Aatao—Biblia Mli Nikasemɔi Babaoo
1 Yehowa Nyɔŋmɔ kɛ shweremɔ ni yaa nɔ miijɔɔ eshikpɔŋ nɔ gbɛjianɔtoo lɛ. Yɛ nyɛsɛɛ sɔɔmɔ afi lɛ mli lɛ, abaptisi mɛi 375,923 yɛ jeŋ fɛɛ—kɛ́ aja mli lɛ kaselɔi heei ni fa fe 1,000 gbi fɛɛ gbi, loo aaafee mɛi 43 yɛ ŋmɛlɛtswaa fɛɛ ŋmɛlɛtswaa mli! Yɛ afii nyɔŋmai abɔ shihilɛ ni mli wa ni ekolɛ wɔnyɛmimɛi lɛ kɛkpe yɛ je lɛŋ hei babaoo lɛ fɛɛ sɛɛ lɛ, Maŋtsɛyeli nitsumɔ lɛ miishwere ni aaná yifalɛi ni yaa hiɛ waa. Kwɛ miishɛɛ sane ni eji akɛ aaakane nɔyaa ni baa yɛ sanekpakpa lɛ gbɛɛ-kɛ-shwamɔ mli lɛ he sane!
2 Yɛ Ghana nitsumɔhe nine lɛ, wɔ hu wɔná daa gbɛgbalɔi kɛ gbɛgbalɔi awalɔi ayifalɛ ni fe fɛɛ yɛ nyɛsɛɛ sɔɔmɔ afi lɛ mli, ni ŋmɛlɛtswai ni fa fe fɛɛ ni aye yɛ shiɛmɔ mli, kɛ woji bibii, kɛ woji tɛtrɛbii ni akɛha lɛ fata he. Mɛi abɔ ni abaptisi lɛ ayifalɛ tee hiɛ, ni aná yifalɛ ni fe fɛɛ yɛ mɛi ni ba Kaimɔ lɛ mli. Ni sɛɛsaramɔ kɛ Biblia mli nikasemɔ nitsumɔ lɛ mli hu? Wɔtee hiɛ yɛ sɛɛsaramɔi fɛɛ ni afee lɛ mli kɛ oha mlijaa 7 hiɛyaa yɛ Biblia mli nikasemɔi amli. Shi amaniɛbɔi tsɔɔ akɛ, shiɛlɔi saŋŋ kɛ amɛhe wooo sɛɛsaramɔi kɛ shia Biblia mli nikasemɔi amli daa. Ni kɛlɛ, shiɛmɔ nitsumɔ lɛ fãi nɛɛ ji nɔ ni kaselɔ feemɔ nitsumɔ lɛ fɛɛ damɔ nɔ. Mɛni wɔteŋ mɔ fɛɛ mɔ baanyɛ afee koni wɔya hiɛ yɛ gbɛfaŋnɔ ni wɔnáa yɛ sɛɛsaramɔi kɛ Biblia mli nikasemɔi amli lɛ mli?
3 Ha Suɔmɔ ni Oyɔɔ akɛ Ooofee Nikasemɔ lɛ Mli Awa: Ehe miihia ni wɔsusu wɔ diɛŋtsɛ wɔhe ni aaawa yɛ mumɔŋ ni wɔfee ekãa lɛ he. Kristo anɔkwa sɛɛnyiɛlɔi lɛ ji mɛi ni “hiɛ dɔɔ yɛ nitsumɔi kpakpai ahe.” (Tito 2:14) Kɛ wɔsaa wɔsusu wɔ shiɛmɔ nitsumɔ lɛ he ekoŋŋ lɛ, ani wɔbaanyɛ wɔkɛɛ akɛ wɔmiishwe waa koni wɔyadi woji fɛɛ ni wɔkɛha yɛ shiɛmɔ nitsumɔ lɛ mli lɛ sɛɛ? Ani wɔyɛ ekãa yɛ shia Biblia mli nikasemɔi ni wɔfɔ̃ɔ mɛi ni jieɔ miishɛɛ kpo amɛtsɔɔ lɛ nine koni wɔkɛ amɛ afee lɛ mli? (Rom. 12:11) Aloo ani ehe miihia ni wɔná suɔmɔ waa diɛŋtsɛ akɛ wɔɔfee sɛɛsaramɔi ni wɔje shia Biblia mli nikasemɔi ashishi?
4 Biblia lɛ ni wɔ diɛŋtsɛ wɔɔkane, kpeeiyaa daa, kɛ woji lɛ akasemɔ baaha wɔya nɔ wɔfee ekãa yɛ mumɔŋ kɛ mɛi ni Nyɔŋmɔ mumɔ lɛ woɔ amɛ hewalɛ. (Efe. 3:16-19) Enɛ baaha wɔhemɔkɛyeli kɛ hekɛnɔfɔɔ ni wɔyɔɔ yɛ Yehowa mli lɛ kɛ suɔmɔ ni wɔyɔɔ kɛha wɔnaanyo gbɔmɔ lɛ mli awa. Ebaatsirɛ wɔ koni wɔtsɔɔ mɔ kroko anɔkwale lɛ, koni yɛ nakai feemɔ mli lɛ wɔha wɔshiɛmɔ nitsumɔ lɛ afee nɔ ni yɔɔ miishɛɛ, nɔ ni yeɔ omanye kɛ nɔ ni kanyaa mɔ. Hɛɛ, esa akɛ wɔtao Biblia mli nikasemɔi babaoo!
5 Okɛ Weku lɛ Akase Nii Klɛŋklɛŋ: Esa akɛ fɔlɔi Kristofoi ni kɛ amɛbii yɔɔ shia lɛ asusu amɛ daa weku Biblia mli nikasemɔ he gbɛjianɔtoo lɛ he waa. (5 Mose 31:12; Lala 148:12, 13; Abɛi 22:6) Eeefee nɔ ni sɛɛnamɔ yɔɔ he waa akɛ fɔlɔi kɛ amɛbii aaakase Taoɔ wolo bibioo lɛ koni sɛɛ mli lɛ amɛkɛ amɛ akase Nilee wolo lɛ koni amɛkɛha amɛhe asa akɛ shiɛlɔi ni abaptisiko amɛ kɛ agbɛnɛ kɛha henɔjɔɔmɔ kɛ baptisimɔ. Shi kɛlɛ, abaanyɛ adamɔ gbekɛ lɛ hiamɔ nii kɛ afii ni eye nɔ koni akɛkase woji krokomɛi afata he. Fɔlɔ ni kɛ gbekɛ ni abaptisiko lɛ kaseɔ nii lɛ baanyɛ abu nikasemɔ lɛ, be, kɛ sɛɛsaramɔi lɛ ahe akɔntaa, taakɛ atsɔɔ yɛ May 1987 Wɔ Maŋtsɛyeli Sɔɔmɔ lɛ mli Sanebimɔ He lɛ.
6 Yaa Hiɛ yɛ Ogbɛjianɔtoo Mli: Kɛ aasusu woji tɛtrɛbii, woji bibii, kɛ woji wuji abɔ ni akɛhaa lɛ he lɛ, ŋwanejee ko kwraa bɛ he akɛ aagbɛ wui babaoo diɛŋtsɛ aashwã. Nɛkɛ anɔkwale he wui ni adu nɛɛ hiɛ hewalɛ waa ni ekɛaaha aná kaselɔi heei. Shi ani okwaafonyo loo abɔɔ nɔkwɛlɔ tsui baanyɔ emli lɛɛlɛŋ, kɛ edu nii aahu, ni yɛ emɔdɛŋbɔi lɛ fɛɛ sɛɛ lɛ, enáaa be kwraa ni ekɛaakpa nii lɛ? Dabi kwraa. Nakai nɔŋŋ hu sɛɛsaramɔ ni afeɔ yɛ shiɛmɔ nitsumɔ mli lɛ he hiaa.
7 Ani otoɔ be omaa shi daa koni ofee sɛɛsaramɔi? Kuu osɛɛ oya mɛi fɛɛ ni jieɔ miishɛɛ kpo lɛ aŋɔɔ mramra. Feemɔ sɛɛsaramɔi kɛ yiŋtoo lɛ akɛ oooje Biblia mli nikasemɔ shishi. Ani oŋmalaa osɛɛsaramɔi lɛ ahe saji jogbaŋŋ, nɔ ni yɔɔ ebe naa, ni otoɔ he gbɛjianɔ jogbaŋŋ? Kwɛmɔ koni oŋma gbi ni otee jɛmɛ klɛŋklɛŋ lɛ, woji fɛɛ ni okɛha, nɔ ni asusu he lɛ he sane kuku, kɛ sane oti ni abaanyɛ agba he sane kɛ́ otee jɛmɛ be kroko lɛ, kɛfata shiatsɛ lɛ gbɛi kɛ adrɛs lɛ he. Shĩ gbɛ yɛ okadimɔ wolo lɛ nɔ kɛha saji krokomɛi ni okɛbaafata he beni ogbe sɛɛsaramɔ fɛɛ sɛɛsaramɔ naa.
8 Pɛimɔ Gbɛ ni Oootsɔ nɔ Ofee Sɛɛsaramɔ lɛ Mli Okwɛ: Mɛni ji saji otii komɛi ni esa akɛ oha ehi ojwɛŋmɔ mli beni ofeɔ sɛɛsaramɔ yɛ mɔ ni yɔɔ wiemɔ lɛ he miishɛɛ lɛ ŋɔɔ lɛ? (1) Jiemɔ miishɛɛ, naanyobɔɔ su, kɛ ekãafeemɔ kpo, ni kaafee kpɛŋŋ. (2) Okɛ lɛ agba saji loo sanebimɔi ni eyɔɔ he miishɛɛ lɛ ahe sane. (3) Ha sanegbaa lɛ afee mlɛo ni oha edamɔ Ŋmalɛ nɔ. (4) Yɛ saramɔ fɛɛ saramɔ mli lɛ, bɔɔ mɔdɛŋ ni otsɔɔ shiatsɛ lɛ nɔ ko ni ebaana akɛ ehe baaba sɛɛnamɔ kɛha lɛ. (5) Ha ekpa be kroko sane ni abaagba yɛ saramɔ ni baanyiɛ sɛɛ lɛ mli lɛ gbɛ. (6) Kaatsɛ tsɔ̃. (7) Kaabi saji ni baawo lɛ hiɛgbele loo nɔ ni baagba enaa. (8) Okɛ sɛɛyoomɔ atsu nii koni okawie oshi shiatsɛ lɛ jwɛŋmɔi ni ejaaa loo esubaŋi fɔji lɛ yɛ be mli ni enáko hiɛsɔɔ kɛhako mumɔŋ nibii.—Kwɛmɔ nɔ ni aŋma ahɔ March 1997 Wɔ Maŋtsɛyeli Sɔɔmɔ lɛ mli lɛ kɛha yelikɛbuamɔ kroko ni tsɔɔ bɔ ni aaafee aye omanye yɛ sɛɛsaramɔi afeemɔ kɛ Biblia mli nikasemɔi ashishijeei mli.
9 Okɛ Hegbɛ Fɛɛ Hegbɛ ni Oooná lɛ Atsu Nii: Yɛ asafo ko mli lɛ, anyɛ aŋmala mɛi fɛɛ ni yɔɔ shia ko ni abuɔ he waa lɛ mli lɛ agbɛi kɛ tsũ he nɔmba. Aŋma wolo aha mɔ fɛɛ mɔ ni yɔɔ shia lɛ mli, ni akɛ dɛhiɛmɔ woji enyɔ wo mli. Yɛ woloŋmaa lɛ naagbee gbɛ lɛ, akɛ ninefɔɔ ha koni afee shia Biblia mli nikasemɔ, ni akɛ tɛlifon nɔmba ni yɔɔ jɛmɛ lɛ fata he bɔni afee ni mɔ ni nine shɛɔ nɔ lɛ anyɛ atswa. Yɛ gbii fioo komɛi asɛɛ lɛ, oblanyo ko tswa ni eebi koni akɛ lɛ akase nii. Afee sɛɛsaramɔ gbi ni nyiɛ sɛɛ lɛ, ni akɛ Nilee wolo lɛ je nikasemɔ shishi. Nakai gbɛkɛ lɛ nɔŋŋ lɛ, etee Asafo Woloŋ Nikasemɔ, ni eyaa kpeei lɛ fɛɛ be fɛɛ be. Oya nɔŋŋ ni ebɔi Biblia lɛ kanemɔ daa ni etee hiɛ waa kɛyashɛ baptisimɔ he.
10 Shiɛlɔi akuu ko to gbɛjianɔ koni amɛfee sɛɛsaramɔi kutuu. Beni nyɛmiyoo ko tee saramɔ lɛ eko lɛ, mɔ ni etaoɔ lɛ lɛ bɛ shia, shi oblayoo kroko ba shinaa lɛ naa, ni ekɛɛ: “Mímɛ bo aahu.” Shiatsɛ lɛ nine eshɛ Nilee wolo lɛ nɔ momo kɛjɛ mɔ ko ni ele lɛ lɛ ŋɔɔ. Beni nyɛmimɛi yei lɛ tee eshia lɛ, no mli lɛ ekane wolo lɛ mli fɛɛ shii enyɔ ni ená saji ni yɔɔ mli lɛ he miishɛɛ waa. Ekɛɛ efeee lɛ naakpɛɛ akɛ Odasefoi lɛ eba eŋɔɔ nakai gbi lɛ ejaakɛ esɔleɔ koni amɛba ni amɛkɛ lɛ abakase Biblia lɛ. Aje nikasemɔ shishi, ni ebɔi asafoŋ kpeei yaa, ni etee hiɛ oyayaayai.
11 Nyɛsɛɛ nɛɛ, nyɛmiyoo ko ni abaptisi lɛ aaafee afii 25 nɛ lɛ kɛ Nilee wolo lɛ eko ha enyɛ. Enyɛ ni ji sɔlemɔ ko mlinyo lɛ je wolo lɛ kanemɔ shishi. Beni egbe yitsei enyɔ naa lɛ, etsɛ́ ebiyoo lɛ, ni nɔ ni fee lɛ naakpɛɛ ji akɛ, ekɛɛ: “Miisumɔ ni matsɔ Yehowa Odasefoi ateŋ mɔ kome!” Enyɛ bɔi nikasemɔ ni amrɔ nɛɛ ábaptisi lɛ.
12 Kaa Gbɛtsɔɔmɔi Nɛɛ Okwɛ: Ani okɛ gbɛ ni yɔɔ tɛ̃ɛ lɛ etsu nii kɛje nikasemɔi ashishi pɛŋ? Obaanyɛ okɛɛ kɛkɛ akɛ: “Kɛ obaasumɔ ni akɛ bo akase Biblia lɛ yɛ shia ni aheee nɔ ko lɛ, manyɛ mikɛ minitii fioo pɛ atsɔɔ bo bɔ ni afeɔ lɛ ahaa. Kɛ oná he miishɛɛ lɛ, obaanyɛ otsa nɔ.” Gbɔmɛi babaoo kpɛlɛɔ ninefɔ̃ɔ ni tamɔ nɛkɛ nɔ mra, ni amɛkwɛɔ bɔ ni afeɔ Biblia mli nikasemɔ lɛ ahaa lɛ amrɔ nɔŋŋ.
13 Yɛ nikasemɔ lɛ shishijee gbɛ lɛ, tsɔɔmɔ nikaselɔ lɛ bɔ ni asaa he kɛtsɔɔ hiɛ ahaa kɛtsɔ ŋmalɛi ni aŋmalako emli wiemɔi ni eeekane lɛ nɔ, ni efolɔ wiemɔi otii ni haa sanebimɔi ni akala lɛ ahetoo lɛ shishi. Okɛ ojwɛŋmɔ ama saji otii lɛ pɛ anɔ. Eyɛ mli akɛ ekolɛ ehe baahia ni wɔfee tswãa yɛ klɛŋklɛŋ nikasemɔ bei fioo lɛ amli moŋ, shi ehe miihia ni afee Biblia mli nikasemɔ lɛ daa. Ha bɔ ni ooofee ni okɛ sɔlemɔ ni ji nikasemɔ lɛ fã ko ni he hiaa lɛ aaatsu nii yɛ sɛɛ mli koni okɛje nikasemɔ shishi lɛ ahi ojwɛŋmɔ mli kɛ bɔ ni ooofee ni okɛ Ŋmalɛi lɛ aaatsu nii koni okɛsaa nikaselɔ lɛ oha shitee-kɛ-woo. Bɔ fɛɛ bɔ ni fee lɛ, ha nikasemɔ lɛ afee nɔ ni yɔɔ miishɛɛ!
14 Shi kɛlɛ, jeee Biblia mli nikaselɔi fɛɛ yaa hiɛ yɛ gbɛ kome nɔ. Amɛteŋ mɛi komɛi susuuu mumɔŋ nibii ahe tamɔ mɛi krokomɛi, ni asaŋ amɛnuuu nibii ni atsɔɔ amɛ lɛ ashishi oya. Mɛi krokomɛi náaa dekã kwraa, ni ekolɛ amɛnyɛɛɛ amɛná be ni he hiaa kɛha yitso muu lɛ fɛɛ kasemɔ otsi fɛɛ otsi. No hewɔ lɛ, yɛ shihilɛi komɛi amli lɛ ekolɛ ehe baahia ni afee nikasemɔ fe shi kome koni akɛgbe yitsei komɛi anaa kɛ nyɔji abɔ komɛi koni akɛgbe wolo muu lɛ fɛɛ naa. Yɛ shihilɛi komɛi amli lɛ, wɔbaanyɛ wɔkase Taoɔ wolo bibioo lɛ klɛŋklɛŋ koni no sɛɛ lɛ wɔya hiɛ kɛya Nilee wolo lɛ mli. Enɛ, ní asafoŋ kpeeiyaa fata he lɛ, baaye abua nikaselɔ fɛɛ nikaselɔ koni ená shishitoo ni ma shi shiŋŋ yɛ anɔkwale lɛ mli.
15 Nɔ ni fe fɛɛ lɛ, sɔlemɔ koni oná Biblia mli nikasemɔ! (1 Yoh. 3:22) Niiashikpamɔi ni sɛɛnamɔ yɔɔ he fe fɛɛ lɛ ateŋ ekome kɛha Kristofonyo ji, ní Yehowa kɛ lɛ aaatsu nii koni eye ebua ni mɔ ko abatsɔ Yesu Kristo kaselɔ. (Bɔf. 20:35; 1 Kor. 3:6-9; 1 Tes. 2:8) Be ni wɔbaajie ekãafeemɔ babaoo kpo wɔtsɔɔ yɛ Biblia mli nikasemɔ mli lɛ nɛ, ni wɔyɛ hekɛnɔfɔɔ kwraa akɛ Yehowa baajɔɔ mɔdɛŋ ni wɔbɔɔ koni wɔje nikasemɔi babaoo ashishi lɛ nɔ babaoo!
[Akrabatsa ni yɔɔ baafa 3]
Ani oosɔle koni oje Biblia mli nikasemɔ hee shishi?