Sanekpakpa Lɛ Kɛhamɔ—Kɛtsɔ yelikɛbuamɔ ni Akɛaaha He Koni Aje Biblia Kasemɔ Shishi Lɛ Nɔ
1 Mɛi fɛɛ ni sumɔɔ Yehowa lɛ miisumɔ ni amɛwo yibii yɛ amɛsɔɔmɔ nitsumɔ lɛ mli. Yesu kɛ nitsumɔ wo wɔdɛŋ akɛ “nyɛyafea kaselɔi . . ., nyɛtsɔa amɛ ni amɛye nibii fɛɛ ni mifa nyɛ lɛ anɔ.” (Mateo 28:19, 20) Kɛ oosumɔ ni oje Biblia kasemɔ shishi lɛ, taomɔ Yehowa gbɛtsɔɔmɔ koni oŋɔ hegbɛ ni yelikɛbuamɔ ni anyɛɔ atsuɔ he nii kɛ gbɛtsɔɔmɔi ni akɛtsɔɔ asafo lɛ nɔ akɛhaa lɛ kɛhaa lɛ.—Mat. 7:7, 8.
2 Mɔ ni kwɛɔ nyɛkuu lɛ nɔ lɛ nyaa Biblia mli nikasemɔ ni nyɛkuu lɛ tsuɔ lɛ he waa. Bɛŋkɛmɔ lɛ ni otsɔɔ akɛ oosumɔ ni okɛ mɔ ko akase Biblia lɛ. Ebaanyɛ eto gbɛjianɔ ni okɛ shiɛlɔ ko ni he esa atsu nii yɛ be ko mli. Esa akɛ yiŋtoo lɛ afee (1) koni enyɛ eye ebua bo koni oje shishi ni oya nɔ ofee Biblia kasemɔ lɛ kɛ (2) oje nikasemɔi krokomɛi ashishi yɛ wɔsɛɛ be mli.
Kasemɔ Nii Kɛtsɔ Nɔ Kwɛmɔ Nɔ Nɔ
3 Yɛ shihilɛi lɛ pii amli lɛ, Biblia mli nikasemɔ ni wɔbɛ eko lɛ jɛ sɛɛsaramɔ ni wɔyaaa oya yɛ be mli ni wɔkɛ woji eha loo yɛ he ni mɔ lɛ etsɔɔ miishɛɛ lɛ. No hewɔ lɛ, ha efee oyiŋtoo akɛ oooya mɛi lɛ aŋɔɔ mra. Shi ehe baahia ni oŋmala amɛhe saji oshwie shi. Ekolɛ shiɛlɔ ni yeɔ buaa bo lɛ baanyɛ atsɔɔ bo bɔ ni ooofee enɛ oha. Nyɛyi enyɔ lɛ fɛɛ baasumɔ ni nyɛsaa nyɛhe kɛha nɛkɛ sɛɛsaramɔi nɛɛ kɛ yiŋtoo akɛ nyɛbaaje Biblia mli nikasemɔi ashishi. Kɛ nyɛfee nyɛkwɛ lɛ, eeeha ole gbɛ ni hi jogbaŋŋ nɔ ni oootsɔ otee mɔ lɛ miishɛɛ shi yɛ be mli ni otee eŋɔɔ lɛ.
4 Kwɛmɔ bɔ ni mɔ ni fata ohe yɛ sɔɔmɔ nitsumɔ lɛ mli lɛ feɔ enɔ ehaa yɛ be mli ni ejeɔ shishi lɛ. Kadimɔ bɔ ni ekɛ shiatsɛ lɛ jeɔ sanegbaa shishi lɛ. Susumɔ bɔ ni bo hu ooofee nakai yɛ be kroko mli lɛ he. Ani egbalaa shiatsɛ lɛ kɛtsɔɔ sanebimɔi titrii anɔ koni etsɔɔ ejwɛŋmɔ yɛ ŋmalɛi komɛi ni sa ahe? Beni nyɛgbe sɛɛsaramɔ lɛ naa lɛ, tii nɔ ni okase lɛ mli okwɛ. Agbɛnɛ bɔɔ mɔdɛŋ, ni okɛ nɛkɛ nibii nɛɛ atsu nii yɛ wɔsɛɛ be mli sɛɛsaramɔi amli.
5 Kɛ nyɛje Biblia lɛ kasemɔ shishi pɛ lɛ, nyɛtoa gbɛjianɔ koni nyɛyi enyɔ lɛ fɛɛ nyɛna mli gbɛfaŋnɔ. Obaanyɛ okane ŋmalɛi titrii komɛi ni oye obua shiatsɛ lɛ koni enu shishi. Kɛ nyɛgbe nikasemɔ lɛ naa lɛ, bi mɔ ni fata oha lɛ koni ekɛ ŋaawoo ni yeɔ buaa aha bo, tamɔ yɛ be mli ni ehe hiaa ni obi saji krokomɛi ni okɛye ebua mɔ ni nyɛkɛ lɛ kaseɔ nii lɛ, bɔ ni ooofee ni otee nikaselɔ lɛ akɔnɔ shi kɛha nikasemɔ ni baanyiɛ sɛɛ lɛ, kɛ bɔ ni ooofee ni ogbala ejwɛŋmɔ kɛba gbɛjianɔtoo loo asafo lɛ nɔ.
Beni Atsake Shikpɔŋkuku Lɛ Mli Lɛ
6 Kɛ ato asafo hee loo afee tsakemɔ yɛ shikpɔŋkuku lɛ mli lɛ, ehe bahiaa ni ekolɛ okɛ shia Biblia mli nikasemɔ ni oje shishi lɛ aha shiɛlɔ kroko. Obaanyɛ oto gbɛjianɔ ni shiɛlɔ ko ni sa ni jɛ asafo kroko mli kɛ bo aya nikasemɔ lɛ nɔ. Yɛ be mli ni otsii fioo ko eho lɛ, nakai shiɛlɔ lɛ baanyɛ aje nikasemɔ lɛ shishi. Kɛ oyoo akɛ nikasemɔ ni okɛaaha mɔ kroko lɛ ji kaselɔ-feemɔ nitsumɔ lɛ fa lɛ ebaatsirɛ bo koni ofee nɔ ni hi fe fɛɛ oha mɔ ni okɛ lɛ kaseɔ nii lɛ.—Fil. 2:4.
7 Yehowa ka he eeha eshiwoo akɛ “mahoso jeŋmaji fɛɛ” lɛ miiba mli ni ekɛ nibii ni jara wa ni asumɔɔ lɛ miiwo eshia lɛ obɔ. (Hag. 2:7) Mɛɛ hegbɛ po ni yɔɔ naakpɛɛ wɔna nɛkɛ akɛ wɔɔye wɔbua mɛi krokomɛi koni amɛbale ni amɛsumɔ Yehowa! Kɛ wɔye wɔbua wɔhe yɛ wekui sɔrɔtoi lɛ amli lɛ, eeenyɛ eba akɛ wɔteŋ mɛi pii baana hegbɛ ni wɔje daa shia Biblia mli nikasemɔ shishi.