Ye Obua Mɛi Krokomɛi Ni Amɛhe Asa Yɛ Nyɔŋmɔ Wiemɔ Lɛ Kɛ Nitsumɔ Mli
1 Yehowa eto nibii babaoo ahe gbɛjianɔ koni akɛtsɔse wɔ ni wɔhe asa yɛ wɔ diɛŋtsɛ wɔsɔɔmɔ lɛ he nitsumɔ mli. Kɛ wɔkɛ nɔ ni ekɛha wɔ lɛ tsu nii lɛ, ‘wɔnaji aaamamɔ shi shiŋŋ.’ (Lala 37:23) Akɛ nɔkwɛmɔ nɔ lɛ, Teokrase Sɔɔmɔ Skul lɛ kɛ nɔ ni miihe ashɛ afii 50 etee nɔ ekɛ tsɔsemɔ ni yaa hiɛ eha yɛ wiemɔ kɛ nitsɔɔmɔ gbɛi kpakpoi ahe. Nɔ ni ebafata enɛ he hu ji daa otsi Sɔɔmɔ kpee, kɛ emli wiemɔi ni anyɛɔ atsuɔ he nii, kɛ nɔkwɛmɔ nii, kɛ sanegbaa bei hu lɛ.
2 Wɔnaa kpokpaa nɔkwɛlɔi asaramɔi ni tsaraa nɔ lɛ ahe sɛɛ. Sɔɔmɔ nɔkwɛlɔ lɛ saraa woloŋ nikasemɔ kui lɛ fɛɛ ni ekɛ ekaawoo ni suɔmɔ yɔɔ mli haa wo bɔni afee ni eye ebua wɔ ni wɔya hiɛ yɛ wɔmaŋ sɔɔmɔ nitsumɔ lɛ mli. Kɛfata enɛɛmɛi fɛɛ he lɛ, be fɛɛ be ni wɔkpeɔ kɛhaa shiɛmɔyaa lɛ, minitii nyɔŋma ni akɛhaa wɔ gbɛtsɔɔmɔi ni anyɛɔ atsuɔ he nii lɛ woɔ wɔ hewalɛ ni akɛ ŋaawoi ni he baaba sɛɛnamɔ haa wɔ kɛha nakai gbi lɛ. (Heb. 10:23-25) Gbɛjianɔtoi ni tamɔ nɛkɛ ni baa kɛjɛɔ Yehowa asafo lɛ ŋɔɔ lɛ tsɔɔ bɔ ni ejɛɔ suɔmɔ mli esusuɔ mɛi ni ekɛ nitsumɔ ewo amɛdɛŋ akɛ amɛshiɛ sanekpakpa lɛ ahe ehaa.
Ye Obua Obalatai Kɛ Biblia Kaselɔi
3 Ehe miihia ni ayɛ abua shiɛlɔi obalaŋtai kɛ mɛi heei lɛ yɛ shiɛmɔ nitsumɔ lɛ mli yɛ bei fɛɛ mli. Eyɛ mli akɛ wɔteŋ mɔ fɛɛ mɔ baanyɛ aye abuɔ amɛ yɛ be kɛ bei amli moŋ, shi gbɛnaa nii ka fɔlɔi kɛ mɛi ni kɛ mɛi heei nɛɛ feɔ Biblia mli nikasemɔ lɛ anɔ titri. (Gal. 6:6; Efes. 6:4) Bɔ ni akɛ Biblia lɛ tsuɔ nii yɛ gbɛ ni mɔɔ shi nɔ lɛ baaa trukaa yɛ be mli ni be hoɔ yaa ni anaa niiashikpamɔ fioo ko lɛ. Shi moŋ, ehe miihia ni akɛ yelikɛbuamɔ ni suɔmɔ yɔɔ mli kɛ tsɔsemɔ aha amɛ be fɛɛ be.
4 Esa akɛ aje shishi akɛ yelikɛbuamɔ lɛ aha dani mɔ lɛ kɛ ehe awo sɔɔmɔ nitsumɔ lɛ mli diɛŋtsɛ. Esa akɛ ati Saneyitso Kɛha Sanegbaa lɛ mli. Ye Obua mɛi ni eshɛ taomɔ nii lɛ ahe ni amɛbaanyɛ amɛkɛ amɛhe awo sɔɔmɔ nitsumɔ lɛ mli lɛ ni amɛle wiemɔ kuku ko ni amɛbaanyɛ amɛkɛtsu nii. Ekolɛ amɛbaanyɛ amɛkɛ ŋmalɛi ni atsɔɔ lɛ ateŋ ekome pɛ atsu nii kɛyashi be mli ni amɛaana niiashikpamɔ babaoo kɛ ekaa. Yɛ be mli ni nyɛfeɔ ekome kɛtsuɔ nii yɛ sɔɔmɔ nitsumɔ lɛ mli lɛ, esa akɛ ohe be yɛ be mli ni nyɛjɛ shia kome mli kɛyaa ekroko mli lɛ ni ojie eyi ni okɛ ŋaawoi ni baaha eya hiɛ lɛ aha lɛ yɛ mlihilɛ mli. Maa bɔ ni ehe hiaa ni esɔle yɛ bei fɛɛ mli lɛ hu nɔ mi.—Efes. 6: 18, 19.
5 Eyɛ mli akɛ daa gbɛgbalɔi kɛ shiɛlɔi krokomɛi ni yɔɔ niiashikpamɔ lɛ kɛ amɛhe woɔ sɔɔmɔ nitsumɔ lɛ mli yɛ otsi lɛ mli titri moŋ, shi kwɛ nɔ kpakpa ni eeeji akɛ nɛkɛ shiɛlɔi ni he esa nɛɛ aaato amɛ gbɛjianɔ bɔni afee ni amɛnyɛ amɛfi otsi naagbee shiɛmɔ nitsumɔ lɛ hu sɛɛ yɛ be kɛ bei amli. Mɛi krokomɛi ni baasumɔ ni amɛkɛ amɛ atsu nii yɛ sɔɔmɔ nitsumɔ lɛ mli koni amɛ hu amɛya amɛhiɛ lɛ ahiɛ baasɔ amɛhe ni amɛkɛshaa afɔle nɛɛ jogbaŋŋ diɛŋtsɛ.—Jaj. 4:9, 10.
6 Be ko ni eho lɛ, no mli lɛ wɔ fɛɛ wɔji mɛi heei kɛ mɛi ni bɛ niiashikpamɔ yɛ shiɛmɔ nitsumɔ lɛ mli. Wɔteŋ mɛi pii na ekaawoo kɛ tsɔsemɔ kɛjɛ shiɛlɔi ni yɔɔ niiashikpamɔ babaoo kɛ gbɛgbalɔi lɛ adɛŋ. Hesaa ni wɔyɔɔ amrɔ nɛɛ kɛ miishɛɛ ni yaa hiɛ ni wɔyɔɔ yɛ shiɛmɔ nitsumɔ lɛ mli lɛ jɛ nakai yelikɛbuamɔ lɛ tɛɛ. (Abɛi 27:17; Bɔfoi 20:35) Eba akɛ hiɛsɔɔ ni wɔyɔɔ wɔhaa nɔ ni Yehowa efee eha wɔ kɛtsɔ tsɔsemɔ ni ekaa yɔɔ mli yɛ sɔɔmɔ nitsumɔ lɛ mli lɛ aaatsirɛ wɔ ni wɔkɛ wɔhe aha ni wɔye wɔbua mɛi krokomɛi hu bɔni afee ni amɛhe asa jogbaŋŋ yɛ Yehowa Wiemɔ lɛ kɛ nitsumɔ mli.