Feemɔ “Ekãa yɛ Nitsumɔi Kpakpai Ahe” yɛ April Mli!

¹ Nyɛsɛɛ afi lɛ aye odase ni eko bako nakai dã beni aja Maŋtsɛyeli Sane No. 34 dɛhiɛmɔ woji lɛ yɛ jeŋ fɛɛ lɛ. Asafoŋ shiɛlɔi kɛ gbɛgbalɔi fɛɛ kɛ amɛhe wo nitsumɔ ni kanyaa mɔ nɛɛ mli kɛ ekãa. Ani ofata amɛhe? Kɛ ofata he lɛ, ŋwanejee ko bɛ he akɛ ona nakai tafãa ni sa kadimɔ ni okɛ ohe wo mli lɛ mli miishɛɛ waa diɛŋtsɛ. Amrɔ nɛɛ, ekolɛ obaasusu sane he nɛkɛ akɛ, Mɛɛ ‘nitsumɔ kpakpa’ yɔɔ kɛha wɔ afi nɛɛ?—Tito 2:14, NW.

² Yɛ April kɛ May klɛŋklɛŋ gbii lɛ amli lɛ, wɔbaana miishɛɛ akɛ wɔɔja Awake! wolo tɛtrɛɛ krɛdɛɛ ko ni ji April 22, 1996 nɔ lɛ ni wieɔ “Beni Tai Bɛ Dɔŋŋ” lɛ he lɛ. Akɛni shiatsɛmɛi babaoo diɛŋtsɛ baanya saneyitso nɛɛ he hewɔ lɛ, wɔbaabɔ mɔdɛŋ ni wɔja wolo tɛtrɛɛ lɛ babaoo bɔ ni wɔɔnyɛ. Akɛni emli sane lɛ he miihia hewɔ lɛ, esa akɛ akɛ Awake! nɛɛ atsu nii yɛ April kɛbote May mli, kɛyashi beni eeetã kwraa.

³ Oti ni Ma Wɔhiɛ—Shiɛlɔi Fɛɛ ni Baana Mli Gbɛfaŋnɔ: Ebaafee nɔ ni woɔ mɔ hewalɛ waa diɛŋtsɛ akɛ shiɛlɔ fɛɛ shiɛlɔ ni yɔɔ maŋ nɛɛ mli lɛ aaanyɛ ana shiɛmɔ nitsumɔ lɛ mli gbɛfaŋnɔ yɛ April. Akɛni Kristo gbele lɛ Kaimɔ lɛ yɛ wɔ jwɛŋmɔ mli waa hewɔ lɛ, eka shi faŋŋ akɛ wɔbaasumɔ ni wɔjie hiɛsɔɔ kpo wɔtsɔɔ Nyɔŋmɔ nijuji lɛ kɛtsɔ “yijiemɔ afɔle” ni wɔkɛaaha tɛɛ lɛ nɔ yɛ shiɛmɔ nitsumɔ lɛ mli.—Heb. 13:15.

⁴ Esa akɛ abɔ mɔdɛŋ waa koni ayoo asafo lɛ mli bii ateŋ mɔ fɛɛ mɔ hiamɔ nii, koni mɔ fɛɛ mɔ anyɛ ekɛ ekãa ana shiɛmɔ nitsumɔ lɛ mli gbɛfaŋnɔ yɛ April. (Rom. 15:1) Esa akɛ woloŋ nikasemɔ nɔkwɛlɔi ale mɛi ni yɔɔ amɛ kuu lɛ mli lɛ ashihilɛi lɛ jogbaŋŋ kɛmɔ shi, ni kɛ ehe miihia lɛ, amɛkɛ yelikɛbuamɔ kpakpa aha. Ani tsɔne mlitamɔ he miihia mɔ ko? Namɔ baanyɛ ekɛha? Ani amɛteŋ mɛi komɛi sheɔ gbeyei loo amɛsusuɔ waa akɛ aakwɛ amɛ? Ani shiɛlɔi ni he esa waa baanyɛ afata amɛhe kɛtsu nii? Ni mɛi ni eka tsu mli loo mɛi ni he yeɔ hu? Ani amɛbaanyɛ amɛkɛ amɛhe awo trukaa odaseyeli, woloŋmaa, loo nitsumɔ kroko ni woɔ yibii mli?

⁵ Mɛi ni ekpa shiɛmɔyaa lɛ anine shɛɔ mumɔŋ hewalɛwoo nɔ daa, ni ekolɛ ebaatsirɛ amɛ ni amɛkɛ amɛhe awo shiɛmɔ nitsumɔ lɛ mli shikome ekoŋŋ. Awake! krɛdɛɛ ni akɛbaafa ta lɛ baaha amɛna hegbɛ ni hi jogbaŋŋ koni amɛfee ekãa ekoŋŋ.

⁶ Tsɔsemɔ Gbekɛbii ni Amɛna Mli Gbɛfaŋnɔ: Yehowa Odasefoi abii babaoo efata amɛfɔlɔi ahe kɛtee shia kɛ shia afii abɔ, eyɛ mli akɛ amɛsɔmɔɔɔ lolo akɛ shiɛlɔi ni abaptisiko amɛ. Ani be eshɛ amrɔ nɛɛ akɛ amɛaaje shishi? Ani amɛtsui tsirɛɔ amɛ ni amɛfeɔ klalo akɛ amɛkɛ amɛhe aaawo shia-kɛ-shia nitsumɔ lɛ mli kɛmɔ shi? Esa akɛ weku yitsei atao be yɛ weku Biblia mli nikasemɔ lɛ mli koni amɛye amɛbua amɛbii ni sa lɛ ni amɛfee shiɛmɔ wiemɔ ni baasa afii ni amɛteŋ mɔ fɛɛ mɔ eye kɛ amɛ nyɛmɔ. Amɛteŋ mɛi ni edara lɛ baanyɛ ahala sanebimɔ ni teeɔ sanegbaa shi ni amɛkɛaatee shiatsɛ lɛ miishɛɛ shi, koni no sɛɛ lɛ amɛtsɔɔ hetoo lɛ yɛ wolo tɛtrɛɛ lɛ mli. Gbekɛbii bibii baanyɛ amɛkɛ wiemɔi fioo ko pɛ aye odase ni mɔɔ shi. Akɛ nɔkwɛmɔ nɔ lɛ, amɛbaanyɛ amɛwo shiatsɛ lɛ hewalɛ ni “ekane wolo tɛtrɛɛ krɛdɛɛ ko ni akɛhaa yɛ jeŋ fɛɛ yɛ nyɔŋ nɛɛ nɔ lɛ.” Nyɛkwɛa koni nyɛkɛ ŋaawoi ni akɛaaye shitee-kɛ-woo wiemɔi ni fɔɔ baa lɛ nɔ lɛ afata he akɛ nyɛweku lɛ hesaamɔ lɛ fã. Obaana saji kpakpai komɛi yɛ Reasoning wolo lɛ mli. Yɛ niyeli bei amli kɛ bei krokomɛi ni sa mli lɛ, wo weku mli bii lɛ hewalɛ ni amɛgba niiashikpamɔi ni amɛna yɛ shiɛmɔ nitsumɔ mli lɛ.

⁷ Biblia Mli Nikaselɔi ni Sa lɛ Tsuɔ Nitsumɔ ni Yesu Tsu Lɛ: Yesu haaa enitsɔɔmɔ lɛ akɔ jamɔi amli hemɔkɛyeli saji ahe nitsɔɔmɔ pɛ he. Efata enikaselɔi lɛ ahe yɛ shiɛmɔ nitsumɔ lɛ mli ni etsɔɔ amɛ gbɛ ni amɛaatsɔ nɔ amɛshiɛ. (Luka 8:1; 10:1-11) Te shihilɛ lɛ yɔɔ tɛŋŋ ŋmɛnɛ? Aafee Biblia mli nikasemɔi fe 90,000 yɛ Ghana. Ŋwanejee ko bɛ he akɛ, kɛ awo amɛ hewalɛ fioo ko pɛ lɛ nɛkɛ nikaselɔi nɛɛ baanyɛ aya amɛhiɛ fioo yɛ amɛ tsɔsemɔ lɛ mli, ni amɛhe asa ni amɛsɔmɔ akɛ shiɛlɔi ni abaptisiko amɛ yɛ April.

⁸ Kɛ oofee Biblia mli nikasemɔ lɛ, susumɔ sanebimɔi nɛɛ ahe: Ani nikaselɔ lɛ miiya ehiɛ, bɔ ni kɛ afii ni eye kɛ enyɛmɔ kpaa gbee? Ani ekɛ mɛi krokomɛi ebɔi ehemɔkɛyeli lɛ he sanegbaa trukaa? Ani eewo “gbɔmɔ hee” lɛ? (Kol. 3:10) Ani eshɛɔ taomɔ nii kɛha shiɛlɔi ni abaptisiko amɛ lɛ ni atsɔɔ yɛ Our Ministry wolo lɛ baafai 97 kɛyashi 99 lɛ he? Kɛ oheɔ oyeɔ akɛ eshɛ he lɛ, mɛni hewɔ okɛ lɛ susuuu sane lɛ he? Nɔ ni he hiaa nikaselɔi komɛi pɛ ji ni aaafɔ amɛ nine tɛɛ ni amɛkɛ amɛhe abawo nitsumɔ lɛ mli. Shi kɛlɛ, kɛ nikaselɔ lɛ miisumɔ lɛ, no lɛ ebaahi ni onukpai asɛinɔtalɔ lɛ atsɔ hiɛ ato gbɛjianɔ taakɛ afɔɔ feemɔ lɛ koni onukpai enyɔ kɛ lɛ agba he sane. Yɛ gbɛ kroko nɔ lɛ, ekolɛ nɔ ko miitsi nikaselɔ lɛ naa. Ekolɛ onukpai lɛ ekome baanyɛ afata ohe yɛ Biblia mli nikasemɔ lɛ mli ni eha nikaselɔ lɛ anyɛ atsɔɔ bɔ ni esusuɔ yɛ anɔkwale lɛ he yɛ gbɛ ni waaa kɛha lɛ lɛ nɔ. Beni ebo nɔ ni nikaselɔ lɛ yɔɔ kɛɛmɔ toi sɛɛ lɛ, ekolɛ onukpa lɛ baanyɛ ekɛ ŋaawoi kpakpai aha, kɛfata Ŋmalɛ naa yelikɛbuamɔ he.

⁹ ‘Hemɔ Be lɛ’ Koni Ofee Gbɛgbalɔi Awalɔ: Hiɛsɔɔ ni ayɔɔ kɛha kpɔmɔ nɔ̃ lɛ tsirɛɔ mɛi akpei abɔ daa afi yɛ Kaimɔ be lɛ mli koni ‘amɛhe be’ ni amɛtsɔmɔ gbɛgbalɔi awalɔi. (Efe. 5:15-17) Eyɛ mli akɛ afɔleshãai komɛi ahe miihia moŋ, shi nyɔmɔwoo ni jɛɔ mli baa lɛ fa naakpa. Obalahii kɛ obalayei bibii ni sa yijiemɔ lɛ naa skul gbɛhamɔ he sɛɛ koni amɛkɛfee gbɛgbalɔi awalɔi. Onukpai ni kɛ amɛbe-fɛɛ tsuɔ nii gbɛkɛ kɛ otsi lɛ naagbeei amli lɛ naa nitsumɔ nɛɛ nɔŋŋ mli gbɛfaŋnɔ kɛmɔɔ shi. No hewɔ lɛ, weku lɛ mli bii fɛɛ ŋɔɔ hegbɛ lɛ koni amɛkɛ amɛhe awo gbɛgbalɔi awalɔ nitsumɔ lɛ mli kutuu! Yɛ asafoi komɛi amli lɛ onukpai kɛ asafoŋ sɔɔlɔi fɛɛ kɛ amɛ ŋamɛi kɛ amɛhe eha akɛ gbɛgbalɔi awalɔi. Akɛni amɛ nɔkwɛmɔ nɔ ni ekãa yɔɔ mli lɛ ekanya mɛi krokomɛi hewɔ lɛ, amɛ hu amɛnyiɛ sɛɛ pɛpɛɛpɛ, ni ehaa asafo lɛ mli bii babaoo diɛŋtsɛ sɔmɔɔ akɛ gbɛgbalɔi awalɔi yɛ April.

¹⁰ Kɛ obaanyɛ ofee gbɛgbalɔi awalɔ loo onyɛɛɛ ofee lɛ, taomɔ gbɛi ni oootsɔ nɔ oha osɔɔmɔ lɛ aya hiɛ yɛ shiɛmɔ nitsumɔ lɛ mli yɛ April. Okɛ oti ko ama ohiɛ, nɔ ni baabi ni omia ohiɛ fioo koni oshɛ he, shi ha efee nɔ ni anyɛɔ ashɛɔ he. Ebaajɔɔ suɔmɔ ni oyɔɔ akɛ “oootsu nii ni akɛ bo atsu nii kwraa” yɛ Yehowa sɔɔmɔ mli bɔ ni oshihilɛ baaŋmɛ gbɛ lɛ nɔ.—2 Kor. 12:15.

¹¹ Kpeei Kɛha Shiɛmɔ Nitsumɔ: Esa akɛ ato kpeei kɛha shiɛmɔ nitsumɔ lɛ he gbɛjianɔ gbi fɛɛ gbi ni akɛbaafã Awake! lɛ he tafaa, yɛ be ni baaha aje shiɛmɔ nitsumɔ lɛ shishi mra lɛ mli. Esa akɛ ato gbɛjianɔ hu kɛha gbɛkɛ odaseyeli. Shiɛlɔi pii kɛ amɛhe baawo shiɛmɔ nitsumɔ lɛ mli yɛ otsi lɛ naagbeei amli, no hewɔ lɛ esa akɛ asafoi lɛ ato kpeei kɛha shiɛmɔyaa Hɔɔ leebi kɛ shwane fɛɛ he gbɛjianɔ, yɛ be ni akɛbaaja Awake! krɛdɛɛ lɛ fɛɛ mli.

¹² Esa akɛ mɛi ni kwɛɔ kpeei kɛha shiɛmɔ nitsumɔ lɛ nɔ lɛ akwɛ ni ana shikpɔŋkuku ni da. Esa akɛ atsu nii yɛ shikpɔŋkuku ni atsuko nii yɛ mli nyɛsɛɛ nɛɛ lɛ mli klɛŋklɛŋ. Shi kɛlɛ, esaaa akɛ atsuɔ nii yɛ shikpɔŋkuku ni akɛwoko mɔ ko dɛŋ ni Asafo lɛ kwɛɔ nɔ lɛ mli ni abiko hegbɛ kɛjɛko Asafo lɛ dɛŋ. Ani oyɛ shikpɔŋkuku kome loo nɔ ni fa fe nakai ni atsuko mli nii nyɛsɛɛ nɛɛ? Kɛ yelikɛbuamɔ he baahia bo kɛha amɛmli nitsumɔ yɛ tafaa lɛ mli lɛ, no lɛ okɛ sɔɔmɔ nɔkwɛlɔ loo nyɛmi nuu ni kwɛɔ shikpɔŋkukuji anɔ lɛ agba he sane, ni ebaaŋɔɔ amɛnaa akɛ amɛaato gbɛjianɔ koni aye abua bo.

¹³ Woji Tɛtrɛbii Enyiɛ Okɛbaaha? Aashi nakai sanebimɔ lɛ aaha mɔ fɛɛ mɔ ni eha hetoo. Be mli ni otsɔɔ woji tɛtrɛbii ayibɔ ni obaanyɛ okɛha yɛ tafaa lɛ mli lɛ, susumɔ shikpɔŋkuku pɔtɛɛ ni obaatsu nii yɛ mli, afii ni oye, ogbɔmɔtsoŋ hewalɛ, be ni obaanyɛ okɛwo nitsumɔ lɛ mli, kɛ nibii krokomɛi ahe. Shi, kadimɔ wiemɔ ni akɛkaiɔ wɔ ni akɛha yɛ January 1, 1994 Buu-Mɔɔ ni je kpo lɛ mli lɛ ni ji: “Ákɛ ŋaawoo lɛ, shiɛlɔi baanyɛ aná oti ko ni ji woji tɛtrɛbii 10 daa nyɔŋ nɔ, taakɛ amɛshihilɛ baaŋmɛ gbɛ; gbɛgbalɔi baanyɛ apele 90 he.” Ani obaanyɛ oshɛ oti ni tamɔ nakai nɔŋŋ he?

¹⁴ Onukpai—Gbɛjianɔtoo Kpakpa He Miihia: Nyɛkwɛa koni kɛ eeehi lɛ, akɛ Awake! krɛdɛɛ nɛɛ atsu nii yɛ asafo lɛ shikpɔŋkuku lɛ fɛɛ mli. Esa akɛ akɛ ŋaa atsu nii yɛ nitsumɔ hei ashikpɔŋkukuji fɛɛ ni akɛha asafo lɛ ni etsu nii yɛ mli lɛ amli. Esa akɛ mɛi ni baatsu nii yɛ mli lɛ asaa amɛhe jogbaŋŋ ni amɛhesaamɔ he atse. Shiɛmɔ wiemɔ kakadaŋŋ he ehiaaa. Kɛ oobɛŋkɛ nitsulɔ ko lɛ, obaanyɛ okɛɛ akɛ bei pii lɛ onaaa nitsulɔi yɛ shia, ni no hewɔ lɛ oba enitsumɔ he lɛ ni okɛ wiemɔ ko ni eka shi faŋŋ akɛ ebaanya he lɛ abaha lɛ. Kɛkɛ lɛ obaanyɛ okɛ lɛ agba wolo tɛtrɛɛ lɛ mli oti krɛdɛɛ ko he sane kuku. Esa akɛ ato woji tɛtrɛbii ni akɛbaatsu nii yɛ gbɛjegbɛ nɔ odaseyeli mli yɛ asafo lɛ shikpɔŋkuku lɛ mli lɛ hu he gbɛjianɔ jogbaŋŋ. Gbɛ ni mɔɔ shi fe fɛɛ ni abaatsɔ nɔ akɛ he awo gbɛjegbɛ nɔ nitsumɔ mli lɛ ji ni otsɔ hiɛ obɛŋkɛ mɛi ni hoɔ lɛ, fe nɔ ni ooomɛ ni amɛbɛŋkɛ bo. Akɛni maŋbii baakwɛ bo jogbaŋŋ hewɔ lɛ, esa akɛ okwɛ jogbaŋŋ ni owo atade ni yɔɔ nyam. Ekolɛ hei krokomɛi hu yɛ nyɛ shikpɔŋkuku lɛ mli ni abaanyɛ atsu nii yɛ mli yɛ tafaa lɛ mli, tamɔ kɔɔyɔŋ lɛji adaamɔ hei, helatsamɔ hei, hei ni akɛ tsɔnei mamɔɔ, shwɛmɔ hei, kɛ gbɔiatoo hei. Esa akɛ onukpai akuu lɛ atsɔɔ gbɛjianɔ ni sa ni abaanyɛ ato kɛha odaseyeli yɛ nɛkɛ hei nɛɛ yɛ nyɛ asafo lɛ shikpɔŋkuku lɛ mli.

¹⁵ Yehowa ji nitsulɔ ni etɔɔɔ lɛ. (Yoh. 5:17) Lɛ ebɔ ŋwɛi kɛ shikpɔŋ kɛ agbɛnɛ kwɛ̃ɛ nibii kɛ kooloi lɛ hu; shi etee nɔ etsu nii aahu kɛyashi beni ebɔ nɔ ko ni yɔɔ nyam—gbɔmɔ. Anɔkwale ni eji akɛ wɔyɛ wala lɛ ji nɔ ni jɛ suɔmɔ ni Nyɔŋmɔ yɔɔ akɛ eeetsu nii lɛ mli kɛba tɛ̃ɛ. Akɛ “Nyɔŋmɔ kaselɔi” lɛ, esa akɛ suɔmɔ ni wɔyɔɔ kɛha lɛ lɛ atsirɛ wɔ ni “wɔfee ekãa yɛ nitsumɔi kpakpai ahe.” (Efe. 5:1; Tito 2:14) Akɛni Yehowa ji mɔ ni sa akɛ enine ashɛ wɔ mɔdɛŋbɔɔ ni fe fɛɛ nɔ ni agbɛnɛ suɔmɔ ni wɔyɔɔ akɛ wɔɔwo yibii lɛ ji su ko ni anaa yɛ mɔ ni feɔ ekãa lɛ he hewɔ lɛ, esa akɛ wɔna he miishɛɛ akɛ wɔɔtsu nitsumɔ ni hi jogbaŋŋ yɛ shiɛmɔ nitsumɔ lɛ mli. Shi kɛlɛ, Yehowa hiɛ sɔɔ afɔle fɛɛ ni wɔshaa wɔhaa lɛ lɛ, ni wɔ nitsumɔ lɛ efeŋ yaka kɔkɔɔkɔ. (1 Kor. 15:58) No hewɔ lɛ nyɛhaa wɔkɛ tsui ni tsɔɔ hiɛsɔɔ atsua nii ni wɔkɛ wɔhe awo nitsumɔ lɛ mli kɛ ekãa yɛ April, kɛ nɔmimaa akɛ wɔbaana Yehowa nɔkpɛlɛmɔ kɛ jɔɔmɔ kɛ omanyeyeli babaoo!