Buu-Mɔɔ kɛ Awake!—Woji Tɛtrɛbii Kɛha Wɔ Be ni Hiamɔ Eba he Lɛ!
1 Saji ni baa ni hosoɔ je lɛ miiya nɔ kɛmiiha Biblia gbalɛ mlibaa! Be mli ni wɔsusuɔ nɔ ni yaa nɔ kɛbɔleɔ wɔhe yɛ je lɛŋ kɛ teokrase gbɛjianɔtoo lɛ mli hu he lɛ, wɔbaanyɛ wɔnu bɔ ni ehe hiaa akɛ wɔshiɛ Maŋtsɛyeli lɛ he “sanekpakpa lɛ” shishi jogbaŋŋ. (Mar. 13:10) Enɛ haa wɔnaa yiŋtoo hewɔ ni esa akɛ wɔkɛ ekãa aya nɔ atsu wɔ sɔɔmɔ nitsumɔ lɛ he nii yɛ April nyɔŋ lɛ nɔ.
2 Nitsumɔ krɛdɛɛ ni wɔbaatsu he nii yɛ nyɔŋ nɛɛ nɔ lɛ maa bɔ ni wɔ shɛɛ sane lɛ he hiaa ha lɛ nɔ mi. Wɔkɛ ekãa kɛ hehiamɔ miimɛ Maŋtsɛyeli Sane ni abaajie lɛ kpo, ni abaaja yɛ April kɛ May lɛ. Bɔni afee ni wɔtswa ekãafeemɔ kɛha nitsumɔ nɛɛ wɔma shi ni wɔtee miishɛɛ shi hu lɛ, Buu-Mɔɔ kɛ Awake! lɛ baahiɛ saji ni eba yɛ ebe naa pɛpɛɛpɛ, ni maa nɔ ni jeŋ saji ni baa ni gbaa mɔ naa lɛ damɔ shi kɛha yɛ gbalɛ naa lɛ nɔ mi. Te wɔɔfee tɛŋŋ wɔsaa shiɛmɔ wiemɔ ni kanyaa miishɛɛ yɛ woji tɛtrɛbii lɛ ahe?
3 Ekolɛ obaanyɛ osaa shiɛmɔ wiemɔ ni mɔɔ shi kɛtsɔ shishijee otii nɛɛ asɛɛnyiɛmɔ nɔ: (1) Halamɔ sane ko ni osusuɔ akɛ mɛi ni yɔɔ okutso lɛ mli lɛ baanya he kɛjɛ woji tɛtrɛbii lɛ ekome mli. (2) Halamɔ wiemɔ ko loo ŋmalɛ ko ni aŋmala emli wiemɔi lɛ ni oheɔ oyeɔ akɛ ebaatee shiatsɛ lɛ miishɛɛ shi yɛ sane nɛɛ mli. (3) Saamɔ shiɛmɔ wiemɔ kuku, ni naanyobɔɔ ŋamɔ, sanebimɔ loo wiemɔ ni maa Ŋmalɛ mli sane hesusumɔ ni yɔɔ miishɛɛ nɔ mi, kɛ nine ni ooofɔ lɛ yɛ anɔkwayeli mli koni ehe woji tɛtrɛbii lɛ fata he. Taakɛ obaanyɛ ona lɛ, enɛ yɛ kuku waa ni ebɛ hwanyaŋŋ. Ekolɛ obaanyɛ ni okɛ shiɛlɔ kroko ni okɛ lɛ tsuɔ nii yɛ shiɛmɔ mli lɛ afee ekome koni nyɛsaa shiɛmɔ wiemɔ ko.
4 Akɛni April 22 “Awake!” lɛ teeɔ sanebimɔ, “Are These the Last Days?” lɛ shi hewɔ lɛ, obaanyɛ otĩ sane ni yɔɔ “Reasoning” wolo lɛ baafa 13 lɛ saneyitso ni ji “Last Days” shishi lɛ mli. Obaanyɛ oje shishi akɛ:
◼ “Wɔmiisara mɛi koni wɔkɛ amɛ asusu nɔ ni saji ni haoɔ mɔ ni yaa nɔ kɛbɔleɔ wɔ lɛ tsɔɔ lɛ he. Kadimɔ nɔ ni sane nɛɛ kɛɔ . . .”
5 April 1 “Buu-Mɔɔ” lɛ teeɔ sanebimɔ nɛɛ shi akɛ: “Nyɔŋmɔ Jamɔ—Ani Eji Saneyitso ni Aahi?” Be mli ni okɛ wolo tɛtrɛɛ lɛ haa lɛ, obaanyɛ okɛɛ akɛ:
◼ “Afɔɔ kɛɛmɔ akɛ Nyɔŋmɔjamɔ ji saneyitso kome ko ni esaaa akɛ agbaa he sane, ejaakɛ eteeɔ ŋwanejee shi tsɔ. Mɛni osusuɔ yɛ no he?” No sɛɛ lɛ tsɔɔmɔ wiemɔ ko ni yɔɔ wolo lɛ mli.
6 Ekolɛ okɛ April 15 “Buu-Mɔɔ” ni hiɛ sane ko akɛ “Ani Obaanyɛ Ona Jamɔ Mli Anɔkwale Lɛ?” atsu nii. Ekolɛ abaabo bo toi jogbaŋŋ yɛ hiɛkpamɔ wiemɔ nɛɛ kɛ nitsumɔ hewɔ:
◼ “Akɛni jamɔi babaoo yɔɔ ŋmɛnɛ hewɔ lɛ, mɛi komɛi susuɔ akɛ ani abaanyɛ ana jamɔ mli anɔkwale lɛ lo. Sane nɛɛ jieɔ gbɛ ko ni mi kɛ bo fɛɛ baanyɛ atsɔ nɔ ana sanebimɔ nɛɛ hetoo ni haa mɔ tsui nyɔɔ emli lɛ kpo. . . .”
7 Dani oooje kpo kɛya shiɛmɔ lɛ, mɛni hewɔ ni okɛ shiɛlɔ kroko ekaaa shiɛmɔ wiemɔ ko nyɛkwɛɛɛ koni nyɛle no jogbaŋŋ? Ekolɛ nyɛbaanyɛ nyɛkɛ ŋaawoi komɛi ni yeɔ ebuaa ni baaha nyɛhe asa ni eha nyɛna hekɛnɔfɔɔ babaoo aha nyɛhe.
8 Beni gbɛjianɔtoo nɛɛ naagbee bɛŋkɛɔ lɛ, eba akɛ wɔɔye wɔhe oyai koni wɔye wɔbua mɛi ni hiɛ tsui kpakpa lɛ koni amɛsha foi kɛjɛ Babilon Kpeteŋkpele lɛ mli. (Kpoj. 18:4) Buu-Mɔɔ kɛ Awake! lɛ tsuɔ gbɛfaŋnɔ ni he hiaa he nii yɛ nitsumɔ ni akuŋ sɛɛ atsuŋ eko dɔŋŋ nɛɛ mli. Wɔmiida shi akɛ Yehowa kɛ dɛŋdadei nɛɛ eha wɔ ni wɔkɛtsu nii!