Kasemɔ Yehowa Kɛtsɔ Mɛi Krokomɛi ni Okɛ Anɔkwayeli Aaakwɛ Amɛnɔ lɛ Nɔ
1 Yehowa ji mɔ ni kɛ anɔkwayeli kwɛɔ mɛi krokomɛi anɔ lɛ he nɔkwɛmɔ nɔ ni fe fɛɛ. Ákɛ Jeŋ Muu Fɛɛ Maŋtsɛ lɛ, ele adesai ni ebɔ amɛ lɛ ahiamɔ nii jogbaŋŋ. (1 Pet. 5:7) Yesu wo esɛɛnyiɛlɔi ahewalɛ koni amɛjie e-Tsɛ lɛ ni haa hulu tsoɔ ehaa jalɔi kɛ mɛi ni ejaaa ni ehaa nugbɔ nɛɔ ehaa amɛ lɛ sui akpo amɛtsɔɔ. (Mat. 5:45) Obaanyɛ okase Yehowa kɛtsɔ mɛi krokomɛi ahesusumɔ yɛ anɔkwayeli mli lɛ nɔ—ni ofee klalo ni ogba mɔ fɛɛ mɔ ni okɛkpeɔ lɛ Maŋtsɛyeli lɛ he shɛɛ sane. Kɛ ole woji bibii ni akɛbaatsu nii yɛ July mli, yɛ shiɛmɔ nitsumɔ lɛ mli lɛ mli saji jogbaŋŋ kɛmɔ shi lɛ, obaanyɛ ona hegbɛ kpakpa ni oye obua mɛi krokomɛi yɛ mumɔŋ. Ŋaawoi ni nyiɛ sɛɛ nɛɛ kɛ saji komɛi ni abaasusu he, ni tsɔɔ bɔ ni ooofee osaa ohe, ni oje mɛi asaramɔ shishi, ni no sɛɛ lɛ ofee sɛɛsaramɔ ni afee yɛ ebe naa pɛpɛɛpɛ ni okɛdi miishɛɛ lɛ sɛɛ lɛ haa.
2 Kɛ okɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ miitsu nii lɛ, obaanyɛ okɛɛ akɛ:
◼ “Ani osusu nɔ hewɔ ni Nyɔŋmɔ ŋmɛɔ adesai agbɛ koni amɛna amanehulu kɛji esumɔɔ amɛ lɛlɛŋ lɛ he pɛŋ? [Ŋmɛɛ gbɛ ni ewie.] Jeee akɛ wolo bibioo nɛɛ kɛ sanebimɔ nɛɛ hetoo ni haa mɔ tsui nyɔɔ emli haa kɛkɛ, shi etsɔɔ hu akɛ, Nyɔŋmɔ ewo shi akɛ ebaajie haomɔ fɛɛ ni gbɔmɔ kɛba lɛ diɛŋtsɛ enɔ kɛ eshikpɔŋ nɔ shia lɛ nɔ lɛ kɛya.” Kanemɔ baafa 27 lɛ kuku 23 lɛ. Okɛ mfoniri ni yɔɔ shishigbɛ lɛ atsɔɔ lɛ, ni okane Lala 145:16 lɛ yɛ kuku 22 lɛ. Okɛ wolo bibioo lɛ aha. Kɛ ana he miishɛɛ lɛ, shi sanebimɔ ko oha ni abaanyɛ aha hetoo be kroko kɛ oba saramɔ lɛ, tamɔ: “Ani obaasumɔ ni ole bɔ ni Nyɔŋmɔ baafee ni etsu eyiŋtoo akɛ ebaajɔɔ adesai ni eha shikpɔŋ lɛ atsɔ paradeiso lɛ he sane?”
3 Kɛ ooku osɛɛ kɛya mɛi ni oha amɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ aŋɔɔ lɛ, obaanyɛ oje sanegbaa kroko shishi yɛ nɛkɛ gbɛ nɔ:
◼ “Beni miba nyɛsɛɛ ko lɛ, sane ni wɔsusu he ji akɛ Nyɔŋmɔ buɔ wɔhe lɛlɛŋ ni akɛ eyiŋtoo ji ni ejie haomɔ fɛɛ ni gbɔmɔ kɛba lɛ diɛŋtsɛ enɔ kɛ eshikpɔŋ nɔ shia lɛ nɔ lɛ kɛya.” Gbelemɔ wolo bibioo lɛ kɛya mfoniri ni yɔɔ baafai 2-3 lɛ nɔ ni okɛɛ akɛ: “Sanebimɔ ni wɔkɛgbe wɔ sanegbaa lɛ naa ji, Te Nyɔŋmɔ baafee tɛŋŋ atsu eyiŋtoo akɛ ebaajɔɔ adesai, ni etsake shikpɔŋ lɛ efee lɛ paradeiso lɛ he nii? Te osusuɔ tɛŋŋ?” Ŋmɛɛ gbɛ ni ewie. Gbelemɔ baafa 17, ni okane kuku 2 kɛ Daniel 2:44. No sɛɛ lɛ, kanemɔ baafa 18 kuku 12 lɛ. Bi shiatsɛ lɛ kɛji ebaasumɔ ni ekɛ bo asusu wolo bibioo lɛ fa 9 lɛ he. Kɛ ebaasumɔ lɛ nakai lɛ, okɛ lɛ akase.
4 Naa gbɛ ni abaanyɛ atsɔ nɔ akɛ “Beni Mɔ Ko ni Osumɔɔ Lɛ Egbo” wolo bibioo lɛ atsu nii. Okɛ esɛɛgbɛ lɛ atsɔɔ lɛ ni okɛɛ:
◼ “Ŋmɛnɛ wɔkɛ wolo bibioo nɛɛ ni kɛ miishɛjemɔ kɛ hiɛnɔkamɔ ebaha mɛi akpekpei abɔ ni elaaje amɛsuɔlɔi yɛ gbele mli lɛ miiha mɛi. Ani osusu hiɛnɔkamɔ ni yɔɔ kɛha gbohii lɛ he pɛŋ? [Ŋmɛɛ gbɛ ni ewie.] Biblia lɛ gbaa gbohiiashitee ni Nyɔŋmɔ ewo shi yɛ he lɛ he sane yɛ faŋŋ mli.” Kanemɔ Yohane 5:28, 29. Gbelemɔ wolo bibioo lɛ ni owie otii ni atsɔɔ mli yɛ baafa 28 lɛ naagbee kuku lɛ kɛ baafa 31 lɛ klɛŋklɛŋ kuku lɛ he. Okɛ mfonirii ni fata he lɛ atsɔɔ. Okɛ wolo bibioo lɛ aha. Obaanyɛ osaa gbɛ kɛha sɛɛsaramɔ kɛtsɔ sane nɛɛ bimɔ nɔ akɛ, “Te wɔɔfee tɛŋŋ wɔna nɔmimaa akɛ yɛ naagbee lɛ abaajie gbele kɛya kwraa lɛ?”
5 Ekolɛ obaasumɔ ni okɛ shiɛmɔ wiemɔ nɛɛ atsu nii yɛ sɛɛsaramɔ lɛ mli yɛ he ni okɛ “Beni Mɔ Ko ni Osumɔɔ Lɛ Egbo” wolo bibioo lɛ ha yɛ lɛ:
◼ “Beni wɔgba sane kɛtsɔ hiɛ lɛ, wɔsusu gbohiiashitee he hiɛnɔkamɔ ni yɔɔ naakpɛɛ lɛ he. Wolo bibioo ni mishi miha bo lɛ tsɔɔ nɔ hewɔ ni wɔbaanyɛ wɔna nɔmimaa akɛ yɛ naagbee lɛ abaajie gbele kɛya kwraa lɛ mli. Ani onaaa akɛ Nyɔŋmɔ shiwoi lɛ shɛjeɔ mɔ mii ni ehaa mɔ náa nɔmimaa?” Ŋmɛɛ gbɛ ni ewie. No sɛɛ lɛ gbelemɔ wolo bibioo lɛ baafa 31, ni okane kukuji enyɔ kɛ etɛ lɛ, kɛ Kpojiemɔ 21:1-4 lɛ hu. Maa hiɛnɔkamɔ ni wɔyɔɔ akɛ wɔɔna wala mli ŋɔɔmɔ ni agboŋ dɔŋŋ lɛ nɔ mi. Kɛ ona bɔ ni ajie miishɛɛ kpo atsɔɔ kɛ bɔ ni shihilɛi lɛ ji yɛ nakai be lɛ mli lɛ, obaanyɛ okɛɛ lɛ akɛ okɛ Nilee wolo lɛ baatsu nii ni okɛfee Biblia mli nikasemɔ, loo obi sane kroko ni baaha ona hegbɛ kɛha sɛɛsaramɔ be kroko.
6 Obaanyɛ okɛɛ nɔ ni nyiɛ sɛɛ nɛɛ beni okɛ “Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu?” miiha lɛ:
◼ “Mɛi babaoo esusu nɔ ni yiŋtoo ni yɔɔ shihilɛ sɛɛ lɛ ji lɛ he. Amɛbi amɛhe saji akɛ: ‘Mɛni hewɔ miyɔɔ biɛ? Nɛgbɛ miyaa? Mɛni ji nɔ ni baafee miwɔsɛɛ shihilɛ?’ Nɛgbɛ osusuɔ akɛ wɔbaanyɛ wɔna hetooi nɛɛ yɛ? [Ŋmɛɛ gbɛ ni ewie.] Kadimɔ nɔ ni Biblia lɛ kɛɔ. [Kanemɔ Lala 36:9.] Ani nilee bɛ mli akɛ aaamu sane naa akɛ adesa Bɔlɔ lɛ ji mɔ ni sa fe fɛɛ ni baanyɛ atsɔɔ nɔ hewɔ ni wɔyɔɔ biɛ? [Ŋmɛɛ gbɛ ni ewie.] Nɛkɛ wolo bibioo nɛɛ tsɔɔ yiŋtoo ni yɔɔ nyam ni Nyɔŋmɔ eto kɛha wɔ.” Gbelemɔ baafai 20-1, kanemɔ mfoniri lɛ he niŋmaa lɛ, ni owie mfoniri lɛ he; no sɛɛ lɛ okɛ wolo bibioo lɛ aha. Bi akɛ: “Te wɔɔfee tɛŋŋ wɔna nɔmimaa akɛ eji Nyɔŋmɔ yiŋtoo lolo akɛ adesai baahi shi kɛya naanɔ yɛ Paradeiso yɛ shikpɔŋ nɔ lɛ?” Too be oma shi ni oku osɛɛ oba.
7 Kɛ akɛ “Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu?” wolo bibioo lɛ ha lɛ, obaanyɛ okɛɛ nɔ ko nɛkɛ kɛ oku osɛɛ otee:
◼ “Beni miba nyɛsɛɛ ko lɛ, miná sane ni mikɛ bo gba ni kɔɔ jwɛŋmɔ ni Biblia lɛ yɔɔ lɛ he lɛ ni tsɔɔ akɛ yiŋtoo yɛ adesai ashihilɛ mli lɛlɛŋ lɛ mli ŋɔɔmɔ waa diɛŋtsɛ.” Okɛ mfoniri ni yɔɔ baafa 31 lɛ atsɔɔ ni obi akɛ, “Te wɔbaafee tɛŋŋ wɔna nɔmimaa akɛ, eji Nyɔŋmɔ suɔmɔnaa nii lolo akɛ, esa ni adesai ahi shi kɛya naanɔ yɛ Paradeiso yɛ shikpɔŋ nɔ?” Kanemɔ baafa 20 lɛ kuku 3. Nyɛsusua otii ni yɔɔ saneyitso bibioo, “Eji Nyɔŋmɔ Yiŋtoo Lolo” shishi lɛ ni yɔɔ baafa 21 lɛ he. Okɛ wolo bibioo lɛ sɛɛgbɛ lɛ atsɔɔ, ni okane shia Biblia mli nikasemɔ ni afeɔ ni aheee nɔ ko lɛ he sane otsɔɔ. Jiemɔ Nilee wolo lɛ yi otsɔɔ, ni ofee bɔ ni wɔkɛtsuɔ nii akɛ nɔ ni yeɔ ebuaa kɛhaa Biblia lɛ kasemɔ lɛ he nɔkwɛmɔ nɔ otsɔɔ.
8 Esa akɛ wɔ shiɛmɔ nitsumɔ lɛ ajie anɔkwa miishɛɛ ni wɔyɔɔ yɛ anɔkwafoi lɛ ayelikɛbuamɔ mli koni “amɛshɛ anɔkwale lɛ lee mli” lɛ kpo. (1 Tim. 2:4) No hewɔ lɛ, too be oma shi yɛ oshiɛmɔyaa he gbɛjianɔ ni oto lɛ mli, koni osaa oya mɔ fɛɛ mɔ ni oha lɛ wolo bibioo lɛ ŋɔɔ ekoŋŋ. Mɔ hesusumɔ diɛŋtsɛ ni ojieɔ lɛ kpo otsɔɔ amɛ lɛ baanyɛ aye abua mɛi ni dɔmɔɔ ŋtsɔi ni amɛyeɔ ŋkɔmɔ yɛ nihii nii ni afeɔ yɛ apasa jamɔ mli lɛ, koni akadi amɛ kɛha yibaamɔ. (Ezek. 9:4, 6) Bo hu obaana miishɛɛ kɛ tsui ni nyɔɔ mɔ mli ni jɛɔ le ni oleɔ akɛ ookase Yehowa kɛtsɔ mɛi krokomɛi ni okɛ anɔkwayeli kwɛɔ amɛnɔ lɛ nɔ lɛ mli baa lɛ.—Okɛto Filipibii 2:20 he.