Hiɛsɔɔ Ni Oyɔɔ Kɛha Kristo Gbele Lɛ
1 “Gbɔmɔ Bi lɛ baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ.” (Mat. 20:28) Gbɔmɔ ko bɛ ni ehi shikpɔŋ nɔ ni baanyɛ afee nɔ ni Yesu Kristo fee kɛha adesai lɛ. Atsɔ eshihilɛ gbɛ kɛ agbɛnɛ yɛ naagbee lɛ egbele yɛ piŋmɔ tso nɔ lɛ nɔ atsɔɔ wɔ gbɛ ni wɔɔtsɔ nɔ ni wɔnine ashɛ nikeenii ni da fe fɛɛ ni mɔ ko baanyɛ ana lɛ nɔ, naanɔ wala. Ni kɛlɛ, mɛi pii ahiɛ esɔɔɔ nɔ ni Kristo fee lɛ.
2 Susumɔ nɔ ni ba beni Yesu kɛ kpitiyelɔi nyɔŋma lɛ kpe lɛ he okwɛ. Beni amɛna Yesu lɛ, amɛbolɔ akɛ: “Nuŋtsɔ Yesu, naa wɔ mɔbɔ? (Luka 17:13) Ena amɛ mɔbɔ, ni taakɛ Mla lɛ tsɔɔ lɛ, ekɛɛ amɛ akɛ amɛya ni amɛkɛ amɛhe ayatsɔɔ osɔfoi lɛ. Beni amɛyaa lɛ, atsa kpitiyelɔi nyɔŋma lɛ fɛɛ.
3 Shi mɔ kome pɛ ku esɛɛ eba Yesu ŋɔɔ ni ebada lɛ shi. Ni mɛi nɛɛhu lɛ hu? Amɛtee ni amɛsusuuu mɔ ni efee amɛ ejurɔ lɛ he akɛ amɛbada lɛ shi. (Luka 17:15-17) Amɛteŋ namɔ wɔtamɔ? Wɔmiisumɔ ni wɔtamɔ nuu ni ku esɛɛ lɛ. Eyɛ enɔkwa hiɛsɔɔ. Ani nakai wɔnuɔ Kristo gbele lɛ he wɔhaa?
4 Hiɛsɔɔ ni Wɔɔjie lɛ Kpo: Asafo lɛ tsɔɔ Biblia mli kukuji pɔtɛɛ komɛi daa afi ni esa akɛ akane yɛ otsi ni tsɔɔ kaimɔ gbi lɛ hiɛ lɛ mli. Abaanyɛ ana Biblia kanemɔi nɛɛ yɛ 1992 Calendar of Jehovah’s Witnesses lɛ mli yɛ April 12-17 gbii lɛ ashishi. Wɔbaanyɛ wɔjie wɔhiɛsɔɔ kpo kɛtsɔ saji ni ba Yesu shihilɛ mli ni etsɛɛɛ ni egbo lɛ kanemɔ kɛ amɛnɔjwɛŋmɔ nɔ.
5 Wɔ sɔɔmɔ nitsumɔ lɛ kɔɔ hiɛsɔɔ ni wɔyɔɔ kɛha Kaimɔ lɛ he. Onukpai lɛ baasumɔ ni amɛto gbɛjianɔ jogbaŋŋ koni gbɛgbalɔi kɛ shiɛlɔi anyɛ ato sɔɔmɔ nitsumɔ ni fa he gbɛjianɔ yɛ April mli.
6 Enɛ ji nyɔŋ ko ni akpei nyɔŋmai abɔ kɛ amɛhe woɔ gbɛgbalɔi awamɔ nitsumɔ lɛ mli. Mɛi 930 kɛ amɛhe wo mli yɛ Ghana yɛ April ni ho lɛ mli. Ani mɛi ni fa fe nakai baanyɛ afee yɛ April nɛɛ mli? Kɛ onyɛɛɛ ofee gbɛgbalɔi awalɔ lɛ, too gbɛjianɔ ni oha gbɛfaŋnɔ ni onaa yɛ shiɛmɔ nitsumɔ lɛ mli lɛ aya hiɛ bɔ ni oshihilɛ aaaŋmɛ gbɛ.
7 Ha Mɛi Krokomɛi Ana Hiɛsɔɔ: Mɛi ni yɔɔ wiemɔ lɛ he miishɛɛ lɛ ateŋ mɛi pii kɛ wɔ kpeɔ daa afi yɛ kaimɔ lɛ shishi. Akɛ nɔkwɛmɔ nɔ lɛ, mɛi 10,650,158 ni ba Kaimɔ lɛ shishi yɛ jeŋ fɛɛ yɛ nyɛsɛɛ March mli lɛ ateŋ mɛi ni fa fe 6,370,000 ji mɛi ni yɔɔ wiemɔ lɛ he miishɛɛ. Enɛ tsɔɔ akɛ hegbɛ kpɛle yɛ kɛha shweremɔ yɛ gbɛjianɔtoo lɛ mli.
8 Esa akɛ wɔkɛ dɛhiɛmɔ woji bibii ni Asafo lɛ ekala ni akɛfɔɔ mɛi anine lɛ atsu nii ni wɔto tsɔnei ahe gbɛjianɔ wɔha wɔ Biblia kaselɔi kɛ mɛi ni yɔɔ wiemɔ lɛ he miishɛɛ lɛ kɛ ehe miihia. Okɛ miishɛɛ diɛŋtsɛ afɔ amɛ nine.
9 Ye obua amɛ ni amɛna nɔ hewɔ ni ato Kaimɔ lɛ, mɛi ni yeɔ niyenii lɛ eko, kɛ nɔ ni okadi nibii lɛ damɔ shi kɛha. (1 Kor. 11:23-26) Agbɛnɛ hu, gbalamɔ hiɛnɔkamɔ ni mɛi ni yeɔ lɛ yɔɔ kɛ nɔ ni mɛi ni kwɛɔ kɛkɛ ni amɛyeee okadi nibii lɛ eko lɛ hu yɔɔ Iɛ mli otsɔɔ lɛ. (Yoh. 10:16; Kpoj. 14:3, 4.) Enɛ baaye abua mɛi ni yɔɔ wiemɔ lɛ he miishɛɛ lɛ ni amɛnu shishi akɛ ehe miihia ni mɔ fɛɛ mɔ ‘ana hemɔkɛyeli,’ ni akɛ Kristo gbele lɛ Kaimɔ lɛ shishi ni amɛbaa daa afi lɛ pɛ kɛkɛ faaa.—Yoh 3:16.
10 Kristo gbele lɛ Kaimɔ lɛ ji nifeemɔ krɛdɛɛ ko diɛŋtsɛ. Kɛji wɔsaa wɔhe jogbaŋŋ wɔha enɛ lɛ, wɔtsɔɔ akɛ wɔhiɛ sɔɔ nɔ fɛɛ nɔ ni Yehowa kɛ Kristo efee kɛha wɔ lɛ diɛŋtsɛ. Hiɛsɔɔ kɛha nɛkɛ be nɛɛ ni wɔɔha wɔ Biblia kaselɔi kɛ mɛi ni yɔɔ wiemɔ lɛ he mishɛɛ lɛ ana lɛ baaye ebua amɛ hu, ni amɛna Yehowa kpɔmɔ nɔ gbɛjianɔtoo kɛtsɔ Yesu Kristo nɔ lɛ mli hemɔkɛyeli.