Wɔ Nɔkwɛmɔ Nɔ Feelɔ lɛ Sɛɛnyiɛmɔ akɛ La Hiɛlɔi

¹ Yesu jaje yɛ lɛ diɛŋtsɛ ehe akɛ: “Miji je lɛ mli la lɛ.” Yesu kaselɔi lɛ hu ji “je lɛŋ la lɛ” kɛtsɔ enɔkwɛmɔ nɔ lɛ sɛɛnyiɛmɔ nɔ. (Mat. 5:14) Akɛ “je lɛ mli la lɛ,” Yesu baanyɛ awie akɛ mɛi fɛɛ ni nyiɛɔ esɛɛ lɛ baaná “wala la lɛ.” (Yohane 8:12) No feɔ wɔ mumɔŋ la hiɛlɔi ni esaaa akɛ wɔhaa nɔ ko tsĩɔ nakai la lɛ hiɛ loo ni ehaà nɔ kɔkɔɔkɔ.

² Yehowa gbɛjianɔtoo lɛ kɛ tsɔsemɔ haa koni etsɔɔ gbɛ ni wɔɔtsɔ nɔ wɔfee la hiɛlɔi kpakpai. Kɛ wɔnyiɛ ŋaawoo kɛ gbɛtsɔɔmɔ ni wɔnine shɛɔ nɔ lɛ sɛɛ kpaakpa lɛ, wɔbaanyɛ wɔha mɛi sɔrɔtoi fɛɛ ale Maŋtsɛyeli anɔkwale lɛ he sane. (1 Tim. 4:6) Ni wɔɔtsu nii akɛ la hiɛlɔi lɛ biii ni wɔwie anɔkwale lɛ he yɛ hegbɛi fɛɛ ni wɔɔna lɛ pɛ mli, shi ni wɔɔhiɛ jeŋba kpakpa mli akɛ Kristofoi hu. Anyɛŋ awie wɔ Nɔkwɛmɔ Nɔ Feelɔ lɛ jeŋba lɛ he efɔŋ. Akɛ esɛɛnyiɛlɔi lɛ, esa akɛ wɔtsɔɔ akɛ Kristojamɔ ji wɔ daa gbi shihilɛ gbɛ. (Efes. 5:9; Tito 2:7, 8, 10) Esa akɛ wɔtsu nitsumɔi kpakpai ni mɛi krokomɛi baanyɛ ana lɛ he nii, koni etsirɛ amɛ ni amɛwo Nyɔŋmɔ hiɛ nyam.—Mat. 5:16.

³ Odasefonyo ko kɛ nibimɔ ko ni ekaaa kpe beni eyaa shia kɛ shia lɛ. Nuu ni yɔɔ shia lɛ mli lɛ kɛ eŋa fɛɛ he miiye waa, shi esa akɛ amɛkɛ shika ko ayato bank. Amɛbi kɛji Odasefonyo lɛ baanyɛ atsu he nii. Ekpɛlɛ nɔ ni aha lɛ shika $2,000 koni ekɛyato bank! Beni etee eba lɛ, ebi akɛ: “Te fee tɛŋŋ nyɛhe mi nyɛye be mli ni nyɛleee mi po lɛ?” Aha hetoo akɛ: “Wɔle, ni mɔ fɛɛ mɔ hu le akɛ Yehowa Odasefoi pɛ ji mɛi ni abaanyɛ ahe amɛ aye.” Kwɛ bɔ ni wɔɔnyɛ wɔda shi akɛ Biblia mli jeŋba he shishitoo mlai ni wɔkɛ wɔhe kpɛtɛɔ he gbagbalii lɛ kɛ bulɛ ni woɔ Nyɔŋmɔ hiɛ nyam nɛkɛ baa!

⁴ Klɛŋklɛŋ klasbii anitsɔɔlɔ ko kɛɛ eklasbii lɛ nɔ hewɔ ni Odasefonyo nikaselɔ ni eye afii ekpaa lɛ sumɔɔɔ ni edikiɔ Halloween mfonirii amli lɛ. Tsɔɔlɔ lɛ kɛɛ ena ehe miishɛɛ waa akɛ efee ekãa akɛ eeeha esoro lɛ yɛ nɔ ni eheɔ eyeɔ lɛ hewɔ. Tsɔɔlɔ lɛ wie akɛ, kɛ wɔheɔ nɔ ko wɔyeɔ jogbaŋŋ lɛ, esa akɛ wɔna ekãa ni wɔfã he. Tsɔɔlɔ lɛ pɛi lɛ diɛŋtsɛ ehemɔkɛyelii amli nakai gbɛkɛ lɛ, ni ehe bahia ni ekpɛlɛ nɔ akɛ, enaaa ekãa ni tamɔ nakai nɔŋŋ yɛ ehemɔkɛyelii ahe. Etswa adafi yɛ gbi ni nyiɛ sɛɛ lɛ nɔ akɛ ehaŋ eklasbii lɛ kɛ amɛhe awo gbijurɔyelii, ni lɛ diɛŋtsɛ lɛ eheee ekomɛi eyeee lɛ ni baaba wɔsɛɛ ko lɛ mli dɔŋŋ!

⁵ Yehowa webii lɛ miishwe ni amɛha amɛla atso, ni he ni amɛyɔɔ lɛ kɔɔɔ he eko. Gbekɛbii ajeŋba he nɔkwɛmɔ nɔ ni yaa nɔ yɛ skul lɛ esa skulbii kɛ tsɔɔlɔi ahiɛ jogbaŋŋ. Odasefoi ni jeee gbekɛbii lɛ ajeŋba fɛfɛo ni amɛjieɔ lɛ kpo yɛ akutso lɛ mli lɛ haa mɛi krokomɛi wieɔ Maŋtsɛyeli shɛɛ sane lɛ he ekpakpa. Odase ni ayeɔ trukaa yɛ shihilɛi sɔrɔtoi babaoo mli lɛ gbalaa mɛi ni yeɔ anɔkwa ni sumɔɔ ni amɛkase babaoo lɛ. Ekãa kɛ anɔkwayeli ni wɔjieɔ lɛ kpo yɛ wɔ nitsumɔ he lɛ po yeɔ odase. Hɛɛ, wɔbaanyɛ wɔtee miishɛɛ shi yɛ anɔkwale lɛ he, ni he fɛɛ he ni wɔyɔɔ loo nɔ ni wɔfeɔ lɛ kɔɔɔ he eko.

⁶ Kɛ wɔtee nɔ wɔkɛ wɔhiɛ ma wɔ Nɔkwɛmɔ Nɔ Feelɔ kpeteŋkpele lɛ shihilɛ gbɛ ni kpa ko bɛ he lɛ nɔ lɛ, wɔbaanyɛ wɔha ŋaa gbɛi ni wɔkɛtsuɔ nii akɛ ekaselɔi lɛ ahi jogbaŋŋ diɛŋtsɛ. Enɔkwɛmɔ nɔ lɛ kasemɔ baaha wɔla lɛ ‘atso aha mɛi fɛɛ.’—Mat. 5:15; 1 Pet. 2:21.