Okɛ Woji Bibii Sɔrɔtoi Atsu Nii yɛ Osɔɔmɔ Nitsumɔ lɛ Mli
1 Ŋmɛnɛ, gbɔmɛi yɛ saji sɔrɔtoi babaoo ahe miishɛɛ. Beni okɛ ohe woɔ shiɛmɔ nitsumɔ lɛ mli yɛ July mli lɛ, obaanyɛ ohiɛ woji bibii lɛ sɔrɔtoi babaoo, ni okɛ emli nɔ ni gbɔmɛi baana he miishɛɛ yɛ shikpɔŋkuku lɛ mli lɛ atsu nii. Ekolɛ obaasumɔ ni oka shiɛmɔ wiemɔi nɛɛ ekome okwɛ:
2 Kɛ okɛ “Nɔyeli ni kɛ Paradeiso Baaba” wolo bibioo lɛ miiha lɛ, obaanyɛ obi akɛ:
◼ “Kɛji Nyɔŋmɔ pɛ ji nɔyelɔ lɛ, te osusuɔ akɛ kulɛ je lɛ baafee aha tɛŋŋ? [Ŋmɛɛ gbɛ ni ejie naa.] Nyɔŋmɔ ni baaŋɔ shikpɔŋ nɛɛ nɔyeli lɛ ji nɔ tuuŋtu ni wɔbiɔ lɛ, kɛji wɔmiisɔle Nuntsɔ lɛ Sɔlemɔ, loo Wɔ-Tsɛ ni Yɔɔ Ŋwɛi, ni Yesu Kristo tsɔɔ wɔ lɛ. [Gbelemɔ baafa 3, ni okane klɛŋklɛŋ kuku, he ni atsɛ Mateo 6:10 yisɛɛ yɛ lɛ.] Kɛji obaasumɔ ni ohi jeŋ ni tamɔ nɛkɛ mli lɛ, no lɛ esa akɛ okane wolo bibioo nɛɛ.” Okɛ wolo lɛ aha lɛ.
3 Abaanyɛ akɛ “Beni Mɔ Ko ni Osumɔɔ lɛ Egbo” lɛ aha yɛ nɛkɛ gbɛ nɔ:
◼ “Ani osusuɔ akɛ gbi ko baaba ni wɔteŋ mɔ ko elaajeŋ esuɔlɔ ko yɛ gbele mli dɔŋŋ? [Ŋmɛɛ gbɛ ni ejie naa.] Nɛkɛ wolo bibioo ni aje gbɛ aŋma lɛ jogbaŋŋ nɛɛ kɛ Biblia shiwoo akɛ gbi ni tamɔ nɛkɛ miiba yɛ wɔsɛɛ be ni ebɛŋkɛ kpaakpa nɛɛ mli lɛ eshɛje mɛi akpekpei abɔ mii. [Gbelemɔ baafa 5, ni okane kuku ni ji ejwɛ, ni 1 Korintobii 15:21, 22 fata he lɛ. No sɛɛ lɛ gbelemɔ mfoniri ni yɔɔ baafa 30 lɛ.] Bɔ ni nitɛŋlɔ ko efee miishɛɛ ni wɔbaana beni wɔhereɔ wɔsuɔlɔi ni egboi lɛ atuu kɛbaa wala mli ekoŋŋ yɛ gbohiiashitee lɛ mli lɛ he mfoniri eha nɛ. Shi nɛgbɛ nakai miishɛɛ nifeemɔ lɛ baaba yɛ? Wolo bibioo nɛɛ baatsɔɔ bo Biblia lɛ hetoo kɛha nakai sanebimɔ lɛ.” Kɛ ehe wolo bibioo lɛ, obaanyɛ okɛfata he akɛ: “Masumɔ ni maba ekoŋŋ be kroko ni wɔsusu sane nɛɛ he kɛya hiɛ.”
4 Obaanyɛ okɛ “Naa! Miifee Nii Fɛɛ Ehee” wolo bibioo lɛ atsu nii, ni otsɔ gbɛ ni yɔɔ tɛɛ nɔ oje Biblia mli nikasemɔ shishi:
◼ “Mɛi pii yɛ sanebimɔi yɛ Biblia lɛ he. Ekolɛ osusu sanebimɔi nɛɛ ekome hetoo he dã. [Gbelemɔ baafa 30.] Nɛkɛ naagbee sanebimɔ nɛɛ etee mɛi pii amiishɛɛ shi: ‘Te ooofee tɛŋŋ osaa ohe kɛha naanɔ wala yɛ Paradeiso?’” Kɛ nyɛsusu kukuji 57-8 ni yɔɔ baafai 29-30 lɛ he, ni okane Kpojiemɔ 21:3, 4 lɛ, okɛbaafee shishitoo nɔ kɛha Biblia mli nikasemɔ shishijee. Shi wolo bibioo lɛ oha lɛ ni oto gbɛjianɔ kɛha sɛɛsaramɔ, be mli ni obaanyɛ okɛ lɛ asusu sanebimɔi krokomɛi lɛ ahe, ni okɛmu osane lɛ naa.
5 Ekolɛ obaasumɔ ni okɛ “The Divine Name That Will Endure Forever” wolo bibioo lɛ aka nɛkɛ shiɛmɔ wiemɔ kuku nɛɛ okwɛ:
◼ “Nibii ni mikase yɛ Biblia lɛ mli klɛŋklɛŋ lɛ ateŋ ekome ji Nyɔŋmɔ gbɛi. Ani ole gbɛi nɛɛ? [Ŋmɛɛ gbɛ ni ejie naa.] Ha matsɔɔ bo. Eyɛ biɛ yɛ Biblia lɛ mli yɛ Lala 83:19. [Kanemɔ.] Nɛkɛ wolo bibioo nɛɛ tsɔɔ bɔ ni Nyɔŋmɔ gbɛi, Yehowa lɛ, jeɔ kpo yɛ wiemɔi sɔrɔtoi babaoo mli. [Okɛ akrabatsa ni yɔɔ baafa 8 lɛ atsɔɔ lɛ.] Kɛ obaasumɔ ni ole Yehowa kɛ eyiŋtoi ahe nii babaoo lɛ, no lɛ esa akɛ okane wolo bibioo nɛɛ.” Okɛ wolo lɛ aha shiatsɛ lɛ.
6 Akɛni wɔyɛ woji bibii sɔrɔtoi ni wɔbaanyɛ wɔkɛtsu nii hewɔ lɛ, eka shi faŋŋ akɛ awaje wɔ ‘koni wɔjaje sanekpakpa wɔtsɔɔ heshibalɔi lɛ.’—Yes. 61:1.