Sɛɛsaramɔi ni Yeɔ Omanye Biɔ Nitsɔɔmɔ ni Mɔɔ Shi
1 Sɛɛsaramɔi ji wɔ sɔɔmɔ nitsumɔ lɛ fa ko ni he hiaa ni yɔɔ miishɛɛ. Mɛni hewɔ esa akɛ wɔkɛ hiɛdɔɔ aya mɛi ni yɔɔ wiemɔ lɛ he miishɛɛ lɛ aŋɔɔ ekoŋŋ lɛ? Nɛkɛ kaselɔ-feemɔ nitsumɔ nɛɛ haa aleɔ Yehowa gbɛi lɛ ni ewoɔ ehiɛ nyam, ni eyeɔ ebuaa mɛi ni sheɔ Nyɔŋmɔ gbeyei lɛ ni amɛbana wala gbɛ lɛ. (2 Kor. 2:17–3:3) Esa akɛ le ni wɔle akɛ Yehowa gbɛi lɛ hetsemɔ kɛ mɛi krokomɛi awala he baa sane lɛ mli lɛ atsirɛ wɔ ni wɔsaa wɔhe jogbaŋŋ dani wɔya.
2 Tsɔɔlɔ kpakpa yeɔ ebuaa nikaselɔ lɛ koni etswa ema shishitoo ni eyɔɔ momo lɛ nɔ. Taakɛ bɔ ni skul tsɔɔlɔ tswaa emaa nilee ni nikaselɔi lɛ naa daa gbi lɛ nɔ lɛ, esa akɛ wɔ hu wɔtsa nɔ yɛ wɔ klɛŋklɛŋ saramɔ lɛ sɛɛ, ni wɔwie saneyitso ni wɔsusu he klɛŋklɛŋ lɛ nɔŋŋ he. Enɛ haa enyɛɔ esusuɔ saji ahe kɛtsaa nɔ, ni niiahesusumɔ lɛ yaa hiɛ.
3 Kɛ oku osɛɛ yɛ be mli ni okɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ eha lɛ, ekolɛ obaana akɛ enɛ mɔɔ shi jogbaŋŋ:
◼ “Beni miba biɛ nyɛsɛɛ lɛ, wɔsusu ‘naagbee gbii’ ni atsi tã yɛ Biblia lɛ mli lɛ, kɛ nɔ ni etsɔɔ kɛha wɔ lɛ he. Ekolɛ ooosusu akɛ te wɔfee tɛŋŋ wɔle akɛ wɔyɛ naagbee gbii amli. (2 Tim. 3:1) Yesu kaselɔi lɛ miitao waa akɛ amɛaale nakai sanebimɔ lɛ hetoo. [Kanemɔ Mateo 24:3.] Yɛ ehetoohamɔ mli lɛ, Yesu tsɔɔ shihilɛi ni wɔnaa ni ebɔle wɔ ŋmɛnɛ lɛ. Ekomɛi ji haomɔ kɛ awuiyeli ni wɔnako eko dã.” Gbalamɔ ejwɛŋmɔ kɛya okadi lɛ he sane ni asusu he yɛ kukuji 3 kɛ 4 yɛ baafa 19 lɛ nɔ. Kɛ ejie miishɛɛ kpo saŋŋ yɛ he lɛ, no lɛ tsɔɔmɔ lɛ okadi lɛ he saji krokomɛi ni yɔɔ kukuji 5 kɛyashi 8 yɛ baafa 20 lɛ. Kɛɛmɔ lɛ akɛ obaasumɔ ni oku osɛɛ ni obaha saji ni abi yɛ wolo lɛ hiɛ lɛ ahetoo.
4 Kɛ oyaadi miishɛɛ ni ayɔɔ yɛ “Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu?” he lɛ sɛɛ lɛ, obaanyɛ okɛɛ akɛ:
◼ “Miisumɔ waa ni wɔtsa wɔ sanegbaa ni kɔɔ yiŋtoo ni yɔɔ wɔshihilɛ sɛɛ he lɛ nɔ. Misusuɔ akɛ mikɛ bo fɛɛ kpɛlɛɔ nɔ akɛ Nyɔŋmɔ to eyiŋ akɛ wɔhi shikpɔŋ nɛɛ nɔ yɛ miishɛɛ kɛ toiŋjɔlɛ shihilɛ mli, shi jeee yɛ haomɔ shihilɛ ni mli wa ni wɔyɔɔ mli ŋmɛnɛ nɛɛ mli. Ani osusuɔ akɛ ebaaha eshiwoo lɛ aba mli?” Ŋmɛɛ gbɛ ni ejie naa. Kanemɔ Yesaia 55:11, koni no sɛɛ lɛ nyɛsusu otii ni yɔɔ kukuji 25 kɛyashi 27, yɛ baafa 30 lɛ ahe. Jiemɔ teemɔŋ Biblia kasemɔ yi oha lɛ akɛ gbɛ ni hi fe fɛɛ ni eeetsɔ nɔ ena yiŋtoo kpakpa yɛ eshihilɛ mli.
5 Kɛ oyaadi tsutsu miishɛɛ ni ana yɛ “Na Wala Mli Ŋɔɔmɔ yɛ Shikpɔŋ nɔ Kɛya Naanɔ!” wolo lɛ he lɛ sɛɛ lɛ, obaanyɛ okɛtsɔɔ mɔ lɛ ekoŋŋ ni okɛɛ akɛ:
◼ “Wɔgba jeŋ fɛfɛo ni afee he mfoniri yɛ wolo nɛɛ sɛɛ lɛ he sane be ko. Miisumɔ ni matsɔɔ bo nɔ hewɔ ni Yesu Kristo mli hemɔkɛyeli he hiaa kɛhaa gbɔmɛi ni taoɔ ni amɛhi jɛmɛ lɛ.” Gbelemɔ mfoniri 41 lɛ, ni okane Yesaia 9:6. Wiemɔ mfoniri 62 he, ni okane Yohane 3:16, ni oma bɔ ni toiboo he hiaa lɛ nɔ mi. Tsɔɔmɔ lɛ akɛ Yehowa Odasefoi miiye kɛmiibua gbɔmɛi ni amɛle bɔ ni amɛaafee amɛjie hemɔkɛyeli kpo kɛtsɔ Biblia lɛ kasemɔ, kɛ mɔdɛŋ ni amɛaabɔ ni amɛhi shi yɛ eŋaawoo naa lɛ nɔ.
6 Yɛ sɛɛsaramɔ fɛɛ sɛɛsaramɔ sɛɛ lɛ, susumɔ bɔ ni ofee lɛ oha lɛ he, kɛ yiŋtoo akɛ obaaha bɔ ni emɔɔ shi ehaa lɛ aya hiɛ. Bi ohe akɛ: Ani misáa nɔ ko pɔtɛɛ ni mikɛ lɛ yaawie he? Ani mitee nɔ migbala ejwɛŋmɔ kɛba Biblia lɛ nɔ? Ani mitswa mima shishitoo nɔ̃ ni mitswa beni mitee eŋɔɔ klɛŋklɛŋ lɛ nɔ? Ani mito miwiemɔ lɛ he gbɛjianɔ bɔ ni ebaanyɛ etsa nɔ ni etsɔ Biblia mli nikasemɔ? Kɛ oha hetoo kpakpa lɛ, emaa nɔ mi akɛ oobɔ mɔdɛŋ ni ofee Nyɔŋmɔ Wiemɔ lɛ he tsɔɔlɔ kpakpa.