Ani Wɔbaanyɛ Wɔha April 2000 Afee Nyɔŋ ni Hi Fe Fɛɛ?
1 April 19, Shɔ gbɛkɛ baafee be ni he hiaa waa yɛ wɔsɔɔmɔ afi lɛ mli. Yɛ be mli ni hulu lɛ nyɔɔ shi blɛoo yɛ je lɛŋ he fɛɛ he yɛ nakai gbi lɛ nɔ lɛ, Yehowa Odasefoi asafoi lɛ fɛɛ kɛ kui ni yɔɔ jeŋ fɛɛ lɛ baaye Kristo gbele lɛ Kaimɔ lɛ he gbi jurɔ. He fɛɛ he ni wɔyɔɔ lɛ, Yesu Kristo afɔleshaa he gbi jurɔ lɛ ni wɔɔye lɛ baafee nifeemɔ ni fe fɛɛ ni atsuɔ he nii yɛ afi lɛ mli. Akadi be ni akɛbaaye Kaimɔ lɛ he gbi jurɔ lɛ yɛ April nyɔŋ lɛ nɔ yɛ 2000 Calendar of Jehovah’s Witnesses (Yehowa Odasefoi 2000 Kalenda) lɛ nɔ.
2 April nyɔŋ lɛ mli gbii lɛ fɛɛ kɛ hegbɛ ni yɔɔ naakpɛɛ haa koni wɔkɛjie susuma muu fɛɛ hiɛsɔɔ ni wɔyɔɔ kɛha Yehowa lɛ kpo wɔtsɔɔ yɛ mlihilɛ ni esaaa ni ejie etsɔɔ wɔ kɛtsɔ e-Bi lɛ afɔleshaa lɛ nɔ lɛ hewɔ. Yɛ mɛɛ gbɛ nɔ? Bɔfo Paulo ŋma akɛ: “Kristo suɔmɔ lɛ nyɛɔ wɔnɔ, ni wɔkojoɔ nɛkɛ, akɛ, kɛ́ mɔ kome gbo mɛi fɛɛ yigbele lɛ, belɛ mɛi lɛ fɛɛ egboi. Ni egbo mɛi fɛɛ yigbele, koni mɛi ni hiɛ kãmɔ lɛ ahiɛ akakãmɔ miiha amɛ diɛŋtsɛ amɛhe dɔŋŋ, shi moŋ amɛhiɛ akãmɔ aha mɔ ni gbo ni atee lɛ shi ekoŋŋ aha amɛ lɛ.” (2 Kor. 5:14, 15) Hɛɛ, yɛ April mli lɛ wɔbaanyɛ wɔtsɔɔ akɛ wɔhiii shi wɔhaaa wɔhe, shi moŋ wɔmiihi shi kɛha mɔ ni gbo eha wɔ lɛ, ni wɔha nyɔŋ nɛɛ afee nɔ ni fe fɛɛ ákɛ Maŋtsɛyeli lɛ sɔɔlɔi!
3 Okɛ Owao Awo Wolo Shishi Koni Osɔmɔ akɛ Gbɛgbalɔi Awalɔ yɛ April Mli: Bɔfo Paulo fee nɔkwɛmɔnɔ ni sa kadimɔ waa efɔ̃ shi beni ekɛɛ akɛ: “Mibuuu enɛɛmɛi ekomefolo, ni miwala hu mibuuu akɛ ejara wa yɛ mihiɛ, beni afee ni mikɛ miishɛɛ agbe migbɛnyiɛmɔ lɛ kɛ sɔɔmɔ ni miná yɛ Nuŋtsɔ Yesu dɛŋ akɛ miye Nyɔŋmɔ duromɔ sanekpakpa lɛ he odase faŋŋ lɛ naa.” (Bɔf. 20:24) Wɔ hu wɔyɛ hegbɛ ni tamɔ nakai akɛ wɔyeɔ Yehowa Nyɔŋmɔ he odase jogbaŋŋ. Bɔni afee ni wɔtsu enɛ he nii lɛ, wɔbaasumɔ ni wɔha April nyɔŋ lɛ afee nɔ ni hi fe fɛɛ kɛtsɔ gbɛgbalɔi awalɔ nitsumɔ lɛ ni wɔkɛ wɔhe aaawo mli lɛ nɔ!
4 Akɛni ehiɛ otsi naagbee gbii enumɔ hewɔ lɛ, April 2000 baafee nyɔŋ ni hi fe fɛɛ kɛha mɛi pii akɛ amɛkɛ amɛhe aaawo gbɛgbamɔ nitsumɔ lɛ mli. Yɛ March 1997 ni eho lɛ mli beni wɔná gbɛgbalɔi awalɔi ayifalɛ ni fe fɛɛ lɛ, mɛi 5,759 ni kɛ amɛhe wo mli lɛ ji shiɛlɔi fɛɛ oha mlijaa 11. Yɛ afii enyɔ sɛɛ lɛ, shiɛlɔi ayifalɛ ni bu shiɛmɔ nitsumɔ he akɔntaa yɛ April 1999 lɛ etee hiɛ kɛho oha mlijaa 14 he. Enɛ tsɔɔ akɛ wɔbaanyɛ wɔteke tsutsu gbɛgbalɔi awalɔi ayifalɛ ni fe fɛɛ ni wɔná lɛ nɔ kwraa. Kɛfata he lɛ, akɛni agbɛnɛ lɛ, atse ŋmɛlɛtswai ni ataoɔ lɛ nɔ hu hewɔ lɛ, enɛ baaha asafo lɛ mli bii pii kɛ amɛhe awo nɛkɛ sɔɔmɔ nitsumɔ fã nɛɛ mli. Esa akɛ shiɛlɔ fɛɛ shiɛlɔ ni abaptisi lɛ lɛ, kɛ sɔlemɔ asusu nyɛ ni ebaanyɛ ekɛ ehe awo gbɛgbalɔi awalɔ nitsumɔ lɛ mli April nɛɛ aloo enyɛŋ lɛ he.
5 Okɛ April nyɔŋ ni yɔɔ 2000 Calendar lɛ nɔ lɛ atsu nii ni okɛto obe he gbɛjianɔ bianɛ kɛha nyɔŋ ni baa lɛ. Kpɛɛ oyiŋ yɛ gbii ni obaanyɛ okɛtsu nii yɛ shiɛmɔ nitsumɔ lɛ mli lɛ he, ni ofee ŋmɛlɛtswai abɔ ni osusuɔ akɛ obaanyɛ okɛtsu nii yɛ shiɛmɔ nitsumɔ lɛ mli yɛ nyɔŋ lɛ mli lɛ fɛɛ ekome. Okɛ bei ni obaanyɛ okɛtsu nii yɛ shiɛmɔ diɛŋtsɛ kɛ trukaa odaseyeli mli lɛ hu afata he. Kɛ obua ŋmɛlɛtswai lɛ fɛɛ naa lɛ, ani eshɛɔ 50 ni ataoɔ kɛjɛɔ gbɛgbalɔi awalɔi adɛŋ lɛ he fioo? Kɛji akɛ eshɛɛɛ ŋmɛlɛtswai ni ataoɔ lɛ, ani obaanyɛ otsake obe he gbɛjianɔ ni oto lɛ mli koni oná be ni okɛ ohe awo gbɛgbalɔi awalɔ nitsumɔ lɛ mli? Kɛ hoo lɛ, ebiɔ ni okɛ ŋmɛlɛtswaa kome pɛ kɛ minitii 40 atsu nii daa gbi bɔni afee ni oná ŋmɛlɛtswai 50 kɛha nyɔŋ lɛ.
6 Amrɔ nɛɛ ni atse ŋmɛlɛtswai ni ataoɔ yɛ daa gbɛgbalɔi lɛ adɛŋ lɛ hu nɔ hewɔ lɛ, ani osusuɔ be-fɛɛ sɔɔmɔ nitsumɔ lɛ ni okɛ ohe aaawo mli lɛ he? Mɛni hewɔ omɛɔ kɛyashi September dani oje shishi? April baafee nyɔŋ ni hi ni obaanyɛ okɛje shishi! Kɛ́ efeɔ bo akɛ onyɛŋ oná ŋmɛlɛtswai 70 ni ataoɔ kɛjɛɔ daa gbɛgbalɔi adɛŋ lɛ, mɛni hewɔ okɛ ohe wooo gbɛgbalɔi awalɔ nitsumɔ lɛ mli yɛ April mli, ní okɛ oti lɛ ama ohiɛ akɛ okɛ ŋmɛlɛtswai 70 baatsu nii? Kɛ ona akɛ obaanyɛ ofee lɛ, no lɛ, obaaná he miishɛɛ waa akɛ okɛ ohe baaha ni ofata daa gbɛgbalɔi lɛ ahe amrɔ nɔŋŋ.—Kwɛmɔ Our Ministry, baafai 113-114 lɛ mli.
7 Okɛ Ohe Awo Sanekpakpa Jajemɔ Nitsumɔ lɛ Mli Kɛmɔ Shi: Ákɛ shiɛlɔi kɛ gbɛgbalɔi lɛ, anɔkwa suɔmɔ ni wɔ fɛɛ wɔyɔɔ kɛha Nyɔŋmɔ kɛ wɔnanemɛi lɛ tsirɛɔ wɔ koni wɔjɛ wɔsusuma fɛɛ mli wɔfee bɔ fɛɛ bɔ ni wɔɔnyɛ yɛ Yehowa sɔɔmɔ lɛ mli taakɛ wɔ diɛŋtsɛ wɔhewalɛ baanyɛ. (Luka 10:27) Wɔkɛ no feemɔ tsɔɔ akɛ, “wɔgboɔ deŋme ni wɔhaa ajɛɔ wɔ lɛ, ejaakɛ wɔŋɔ wɔhiɛ wɔfɔ̃ Nyɔŋmɔ hiɛkãlɔ lɛ nɔ, mɔ ni ji gbɔmɛi fɛɛ ayiwalaherelɔ, titri lɛ mɛi ni heɔ yeɔ lɛ.” (1 Tim. 4:10) No hewɔ ni esa akɛ wɔkpa gbɛ akɛ mɛi fɛɛ kɛ amɛhe baawo Maŋtsɛyeli nitsumɔ lɛ mli kɛmɔ shi yɛ April mli lɛ.
8 Wɔhiɛ akakpa Yesu ŋaawoo lɛ nɔ akɛ: “Nikpamɔ lɛ fá moŋ, shi nitsulɔi lɛ faaa. No hewɔ lɛ nyɛkpaa nikpamɔ nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!” Yesu kɛɛ nakai etsɛɛɛ nɔŋŋ kɛkɛ ni ewo ebɔfoi 12 lɛ gbɛ koni amɛyashiɛ. (Mat. 9:37, 38; 10:1, 5, 7) Aaafee afi sɛɛ beni etsɔse mɛi 12 lɛ jogbaŋŋ yɛ shiɛmɔ nitsumɔ lɛ mli lɛ, Yesu “famɔ mɛi nyɔŋmai-kpawo kroko hu, ni etsu amɛ,” ni ekɛ tsɔsemɔ wiemɔ kome lɛ nɔŋŋ ha amɛ akɛ: “Nikpamɔ lɛ fá, . . . no hewɔ lɛ nyɛkpaa nikpamɔ nuŋtsɔ lɛ fai, koni etsu nitsulɔi kɛba enikpamɔ lɛ mli.” (Luka 10:1, 2) Biblia mli wolo ni ji Bɔfoi lɛ Asaji lɛ bɔ bɔ ni Yehowa ha nakai sɔlemɔ lɛ hetoo lɛ he amaniɛ. Beni Pentekoste 33 Ŋ.B. lɛ shɛɔ lɛ, no mli lɛ, kaselɔi lɛ ayifalɛ etee hiɛ kɛyashɛ 120. Kɛkɛ ni aná kaselɔi ayifalɛ ni fe fɛɛ ni ji 3,000 kɛ 5,000 ni tsara nɔ. (Bɔf. 1:15; 2:41; 4:4) Yɛ no sɛɛ lɛ, “kaselɔi lɛ ayi bafá babaoo diɛŋtsɛ.” (Bɔf. 6:7) Nakai nɔŋŋ esa akɛ yɛ wɔbei nɛɛ amli lɛ, wɔya nɔ wɔkpa Nuŋtsɔ lɛ fai lolo koni aná Maŋtsɛyeli shiɛlɔi babaoo! Yɛ wɔsɔlemɔi lɛ kɛ gbeekpamɔ naa lɛ, esa akɛ asafo fɛɛ asafo mli shiɛlɔi ato gbɛjianɔ jogbaŋŋ koni bɔ fɛɛ bɔ ni fee lɛ amɛkɛ amɛhe awo sɔɔmɔ nitsumɔ lɛ mli yɛ nyɔŋ fɛɛ nyɔŋ nɔ.
9 Ofainɛ kwɛmɔ April nyɔŋ lɛ jogbaŋŋ yɛ 2000 Calendar lɛ nɔ. Akɛni Hɔɔ kɛ Hɔgbaa ji klɛŋklɛŋ gbii enyɔ ni jeɔ nyɔŋ lɛ shishi hewɔ lɛ, ani obaanyɛ oto gbɛjianɔ koni okɛ ohe awo nakai otsi lɛ naagbee sɔɔmɔ lɛ mli, koni okɛje nyɔŋ lɛ shishi jogbaŋŋ? Ani obaanyɛ ofata mɛi ahe daa yɛ “Woji Tɛtrɛbii Ajaa Gbi” yɛ nyɔŋ lɛ mli lɛ he yɛ Asafo Woloŋ Nikasemɔ kuu lɛ mli? Ni ŋmɛlɛtswaa kome loo nɔ ni fe nakai ni okɛaatsu nii daa Hɔgbaa yɛ sɔɔmɔ nitsumɔ lɛ mli lɛ hu? Ani obaanyɛ oto gbɛjianɔ koni okɛ ohe awo gbɛkɛnaashi odaseyeli nitsumɔ lɛ mli? Ni ohiɛ akakpa hegbɛi fɛɛ ni oooná ni okɛaaye trukaa odase yɛ onitsumɔhe, yɛ skul aloo yɛ be mli ni okɛ ohe woɔ daa gbi nitsumɔ ko mli lɛ hu nɔ. Kadimɔ gbii ni obaanyɛ okɛtsu nii yɛ sɔɔmɔ nitsumɔ lɛ mli, ni okɛ kalenda lɛ atsu nii be fɛɛ be yɛ be ni oto kɛha shiɛmɔyaa lɛ mli kɛha nyɔŋ lɛ.
10 April baafee be ni sa kɛha mɛi fɛɛ ni eshɛ ni baanyɛ asɔmɔ akɛ shiɛlɔi ni abaptisiko amɛ, ni onukpai lɛ ekpɛlɛ amɛnɔ lɛ koni amɛje shishi. Kɛji akɛ okɛ mɔ ko miikase Biblia lɛ, ani nakai mɔ lɛ etee hiɛ saŋŋ ni ebaanyɛ eyanina onukpai asɛinɔtalɔ lɛ koni ebi ni aha etsɔ sanekpakpa lɛ shiɛlɔ? Kɛ́ oyɛ bii ni abaptisiko amɛ lɛ, ani okɛ onukpai lɛ egba amɛmumɔŋ nɔyaa he sane? Ani nɛkɛ be nɛɛ efeŋ be ni sa kɛha amɛ ni amɛkɛaaje shiɛmɔ shishi?—Kwɛmɔ Our Ministry, baafai 97-100.
11 Yɛ be mli ni wɔbɔɔ mɔdɛŋ koni wɔha April 2000 afee nyɔŋ ni hi fe fɛɛ lɛ, ehe miihia ni wɔteŋ mɔ fɛɛ mɔ kɛ ehe awo sɔɔmɔ nitsumɔ lɛ mli, ni agbɛnɛ lɛ wɔkɛ wɔshiɛmɔ lɛ he akɔntaabuu aha yɛ nyɔŋ lɛ naagbee mli. (Okɛto Marko 6:30 he.) Esa akɛ awo shiɛlɔi heei ni abaptisiko amɛ ni enɛ ji klɛŋklɛŋ kwraa ni amɛkɛ amɛhe baawo shiɛmɔ nitsumɔ lɛ mli lɛ hewalɛ ni amɛkɛ amɛshiɛmɔ nitsumɔ lɛ he akɔntaabuu lɛ aha oya. Kɛ wɔtsu wɔgbɛfaŋnɔ lɛ, wɔbaafata he ní wɔha April shiɛmɔ akɔntaabuu lɛ aya hiɛ jogbaŋŋ, ni wɔkɛ yijiemɔ ni jijeɔ waa ni akɛaaha Yehowa lɛ baaha kɛtsɔ mɔdɛŋbɔɔ ni wɔkɛaaye odase lɛ nɔ.
12 Okɛ Mɛi Krokomɛi Afata Ohe Kɛba Kaimɔ lɛ Shishi: Ani wɔnaŋ miishɛɛ akɛ wɔɔná yifalɛ ni fe fɛɛ yɛ afi 2000 lɛ mli beni ayeɔ Kristo gbele lɛ Kaimɔ lɛ? Hɛɛ! No baatsɔɔ akɛ gbɔmɛi ayifalɛ ni fe fɛɛ fe yɛ be ni eho lɛ mli lɛ eba koni amɛbatsɔɔ bɔ ni amɛhiɛ esɔ suɔmɔ ni fe fɛɛ ni Yehowa Nyɔŋmɔ kɛ Yesu Kristo ejie lɛ kpo etsɔɔ wɔ lɛ! (Yoh. 3:16; 15:13) Too gbɛjianɔ fɛɛ ni ooonyɛ koni nɔ ko nɔ ko akatsĩ bo kɛ oweku lɛ naa ni nyɛnyɛ nyɛya Kaimɔ lɛ shishi.
13 Amrɔ nɛɛ hu ji be ni esa akɛ oje shishi ofɔ̃ mɛi anine kɛba Kaimɔ lɛ shishi. Ŋmalamɔ mɛi fɛɛ ni obaasumɔ ni ofɔ̃ amɛ nine lɛ agbɛi oshwie shi. Okɛ mɛi ni okɛ amɛ ekase Biblia lɛ dã lɛ agbɛi afata he, kɛ mɛi ni okɛ amɛ miikase nii amrɔ nɛɛ, kɛ mɛi fɛɛ ni oku osɛɛ oyasara amɛ lɛ hu. Okɛ onanemɛi ni yɔɔ nitsumɔhe, skul, kɛ okutso lɛ mli, kɛ agbɛnɛ hu mɛi fɛɛ ni okɛ amɛ kpeɔ yɛ nitsumɔ mli lɛ hu agbɛi afata he. Ohiɛ akakpa nɔ, ni okɛ nanemɛi krokomɛi kɛ owekumɛi afata he. Kɛ́ oŋmala gbɛi lɛ fɛɛ ogbe naa lɛ, agbɛnɛ jee shishi ni okɛ ekãa afɔ̃ mɛi lɛ anine ekomekome. Tsɔɔmɔ amɛ be kɛ he ni abaakpe yɛ kɛye Kaimɔ lɛ jogbaŋŋ. Yɛ be mli ni April 19 lɛ shɛɔ lɛ, yaa ni oyakai mɛi ni oŋmala amɛgbɛi lɛ, bo diɛŋtsɛ obaanyɛ oya amɛŋɔɔ aloo obaanyɛ otsɔ tɛlifoŋ nɔ ofee nakai. Kɛɛmɔ amɛ akɛ obaaba koni okɛ amɛ afee ekome kɛya Kaimɔ lɛ shishi nakai gbɛkɛ lɛ.
14 Yɛ tsutsu gbɛtsɔɔmɔ ni Asafo lɛ kɛha lɛ kɛ gbeekpamɔ naa lɛ, onukpai akuu lɛ baabɔ mɔdɛŋ waa koni amɛwo mɛi fɛɛ ni ekpa shiɛmɔyaa ni yɔɔ amɛshikpɔŋkuku lɛ mli lɛ hewalɛ koni amɛya Kaimɔ lɛ shishi. (Mat. 18:12-14) Onukpai lɛ baasumɔ ni amɛti February 2, 1999 wolo ni Asafo lɛ ŋma lɛ mli ekoŋŋ. Esa akɛ asafo lɛ woloŋmalɔ lɛ aŋmala mɛi fɛɛ ni ekpa shiɛmɔyaa lɛ agbɛi, ni sɔɔmɔ nɔkwɛlɔ lɛ baahala onukpai komɛi koni amɛya mɛi lɛ aŋɔɔ, ni amɛyafɔ̃ amɛ nine kɛba Kaimɔ lɛ shishi. Ekolɛ, kɛ onukpai lɛ yasara amɛ nɔŋŋ yɛ be ni sa mli kɛwo amɛ hewalɛ lɛ, abaanyɛ aye abua nɛkɛ mɛi ni ekpa shiɛmɔyaa nɛɛ koni amɛbɔi shiɛmɔyaa ekoŋŋ, yɛ April mli po. Ebaafee nɔ ni tswaa mɔ emaa shi kɛji akɛ aha mɔ lɛ kɛ shiɛlɔ ni he esa tsu nii yɛ shiɛmɔ nitsumɔ lɛ mli.
15 Okɛ Hewalɛwoo Kpakpa Aha Kɛha April! Ebaabi ni onukpai lɛ kɛ asafoŋ sɔɔlɔi lɛ fɛɛ kɛ weku yitsei kɛ amɛhe awo mli jogbaŋŋ, ni no dani April 2000 baanyɛ afee nyɔŋ ni hi fe fɛɛ kɛha wɔ. Esa akɛ onukpai lɛ abɔ mɔdɛŋ ni amɛkwɛ ni amɛto nɔ fɛɛ nɔ he gbɛjianɔ jogbaŋŋ yɛ be mli ni amɛkɛ hiɛnyiɛmɔ haa lɛ. (Heb. 13:7) Esa akɛ ato gbɛjianɔi ni abaanyɛ atsu he nii aha kpeei kɛha shiɛmɔyaa yɛ otsi lɛ mli lɛ mli kɛ enaagbee fɛɛ. Abaanyɛ ato kpeei krokomɛi ahe gbɛjianɔ kɛha shwane kɛ gbɛkɛnaashi shiɛmɔyaa. Esa akɛ akɛ be he gbɛjianɔ fɛɛ ni ato kɛha April akpɛtɛ adafitswaa tao lɛ nɔ. Ehe baahia ni ahala mɔ ko ní enyiɛ kpee kɛha shiɛmɔyaa he gbɛjianɔ ni ato lɛ hiɛ. Esa akɛ akɛ shikpɔŋkuku ni da bɔ ni sa aha koni kuu fɛɛ kuu aná he ko ni ebaatsu nii yɛ.
16 Akɛ Buu-Mɔɔ kɛ Awake! woji tɛtrɛbii lɛ baatsu nii yɛ April mli. Akɛ Taoɔ wolo bibioo lɛ baaha bɔni afee ni abɔ mɔdɛŋ ni akɛ mɛi fɛɛ ni yɔɔ wiemɔ lɛ he miishɛɛ lɛ aje shia Biblia mli nikasemɔ shishi. Enɛ hewɔ lɛ, ehe baahia ni aná woji tɛtrɛbii kɛ woji bibii pii ni akɛtsu nii.
17 Yɛ nyɔŋ lɛ naagbee mli lɛ, ehe baahia ni woloŋ nikasemɔ nɔkwɛlɔi kɛ amɛsɛɛkwɛlɔi fɛɛ awo mɛi fɛɛ ni yɔɔ amɛkuu lɛ mli lɛ hewalɛ koni amɛkɛ amɛshiɛmɔ nitsumɔ he akɔntaabuu lɛ aha oya yɛ nyɔŋ lɛ naagbee mli. Amɛwo mɔ fɛɛ mɔ ni yɔɔ amɛkuu lɛ mli lɛ hewalɛ koni ekɛ esɔɔmɔ nitsumɔ he akɔntaabuu aha amrɔ nɔŋŋ yɛ nyɔŋ lɛ naagbee mli. Ekolɛ abaanyɛ afee enɛ Hɔgbaa, April 30 gbi lɛ nɔ. Kɛkɛ lɛ, kɛ woloŋmalɔ lɛ bua akɔntaabuu lɛ fɛɛ naa, ni ena akɛ shiɛlɔi komɛi kɛ amɛnɔ bako lɛ ebaanyɛ ni ekɛ mlihilɛ akai amɛ koni amɛfee nakai dani May 6 ashɛ, be mli ni esa akɛ ekɛ asafo lɛ akɔntaabuu lɛ ayaha Asafo lɛ. Ebaanyɛ etsɛ asafo woloŋ nikasemɔ nɔkwɛlɔi lɛ koni amɛye amɛbua lɛ ni eyanina shiɛlɔi lɛ.
18 Kaimɔ lɛ ji be ni he hiaa fe fɛɛ kɛha Nyɔŋmɔ webii yɛ afi lɛ mli. Esa akɛ efee be ni wɔ fɛɛ lɛ, wɔbaafee mɛi ni wɔbɛ dekã kwraa yɛ Yehowa sɔɔmɔ nitsumɔ lɛ mli. Ebaanyɛ efee nakai, kɛji akɛ mɔ fɛɛ mɔ ná emli gbɛfaŋnɔ kɛmɔ shi akɛ sanekpakpa lɛ jajelɔi, kɛji akɛ mɛi ni baanyɛ amɛkɛ amɛhe awo gbɛgbalɔi awalɔ nitsumɔ lɛ mli lɛ fee nakai, kɛ agbɛnɛ hu kɛji akɛ, wɔkɛ mɔdɛŋbɔɔ fɔ̃ɔ mɛi krokomɛi nine kɛbaa Kristo gbele lɛ Kaimɔ lɛ shishi. Nyɛhaa wɔkɛ ekãa asɔlea kɛbia Yehowa dɛŋ jɔɔmɔi babaoo yɛ be mli ni wɔbɔɔ mɔdɛŋ ni wɔha April 2000 afee nyɔŋ ni hi fe fɛɛ lɛ, koni wɔkɛjie Nyɔŋmɔ yi ni wɔkɛwo ehiɛ nyam lɛ!—Heb. 13:15.
[Akrabatsa ni yɔɔ baafa 3]
Gbɛgbalɔi Awalɔi
Yibɔ ni Fe Fɛɛ ni Wɔná: 5,759
(March 1997)
[Akrabatsa ni yɔɔ baafa 4]
Shiɛlɔi Fɛɛ Ayifalɛ
Yibɔ ni Fe Fɛɛ ni Wɔná: 61,247
(October 1999)
[Akrabatsa ni yɔɔ baafa 5]
Kaimɔ Lɛ
Yibɔ ni Fe Fɛɛ ni Wɔná: 202,167
(1999)