Shiɛmɔ ní Oye Odase Kɛmɔ Shi
1 Ákɛ “lumɔ kɛ mlawolɔ” lɛ, Yesu saa ekaselɔi lɛ kɛha shiɛmɔ nitsumɔ ni da ni kã amɛhiɛ lɛ. (Yes. 55:4; Luka 10:1-12; Bɔf. 1:8) Bɔfo Petro tsɔɔ nitsumɔ ni Yesu kɛha amɛ lɛ mli yɛ nɛkɛ wiemɔi nɛɛ amli, akɛ: “Ewo wɔ kitã akɛ wɔshiɛ wɔtsɔɔ maŋ lɛ ni wɔye odase akɛ lɛ ji mɔ ni Nyɔŋmɔ efã eto hiɛkalɔi kɛ gbohii akojolɔ lɛ.” (Bɔf. 10:42) Mɛɛ gbɛ nɔ wɔtsɔɔ wɔyeɔ odase ni mɔɔ shi?
2 Wɔbaanyɛ wɔkase babaoo kɛjɛ bɔfo Paulo nɔkwɛmɔnɔ lɛ he susumɔ mli. Beni ekɛ onukpai ni jɛ Efeso asafo lɛ mli lɛ kpeɔ lɛ, ekai amɛ akɛ: “Mishiuuu nii ni he yɔɔ sɛɛnamɔ ha nyɛ lɛ eko nɔ, ni mijaje mitsɔɔ nyɛ yɛ faŋŋ kɛ shia fɛɛ shia hu; ni miye tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli lɛ he odase mitsɔɔ Yudafoi kɛ Helabii fɛɛ.” (Wɔma efã ko nɔ mi.) Yɛ kaai ni Paulo ŋmɛ etsui shi yɛ mli lɛ fɛɛ sɛɛ lɛ, etsu nii waa koni ekɛ sanekpakpa lɛ ayaha mɛi ni fa bɔ ni eeenyɛ. Etsui enyɔɔɔ emli yɛ shishijee anɔkwalei lɛ ni ekɛaaha mɛi ni boɔ lɛ toi lɛ pɛ he, shi moŋ etao akɛ egba “Nyɔŋmɔ yiŋtoo muu lɛ fɛɛ” etsɔɔ amɛ. Bɔni afee ni enyɛ efee enɛ lɛ, eesumɔ ni emia ehiɛ waa ni ekɛ nibii ashã afɔle. Ejaje ekoŋŋ akɛ: “Miwala hu mibuuu akɛ ejara wa yɛ mihiɛ, beni afee ni mikɛ miishɛɛ agbe migbɛnyiɛmɔ lɛ kɛ sɔɔmɔ ni miná yɛ Nuŋtsɔ Yesu dɛŋ akɛ miye Nyɔŋmɔ duromɔ sanekpakpa lɛ he odase faŋŋ lɛ naa.”—Bɔf. 20:20, 21, 24, 27, wɔma efã ko nɔ mi.
3 Te wɔɔfee tɛŋŋ wɔkase Paulo nɔkwɛmɔnɔ lɛ ŋmɛnɛ? (1 Kor. 11:1) Kɛtsɔ aŋkroaŋkroi kɛ wekui ni sa ni wɔɔtao amɛ yɛ be mli ni wɔ diɛŋtsɛ lɛ wɔkɛ kaai miikpe lɛ nɔ, kɛtsɔ mɔdɛŋ ni wɔbɔɔ waa koni wɔkɛ sanekpakpa lɛ ayaha wekui kɛ wiemɔi akui srɔtoi fɛɛ lɛ nɔ, ni kɛtsɔ wɔhiɛ ni wɔɔmia ni wɔye wɔbua mɛi ni yɔɔ wiemɔ lɛ he miishɛɛ lɛ nɔ. (Mat.10:12, 13) Enɛ biɔ be, mɔdɛŋbɔɔ, kɛ suɔmɔ kɛha gbɔmɛi lɛ.
4 Ani Obaanyɛ Osɔmɔ akɛ Gbɛgbalɔi Awalɔ? March kɛ April baanyɛ afee hegbɛ ni nɔ bɛ kɛha bo ni okɛaaye odase ni mɔɔ shi kɛtsɔ gbɛgbalɔi awamɔ nitsumɔ lɛ ni okɛ ohe aaawo mli lɛ nɔ. Kwɛ hewalɛwoo ni eji akɛ aaana mɔdɛŋ krɛdɛɛ ni shiɛlɔi babaoo bɔ yɛ nyɛsɛɛ afi lɛ mli, koni amɛkɛ amɛhe awo gbɛgbalɔi awamɔ nitsumɔ lɛ mli!
5 Hewalɛwoo ni Yehowa gbɛjianɔtoo lɛ kɛha lɛ kanya nyɛmi yoo ko ni eye afii 80 ni yɔɔ gbɔmɔtsoŋ hewalɛnamɔ mli naagbai babaoo lɛ. Eŋma akɛ: “Ekanya shwelɛ ni miyɔɔ yɛ mitsui mli be kakadaŋŋ nɛ lɛ waa, ni eha minu he akɛ esa akɛ mafee gbɛgbalɔi awalɔ kɛ hoo lɛ, shikome ekoŋŋ.” Ekpɛ eyiŋ akɛ ebaafee enɛ yɛ March mli. Ekɛɛ akɛ: “Klɛŋklɛŋ nii ni mifee ji, mita shi ni misusu he mikwɛ dã. Mikɛ mibiyoo lɛ susu he, ejaakɛ eyelikɛbuamɔ he baahia mi. Eha minaa kpɛ mihe beni lɛ diɛŋtsɛ hu eyahe gbɛbimɔ wolo kɛha enɛ eko feemɔ lɛ.” Yɛ nyɔŋ lɛ mli lɛ, nyɛmi yoo nukpa nɛɛ kɛ ŋmɛlɛtswai 52 tsu nii yɛ sɔɔmɔ nitsumɔ lɛ mli. Ekɛɛ akɛ: “Misɔleɔ shii abɔ mihaa Yehowa koni ewaje mi, kɛ́ minu he akɛ mihewalɛ miitã lɛ. Mimii shɛ mihe ni mitsui nyɔ mimli waa yɛ nyɔŋ lɛ naagbee, ni mida Yehowa shi shii abɔ akɛni eye ebua mi lɛ hewɔ. Masumɔ ni maka efeemɔ ekoŋŋ.” Eniiashikpamɔ ni miishɛɛ yɔɔ mli lɛ baanyɛ awo mɛi krokomɛi ni miisumɔ diɛŋtsɛ ni amɛfee gbɛgbalɔi awalɔi lɛ hewalɛ yɛ gbɔmɔtsoŋ hewalɛ ni amɛbɛ kwraa lɛ fɛɛ sɛɛ.
6 Nyɛmi nuu ko ni enitsumɔ je edɛŋ trukaa lɛ ŋɔ hegbɛ lɛ koni ekɛfee gbɛgbalɔi awalɔ. Beni nyɔŋ lɛ yaa hiɛ lɛ, ená ekãa babaoo kɛha shiɛmɔ nitsumɔ lɛ, ni beni nyɔŋ lɛ baa naagbee lɛ, eje Biblia mli nikasemɔ hee shishi. Beni esusuɔ eniiashikpamɔ lɛ he lɛ, ekɛɛ akɛ: “Mɛɛ nyɔŋ ni sɛɛnamɔ yɔɔ mli po nɛ!” Kwɛ emli ni fili lɛ yɛ Yehowa gbɛtsɔɔmɔ kɛ yelikɛbuamɔ ni ená lɛ hewɔ! Hɛɛ, Yehowa fɔse jɔɔmɔi pii eshwie nyɛmi nuu lɛ nɔ yɛ mɔdɛŋ kroko ni nyɛmi nuu lɛ bɔ yɛ sɔɔmɔ lɛ mli lɛ hewɔ, ni Yehowa baafee nakai nɔŋŋ kɛha bo.—Mal. 3:10.
7 Shiɛlɔi pii yɛ ni gbɛgbalɔi awamɔ nitsumɔ lɛ bɛ mlɛo kɛha amɛ. Ni kɛlɛ, yɛ heloo gbɛfaŋ nitsumɔ kɛ weku mli gbɛnaa nii kɛ agbɛnɛ kaai ni aŋkroaŋkroi kɛkpeɔ lɛ fɛɛ sɛɛ lɛ, nyɛmimɛi hii kɛ yei babaoo enyɛ efee nakai. Bei pii lɛ, odase ni ayeɔ kɛmɔɔ shi lɛ kɔɔ wɔbe ni jara wa lɛ kɛ wɔnyɛmɔ ni wɔkɛshãa afɔle lɛ he, shi anyɛŋ akɛ nɔ ko ato jɔɔmɔi ni jɛɔ mli baa lɛ ahe.—Abɛi 10:22.
8 March kɛ April ji bei ni hi jogbaŋŋ kɛha gbɛgbalɔi awalɔ feemɔ. Otsii anaagbeei enumɔ yɔɔ March mli. Hegbɛ ni wɔɔŋɔ ni wɔkɛaatsu nii jogbaŋŋ yɛ gbɛkɛnaashi kɛ otsii lɛ anaagbeei lɛ baanyɛ aha mɛi ni kɛ amɛbe fɛɛ tsuɔ nii lɛ ana hegbɛ ni amɛfee gbɛgbalɔi awalɔi. Kɛfata he lɛ, obaanyɛ ni okɛ hegbɛ ni gbɛhamɔ gbii lɛ kɛhaa lɛ atsu nii yɛ April nyɔŋ lɛ mli. Ekolɛ mɛi komɛi baana hejɔɔmɔ kɛjɛ skul kɛ heloo gbɛfaŋ nitsumɔi amli, ni enɛ baanyɛ aye abua amɛ koni amɛnine ashɛ oti ni ji ŋmɛlɛtswai 50 ni ataoɔ lɛ nɔ. Bɔni afee ni oto ŋmɛlɛtswai 50 he gbɛjianɔ yɛ sɔɔmɔ lɛ mli yɛ March kɛ April mli lɛ, ani obaanyɛ ni okɛ be he gbɛjianɔ ni áto aha gbɛgbalɔi awalɔi lɛ he nɔkwɛmɔnɔ ni fata sane nɛɛ he lɛ ateŋ ekome atsu nii? Okɛ mɛi krokomɛi agba obe he gbɛjianɔtoo lɛ he sane; ŋwanejee ko bɛ he akɛ ebaawo mɛi komɛi hewalɛ ni amɛfata ohe yɛ sɔɔmɔ nitsumɔ lɛ mli. Kɛji akɛ onyɛɛɛ ofee gbɛgbalɔi awalɔ lɛ, okɛ otii pɔtɛɛi komɛi amamɔ ohiɛ kɛha nɛkɛ nyɔji nɛɛ, koni okɛ mɛi ni amɛ́nyɛ amɛfee nakai lɛ atsu nii. Too gbɛjianɔ bianɛ kɛha sɔɔmɔ ni yaa hiɛ yɛ March kɛ April mli.
9 Jiemɔ Hiɛsɔɔ Kɛha Kaimɔ lɛ Kpo: Daa afi, yɛ Kaimɔ be lɛ mli lɛ, shidaa kɛha kpɔmɔnɔ lɛ tsirɛɔ mɛi akpei abɔ koni ‘amɛhe be’ koni amɛkɛfee gbɛgbalɔi awalɔi. (Efe. 5:15, 16) Yɛ nyɛsɛɛ afi lɛ mli yɛ Ghana lɛ, wɔná gbɛgbalɔi awalɔi 6,555 yɛ March mli, kɛ 3,056 yɛ April mli. Kɛ aja mli lɛ, efeɔ 4,806 kɛha nɛkɛ nyɔji enyɔ nɛɛ eko fɛɛ eko. Okɛ no ato mɛi 1,052 kɛ́ aja mli, ni fee gbɛgbalɔi awalɔi yɛ sɔɔmɔ afi ni ho lɛ nyɔŋ fɛɛ nyɔŋ nɔ lɛ he okwɛ. Nɛkɛ Kaimɔ be nɛɛ ji hegbɛ kroko ni hi jogbaŋŋ ni wɔkɛaatsɔɔ anɔkwa hiɛsɔɔ ni wɔyɔɔ kɛha Kristo kpɔmɔ afɔleshaa lɛ, kɛtsɔ sɔɔmɔ nitsumɔ lɛ ni wɔkɛ wɔhe baawo mli babaoo lɛ nɔ.
10 Susumɔ nɔ ni Kaimɔ lɛ ji kɛha bo, yɛ be mli ni April 16 bɛŋkɛɔ lɛ he okwɛ. Jwɛŋmɔ nibii ni tee nɔ aahu kɛyashi Kristo gbele lɛ kɛ susumɔi ni tsii waa ni ba ejwɛŋmɔ kɛ etsui mli lɛ ahe. Agbɛnɛ hu jwɛŋmɔ nyamɔ ni akɛma Yesu hiɛ lɛ kɛ bɔ ni eye ebua lɛ koni eŋmɛ etsui shi yɛ niseniianii ni afee lɛ lɛ fɛɛ mli lɛ nɔ. Jwɛŋmɔ gbɛhe mli ni eyɔɔ bianɛ akɛ asafo lɛ Yitso, ni miikwɛ shiɛmɔ kɛ kaselɔ-feemɔ nitsumɔ lɛ nɔ lɛ he. (1 Kor. 11:3; Heb. 12:2; Kpoj. 14:14-16) Agbɛnɛ feemɔ oshidaa kɛha nibii fɛɛ ni Kristo efee lɛ he nɔkwɛmɔnɔ, kɛtsɔ shiɛmɔ nitsumɔ lɛ ni okɛ ohe baawo mli babaoo bɔ ni oshihilɛ baaŋmɛ bo gbɛ lɛ nɔ.
11 Wo Mɛi Krokomɛi Hewalɛ ni Amɛye Odase Kɛmɔ Shi: Kɛji akɛ onukpai kɛ asafoŋ sɔɔlɔi kɛ amɛhe wo gbɛgbalɔi awamɔ nitsumɔ lɛ mli lɛ, amɛbajeɔ gbɛhe ni hi jogbaŋŋ ni baaha amɛwo mɛi krokomɛi hewalɛ lɛ mli. Beni amɛkɛ shiɛlɔi lɛ efee ekome kɛtsuɔ nii, ni amɛsaraa nyɛmimɛi lɛ, amɛ diɛŋtsɛ lɛ amɛnáa hegbɛi kpakpai ni amɛkɛaaye amɛbua mɛi krokomɛi koni amɛná nitsumɔ krɛdɛɛ nɛɛ mli gbɛfaŋnɔ kɛmɔ shi. Eba akɛ wɔ fɛɛ wɔkɛ enɛ baawo sɔlemɔ mli, koni wɔkɛwaje ekome ni wɔfee yɛ odase ni wɔyeɔ kɛmɔɔ shi lɛ mli lɛ.
12 Yɛ be mli ni onukpai kɛ asafoŋ sɔɔlɔi fɛɛ kɛ gbɛjianɔi ni asafo lɛ eto kɛha nitsumɔ ni yaa hiɛ yɛ March kɛ April nyɔji lɛ amli lɛ baatsu nii yɛ gbeekpamɔ mli lɛ, esa akɛ sɔɔmɔ nitsumɔ nɔkwɛlɔ lɛ titri hiɛ ahi gbɛjianɔ kpakpa ni eeeto kɛha sanekpakpa jajemɔ nitsumɔ lɛ nɔ. Esa akɛ eto hei ni abaajɛ jɛmɛ aya shiɛmɔ, gbii, kɛ bei ni hi kɛha shiɛlɔi lɛ ateŋ mɛi ni fa lɛ he gbɛjianɔ koni atswa enɛɛmɛi ahe adafi be fɛɛ be. Abaanyɛ ato gbɛjianɔ hu koni akpe yɛ bei srɔtoi amli yɛ hei srɔtoi yɛ gbi lɛ mli, koni akɛ nakai feemɔ aha mɔ fɛɛ mɔ ni yɔɔ asafo lɛ mli lɛ aná hegbɛ koni ekɛ ehe awo odaseyeli nitsumɔi srɔtoi lɛ eko mli. Nɔ ni baanyɛ afata enɛɛmɛi ahe ji shikpɔŋkuku ni nitsumɔhei yɔɔ mli, gbɛjegbɛ nɔ odaseyeli, shia kɛ shia shiɛmɔ, sɛɛsaramɔi afeemɔ, kɛ tɛlifoŋ nɔ odaseyeli. Kɛfata he lɛ, esa akɛ eto gbɛjianɔ kɛha woji, woji tɛtrɛbii, kɛ shikpɔŋkukuji ni fa yɛ nɛkɛ nyɔji nɛɛ amli.
13 Wolo ni akɛbaaha yɛ March mli ji Nilee wolo lɛ, kɛ yiŋtoo akɛ abaaje Biblia mli nikasemɔi ashishi. Ŋaawoi kpakpai kɛha Nilee wolo lɛ kɛhamɔ je kpo yɛ nɔ ni aŋma ahɔ January 2002 Wɔ Maŋtsɛyeli Sɔɔmɔ lɛ mli lɛ mli. Nɔ ni akɛbaaha yɛ April mli ji Buu-Mɔɔ lɛ kɛ Awake! woji tɛtrɛbii lɛ. Bɔɔ mɔdɛŋ ni okɛ shiɛmɔ wiemɔi ni ato he gbɛjianɔ ni jeɔ kpo yɛ “Nɔ ni Esa akɛ Owie yɛ Woji Tɛtrɛbii lɛ Ahe” lɛ mli lɛ atsu nii. Esa akɛ mɔ fɛɛ mɔ ato be, ní ekɛsaa ehe jogbaŋŋ koni enyɛ eye odase kɛmɔ shi.
14 Kwɛ bɔ ni ájɔɔ wɔ aha akɛ wɔɔtsu nii yɛ Kristo Yesu, asafo lɛ Yitso lɛ gbɛtsɔɔmɔ shishi, koni wɔná hegbɛ ni wɔgba mɛi krokomɛi sanekpakpa lɛ! Yɛ be mli ni March kɛ April nyɔji lɛ bɛŋkɛɔ lɛ, nyɛhaa wɔbɔa mɔdɛŋ shikome ekoŋŋ koni wɔfee amɛ wɔ nyɔji ni hi fe fɛɛ, yɛ be mli ni wɔboɔ Kristo famɔ akɛ wɔshiɛ ni wɔye odase kɛmɔ shi lɛ toi lɛ.
[Caption on page 4]
Gbɛ̀i Srɔtoi ni Aaatsɔ nɔ Afee Gbɛgbalɔi Awalɔ yɛ March kɛ April 2003 Mli
Gbi Ŋmɛlɛtswai
Ju 1 2 — — 2 —
Jufɔ 1 — 3 — — —
Shɔ 1 2 — 5 — —
Soo 1 — 3 — — —
Sohaa 1 2 — — — —
Hɔɔ 5 4 3 5 6 7
Hɔgbaa 2 2 3 2 2 3
March 56 56 54 55 50 50
April 50 50 51 53 — —
Ani bei ahe gbɛjianɔtoi nɛɛ ateŋ ekome baahi aha bo?