Dii Woji Tɛtrɛbii kɛ Woji Bibii ni Okɛhaa lɛ Sɛɛ
1 Yesu wo esɛɛnyiɛlɔi lɛ ahewalɛ koni amɛfee kaselɔi. (Mat. 28:19) Enɛ tsɔɔ babaoo fe woji kɛhamɔ kɛkɛ; wɔmiisumɔ ni wɔye wɔbua mɛi ni amɛya hiɛ yɛ mumɔŋ. Bɔni afee ni wɔfee nakai lɛ esa akɛ wɔku wɔsɛɛ ni wɔkɛ yelikɛbuamɔ babaoo ayaha mɛi ni tsɔɔ miishɛɛ lɛ.
2 Kɛ oma woji tɛtrɛbii lɛ ekome mli sane ko nɔ mi yɛ oklɛŋklɛŋ saramɔ lɛ mli lɛ, no lɛ ebaahi akɛ nyɛaasusu nakai sane lɛ nɔŋŋ he kɛ oku osɛɛ otee:
◼ “Nyɛsɛɛ ko beni mibasara bo lɛ, migbala ojwɛŋmɔ kɛtee Buu-Mɔɔ (loo Awake!) lɛ mli sane ko ni ye ebua wɔ koni wɔle bɔ ni ehe hiaa ha akɛ wɔɔtao Biblia lɛ mli wɔkwɛ lɛ nɔ. Nyɔŋmɔ yiŋtoo ni kɔɔ wɔsɛɛ shihilɛ kpakpa he kɛha adesai lɛ damɔ e-Maŋtsɛyeli nɔyeli lɛ nɔ. Mika 4:3, 4 ŋmaa eshiwoo ni tsɔɔ akɛ Maŋtsɛyeli nɛɛ kɛ tai fɛɛ baaba naagbee lɛ he sane.” Kɛ okane ŋmalɛ lɛ ogbe naa lɛ, okɛ “Naa!” wolo bibioo lɛ atsɔɔ, ni okɛ esɛɛgbɛ mfoniri lɛ atsɔɔ. Nyɛsusua klɛŋklɛŋ kuku kɛ ŋmalɛi ni atsɛ sɛɛ kɛha nakai kuku lɛ he (kwɛmɔ Naa wolo baafa 4 shishigbɛ niŋmaa), ni okadi akɛ Mika 4:3, 4 ji enɛɛmɛi ateŋ ekome. Too sɛɛsaramɔ he gbɛjianɔ koni okɛ kuku 2 lɛ atsa sanegbaa lɛ nɔ.
3 Kɛ etamɔ nɔ ni shiatsɛ lɛ bɛ he miishɛɛ tsɔ loo ni enaaa be ni akɛaagba sane po lɛ, obaanyɛ okadi egbɛi kɛha sɛɛsaramɔ:
◼ “Akɛni ona woji tɛtrɛbii ni mishi miha bo nyɛsɛɛ ko lɛ he miishɛɛ hewɔ lɛ, misusuɔ akɛ obaana ehee sɔrɔtoi ni baa lɛ ahe miishɛɛ. Miheɔ miyeɔ akɛ obaana enɛ mli sane nɛɛ he miishɛɛ waa.” Tsɔɔmɔ lɛ emli sane ko ni ebaanya he lɛ eko. Kɛɛmɔ lɛ akɛ okɛ ehee sɔrɔtoi ni baanyiɛ sɛɛ lɛ baaba ni ogbala ejwɛŋmɔ kɛya woji tɛtrɛbii ashɛɛ lɛ he gbɛjianɔ ni atoɔ lɛ nɔ.
4 Kɛ shiatsɛ lɛ kane woji tɛtrɛbii lɛ ni ejie miishɛɛ kpo yɛ enɛɛmɛi ahe lɛ, no lɛ esa akɛ efee nɔ ni waaa akɛ oookɛɛ lɛ ni eshɛ woji lɛ:
◼ “Akɛni onaa Buu-Mɔɔ lɛ kanemɔ he miishɛɛ hewɔ lɛ, obaanyɛ okɛ gbɛjianɔ ni atoɔ koni ashɛ lɛ atsu nii koni akɛ emli sɔrɔtoi ni baa lɛ aha bo daa kɛtsɔ post-ɔfis adeka mli koni ona nɔmimaa akɛ onine baashɛ emli eko fɛɛ eko nɔ.” Tsɔɔmɔ lɛ jara lɛ ni otsɔɔ lɛ bɔ ni afeɔ aŋmalaa woji ni akɛshɛɔ lɛ nɔ nii.
5 Kɛ okɛ wolo bibioo ko eha shi moŋ onako hegbɛ ni ofee bɔ ni atoɔ nikasemɔ he gbɛjianɔ ahaa lɛ he nɔkwɛmɔ nɔ lɛ, too he gbɛjianɔ ni ofee nakai yɛ sɛɛsaramɔ lɛ mli.
Akɛ nɔkwɛmɔ nɔ lɛ, kɛ oshi “Nɔyeli” wolo bibioo lɛ oha shiatsɛ lɛ, bi lɛ ni eyakɔ enɔ lɛ kɛba, ni okɛɛ akɛ:
◼ “Kadimɔ nɔ ni baafa 3 lɛ kɛɔ wɔ yɛ shɛɛ sane ni Yesu jaje etsɔɔ beni eyɔɔ shikpɔŋ nɔ lɛ saneyitso lɛ he.” No sɛɛ lɛ okɛ lɛ asusu sane ni yɔɔ baafa 3 lɛ he kuku. Bi shiatsɛ lɛ ni etsɔɔ nɔ ni esusuɔ akɛ ehe hiaa ni efee koni ekase babaoo. No sɛɛ lɛ kɛɛmɔ akɛ: “Ehe miihia ni wɔle nɔ hewɔ ni Nyɔŋmɔ Maŋtsɛyeli lɛ he hiaa wɔ waa lɛ. Masumɔ akɛ maku misɛɛ maba ni wɔsusu nɔ hewɔ ni esa akɛ wɔkpa Nyɔŋmɔ nɔyeli lɛ gbɛ akɛ wɔ hiɛnɔkamɔ kome pɛ lɛ he.”
6 Wɔyɛ woji bibii sɔrɔtoi babaoo. Taomɔ otii ni yɔɔ miishɛɛ ni yɔɔ emli nɔ ni oto he gbɛjianɔ akɛ okɛaatsu nii lɛ mli. Ebaaye ebua bo ni owo mɛi ni yɔɔ tsuijurɔ lɛ fɛɛ hewalɛ ni amɛkase nibii ni Yesu efa akɛ afee lɛ he nii babaoo.—Mat. 28:20.