Okɛto

Ani Okɛ Woji Bibii Nɛɛ Miitsu Nii?

Spirit of the Dead

Afee aha mɛi ni heɔ shihilɛ yɛ gbele sɛɛ lɛ amɛyeɔ kɛ mɛi ni heɔ blematsɛmɛi lɛ amumɔi amɛyeɔ

Bɔ ni wɔɔfee wɔkɛha: “Wɔbaasumɔ ni wɔle ojwɛŋmɔ yɛ nɔ ni Biblia mli ŋmalɛ nɛɛ wieɔ yɛ gbohii lɛ ahe lɛ he. [Kanemɔ Jajelɔ 9:⁠5.] Ani osusuɔ akɛ gbohii lɛ yɛ hewalɛ ni amɛbaanyɛ amɛye amɛbua wɔ, loo amɛye wɔ awui? [Ŋmɛɛ gbɛ ni eha hetoo.] Wolo bibioo nɛɛ kɛ odaseyeli ni kɔneɔ mɔ yiŋ haa akɛ esaaa akɛ adesai sheɔ gbohii lɛ agbeyei.” Okɛ wolo bibioo lɛ aha lɛ.

Obaanyɛ oka enɛ okwɛ: Kɛ́ oku osɛɛ otee shĩatsɛ lɛ ŋɔɔ lɛ, okɛ lɛ akane baafa 2 kɛ 3 lɛ, ni okɛ lɛ asusu sanebimɔi ni yɔɔ jɛmɛ lɛ ahe. No sɛɛ lɛ okɛ ŋmalɛi ni yɔɔ baafa 5 lɛ atsu nii kɛtsɔɔ akɛ gbohii lɛ nyɛɛɛ nɔ ko nɔ ko afee. Halamɔ saneyitsei ni yɔɔ baafa 3 lɛ ateŋ ekome ní okɛ lɛ baasusu he kɛ́ oku osɛɛ.

A Book for All People

Afee aha mɛi ni le woloŋ shi amɛleee Biblia lɛ he nɔ ko tsɔ

Bɔ ni wɔɔfee wɔkɛha: Kanemɔ 2 Timoteo 3:​16, 17. No sɛɛ lɛ kɛɛmɔ akɛ: “Ani okpɛlɛɔ nɔ akɛ Biblia lɛ jɛ Nyɔŋmɔ mumɔ lɛŋ? Aloo osusuɔ akɛ eji wolo kpakpa ko kɛkɛ? [Ŋmɛɛ gbɛ ni eha hetoo.] Mɛi babaoo hiɛ susumɔi srɔtoi yɛ sanebimɔ nɛɛ he, shi wɔna akɛ mɛi fioo ko pɛ epɛi Biblia lɛ mli amɛkwɛ. [Kanemɔ niiashikpamɔ ni yɔɔ saneyitso ni yɔɔ baafa 3 lɛ shishi lɛ.] Wolo bibioo nɛɛ tsɔɔ yiŋtoi kpakpai ahewɔ ni esa akɛ mɛi fɛɛ ni jɛ shihilɛi srɔtoi amli, ni hiɛ hemɔkɛyelii srɔtoi lɛ asusu nɔ ni Biblia lɛ kɛɔ lɛ he.”

Obaanyɛ oka enɛ okwɛ: Kɛ́ shĩatsɛ lɛ ŋɔ wolo bibioo lɛ, kɛɛmɔ akɛ: “Nɔ kome hewɔ ni mɛi pii susuɔ akɛ Biblia lɛ bɛ nɔ kpakpa ko kɛha wɔ lɛ ji akɛ jamɔi eha mɛi ená jwɛŋmɔ ni ejaaa yɛ Biblia lɛ kɛ emli tsɔɔmɔi lɛ ahe. Kɛ́ miku misɛɛ miba lɛ, maha bo enɛ he nɔkwɛmɔnɔ.” Kɛ́ oku osɛɛ otee lɛ, okɛ lɛ asusu saji ni yɔɔ baafa 4-5 lɛ ekomɛi ahe.

You Can Be God’s Friend!

Afee aha mɛi ni woloŋlee faaa loo mɛi ni leee nikanemɔ jogbaŋŋ

Bɔ ni wɔɔfee wɔkɛha: “Kɛ́ okwɛ lɛ, ani wɔbaanyɛ wɔkɛ Nyɔŋmɔ afee naanyo? [Ŋmɛɛ gbɛ ni eha hetoo. No sɛɛ lɛ, kanemɔ Yakobo 2:​23.] Afee wolo bibioo nɛɛ koni eye ebua wɔ ni wɔkɛ Nyɔŋmɔ afee naanyo, taakɛ Abraham fee lɛ.”

Obaanyɛ oka enɛ okwɛ: Kɛ́ kpaako otee mɔ lɛ ŋɔɔ jio, oofee sɛɛkuu-kɛsaramɔ jio lɛ, okɛ lɛ asusu nikasemɔ 1 lɛ fɛɛ loo efã ko he koni okɛtsɔɔ lɛ bɔ ni wɔkɛ mɛi kaseɔ Biblia lɛ wɔhaa.

Does God Really Care About us?

Afee aha mɛi ni naagbai ni yaa nɔ ŋmɛnɛ lɛ haoɔ amɛ ni amɛbiɔ kɛji Nyɔŋmɔ susuɔ wɔhe lɛ

Bɔ ni wɔɔfee wɔkɛha: “Mɛi komɛi shwaa Nyɔŋmɔ akɛ lɛ ehaa amanehulu kɛ jalɛsane ni ayeee ni yaa nɔ yɛ je lɛŋ lɛ fɛɛ baa. Amɛsusumɔ ji akɛ, akɛni Nyɔŋmɔ ji ofe hewɔ lɛ, eji esusuɔ wɔhe lɛɛlɛŋ kulɛ ebaafo wɔmanehului lɛ fɛɛ sɛɛ. Te bo hu osusuɔ tɛŋŋ? [Ŋmɛɛ gbɛ ni eha hetoo.] Lala 72:​12-14 lɛ tsɔɔ akɛ Nyɔŋmɔ susuɔ wɔhe lɛɛlɛŋ. Jeee lɛ ehaa amanehulu kɛ jalɛsane ni ayeee lɛ baa. Ewo shi akɛ etsɛŋ, ebaajie efɔŋfeelɔi lɛ kɛya kwraa. Wolo bibioo nɛɛ, ni ji Ani Nyɔŋmɔ Susuɔ Wɔhe Lɛɛlɛŋ? lɛ tsɔɔ nɔ ni ebaafee, kɛ bɔ ni wɔɔfee wɔná he sɛɛ.” Okɛ lɛ atsa sanegbaa lɛ nɔ kɛ wiemɔi ni yɔɔ baafa 27 kuku 22 lɛ, ni okɛ wolo bibioo lɛ aha lɛ.

Obaanyɛ oka enɛ okwɛ: Kɛ́ shĩatsɛ lɛ ŋɔ wolo bibioo lɛ, kɛɛmɔ lɛ akɛ: “Mɛi babaoo heɔ amɛyeɔ akɛ Nyɔŋmɔ yɛ, shi amɛyiŋ etɛɛɛ amɛ akɛ esusuɔ wɔpiŋmɔi lɛ ahe. Be kroko lɛ, masumɔ ni mikɛ bo asusu Nyɔŋmɔ yiŋtoo kɛha adesai lɛ he.” Okɛ lɛ asusu fã 1, kuku 3, 4; kɛ fã 2, kuku 1, 2 lɛ he.

A Satisfying Life​—How to Attain It

Afee aha mɛi ni jaaa Nyɔŋmɔ

Bɔ ni wɔɔfee wɔkɛha: “Mɛi babaoo miisumɔ ni amɛná miishɛɛ yɛ shihilɛ mli, no hewɔ ni wɔba oŋɔɔ lɛ. Wɔ fɛɛ wɔkɛ naagbai ni baanyɛ aha wɔhao kpeɔ. Kɛ́ ebalɛ nakai lɛ, ekolɛ wɔbaasumɔ ni wɔwekunyo loo naanyo ko ni wɔmuɔ wɔfɔ̃ɔ enɔ lɛ awo wɔ ŋaa, loo wɔyatao ŋaawoo kɛjɛ woji amli loo Intanɛt lɛ nɔ. Nɛgbɛ ona akɛ abaanyɛ aná ŋaawoo kpakpa yɛ? [Ŋmɛɛ gbɛ ni eha hetoo.] Mɛi komɛi anaa kpɛɔ amɛhe kɛ́ amɛna ŋaawoo kpakpa ni yɔɔ Biblia lɛ mli lɛ. Naa enɛ he nɔkwɛmɔnɔ. [Okɛ yitso 2 lɛ atsɔɔ lɛ, ni okane ŋmalɛ ni aŋmala amɛmli wiemɔi lɛ ateŋ ekome.] Afee wolo bibioo nɛɛ koni etsɔɔ wɔ bɔ ni wɔɔfee wɔná miishɛɛ waa yɛ shihilɛ mli.”

Obaanyɛ oka enɛ okwɛ: Kɛ́ shĩatsɛ lɛ ŋɔ wolo bibioo lɛ, kɛɛmɔ akɛ: “Mɛi babaoo enu akɛ nibii pii yɛ Biblia lɛ mli ní kɛ amɛhe kpãaa gbee. Kɛ́ miku misɛɛ miba lɛ, matsɔɔ bo nɔ kome ni tsɔɔ akɛ Biblia lɛ kɛ adebɔɔ nibii ahe nilee kpãa gbee, ni ekolɛ obaanya he waa.” Kɛ́ oku osɛɛ otee lɛ, okɛ lɛ asusu kuku 4 ni yɔɔ baafa 12 lɛ he.

The Origin of Life​—Five Questions Worth Asking

Afee aha Kristofoi ni aatsɔɔ amɛ sutsakemɔ tsɔɔmɔ lɛ yɛ skul, ni abaanyɛ akɛha mɛi ni heɔ sutsakemɔ tsɔɔmɔ lɛ amɛyeɔ, mɛi ni yiŋ etɛɛɛ amɛ akɛ Nyɔŋmɔ yɛ, kɛ mɛi ni kɛɛ Nyɔŋmɔ bɛ lɛ (Esaaa akɛ akɛhaa yɛ shĩa kɛ shĩa.)

Bɔ ni wɔɔfee wɔkɛha mɔ ko ni heɔ sutsakemɔ tsɔɔmɔ lɛ eyeɔ loo mɔ ko ni kɛɛ Nyɔŋmɔ bɛ: “Ŋmɛnɛ lɛ woji ni wieɔ adebɔɔ nibii ahe lɛ kpotoo tsɔɔ sutsakemɔ tsɔɔmɔ. Ani oheɔ oyeɔ akɛ sutsakemɔ tsɔɔmɔ lɛ ji yiŋsusumɔ ko kɛkɛ, aloo osusuɔ akɛ amrɔ nɛɛ ama nɔ mi akɛ eji anɔkwa sane? [Ŋmɛɛ gbɛ ni eha hetoo.] Okɛ mi baakpã gbee akɛ, kɛ́ wɔɔkpɛ yiŋ ni ja yɛ sane ko he lɛ, esa akɛ wɔkwɛ sane lɛ biɛ kɛ biɛ fɛɛ jogbaŋŋ. Wolo bibioo nɛɛ kɛ odaseyelii ni haa mɛi pii kpɛlɛɔ nɔ akɛ abɔ nibii ni wala yɔɔ amɛmli lɛ haa.”

Obaanyɛ oka enɛ okwɛ: Kɛ́ otee skul lɛ, okɛ wolo bibioo lɛ eko afɔ̃ okpɔlɔ lɛ nɔ ni okwɛ akɛ oklasbii lɛ ekomɛi baasumɔ ni amɛle nɔ ko yɛ he lo.

The Pathway to Peace and Happiness

Afee aha Buddhabii

Bɔ ni wɔɔfee wɔkɛha Buddhanyo ko ni hiɛ efã: “Ekolɛ bɔ ni susumɔi fɔji ehe shi waa ŋmɛnɛ kɛ bɔ ni enɛɛmɛi náa wɔbii anɔ hewalɛ lɛ miihao bo tamɔ bɔ ni ehaoɔ mi lɛ. Kɛ́ okwɛ lɛ, mɛni hewɔ oblahii kɛ oblayei babaoo ajeŋba ekpɔtɔ waa nakai? [Ŋmɛɛ gbɛ ni eha hetoo.] Ani ole akɛ wolo ko ni abɔi ŋmaa kwraa dani ato Hindubii, Kristofoi, kɛ Muslimbii ajamɔ shishi lɛ gba enɛ he sane efɔ̃ shi? [Kanemɔ 2 Timoteo 3:1-3.] Kadimɔ akɛ shihilɛi nɛɛ miiya nɔ yɛ hiɛ ni atee yɛ wolokasemɔ mli lɛ fɛɛ sɛɛ. [Kanemɔ kuku 7 lɛ.] Wolo nɛɛ eye ebua mi ni mibanu anɔkwalei ni mɛi babaoo nuuu shishi lɛ ashishi. Ani obaasumɔ ni okane?”

Obaanyɛ oka enɛ okwɛ: Kɛ́ shĩatsɛ lɛ ná Biblia lɛ he miishɛɛ lɛ, no lɛ be kroko kɛ́ oku osɛɛ otee eŋɔɔ lɛ, okɛ sanebimɔi ni yɔɔ wolo lɛ sɛɛgbɛ lɛ atsɔɔ lɛ, ni okɛ Biblia lɛ Tsɔɔ wolo lɛ he coupon lɛ hu atsɔɔ lɛ. Kɛɛmɔ lɛ akɛ kɛji eetao ena Biblia lɛ Tsɔɔ wolo lɛ eko lɛ, ohiɛ eko. Okɛ he ni ato wolo lɛ saneyitsei lɛ anaa yɛ lɛ atsɔɔ lɛ, ni okɛ lɛ asusu yitso ni ebaahala lɛ mli kuku kome loo enyɔ he.

Our Problems​—Who Will Help Us Solve Them?

Afee aha Hindubii

Bɔ ni wɔɔfee wɔkɛha: “Mɛi pii ni wɔkɛgbaa sane lɛ ehao yɛ efɔŋfeemɔ ni yɔɔ je lɛŋ lɛ hewɔ. Ani osusuɔ akɛ Nyɔŋmɔ baajie je lɛŋ naagbai lɛ kɛya be ko? [Ŋmɛɛ gbɛ ni eha hetoo.] Gbalɛ nɛɛ haa wɔ hiɛnɔkamɔ. [Kanemɔ Lala 37:​11.] Nɔ ni mikane nɛɛ jɛ Biblia lɛ mli, ni bei pii lɛ mɛi nuuu Biblia lɛ shishi, ni amɛkɛtsuuu nii jogbaŋŋ. Ekolɛ ohiɛ baafee bo yaa kɛ́ oná ole akɛ Biblia lɛ jeee Blɔfomɛi awolo; Biblia lɛ fiii maji ni yeɔ maji krokomɛi ni he waaa lɛ anɔ dɛŋdɛŋ lɛ sɛɛ, ni ebuuu hewolonɔ su ko akɛ enɔ kwɔ fe ekroko. Shi ehaa wɔ hiɛnɔkamɔ akɛ etsɛŋ, Nyɔŋmɔ baajie wɔnaagbai lɛ fɛɛ. Shishitoo mlai ni baaye abua wɔ ni wɔdamɔ wɔnaagbai anaa amrɔ nɛɛ hu yɛ mli. Wolo bibioo nɛɛ haa wɔleɔ enɛ he saji pii.”

Obaanyɛ oka enɛ okwɛ: Kɛ́ shĩatsɛ lɛ ná Biblia lɛ he miishɛɛ lɛ, no lɛ kɛ́ oku osɛɛ otee eŋɔɔ lɛ, okɛ mfonirii ni yɔɔ Biblia lɛ Tsɔɔ wolo lɛ baafa 4-5 lɛ atsɔɔ lɛ. Kanemɔ ŋmalɛi ni aŋmala amɛmli wiemɔi lɛ ateŋ ekome loo nɔ̃, ní okɛ wolo lɛ aha lɛ.

Will There Ever Be a World Without War?

Afee aha Yudafoi

Bɔ ni wɔɔfee wɔkɛha: “Yɛ yinɔsane mli fɛɛ lɛ, tai eha adesai ena nɔ waa. Mɛni hewɔ osusuɔ akɛ mɛi kã he amɛwuɔ ta eyɛ mli akɛ mɛi kɛɔ akɛ amɛsumɔɔ toiŋjɔlɛ? [Ŋmɛɛ gbɛ ni eha hetoo.] Yesaia gbalɛ nɛɛ haa wɔnáa hiɛnɔkamɔ. [Kanemɔ Yesaia 2:4.] Kɛlɛ, enɛ teɔ sanebimɔi srɔtoi ashi: Mɛɛ be Yesaia gbalɛ lɛ baaba mli, ni yɛ mɛɛ gbɛ nɔ? Mɛni hewɔ wɔbaanyɛ wɔmu wɔfɔ̃ hiɛnɔkamɔ ni Ŋmalɛ lɛ kɛhaa lɛ nɔ lɛ? Wolo bibioo nɛɛ haa saji nɛɛ ahetoo.”

Obaanyɛ oka enɛ okwɛ: Kɛ́ shĩatsɛ lɛ ŋɔ wolo bibioo lɛ, ha egbele baafa 16-17 lɛ ni okɛɛ akɛ: “Mɛi babaoo susuɔ yiwalɛ nifeemɔi, tamɔ Yudafoi babaoo ni Nazibii kpata amɛhiɛ lɛ he ni amɛbiɔ akɛ, ‘Kɛ́ Nyɔŋmɔ yɛ lɛ, mɛni hewɔ eŋmɛɔ piŋmɔ gbɛ?’ Wɔbaanyɛ wɔsusu enɛ he be kroko kɛ́ miba.”

The Guidance of God​—Our Way to Paradise

Afee aha Muslimbii ni yɔɔ hei ni amɛbaanyɛ amɛkase Biblia lɛ ni agbaaa amɛnaa

Bɔ ni wɔɔfee wɔkɛha: “Minu akɛ Muslimbii heɔ anɔkwa Nyɔŋmɔ kome pɛ amɛyeɔ ni amɛheɔ gbalɔi lɛ fɛɛ amɛyeɔ. Ani eji anɔkwale? [Ŋmɛɛ gbɛ ni eha hetoo.] Masumɔ ni mikɛ bo asusu blema gbalɛ ko ni tsɔɔ akɛ abaafee shikpɔŋ lɛ paradeiso lɛ he. Ofainɛ, manyɛ makane nɔ ni gbalɔ lɛ ŋma lɛ matsɔɔ bo? [Kanemɔ Yesaia 11:6-9.] Mɛi babaoo ahiɛ feɔ amɛ yaa yɛ bɔ ni Nyɔŋmɔ baafee ekɛ tsakemɔi nɛɛ aba shikpɔŋ lɛ nɔ lɛ he. Wolo bibioo nɛɛ tsɔɔ nɔ ni gbalɔi lɛ kɛɔ yɛ sane nɛɛ he.”

Obaanyɛ oka enɛ okwɛ: Kɛ́ shĩatsɛ lɛ ŋɔ wolo bibioo lɛ, kɛɛmɔ akɛ: “Nyɔŋmɔ wolo nɛɛ tsɔɔ akɛ shishijee mli lɛ, gbɔmɔ hi paradeiso. Be kroko ni wɔbaagba sane ekoŋŋ lɛ, masumɔ ni maha sane nɛɛ hetoo, ‘Te fee tɛŋŋ ni gbɔmɔ gbo Nyɔŋmɔ nɔ toi ni paradeiso lɛ bɔ lɛ?’” Kɛ́ oku osɛɛ otee eŋɔɔ lɛ, okɛ lɛ asusu saneyitso ni jeɔ shishi yɛ baafa 6 lɛ klɛŋklɛŋ kukuji lɛ ahe.

Real Faith​—Your Key to a Happy Life

Afee aha Muslimbii ni yɔɔ hei ni amɛbaanyɛ amɛkase Biblia lɛ ni agbaaa amɛnaa

How to offer it: Bɔ ni wɔɔfee wɔkɛha: Okɛ mfoniri ni yɔɔ baafa 16-17 lɛ atsɔɔ lɛ ni okɛɛ akɛ: “Shihilɛ nɛɛ yɛ srɔto kwraa yɛ nɔ ni wɔnaa yɛ je lɛŋ ŋmɛnɛ lɛ he. Ani oheɔ oyeɔ akɛ be ko baaba ni je lɛŋ shihilɛ baafee tamɔ nɛkɛ? [Ŋmɛɛ gbɛ ni eha hetoo.] Kadimɔ shi ni Nyɔŋmɔ wolo nɛɛ ewo lɛ. [Kanemɔ ŋmalɛi ni aŋmala amɛmli wiemɔi lɛ ekome kɛjɛ o-Biblia lɛ mli.] Wolo bibioo nɛɛ yeɔ ebuaa wɔ koni wɔhe wɔye diɛŋtsɛ akɛ shiwoi ni tamɔ nɛkɛ lɛ baaba mli lɛɛlɛŋ.”

Obaanyɛ oka enɛ okwɛ: Kɛ́ okɛ shĩatsɛ lɛ gba sane klɛŋklɛŋ kwraa ogbe naa lɛ, ha ehala sanebimɔi ni yɔɔ wolo lɛ sɛɛgbɛ lɛ ateŋ ekome. No sɛɛ lɛ, too gbɛjianɔ ni oku osɛɛ okɛ lɛ ayasusu hetoo lɛ he kɛjɛ wolo bibioo lɛ mli.

Lasting Peace and Happiness​—How to Find Them

Afee aha Chinabii

Bɔ ni wɔɔfee wɔkɛha: “Ŋmɛnɛ lɛ, wɔkɛ naagbai babaoo kpeɔ yɛ shihilɛ mli ni haaa wɔná miishɛɛ. Mɛni yeɔ ebuaa bo koni oná miishɛɛ yɛ naagbai ni okɛkpeɔ lɛ fɛɛ sɛɛ? [Ŋmɛɛ gbɛ ni eha hetoo.] Mɛi babaoo náa miishɛɛ yɛ Biblia mli ŋaawoo ni amɛkɛtsuɔ nii lɛ hewɔ. [Kanemɔ Lala 119:1, 2.] Mɛi komɛi susuɔ akɛ Biblia lɛ ji Amerikabii loo Yuropabii awolo, no hewɔ lɛ amɛkɛtsuuu nii. Shi kadimɔ enɛ. [Okɛ lɛ asusu baafa 17 kuku 16 lɛ he.] Wolo bibioo nɛɛ tsɔɔ bɔ ni wɔɔfee wɔná toiŋjɔlɛ kɛ miishɛɛ ni sɛɛ efooo.”

Obaanyɛ oka enɛ okwɛ: Kɛ́ shĩatsɛ lɛ ŋɔ wolo bibioo lɛ, okɛ lɛ akane baafa 17, kuku 18 lɛ klɛŋklɛŋ sane muji etɛ lɛ ni okɛɛ akɛ: “Kɛ́ miku misɛɛ miba lɛ, masumɔ ni matsɔɔ bo nibii ni Biblia lɛ tsɔɔ akɛ wɔbaanyɛ wɔkpa amɛ gbɛ wɔsɛɛ.” Kɛ́ oku osɛɛ lɛ, okɛ lɛ asusu otii ni yɔɔ baafa 30, kuku 6 lɛ mli lɛ ateŋ ekome he.