ni wɔjaa lɛ tsuɔ nɔ wulu ko he nii yɛ yelikɛbuamɔ ni ekɛhaa mɛi akpekpei abɔ koni amɛkɛkase Nyɔŋmɔ yiŋtoi ahe nii lɛ mli. Shɛɛ saji ni yɔɔ mli lɛ ji sanekpakpa lɛɛlɛŋ, ejaakɛ etswaa Nyɔŋmɔ ŋwɛi Maŋtsɛyeli lɛ he adafi akɛ hiɛnɔkamɔ koome pɛ kɛha adesai aweku lɛ.
2 Woji tɛtrɛbii lɛ tsuɔ gbɔmɛi ahiamɔ nii diɛŋtsɛ lɛ ahe nii—henumɔŋ, shihilɛ kɛ mumɔŋ. Yɛ be mli ni jeŋba kɛ weku shihilɛ kpakpa fiteɔ yɛ he fɛɛ he nɛɛ, Buu-Mɔɔ kɛ Awake! lɛ yeɔ ebuaa gbɔmɛi ni ehaa amɛshihilɛ yaa hiɛ kɛtsɔ tsɔɔmɔ ni etsɔɔ amɛ bɔ ni amɛaafee amɛkɛ Biblia shishitoo mlai aaatsu nii aha lɛ nɔ. Eeefee wɔ miishɛɛ akɛ wɔɔha ashɛ woji tɛtrɛbii lɛ yɛ April kɛ May mli.
3 Nibii ni Haa Anáa He Miishɛɛ yɛ Mli: Buu-Mɔɔ kɛ Awake! lɛ yɛ aaafee mɛi ayibɔ ni yɔɔ jeŋ fɛɛ lɛ wiemɔi amli. Enɛ hewɔ lɛ, ale wɔ woji tɛtrɛbii lɛ jogbaŋŋ. Naa yiŋtoi komɛi ahewɔ ni mɛi babaoo náa he miishɛɛ lɛ:
◼ Ákɛ woji ni tsɔɔ anɔkwayeli kɛ anɔkwale lɛ, amɛjieɔ sɔrɔtofeemɔ ni yɔɔ ekpakpa kɛ efɔŋ teŋ lɛ kpo.
◼ Amɛkɛ jalɛ paradeiso ni baaba lɛ he hiɛnɔkamɔ haa, ni damɔ Nyɔŋmɔ shiwoo akɛ ekɛ shikpɔŋ lɛ baaba e-Maŋtsɛyeli nɔyeli shishi lɛ nɔ.
◼ Akɛ saji ni baa yɛ ebe naa yɛ henɔi sɔrɔtoi amli haa, ni gbɔmɛi ni yɔɔ shihilɛi kɛ kusumii fɛɛ amli lɛ náa he miishɛɛ.
◼ Saji lɛ yɛ kuku, etsɔɔ mɔ nii, ejieɔ anɔkwalei akpo, ni amɛkɛ amɛhe wooo mɛi ahe jwɛŋmɔ fɔŋ ni anáa kɛ sane he ni aŋmɛɔ akɛsaa mli.
◼ Amɛmli mfonirii ni gbalaa mɔ lɛ haa anaa he miishɛɛ oya nɔŋŋ, ni niŋmai ni yɔɔ faŋŋ lɛ haa woji lɛ kanemɔ feɔ mlɛo.
4 Okɛha yɛ He Fɛɛ He: Woji tɛtrɛbii lɛ ni wɔkɛaaha babaoo lɛ kpotoo damɔɔ mɔdɛŋbɔɔ ni wɔkɛsaa wɔhe yɛ wɔshiɛmɔ wiemɔi amli, yɛ wɔbe he gbɛjianɔtoo mli, kɛ wɔshiɛmɔ he gbɛjianɔ ni wɔɔto lɛ nɔ. Akɛ gbɛtsɔɔmɔi ni anyɛɔ atsuɔ he nii eha yɛ September 1995 kɛ October 1996 Wɔ Maŋtsɛyeli Sɔɔmɔ wolo lɛ mli, ni ebaahi akɛ wɔɔtĩ mli koni wɔkɛtsu nii.
5 Lé Nibii ni Yɔɔ Woji Tɛtrɛbii lɛ Amli: Be mli ni okaneɔ eko fɛɛ eko lɛ, susumɔ mɔ ni baasumɔ ni ena eko lɛ he. Taomɔ otii pɔtɛɛ loo ŋmalɛi ni obaanyɛ otsɛ yisɛɛ yɛ oshiɛmɔ wiemɔ lɛ mli. Susumɔ sanebimɔ ko ni obaanyɛ obi koni okɛje sanegbaa shishi ni okɛtee miishɛɛ shi yɛ sane lɛ he lɛ he.
6 Ha Shiɛmɔ Wiemɔ lɛ Asa Mɔ lɛ He: Too shiɛmɔ wiemɔ ni yɔɔ kuku, ni sa ni abaanyɛ atsake kɛha nuu, yoo, mɔ ni hiɛ efa, loo oblanyo kɛji ole lɛ loo oleee lɛ lɛ he gbɛjianɔ.
7 Feemɔ Klalo Daa ni Okɛ Buu-Mɔɔ kɛ Awake! lɛ Aha: Akɛni wɔbaanyɛ wɔkɛ woji tɛtrɛbii lɛ awo baagi, baagi pɛmpɛoo, loo kotoku mli yɛ gbɛ ni waaa nɔ hewɔ lɛ, wɔbaanyɛ wɔhiɛ ekomɛi kɛ́ wɔmiifã gbɛ loo wɔmiihe nii. Okɛha kɛ́ okɛ wekumɛi, nanemɛi, nanemɛi nitsulɔi, skulbii, loo tsɔɔlɔi miigba sane. Too gbi ko daa otsi, titri lɛ kɛha woji tɛtrɛbii ahe odaseyeli.
8 Ná Hiɛsɔɔ Oha Woji Tɛtrɛbii Lɛ: Sɛɛnamɔ ni yɔɔ amɛhe lɛ gbooo kɔkɔɔkɔ. Bei ni hoɔ lɛ baaa hiamɔ ni yɔɔ shɛɛ sane ni yɔɔ mli lɛ shi. Eka shi faŋŋ akɛ, kɛ́ wɔkɛ mɔdɛŋbɔɔ krɛdɛɛ ko wo mli koni wɔkɛ woji tɛtrɛbii ni wɔnine shɛɔ nɔ lɛ fɛɛ aha lɛ, ehe ebahiaŋ ni abua ememeji anaa awo woji atoohe lɛ.
9 Gbɛjegbɛ Nɔ Odaseyeli Mɔɔ Shi: Enɛ ji gbɛ kome ni hi fe fɛɛ ni abaanyɛ atsɔ nɔ ni akɛ woji tɛtrɛbii lɛ aha gbɔmɛi babaoo. Shiɛlɔi komɛi tsuɔ nii yɛ gbɛjegbɛi ni dekã bɛ nɔ kwraa nɔ yɛ be kɛ bei amli yɛ jara gbi nɔ.
10 Jarayeli Shikpɔŋkukuji Woɔ Yibii: Beni wɔyeɔ odase yɛ shwapo kɛ shwapo naa lɛ, mɛi fioo pɛ wɔninaaa amɛ. Jarayelɔi babaoo tseɔ amɛhiɛ amɛhaa wɔ, ni mɛi babaoo heɔ woji tɛtrɛbii lɛ. Okɛ saji ni sa kɛha nakai jarayelihe ni otee lɛ aha.
11 Mɛi ni Wɔkɛ Woji Tɛtrɛbii lɛ Haa Daa yɛ Nyɛmɔ Lɛ: Akɛni akalaa woji tɛtrɛbii lɛ daa nyɔŋ mlijaa hewɔ lɛ, eji nɔ ni sa akɛ wɔɔku wɔsɛɛ kɛya mɛi ni kaneɔ lɛ aŋɔɔ koni wɔkɛ nɔ ni nyiɛ sɛɛ lɛ ayaha amɛ. Esa akɛ wɔfee sɛɛsaramɔi daa, jeee koni wɔkɛ woji tɛtrɛbii lɛ aha kɛkɛ shi moŋ koni wɔkɛtee mɔ lɛ miishɛɛ shi yɛ Biblia lɛ he. Mɛi ni heɔ woji tɛtrɛbii daa lɛ ji mɛi ni abaanyɛ akɛ amɛ afee Biblia mli nikasemɔ.
12 Ná Nɔ ni Fe Fɛɛ yɛ April kɛ May Mli: Buu-Mɔɔ kɛ Awake! lɛ ená mɛi akpekpei abɔ ni naa ekanemɔ he miishɛɛ lɛ anɔ hewalɛ. Amɛji nɔ ni mɔɔ shi yɛ Maŋtsɛyeli lɛ he adafitswaa mli aahu akɛ, esa akɛ wɔha efee oti akɛ wɔɔhiɛ eko ni gbi fɛɛ gbi ni hegbɛ lɛ aaaba lɛ wɔha amɛshɛ. Eba akɛ April kɛ May nyɔji lɛ baafee nɔ ni ekaaa kwraa kɛha woji tɛtrɛbii lɛ jaa!