Buu-Mɔɔ kɛ Awake!—Anɔkwale he Woji
1 January 1, 1994 Buu-Mɔɔ lɛ baafa 22 kai wɔ akɛ wɔwoji tɛtrɛbii lɛ ŋmalaa ‘saji yɛ ebe naa ni etsuɔ gbɔmɛi ahiamɔ nii diɛŋtsɛ lɛ ahe nii.’ Wɔmiisumɔ ni wɔja nɛkɛ woji nɛɛ babaoo diɛŋtsɛ. Yɛ April kɛ May nyɔji lɛ amli lɛ, Buu-Mɔɔ kɛ Awake! lɛ shɛɛ wɔkɛbaaha, kɛ woji bibii sɔrɔtoi lɛ fɛɛ, ja Skul wolo bibioo lɛ pɛ.
2 Shia-kɛ-shia nitsumɔ lɛ haa wɔnaa hegbɛ ni hi fe fɛɛ koni wɔnyɛ wɔkɛ woji tɛtrɛbii nɛɛ aha. Trukaa odaseyeli ni mɔɔ shi jogbaŋŋ kɛ sɛɛsaramɔi hu haa anyɛɔ akɛ woji lɛ haa daa. Odase ni ayeɔ yɛ gbɛjegbɛi anɔ kɛ nitsumɔ hei ni wɔɔya yɛ wɔ shikpɔŋkuku lɛ mli lɛ hu ji gbɛi ni yeɔ omanye ni abaanyɛ atsɔ nɔ ni wɔha woji tɛtrɛbii ni wɔkɛhaa lɛ aya hiɛ.
3 Saji ni Abaasusu He: April 1 Buu-Mɔɔ lɛ susuɔ saneyitsei ni ji “Jeŋ ni Hi—Ani Eji Lamɔ ko Kɛkɛ?” kɛ “Jeŋ ni Hi—Ebɛŋkɛ!” lɛ ahe. Enɛ kɛ wolo tɛtrɛɛ lɛ yiŋtoo akɛ ejaje Nyɔŋmɔ Maŋtsɛyeli etsɔɔ lɛ kpaa gbee pɛpɛɛpɛ. Nikasemɔ ni ji enyɔ lɛ kɛba naagbee ni etsɔɔ bɔ ni naanɔ paradeiso baaba kɛ̃ yɛ Kristo Yesu nɔyeli shishi lɛ mli kɛmu naa.—Luka 23:43.
4 Sanebimɔ ni asusu he yɛ nɔ ni je kpo yɛ March 1 lɛ mli ji “Ani Akaŋshii Ji nɔ Titri ni Haa Ayeɔ Omanye?” Sane ni ji enyɔ ni yɔɔ enɛ nɔŋŋ mli ni hiɛ saneyitso akɛ, “Jwɛŋmɔŋ Toiŋjɔlɛ-Namɔ yɛ Gbɔmɛi ni Shiɔ Akaŋ Ateŋ,” lɛ tsɔɔ he ni abaana anɔkwa jwɛŋmɔŋ toiŋjɔlɛ yɛ. March 22 Awake! lɛ saneyitso ni ji “The Money Chase—Where Will It End?” ni yɔɔ sɛɛ lɛ hiɛ saji sɔrɔtoi enyɔ. Esa akɛ wɔkɛ saji nɛɛ atsu nii ni wɔkɛ mɛi ni susuɔ akɛ sɛɛnamɔ kɛ anɔkwa miishɛɛ bɛ amɛshihilɛi amli lɛ aje sanegbaai ashishi amrɔ nɔŋŋ.
5 Pii ni Akɛaaha: January 1 Buu-Mɔɔ lɛ kɛ ŋaawoi sɔrɔtoi ejwɛ ha koni akɛ pii aha. Awo wɔ hewalɛ (1) ni wɔsumɔ ni wɔna woji tɛtrɛbii lɛ eko fɛɛ eko. Kɛ wɔkane enɛɛmɛi lɛ, esa akɛ wɔsusu he, ni wɔle saji ni mɛi ni yɔɔ wɔ shikpɔŋkuku mli lɛ baana he miishɛɛ waa. Agbɛnɛ hu, kɛ wɔhiɛɔ woji lɛ sɔrɔtoi abɔ daa lɛ, wɔbaanyɛ wɔkɛha wɔ nanemɛi nitsulɔi, kuuŋbii, tsɔɔlɔi, nanemɛi skulbii, loo nihelɔi.
6 Akai wɔ (2) koni wɔha wɔwiemɔ lɛ afee kuku. Halamɔ oti kome ko ni yɔɔ miishɛɛ, ni owie he kuku. Kɛ onyɛ oha ahe yɛ shia lɛ, no lɛ ebaanyɛ ekɛ mɔ ni okɛkpe lɛ kɛ mɛi krokomɛi ni yɔɔ shia mli lɛ ‘awie.’
7 Nɔ kroko hu ni he hiaa ji (3) ni ofee tswãa. Ehi akɛ oooha emli saji sɔrɔtoi ni ooogba he sane lɛ ahi ojwɛŋmɔ mli—eko kɛha obalaŋtai, ekroko hu kɛha hii, ni eko hu kɛha yei.
8 Naagbee kwraa lɛ, ehe miihia (4) ni wɔkɛ oti ko kɛha ekɛhamɔ lɛ ama wɔhiɛ. Aawo asafoi fɛɛ ni hiɛ woji tɛtrɛbii ahe nyɔmɔ lɛ hewalɛ waa diɛŋtsɛ ni amɛwo amɛnyɔji lɛ koni amɛnyɛ amɛshɛ woji tɛtrɛbii lɛ babaoo. Enɛ baaye ebua waa diɛŋtsɛ koni akɛ woji tɛtrɛbii lɛ aha kɛ miishɛɛ. Kɛ wɔshɛ woji tɛtrɛbii, ni wɔnine shɛɔ nakai yibɔ lɛ nɔ daa lɛ, ebaawo wɔ hewalɛ ni wɔtsu babaoo.
9 Wɔmiisumɔ ni mɛi krokomɛi ale Nyɔŋmɔ Maŋtsɛyeli lɛ he sane lɛ. Nyɛhaa wɔkɛ yelikɛbuamɔ fɛfɛo ni woji tɛtrɛbii lɛ kɛhaa lɛ atsua nii kwraa kɛwulaa shi ni wɔkɛgbɛ Maŋtsɛyeli shɛɛ sane lɛ wɔshwa.—Mat. 10:7.