Okɛ Woji Tɛtrɛbii Atsu Nii ni Okɛja Anɔkwale Lɛ

¹ Afite sɛɛnamɔ ni yɔɔ anɔkwa saji ni anyɛɔ akɛ he fɔɔ nɔ lɛ babaoo yɛ gbɔmɛi ashihilɛ mli ŋmɛnɛ, yɛ adafitswaa ni awoɔ he tsɔ, maŋkwramɔŋ shiwoi ni akɛlakaa mɛi, kɛ majimaji ateŋ saji ni akɛɔ ni akɛshishiuɔ mɛi babaoo lɛ hewɔ. Esoro Buu-Mɔɔ lɛ kɛ Awake! lɛ kwraa ejaakɛ nomɛi pɛ jajeɔ anɔkwale ni kɔɔ Nyɔŋmɔ Maŋtsɛyeli lɛ he lɛ ni etsɔɔ nɔ ni esa akɛ mɔ fɛɛ mɔ afee koni ena naanɔ jɔɔmɔi ni ekɛbaaba lɛ mli ŋɔɔmɔ.

² Yɛ maŋ ko mli lɛ, onukpa ko ni tsuɔ nii yɛ nɔyeli lɛ adafitswaa nitsumɔ he ni bayoo sɛɛnamɔ ni yɔɔ woji tɛtrɛbii enyɔ nɛɛ ahe lɛ ye ebua amrɔ nɔŋŋ koni akpɛlɛ amɛjaa lɛ nɔ. Nuu nɛɛ wie akɛ: “Mibuɔ Buu-Mɔɔ lɛ akɛ eji woji tɛtrɛbii ni hi fe fɛɛ lɛ ateŋ ekome; eŋɔɔ minaa waa akɛ maye mabua.” Eji hegbɛ ni wɔna akɛ wɔye wɔbua mɛi krokomɛi kɛtsɔ woji tɛtrɛbii ni baanyɛ ekɛ nilee ni haa wala aha nɛɛ ajaa nɔ. (Yoh. 17:⁠3) Mɛɛ gbɛ nɔ oootsɔ ni okɛ woji tɛtrɛbii ni sɛɛnamɔ yɔɔ he nɛɛ aha yɛ May mli? Ekolɛ ŋaawoi ni akɛha ni nyiɛ sɛɛ nɛɛ baaye abua.

³ Kɛ okɛ shishijee sane ni yɔɔ May 15 “Buu-Mɔɔ” lɛ mli lɛ miitsɔɔ lɛ, obaanyɛ okɛɛ akɛ:

◼ “Wɔkɛ gbɔmɛi miiwie wolo ni aheɔ fe fɛɛ yɛ je lɛŋ lɛ he. Ani ole wolo ni ji? [Ŋmɛɛ hetoo gbɛ.] Biblia lɛ he wɔwieɔ lɛ. Yiŋtoo diɛŋtsɛ ko ni yɔɔ hewɔ ni mɛi pii ehe Biblia lɛ nakai lɛ. Anaa yiŋtoo lɛ yɛ 1 Timoteo 3:16.” Kɛ okane ŋmalɛ lɛ ogbe naa lɛ, maa saji otii ni sa ni yɔɔ emli saji lɛ ekome mli lɛ nɔ mi.

⁴ Aloo yɛ be mli ni ojie ohe kpo kuku sɛɛ lɛ, obaanyɛ okɛɛ nɔ ko ni tamɔ nɛkɛ:

◼ “Ekolɛ oyoo akɛ aasusu gbekɛbii ahe waa agbɛnɛ yɛ jeŋ fɛɛ yɛ naagbai ni gbekɛbii kɛkpeɔ lɛ hewɔ. Mɛɛ gbekɛbii anaagbai onaa yɛ wɔ akutso nɛɛ mli ni gbaa onaa?” Ŋmɛɛ hetoo gbɛ. Tsɔɔmɔ naagbai ni hiɛdɔɔ yɔɔ mli ni gbekɛbii kɛkpeɔ yɛ jeŋ fɛɛ ni May 8, Awake! lɛ shishijee wiemɔi lɛ wie he lɛ ekomɛi, ni ogbala jwɛŋmɔ kɛya tsabaa ni Nyɔŋmɔ Maŋtsɛyeli lɛ kɛhaa lɛ nɔ.

⁵ Ekolɛ oŋmala mɛi ni jie miishɛɛ fioo ko yɛ sane lɛ he kɛjɛ shishijee shi nɔ ko jɛɛɛ mli baaa lɛ agbɛi yɛ osɛɛsaramɔ kadimɔ wolo lɛ nɔ. Akɛni miishɛɛ lɛ faaa tsɔ hewɔ lɛ, onuŋ he akɛ esa akɛ otsa sɛɛsaramɔ lɛ nɔ. Shi obaanyɛ ni okɛ wolo nɛɛ atsu nii ni okɛje woji tɛtrɛbii ni okɛhaa mɛi pɔtɛɛ daa lɛ shishi. Kɛ okadi sane ko ni onuɔ he akɛ ebaaŋɔɔ gbɔmɔ pɔtɛɛ ko naa lɛ, bɔɔ mɔdɛŋ ni oyasara nakai mɔ lɛ ni okɛ wolo tɛtrɛɛ lɛ aha lɛ.

⁶ Trukaa Odaseyeli: Enɛ ji gbɛ ni hi fe fɛɛ ni okɛaatee miishɛɛ shi yɛ woji tɛtrɛbii lɛ ahe. Ŋaa gbɛ ni oootsɔ nɔ okɛ mfoniri fɛfɛo ni yɔɔ hiɛ lɛ atsu nii lɛ baanyɛ atee sanegbaa shi. Nyɛmi yoo ko kɛ sɔrɔtoi komɛi shwie ekpɔlɔ nɔ koni enanemɛi nitsulɔi ni hoɔ lɛ anyɛ ana; enyɛ ekɛ pii ha. Ha efee ohiamɔ sane akɛ ooohiɛ fioo be fɛɛ be, ni oŋɔ hegbɛ lɛ ni okɛha yɛ nyɔŋ nɛɛ nɔ, beni oyaa jara nɔ, oyaa skul, ota bɔs loo trɔtrɔ mli, loo okɛ mɛi krokomɛi kpeɔ yɛ he kroko lɛ.

⁷ Yɛ Buu-Mɔɔ lɛ kɛ Awake! lɛ yelikɛbuamɔ hewɔ lɛ, wɔna hetooi wɔha sanebimɔi ni he hiaa ni kɔɔ Yehowa kɛ ejamɔ he lɛ he. Wɔmiisumɔ ni wɔkɛ woji ni akalaa daa nɛɛ atsu nii yɛ gbɛ fɛɛ gbɛ ni wɔɔnyɛ nɔ, koni wɔkɛye wɔbua mɛi krokomɛi ni amɛbale “Yehowa, . . . Nyɔŋmɔ anɔkwafo” lɛ.​—⁠Lala 31:⁠6.