Jajemɔ Yehowa Agbojee Lɛ
1. Mɛni tsirɛɔ wɔ koni wɔjaje Yehowa agbojee lɛ?
1 “Bo, Yehowa, onɔ̃ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ̃ ni.” (1 Kron. 29:11) Suɔmɔ kɛ hiɛsɔɔ ni wɔyɔɔ kɛha Yehowa lɛ náa wɔnɔ hewalɛ yɛ mɛɛ gbɛ nɔ? Etsirɛɔ wɔ koni ‘wɔjaje mɔ ni tsɛ́ wɔ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.’ (1 Pet. 2:9) Wɔnyɛŋ wɔkpa wɔ-Nyɔŋmɔ kpeteŋkpele lɛ he sane ni wɔshiɛɔ wɔhaa mɛi krokomɛi lɛ! Wɔbaaná hegbɛ kpele ni wɔkɛjaje Yehowa agbojee lɛ yɛ March, April, kɛ May nyɔji lɛ amli.
2. Mɛɛ tafãa krɛdɛɛ ato he gbɛjianɔ ni akɛbaatswa Kaimɔ lɛ he adafi, ni namɛi baanyɛ amɛkɛ amɛhe awo mli?
2 Tafãa Krɛdɛɛ ni Akɛbaatswa Kaimɔ lɛ He Adafi: Yɛ Ju April 2 lɛ, wɔbaagbala mɛi ajwɛŋmɔ kɛba Yehowa agbojee lɛ nɔ kɛtsɔ Nuŋtsɔ lɛ Gbɛkɛnaashi Niyeli lɛ kaimɔ nɔ. Abaajara nifeemɔ ni he hiaa waa nɛɛ he ninefɔ̃ɔ wolo krɛdɛɛ yɛ je lɛŋ fɛɛ kɛjɛ March 17 kɛyashi April 2. Wɔmiiwo mɔ fɛɛ mɔ hewalɛ koni ekɛ ehe awo mli kɛmɔ shi. Enɛ baafee be ni hi jogbaŋŋ kɛha mɛi heei koni amɛbɔi shiɛmɔyaa kɛ́ amɛshɛɔ taomɔ nii kɛha shiɛmɔyaa lɛ ahe lɛ. Kɛ́ oyɛ Biblia mli nikaselɔi loo bii ni ekolɛ amɛshiɛɔ taomɔ nii nɛɛ ahe lɛ, ŋɔɔ hegbɛ lɛ ni okɛ onukpai lɛ agba he sane.
3. Mɛni wɔbaanyɛ wɔkɛɛ kɛfɔ̃ mɛi anine kɛba Kaimɔ lɛ shishi?
3 Abaatsu tafãa nɛɛ he nii tamɔ bɔ ni atswa “Kpɔmɔ Ebɛŋkɛ!” Kpokpaa Wulu nɔ Kpeei lɛ ahe adafi lɛ. Abaamaje asafoi lɛ ninefɔ̃ɔ woji ni fa bɔ ni sa bɔni afee ni shiɛlɔi fɛɛ anyɛ aná ekomekomei 30, ni gbɛgbalɔi fɛɛ hu anyɛ aná ekomekomei 100. Ha oshiɛmɔ wiemɔ lɛ afee kuku, ekolɛ obaanyɛ okɛɛ akɛ: “Wɔkɛ enɛ miifɔ̃ bo nine kɛha nifeemɔ ko ni he hiaa ni afeɔ daa afi lɛ. Wɔkɛ miishɛɛ baakpee bo atuu. Nifeemɔ lɛ he saji fɛɛ yɛ ninefɔ̃ɔ wolo nɛɛ nɔ.” Shi kɛ́ shiatsɛ lɛ bi saji lɛ, ŋɔɔ be ni okɛha saji lɛ ahetoo. Wɔbaanyɛ wɔkɛ sane ni kɔɔ Nuŋtsɔ lɛ Gbɛkɛnaashi Niyeli lɛ he ni yɔɔ Biblia lɛ Tsɔɔ wolo lɛ mli ni jeɔ shishi kɛjɛɔ baafa 206 lɛ atsu nii kɛha shiatsɛ lɛ hetoo. Yɛ otsii lɛ anaagbee lɛ, wɔkɛ woji tɛtrɛbii heei ni eba lɛ baafata ninefɔ̃ɔ wolo krɛdɛɛ lɛ he ni wɔkɛha. Kadimɔ mɛi fɛɛ ni jie miishɛɛ kpo lɛ, ni oto gbɛjianɔ koni oyasara amɛ be kroko.
4. Mɛɛ gbɛ nɔ abaatsɔ aja Kaimɔ lɛ he ninefɔ̃ɔ wolo krɛdɛɛ lɛ?
4 Kɛ́ eeehi lɛ, esa ákɛ akɛ ninefɔ̃ɔ wolo krɛdɛɛ nɛɛ awo shiatsɛ fɛɛ shiatsɛ diɛŋtsɛ dɛŋ. No hewɔ lɛ, ŋmalamɔ mɛi ni oyanaaa amɛ yɛ shĩa lɛ ahe saji oshwie shi, ni oto gbɛjianɔ ni oya jɛi be kroko. Asafoi ni amɛninefɔ̃ɔ woji lɛ pii baashwɛ lɛ baanyɛ ashi woji nɛɛ eko yɛ shĩai ni amɛyanaa mɛi yɛ mli lɛ kɛ́ eshwɛ otsi kome ni Kaimɔ gbi baashɛ lɛ, shi esaaa akɛ amɛfeɔ nakai yɛ be ni tsɔɔ otsi nɛɛ hiɛ lɛ mli. Tswaa ofai shi akɛ obaaha mɛi ni okuɔ sɛɛ oyasaraa amɛ, o-Biblia mli nikaselɔi, onanemɛi nitsulɔi, okutsoŋbii, kɛ mɛi krokomɛi ni ole amɛ lɛ ninefɔ̃ɔ wolo nɛɛ eko.
5. Mɛni hewɔ amrɔ nɛɛ ji be ni esa akɛ obɔi ohe saamɔ kɛha gbɛgbalɔi awalɔ feemɔ lɛ?
5 Gbɛgbalɔi Awalɔ Feemɔ: Ani obaanyɛ ojaje Yehowa agbojee lɛ kɛmɔ shi jogbaŋŋ kɛtsɔ ohe ni okɛaawo gbɛgbalɔi awamɔ nitsumɔ lɛ mli yɛ March, April, kɛ May mli lɛ nɔ? Enɛ feemɔ baabi ni ekolɛ ofee tsakemɔi komɛi yɛ odaa gbi gbɛjianɔtoi amli. (Efe. 5:15-17) Obaanyɛ oná nɔmimaa akɛ kɛ́ omia ohiɛ ofee babaoo yɛ Yehowa sɔɔmɔ mli lɛ, obaaná miishɛɛ ni Yehowa aaajɔɔ bo hu. (Abɛi 10:22) Akɛni Kaimɔ be lɛ miibɛŋkɛ hewɔ lɛ, amrɔ nɛɛ ji be ni esa akɛ obɔi ohe saamɔ.—Abɛi 21:5.
6. Mɛni wɔbaanyɛ wɔkase kɛjɛ nyɛmi yoo ko ni eye afii 90 ni kɛ ehe wo gbɛgbalɔi awamɔ nitsumɔ lɛ mli nyɛsɛɛ afi lɛ niiashikpamɔ lɛ mli?
6 Nyɛmi yoo ko ni eye afii 90 lɛ ná miishɛɛ waa akɛ ená hegbɛ ekɛ ehe wo gbɛgbalɔi awamɔ nitsumɔ lɛ mli nyɛsɛɛ afi lɛ. Ekɛɛ akɛ: “Eyɛ mli akɛ misumɔɔ ŋmɔ feemɔ ni mishwe akɛ mabɔi nidumɔ moŋ, shi miyɔse akɛ esa akɛ mikɛ nibii ni he hiaa aye klɛŋklɛŋ gbɛhe. Akɛni miná shwelɛ kɛha Maŋtsɛyeli lɛ he nibii ni mikɛaaye klɛŋklɛŋ gbɛhe hewɔ lɛ, mikpɛ miyiŋ akɛ mikɛ mihe baawo gbɛgbalɔi awamɔ nitsumɔ lɛ mli yɛ March.” Ani ajɔɔ emɔdɛŋbɔɔ lɛ nɔ? Ekɛɛ akɛ: “Minu he akɛ mibɛŋkɛ nyɛmimɛi ni yɔɔ asafo lɛ mli lɛ waa, ni enɛ eha mibɛŋkɛ Yehowa hu waa.” Ani wɔ hu wɔbaanyɛ wɔpɛi wɔshihilɛ mli nibii ni he hiaa lɛ amli wɔkwɛ koni wɔfee tsakemɔi ni tamɔ nakai nɔŋŋ kɛ́ nakai feemɔ aaahi?
7. Ani ewa akɛ aaasɔmɔ akɛ gbɛgbalɔi awalɔ?
7 Ŋmɛlɛtswai 50 ni ataoɔ kɛjɛɔ gbɛgbalɔi awalɔi adɛŋ lɛ jeee nɔ ko ni námɔ wa tamɔ bɔ ni ekolɛ osusuɔ akɛ enámɔ wa lɛ. Okɛ sɔlemɔ asusu odaa gbi nifeemɔi ahe, too obe he gbɛjianɔ, ni oŋma owo kalanda ni bo diɛŋtsɛ ofee kɛha teokrase nifeemɔi lɛ nɔ. Ole bɔ ni oshihilɛ yɔɔ ha jogbaŋŋ fe mɔ fɛɛ mɔ. Kɛ́ obɛ gbɔmɔtsoŋ hewalɛ ni no hewɔ onyɛŋ okɛ bei pii ashiɛ lɛ, ekolɛ obaanyɛ oshiɛ ŋmɛlɛtswai fioo ko daa gbi. Kɛ́ okɛ obe fɛɛ tsuɔ nii loo oyaa skul lɛ, no lɛ obaanyɛ okɛ ohe awo gbɛgbalɔi awamɔ nitsumɔ lɛ mli kɛtsɔ shiɛmɔ ni oooshiɛ gbɛkɛgbɛkɛ loo yɛ otsii lɛ anaagbee lɛ nɔ.
8. Mɛni ye ebua wu ko kɛ eŋa ni amɛnyɛ amɛkɛ amɛhe wo gbɛgbalɔi awamɔ nitsumɔ lɛ mli?
8 Mɛi babaoo enyɛ amɛkɛ amɛhe ewo gbɛgbalɔi awamɔ nitsumɔ lɛ mli akɛ weku. Wu ko kɛ eŋa shashao shi afii abɔ akɛ amɛkɛ amɛhe aaawo gbɛgbalɔi awamɔ nitsumɔ lɛ mli ejaakɛ amɛnu he akɛ amɛshihilɛ eŋmɛŋ amɛ gbɛ. Mɛni amɛfee yɛ enɛ he? “Wɔsɔle wɔha Yehowa koni eye ebua wɔ ni wɔnyɛ wɔtsu nitsumɔ ni wɔkɛ afii babaoo eshwe akɛ wɔɔfee ekome kɛtsu lɛ.” Akɛni amɛto gbɛjianɔ kpakpa hewɔ lɛ, amɛnyɛ amɛtsu oti ni amɛkɛ ma amɛhiɛ lɛ he nii. Amɛkɛɛ kɛfata he akɛ: “Eha wɔná miishɛɛ naakpa. Wɔná jɔɔmɔi babaoo. Ŋaawoo ni wɔkɛhaa ji, kaa okwɛ. Kɛ́ wɔweku lɛ nyɛ efee enɛ lɛ, nyɛ hu nyɛbaanyɛ nyɛfee.”
9. Mɛni nyɛbaanyɛ nyɛfee beni nyɛfeɔ nyɛweku nikasemɔ ni nyiɛ sɛɛ lɛ koni nyɛkɛsaa nyɛhe kɛha nyɔji krɛdɛɛi ni kamɔ nyɛhiɛ lɛ?
9 Mɛni hewɔ nyɛŋɔɔ be ni nyɛkɛbaafee nyɛweku nikasemɔ ni nyiɛ sɛɛ lɛ eko ni nyɛkɛsusu bɔ ni nyɛaafee nyɛlɛɛ nyɛsɔɔmɔ lɛ mli yɛ nyɔji krɛdɛɛi ni kamɔ nyɛhiɛ lɛ amli? Kɛ́ nyɛweku lɛ mli bii fɛɛ nyɛŋ amɛkɛ amɛhe awo gbɛgbalɔi awamɔ nitsumɔ lɛ mli po lɛ, ekolɛ mɔ kome baanyɛ ekɛ ehe awo mli kɛ́ weku lɛ mli bii krokomɛi fi esɛɛ ni amɛye amɛbua lɛ. Kɛ́ nyɛweku lɛ nyɛŋ afee nakai lɛ, ekolɛ nyɛbaanyɛ nyɛkɛma nyɛhiɛ akɛ nyɛbaaha ŋmɛlɛtswai ni nyɛkɛshiɛɔ lɛ aya hiɛ yɛ nyɔji krɛdɛɛi nɛɛ amli.
10. Mɛni hewɔ esa akɛ wɔkɛ mɛi agba shwelɛ ni wɔyɔɔ akɛ wɔkɛ wɔhe baawo gbɛgbalɔi awamɔ nitsumɔ lɛ mli yɛ Kaimɔ be lɛ mli lɛ he sane lɛ?
10 Nyɛyea Nyɛbuaa Nyɛhe: Miishɛɛ ni anáa kɛha nɔ ko feemɔ lɛ náa mɛi krokomɛi anɔ hewalɛ. Okɛ mɛi agba shwelɛ ni oyɔɔ akɛ okɛ ohe aaawo gbɛgbalɔi awamɔ nitsumɔ lɛ mli lɛ he sane. Enɛ baanyɛ awo mɛi krokomɛi hewalɛ ni amɛkɛ amɛhe awo mli. Kɛfata he lɛ, mɛi ni etsu gbɛgbamɔ nitsumɔ lɛ dã lɛ baanyɛ awo bo ŋaa ni baaye abua bo ni oto oshihilɛ kɛ obe he gbɛjianɔ koni onyɛ oshɛ oti ni okɛma ohiɛ lɛ he. (Abɛi 15:22) Kɛ́ obaanyɛ okɛ ohe awo gbɛgbalɔi awamɔ nitsumɔ lɛ mli lɛ, mɛni hewɔ ofɔ̃ɔɔ shiɛlɔ kroko ni ekolɛ eshihilɛ tamɔ onɔ lɛ nine koni efata ohe kɛtsu nitsumɔ ni yɔɔ miishɛɛ nɛɛ?
11. Mɛni onukpai lɛ baanyɛ amɛfee koni mɛi aná shwelɛ kɛha gbɛgbalɔi awamɔ nitsumɔ lɛ yɛ nyɔji ni kamɔ wɔhiɛ lɛ amli?
11 Onukpai babaoo toɔ gbɛjianɔ ni sa koni amɛkɛ amɛhe awo sɔɔmɔ nitsumɔ krɛdɛɛ nɛɛ mli. (Heb. 13:7) Yɛ anɔkwale mli lɛ, enɛ woɔ asafoŋbii lɛ hewalɛ waa! Onukpai tsɔɔ amɛkɛ mɛi krokomɛi asanegbaa hu nɔ amɛhaa mɛi náa shwelɛ kɛha nitsumɔ nɛɛ. Ekolɛ nɔ pɛ ni he hiaa mɛi komɛi ni amɛkɛ amɛhe awo gbɛgbalɔi awamɔ nitsumɔ lɛ mli ji ŋaawoi ni anyɛɔ akɛtsuɔ nii loo hewalɛwoo wiemɔi fioo ko. Ekolɛ sɔɔmɔ nitsumɔ nɔkwɛlɔ lɛ baato kpeei krokomɛi kɛha shiɛmɔyaa he gbɛjianɔ koni mɔ fɛɛ mɔ anyɛ ekɛ ehe awo kutuu odaseyeli mli, beni akpa nitsumɔ loo skul po. Esa akɛ atswa gbɛjianɔtoo nɛɛ he adafi yɛ be kɛ beaŋ. Ebaakwɛ hu koni mɔ fɛɛ mɔ aná shikpɔŋkuku kɛ woji bɔ ni sa.
12. Kɛ́ onyɛɛɛ okɛ ohe awo gbɛgbalɔi awamɔ nitsumɔ lɛ mli lɛ, mɛni obaanyɛ ofee?
12 Kɛ́ oshihilɛi eŋmɛɛɛ bo gbɛ ni okɛ ohe awo gbɛgbalɔi awamɔ nitsumɔ lɛ mli po lɛ, obaanyɛ owo mɛi ni kɛ amɛhe ewo mli lɛ hewalɛ ni osɔle oha amɛ. (Abɛi 25:11; Kol. 4:12) Ekolɛ obaanyɛ oto gbɛjianɔi koni okɛ amɛ aya shiɛmɔ yɛ gbii krokomɛi amli yɛ otsi lɛ mli loo otsɛ yɛ shiɛmɔ nitsumɔ lɛ mli fe bɔ ni ofɔɔ feemɔ lɛ.
13. Mɛɛ oti akɛma Ghana asafoi lɛ ahiɛ, ni mɛɛ yelikɛbuamɔ nyɛsafo lɛ baanyɛ ekɛha koni anyɛ ashɛ he?
13 Aatao Gbɛgbalɔi Awalɔi 12,000 yɛ April: Gbɛgbalɔi awalɔi ayibɔ ni fe fɛɛ ni Ghana nitsumɔhe nine lɛ bu he akɔntaa ji 7,117, ni aná enɛ yɛ April 2000. No hewɔ lɛ oti ni abaanyɛ ashɛ he ni wɔkɛma wɔhiɛ yɛ April ji gbɛgbalɔi awalɔi 12,000. Kɛ́ hooo kwraa ni mɔ kome yɛ shiɛlɔi ekpaa fɛɛ ekpaa ateŋ kɛ ehe wo gbɛgbalɔi awamɔ nitsumɔ lɛ mli yɛ asafo fɛɛ asafo mli lɛ, no lɛ wɔbaanyɛ wɔshɛ oti nɛɛ he. Yɛ anɔkwale mli lɛ, asafoi komɛi baaná shiɛlɔi ni fa fe yibɔ nɛɛ po, ní amɛshihilɛi baaŋmɛ amɛ gbɛ koni amɛkɛ amɛhe awo gbɛgbalɔi awamɔ nitsumɔ lɛ mli. Ewaŋ kɛhaŋ asafoi pii akɛ amɛaashɛ oti nɛɛ ni akɛma asafoi lɛ ahiɛ lɛ he. Bo lɛ kwɛmɔ miishɛɛ ni enɛ baaha aná yɛ nyɛsafo lɛ mli kɛ hewalɛ kpakpa ni eeená yɛ nyɛshikpɔŋkuku lɛ shiɛmɔ nitsumɔ lɛ nɔ!
14. Mɛni hewɔ April ji nyɔŋ ni hi kɛha gbɛgbalɔi awamɔ nitsumɔ lɛ?
14 Mɛni hewɔ April ji nyɔŋ ni hi jogbaŋŋ kɛha gbɛgbalɔi awamɔ nitsumɔ lɛ? Abaaye Kaimɔ lɛ yɛ nyɔŋ nɛɛ shishijee, ni enɛ baaha wɔná hegbɛ babaoo ní wɔkɛku sɛɛ wɔyasara mɛi ni ba lɛ shii abɔ. Wɔkɛ woji tɛtrɛbii lɛ baaha kɛ yiŋtoo akɛ kɛ́ wɔku sɛɛ kɛyasara amɛ lɛ wɔkɛ Biblia lɛ Tsɔɔ wolo lɛ baaha ni wɔje Biblia mli nikasemɔi ashishi. No hewɔ lɛ wɔhe ni wɔkɛaawo gbɛgbalɔi awamɔ nitsumɔ lɛ mli yɛ April lɛ baaha wɔná hegbɛi babaoo kɛje Biblia mli nikasemɔi ashishi. Kɛfata he lɛ, Hɔgbaa komekomei enumɔ kɛ maŋ hejɔɔmɔ gbii yɛ April nyɔŋ lɛ mli, ni enɛ baaha efee mlɛo kɛha nitsulɔi kɛ skulbii koni amɛkɛ amɛhe awo gbɛgbalɔi awamɔ nitsumɔ lɛ mli.
15. Mɛni hewɔ esa akɛ wɔkɛ hiɛdɔɔ atsu nii beni Kaimɔ be lɛ bɛŋkɛɔ lɛ?
15 Kaimɔ lɛ yeli afi fɛɛ afi lɛ jieɔ afi kome yɛ be ni eshwɛ ni nibii agbɛjianɔtoo nɛɛ baaba naagbee lɛ nɔ. Be ni eshwɛ ni wɔkɛaagba mɛi krokomɛi wɔ-Nyɔŋmɔ kpeteŋkpele lɛ he sane lɛ faaa. (1 Kor. 7:29) Hegbɛ kpele ni Kaimɔ nɛɛ eha wɔná akɛ wɔjie wɔŋwɛi Tsɛ lɛ yi lɛ baaho aya kwraa kɛ́ Kaimɔ be lɛ ba naagbee. Eba akɛ wɔɔsaa wɔhe amrɔ nɛɛ koni wɔfee bɔ fɛɛ bɔ ni wɔɔnyɛ kɛjaje Yehowa agbojee lɛ yɛ March, April, kɛ May!
[Caption on page 4]
Ani Wɔbaanyɛ Wɔná Gbɛgbalɔi Awalɔi 12,000 yɛ April?
◼ Pɛimɔ oshihilɛ mli nibii ni he hiaa lɛ amli okwɛ
◼ Nyɛsusua otii ni nyɛkɛaamamɔ nyɛhiɛ akɛ weku lɛ he
◼ Okɛ mɛi agba nɔ ni oto ni obaafee lɛ he sane