Nyɔŋmɔ “Wiemɔ Lɛ Ni Wɔɔjie Yi Wɔtsɔɔ
1 Mɛi pii buɔ Biblia lɛ ŋmɛnɛ akɛ ebe eho ni sɛɛnamɔ bɛ he. Shi kɛlɛ, Nyɔŋmɔ Wiemɔ lɛ yɛ hewalɛ ni ekɛtsakeɔ gbɔmɛi ashihilɛ. (Heb. 4:12) Enɛ eje kpo faŋŋ yɛ gbɔmɛi sɔrɔtoi pii aniiahesusumɔ, amɛjeŋba, kɛ subaŋi kpakpai ni anaa lɛ mli. (Efes. 4:24) Kɛ akɛ Biblia ŋaawoo tsu nii lɛ, ehaa anaa weku shihilɛ ni miishɛɛ yɔɔ mli. Ehaa toiŋjɔlɛ hiɔ kuuŋbii ateŋ, ni maji anɔ ni amɛjɛ, amɛhewolo nɔ su, aloo bɔ ni amɛji yɛ shihilɛ mli lɛ kɔɔɔ he eko.—Luka 10:29-37.
2 Esa akɛ niiashikpamɔ ni wɔ diɛŋtsɛ wɔna yɛ Nyɔŋmɔ Wiemɔ lɛ he lɛ atsirɛ wɔ ni wɔwo mɛi krokomɛi hewalɛ ni amɛtao sɛɛnamɔ kpakpa ni yɔɔ Biblia lɛ he lɛ mli amɛha amɛ diɛŋtsɛ amɛhe. Aha wɔ nɔ kpakpa ni wɔɔdamɔ nɔ wɔfee enɛ kɛtsɔ Saneyitso Kɛha Sanegbaa hee, ni ji “Mɛni Hewɔ Esa Akɛ Okane Biblia Lɛ?” nɔ. Mɛɛ gbɛ nɔ wɔɔtsɔ wɔkɛ saneyitso nɛɛ kɛ New World Translation lɛ kɛ “Naa! Miifee Nii Fɛɛ Ehee wolo bibioo lɛ atsu nii yɛ wɔsɔɔmɔ lɛ mli yɛ December mli?
Saneyitso Kɛha Sanegbaa Lɛ Kɛ Nitsumɔ
3 Kɛ wɔtsɔɔ mɛi ni wɔji sɛɛ lɛ, wɔbaanyɛ wɔkɛɛ: “Akɛni shihilɛi ni mli wawai kɛ naagbai miisa wekui ahe ŋmɛnɛ hewɔ lɛ, wɔmiisara mɛi koni wɔkɛgbala amɛjwɛŋmɔ kɛya yelikɛbuamɔ jɛɛhe diɛŋtsɛ lɛ nɔ. Tsutsu ko lɛ, gbɔmɛi kwɛɔ Biblia lɛ gbɛ kɛha gbɛtsɔɔmɔ, shi nibii etsake agbɛnɛ, aloo jeee nakai? Ani osusuɔ akɛ Biblia lɛ baanyɛ aye abua ni akɛna ŋmɛnɛ naagbai, tamɔ tsofai ni akɛtsuɔ nii yɛ gbɛ fɔŋ nɔ, gbekɛbii fɔji, kɛ shiai ni fiteɔ lɛ anaa tsabaa? [Ŋmɛɛ lɛ gbɛ ni eha hetoo.] Kwɛmɔ nɔ ni Biblia lɛ kɛɔ yɛ 2 Timoteo 3:16. [Kanemɔ.] Ani osusuɔ akɛ Biblia lɛ baanyɛ ana hewalɛ kpakpa ni he yɔɔ sɛɛnamɔ nɛkɛ yɛ mɛi anɔ? [Ŋmɛɛ lɛ gbɛ ni eha hetoo.] Gbɛtsɔɔmɔ he hiaa mɛi pii ni amɛtaoɔ hu yɛ be mli ni amɛkɛ naagbai kpeɔ loo amɛfeɔ yiŋkpɛi komɛi yɛ amɛshihilɛ mli lɛ, aloo jeee nakai? Susumɔ he ni Nyɔŋmɔ Wiemɔ lɛ sɛɛnyiɛmɔ kɛ wɔ baaya lɛ he okwɛ. [Kanemɔ Yohane 17:3.] Biblia lɛ kɛ gbɛtsɔɔmɔ ni mli ka shi faŋŋ haa koni wɔkɛna wɔnaagbai lɛ anaa ni ekɛ hiɛnɔkamɔ ni ma shi shiŋŋ hu haa kɛha wɔsɛɛ.” Kɛji mɔ lɛ tsɔɔ anɔkwa miishɛɛ yɛ Nyɔŋmɔ Wiemɔ lɛ shishinumɔ he lɛ, no lɛ wɔbaanyɛ wɔfee sɛɛnamɔ ni yɔɔ New World Translation Biblia lɛ aloo “Naa! miifee Nii Fɛɛ Ehee” wolo bibioo lɛ he lɛ he nɔkwɛmɔ nɔ wɔtsɔɔ lɛ.
4 Kɛ okɛ New World Translation Biblia lɛ miiha lɛ, bi shiatsɛ lɛ kɛji eyɛ lɛ diɛŋtsɛ e-Biblia ni enaa akɛ ekanemɔ yɛ mlɛo hu lo. Obaanyɛ odamɔ bɔ ni ebaajie naa eha lɛ nɔ ni ogbala ejwɛŋmɔ kɛya New World Translation Biblia lɛ mli nibii ni he yɔɔ sɛɛnamɔ, kɛ bɔ ni aŋma yɛ ŋmɛnɛŋmɛnɛ wiemɔ ni shishinumɔ waaa mli kɛ Nyɔŋmɔ gbɛi ni ekɛtsuɔ nii lɛ hu nɔ. Ekolɛ ebaaye ebua bo kɛ okɛ otii ni yɔɔ Reasoning wolo lɛ baafai 276-80 lɛ tsu nii. Okɛ mɛi ni naa he miishɛɛ lɛ ato shia Biblia mli nikasemɔ he gbɛjianɔ.
5 Kɛ oogbala jwɛŋmɔ kɛmiiya “Naa! miifee Nii Fɛɛ Ehee” wolo bibioo lɛ nɔ lɛ, obaanyɛ otee shiatsɛ lɛ miishɛɛ shi kɛtsɔ esɛɛ mfoniri ni gbalaa mɔ jwɛŋmɔ lɛ aloo yitso ni ji “Nibii ni Ehiii—Mɛni Hewɔ Nyɔŋmɔ Ŋmɛɔ Amɛ Gbɛ?” ni yɔɔ baafa 15 lɛ nɔ.
6 Yɛ December mli lɛ, ha ohiɛ ahi ohe nɔ yɛ hegbɛi ni onaa ni okɛaawo mɛi ahewalɛ ni amɛkane Biblia lɛ nɔ. Okɛ oyaiyeli adi sɛɛ ni oku osɛɛ oyasara mɛi ni yɔɔ he miishɛɛ lɛ. Ye ebua amɛ ni amɛna anɔkwa hiɛsɔɔ amɛha hewalɛ ni Nyɔŋmɔ Wiemɔ lɛ yɔɔ lɛ. Ni kɛ amɛkɛ emli shishitoo mlai lɛ tsu nii yɛ amɛshihilɛ mli lɛ, amɛbaana naanɔ sɛɛnamɔi amrɔ nɛɛ kɛ agbɛnɛ yɛ wala ni baaba lɛ mli hu.—1 Tim. 4:8.