Feemɔ Shiɛlɔ ni Yaa Ehiɛ
1 Kɛ́ wɔ-ŋwɛi Tsɛ lɛ na akɛ etsuji miiya amɛhiɛ yɛ anɔkwale lɛ mli lɛ, enaa miishɛɛ waa. Kɛ́ wɔtee hiɛ akɛ sanekpakpa shiɛlɔi ni he esa, ni haa amɛnitsumɔ mɔɔ shi jogbaŋŋ lɛ, no hu haa enaa miishɛɛ. Paulo wo nɔkwɛlɔ Timoteo hewalɛ koni ekã he eya ehiɛ yɛ wolokasemɔ kɛ nitsɔɔmɔ mli, bɔni afee ni mɛi fɛɛ ana eshweremɔ lɛ faŋŋ. (1 Tim. 4:13-15) Esa akɛ wɔ fɛɛ wɔbɔ mɔdɛŋ ni wɔya wɔhiɛ yɛ bɔ ni wɔtsuɔ shiɛmɔ nitsumɔ lɛ wɔhaa lɛ mli, kɛ́ wɔji shiɛlɔi ni he esa po.
2 Okɛ Otii Amamɔ Ohiɛ: Kɛ́ wɔbaaya wɔhiɛ lɛ, belɛ ebiɔ ni wɔkɛ otii amamɔ wɔhiɛ. Mɛni ji otii ni wɔbaanyɛ wɔkɛmamɔ wɔhiɛ lɛ ekomɛi? Wɔbaanyɛ wɔbɔ mɔdɛŋ koni wɔha wɔhe asa yɛ bɔ ni wɔkɛ wɔmumɔŋ klante, ni ji Biblia lɛ tsuɔ nii wɔhaa lɛ mli. (Efe. 6:17) Ekolɛ sɔɔmɔ nitsumɔ lɛ fã ko yɛ ni ebaabi ni wɔya wɔhiɛ yɛ mli, tamɔ gbɛjegbɛi ahe odaseyeli, tɛlifoŋ nɔ odaseyeli, aloo shikpɔŋkuku ni nitsumɔhei yɔɔ mli lɛ amli nitsumɔ nɛkɛ. Ekolɛ wɔbaanyɛ wɔbɔ mɔdɛŋ akɛ wɔbaafee sɛɛkuu-kɛsaramɔi babaoo ni mɔɔ shi. Oti kroko ni sa jogbaŋŋ ni wɔbaanyɛ wɔkɛma wɔhiɛ ji ní wɔya wɔhiɛ yɛ bɔ ni ajeɔ Biblia mli nikasemɔ shishi ni atsaa nɔ lɛ mli.
3 Nibii ni Yeɔ Buaa Wɔ: Ato Asafoŋ kpeei, titri lɛ Teokrase Sɔɔmɔ Skul lɛ kɛ Sɔɔmɔ Kpee lɛ ahe gbɛjianɔ koni akɛye abuɔ wɔ ni wɔya wɔhiɛ akɛ shiɛlɔi. Kɛ́ wɔbɔ mɔdɛŋ wɔkase nibii ni abaasusu he yɛ kpeei nɛɛ ashishi dani wɔtee, ni wɔkɛ gbɛtsɔɔmɔi ni akɛhaa yɛ jɛmɛ lɛ tsu nii lɛ, wɔnine baashɛ jɔɔmɔi babaoo nɔ.—2 Kor. 9:6.
4 Ehe miihia hu ni wɔye wɔbua wɔhe koni wɔ fɛɛ wɔya wɔhiɛ. (Abɛi 27:17) Kɛ́ wɔbo shiɛmɔ wiemɔi ni mɛi ni wɔkɛtsuɔ nii yɛ shiɛmɔ nitsumɔ lɛ mli lɛ kɛtsuɔ nii lɛ toi jogbaŋŋ lɛ, ebaaye ebua wɔ ni wɔhe asa. Kɛfata he lɛ, ekolɛ wɔsafo woloŋ nikasemɔ nɔkwɛlɔ lɛ baato gbɛjianɔ koni mɔ ko aye abua wɔ. Mɛɛ jɔɔmɔ po eji nɛkɛ, ákɛ wɔɔná gbɛgbalɔ loo shiɛlɔ ni he esa aye abua wɔ bɔni afee ni wɔwo yibii babaoo ni wɔná miishɛɛ waa yɛ shiɛmɔ nitsumɔ lɛ mli! Ani shiɛlɔ hee ko yɛ wɔ-woloŋ nikasemɔ kuu lɛ mli? Ekolɛ wɔbaanyɛ wɔfɔ̃ lɛ nine ni ekɛ wɔ atsu nii yɛ shiɛmɔ nitsumɔ lɛ mli.
5 Kristofoi ashiɛmɔ nitsumɔ lɛ ji nitsumɔ ni he hiaa fe fɛɛ ni atsuɔ ŋmɛnɛ. Beni wɔkɛ “yijiemɔ afɔle” haa Yehowa lɛ, ebaabi ni wɔkɛ wɔnyɛmɔ fɛɛ afee nakai. (Heb. 13:15) Kɛ́ wɔbɔ mɔdɛŋ wɔtee hiɛ yɛ shiɛmɔ nitsumɔ lɛ mli lɛ, wɔbaatsɔmɔ ‘nitsulɔi ni hiɛ gbooo, ni jaa anɔkwale wiemɔ lɛ mli pɛpɛɛpɛ.’—2 Tim. 2:15.