Wɔkɛ Wolo Bibioo Hee lɛ Baaha!
1. Mɛɛ wolo wɔkɛbaaha yɛ November mli, ni mɛni hewɔ afee wolo nɛɛ?
1 Beni wɔtee “Nyɛyaa Nɔ Nyɛsaraa!” Kpokpaa Wulu nɔ Kpee lɛ yɛ afi 2009 mli lɛ, ajie wolo bibioo ni ji The Bible—What Is Its Message? lɛ kpo. Yɛ November mli lɛ, asafoi ni yɔɔ je lɛŋ fɛɛ lɛ kɛ wolo nɛɛ baaha klɛŋklɛŋ kwraa. Mɛɛ gbɛ nɔ mɛi ni yɔɔ wɔshikpɔŋkuku lɛ mli lɛ baaná wolo nɛɛ he sɛɛ? Mɛi pii, titri lɛ, mɛi ni yɔɔ jamɔi ni jeee Kristofoi ajamɔ mli lɛ, leee nɔ ko tsɔ yɛ Biblia lɛ he. No hewɔ lɛ, wolo bibioo lɛ tsɔɔ mli yɛ baafa 3 lɛ akɛ, afee koni eha mɛi “ale Biblia lɛ he sane.”
2. Te wɔɔfee tɛŋŋ wɔkɛ wolo bibioo lɛ aha lɛ?
2 Bɔ ni Wɔɔfee Wɔkɛha: Wɔbaanyɛ wɔkɛɛ nɔ ko tamɔ nɛkɛ: “Wɔbaasumɔ ni wɔle ojwɛŋmɔ yɛ nɔ ni ŋmalɛ nɛɛ kɛɔ lɛ he. [Kanemɔ 2 Timoteo 3:16.] Mɛi ni wɔkɛgbaa sane lɛ ateŋ mɛi pii kpɛlɛɔ wiemɔi nɛɛ anɔ; mɛi komɛi hu susuɔ akɛ Biblia lɛ ji wolo kpakpa ko kɛkɛ. Te bo hu osusuɔ tɛŋŋ yɛ Biblia lɛ he? [Ŋmɛɛ lɛ gbɛ ni eha hetoo.] Ekɔɔɔ he eko jamɔ mli ni wɔyɔɔ lɛ, ehi jogbaŋŋ akɛ wɔ diɛŋtsɛ wɔɔpɛi Biblia lɛ mli wɔkwɛ. [Kanemɔ hiɛkpamɔ wiemɔ ni yɔɔ wolo lɛ baafa 3 lɛ yiteŋgbɛ lɛ.] Beni okaneɔ Biblia mli amaniɛbɔi ni yɔɔ miishɛɛ ni afo lɛ kuku yɛ wolo nɛɛ mli lɛ, obaana nɔ ko ni yɔɔ miishɛɛ waa: Biblia muu lɛ fɛɛ hiɛ saneyitso kome kɛ shɛɛ sane kome.”
3. Mɛɛ shiɛmɔ wiemɔ kroko wɔbaanyɛ wɔkɛtsu nii, titri lɛ yɛ shikpɔŋkukuji ni mɛi babaoo bɛ Kristofoi ajamɔ ko mli lɛ mli?
3 Gbɛ kroko ni wɔbaanyɛ wɔtsɔ nɔ wɔkɛ wolo lɛ aha mɛi, titri lɛ, kɛ́ wɔmiishiɛ yɛ hei ni mɛi babaoo bɛ Kristofoi ajamɔ ko mli lɛ nɛ: “Wɔbaasumɔ ni wɔle ojwɛŋmɔ yɛ nɔ ni Ŋmalɛ lɛ (loo wolo krɔŋkrɔŋ nɛɛ) kɛɔ yɛ biɛ lɛ he. [Kanemɔ Lala 37:11.] Te osusuɔ akɛ shikpɔŋ lɛ baafee tɛŋŋ kɛ gbalɛ nɛɛ ba mli lɛ? [Ŋmɛɛ lɛ gbɛ ni eha hetoo.] Enɛ ji hiɛnɔkamɔ kɛ miishɛjemɔ ni mɛi fɛɛ ni jɛ shihilɛi kɛ jamɔi srɔtoi amli lɛ anine baanyɛ ashɛ nɔ yɛ Biblia lɛ mli lɛ he nɔkwɛmɔnɔ.” Kanemɔ wiemɔi ni yɔɔ wolo lɛ baafa 3 lɛ yiteŋgbɛ lɛ, ni okɛ wolo bibioo lɛ aha lɛ.
4. Te wɔɔfee tɛŋŋ wɔkɛ wolo bibioo lɛ aje Biblia mli nikasemɔ shishi?
4 Jee Biblia Mli Nikasemɔ Shishi: Kɛ́ wɔku wɔsɛɛ kɛtee shĩatsɛ lɛ ŋɔɔ lɛ, wɔbaanyɛ wɔkai lɛ sane ni wɔkɛ lɛ gba lɛ, ni wɔkɛ lɛ asusu kuku kome loo enyɔ ni kɔɔ sane ni wɔkɛ lɛ susu he lɛ he kɛjɛ wolo bibioo lɛ mli, ni wɔbaanyɛ wɔkɛ sanebimɔi ni yɔɔ wolo bibioo lɛ fã ni wɔkɛ lɛ susuɔ he lɛ naagbee gbɛ lɛ atsu enɛ he nii. Aloo kɛ́ wɔmiisumɔ ni wɔkɛ lɛ aje Biblia lɛ Tsɔɔ wolo lɛ shishi amrɔ nɔŋŋ lɛ, wɔbaanyɛ wɔkɛ lɛ akane sane ni yɔɔ wolo bibioo lɛ sɛɛ gbɛ lɛ, ni wɔha lɛ Biblia lɛ Tsɔɔ wolo lɛ eko, ni wɔbi lɛ ni etsɔɔ saneyitsei lɛ ateŋ nɔ ni enyaa he, ni wɔkɛ lɛ asusu kuku kome loo enyɔ he yɛ nakai yitso lɛ mli. Eba akɛ wɔ fɛɛ wɔkɛ wɔhe baawo wolo bibioo nɛɛ kɛhamɔ mli kɛmɔ shi yɛ November mli!