Oti ni Sa Kɛha Sɔɔmɔ Afi Hee Lɛ
1. Mɛɛ oti wɔbaanyɛ wɔkɛma wɔhiɛ kɛha sɔɔmɔ afi hee lɛ?
1 Kɛ́ wɔmiisumɔ ni wɔya hiɛ yɛ Nyɔŋmɔjamɔ mli lɛ, no lɛ esa akɛ wɔkɛ otii amamɔ wɔhiɛ. Mɛɛ otii okɛmamɔ ohiɛ kɛha sɔɔmɔ afi hee lɛ? Oti ni sa jogbaŋŋ ji ni okɛ ohe awo gbɛgbalɔi awamɔ nitsumɔ lɛ mli nyɔɔŋ kome loo nɔ ni fa fe nakai. Akɛni nitsumɔ ni tsumɔ ŋɔɔ nɛɛ biɔ ni otsɔ hiɛ oto oshihilɛ he gbɛjianɔ hewɔ lɛ, amrɔ nɛɛ ji be ni sa jogbaŋŋ akɛ ooofee nakai. Mɛni hewɔ esa akɛ okɛ gbɛgbalɔi awamɔ nitsumɔ lɛ afee oti ni ma ohiɛ lɛ?
2. Mɛni hewɔ esa akɛ wɔkɛ gbɛgbalɔi awamɔ nitsumɔ lɛ afee oti ni ma wɔhiɛ lɛ?
2 Yiŋtoi Ahewɔ ni Esa akɛ Wɔkɛ Wɔhe Awo Mli: Kɛ́ wɔkɛ wɔhe wo gbɛgbalɔi awamɔ nitsumɔ lɛ mli lɛ, ehaa wɔkɛ be babaoo tsuɔ nii yɛ shiɛmɔ nitsumɔ lɛ mli, ni enɛ haa wɔsaa wɔŋwɛi Tsɛ lɛ hiɛ “fe tsutsu lɛ.” (1 Tes. 4:1) Kɛ́ wɔsusu nibii fɛɛ ni Yehowa efee eha wɔ lɛ ahe lɛ, wɔtsui tsirɛɔ wɔ koni wɔgba ehe sane wɔtsɔɔ mɛi krokomɛi. (Lala 34:2, 3) Yehowa naa nibii ni wɔkɛshãa afɔle koni wɔtsu babaoo yɛ sɔɔmɔ nitsumɔ lɛ mli lɛ, ni ehiɛ sɔɔ enɛ. (Heb. 6:10) Le ni wɔle akɛ nitsumɔ ni wɔtsuɔ lɛ saa Yehowa hiɛ lɛ haa wɔnáa miishɛɛ waa diɛŋtsɛ.—1 Kron. 29:9.
3, 4. Kɛ́ wɔkɛ wɔhe wo gbɛgbalɔi awamɔ nitsumɔ lɛ mli lɛ, mɛɛ sɛɛnamɔi jɛɔ mli kɛbaa?
3 Kɛ́ ofɔɔ nitsumɔ ko tsumɔ lɛ, bei pii lɛ nitsumɔ lɛ bafeɔ nɔ ni yɔɔ mlɛo ní tsumɔ yɔɔ miishɛɛ. Be babaoo ní okɛaatsu nii yɛ shiɛmɔ nitsumɔ lɛ mli lɛ baaha ohe asa kɛ shiɛmɔ. Ewaŋ kɛhaŋ bo akɛ oooje sanegbaa shishi, ni obaanyɛ okɛ Biblia lɛ atsu nii jogbaŋŋ. Kɛ́ okɛ mɛi fɔɔ ohemɔkɛyeli lɛ he sanegbaa lɛ, emli yaa nɔ ewaa. Mɛi babaoo ni kulɛ amɛfeee Biblia mli nikasemɔ lɛ enyɛ amɛmiifee eko amrɔ nɛɛ akɛni amɛkɛ amɛhe wo gbɛgbalɔi awamɔ nitsumɔ lɛ mli lɛ hewɔ.
4 Wɔhe ni wɔkɛaawo gbɛgbalɔi awamɔ nitsumɔ lɛ mli lɛ hu baawo wɔ hewalɛ ni wɔfee ekãa yɛ mumɔŋ. Nyɛmi nuu ko ni tsutsu lɛ eji daa gbɛgbalɔ lɛ yɔse akɛ heloonaa nitsumɔ miihe ebe babaoo, no hewɔ lɛ ekpɛ eyiŋ akɛ ekɛ ehe baawo gbɛgbalɔi awamɔ nitsumɔ lɛ mli nyɔɔŋ kome. Ekɛɛ akɛ: “Nakai nyɔɔŋ kome lɛ ha mifee ekãa yɛ mumɔŋ bɔ ni ha minaa kpɛ mihe! Enɛ hewɔ lɛ mito gbɛjianɔ akɛ matsu gbɛgbalɔi awamɔ nitsumɔ lɛ daa nyɔɔŋ, ni enɛ ha mibatsɔ daa gbɛgbalɔ ekoŋŋ.”
5. Kɛ́ wɔnuɔ he akɛ wɔhe esako lɛ, mɛɛ gbɛ nɔ wɔɔtsɔ wɔye nakai henumɔ lɛ nɔ?
5 Ye Gbɛtsii Nii Anɔ: Ekolɛ mɛi komɛi baashashao shi akɛ amɛkɛ amɛhe aaawo gbɛgbalɔi awamɔ nitsumɔ lɛ mli akɛni amɛnuɔ he akɛ amɛhe esako yɛ shiɛmɔ nitsumɔ lɛ mli lɛ hewɔ. Kɛ́ enɛ ji nɔ ni tsĩɔ onaa lɛ, no lɛ Yehowa baanyɛ aye abua bo taakɛ eye ebua Yeremia lɛ. (Yer. 1:6-10) Eyɛ mli akɛ Mose ‘jeee wielɔ ko, ni elilɛi hu tsii’ moŋ, shi Yehowa kɛ lɛ tsu E-suɔmɔnaa nifeemɔ he nii. (2 Mose 4:10-12) Kɛ́ onuɔ he akɛ ohe esako lɛ, no lɛ sɔlemɔ obi Yehowa ní ewo bo hewalɛ.
6. Te mɛi ni bɛ gbɔmɔtsoŋ hewalɛ loo mɛi ni bɛ dekã lɛ aaafee tɛŋŋ amɛkɛ amɛhe awo gbɛgbalɔi awamɔ nitsumɔ lɛ mli?
6 Ani hela loo deka ni obɛ lɛ haa oshashaoɔ shi akɛ okɛ ohe aaawo gbɛgbalɔi awamɔ nitsumɔ lɛ mli? Kɛ́ oji mɔ ni bɛ gbɔmɔtsoŋ hewalɛ lɛ, no lɛ shiɛmɔ ni oooya lɛ fiofio lɛ baanyɛ aha okɛ ohe awo gbɛgbalɔi awamɔ nitsumɔ lɛ mli. Kɛ́ oji mɔ ni dekã faaa lɛ, no lɛ obaanyɛ oto nifeemɔi ni he ehiaaa tsɔ lɛ ahe gbɛjianɔ ni otsu nomɛi ahe nii yɛ nyɔɔŋ kroko mli. Mɛi komɛi ni kɛ amɛbe fɛɛ tsuɔ nii lɛ bi gbɛ kɛjɛ nitsumɔ mli gbi kome loo gbii enyɔ, ni no ha amɛnyɛ amɛná dekã ni amɛkɛ amɛhe ewo gbɛgbalɔi awamɔ nitsumɔ lɛ mli.—Kol. 4:5.
7. Mɛni hewɔ ehe hiaa akɛ aaasɔle daa yɛ gbɛgbalɔi awamɔ nitsumɔ lɛ he lɛ?
7 Gbɛ nɔ ní Oootsɔ Otsu He Nii: Sɔlemɔ yɛ shwelɛ ni oná akɛ okɛ ohe baawo gbɛgbalɔi awamɔ nitsumɔ lɛ mli lɛ he. Bi Yehowa ní ejɔɔ mɔdɛŋ ni obɔɔ akɛ olɛɛ osɔɔmɔ lɛ mli lɛ nɔ. (Rom. 12:11, 12) Ebaanyɛ eye ebua bo ni okɛ nilee akpɛ oyiŋ yɛ bɔ ni ooofee oná dekã lɛ he. (Yak. 1:5) Kɛ́ obɛ he miishɛɛ akɛ okɛ ohe aaawo mli lɛ, bi Yehowa ni eye ebua bo ni oná shiɛmɔ nitsumɔ lɛ he miishɛɛ.—Luka 10:1, 17.
8. Mɛɛ gbɛ nɔ Abɛi 15:22 lɛ ni okɛaatsu nii lɛ baanyɛ awo bo hewalɛ ni okɛ ohe awo gbɛgbalɔi awamɔ nitsumɔ lɛ mli?
8 Nyɛsusua gbɛgbalɔi awamɔ nitsumɔ lɛ ni nyɛkɛaafee oti ní ma nyɛhiɛ lɛ he akɛ weku. (Abɛi 15:22) Ekolɛ weku lɛ mli bii lɛ baanyɛ afĩ weku lɛ mlinyo kome sɛɛ koni ekɛ ehe awo gbɛgbalɔi awamɔ nitsumɔ lɛ mli. Okɛ mɛi krokomɛi ni yɔɔ asafo lɛ mli, titri lɛ mɛi ni amɛshihilɛ tamɔ onɔ̃ lɛ agba shwelɛ ni oná akɛ okɛ ohe baawo gbɛgbalɔi awamɔ nitsumɔ lɛ mli lɛ he sane. Enɛ baanyɛ awo bo hewalɛ waa ní okɛ ohe awo gbɛgbalɔi awamɔ nitsumɔ lɛ mli.
9. Mɛɛ nyɔji obaanyɛ ohala akɛ okɛbaatsu gbɛgbalɔi awamɔ nitsumɔ lɛ?
9 Kɛ́ okwɛ shiɛmɔ he gbɛjianɔ ni oto kɛha sɔɔmɔ afi hee lɛ, mɛɛ be osusuɔ akɛ obaanyɛ okɛ ohe awo gbɛgbalɔi awamɔ nitsumɔ lɛ mli? Kɛ́ oji nitsulɔ ni kɛ ebe fɛɛ tsuɔ nii loo oji mɔ ni yaa skul lɛ, ekolɛ obaasumɔ ni okwɛ akɛ obaanyɛ okɛ ohe awo mli yɛ nyɔji ni hejɔɔmɔ gbi yɔɔ mli, loo Hɔɔ enumɔ loo Hɔgbaa enumɔ yɔɔ mli lɛ amli. Akɛ nɔkwɛmɔnɔ lɛ, otsii anaagbee enumɔ yɔɔ September, December, March, kɛ August mli. Hɔɔ enumɔ yɔɔ May mli, ni Hɔgbaa enumɔ yɔɔ June hu mli. Kɛ́ oyɛ gbɔmɔtsoŋ hewalɛnamɔ mli naagbai lɛ, obaanyɛ otsu yɛ nyɔji ni kɔɔyɔŋ tsakemɔ baahi kɛha bo lɛ amli. Ekolɛ obaanyɛ okɛ ohe awo gbɛgbalɔi awamɔ nitsumɔ lɛ mli hu yɛ nyɔɔŋ ni ato akɛ kpokpaa nɔkwɛlɔ lɛ baaba ebasara nyɛsafo lɛ mli. Kɛ́ ebasara nyɛsafo lɛ, obaaná hegbɛ ni oya kpee ni ekɛ daa gbɛgbalɔi lɛ baafee lɛ klɛŋklɛŋ fã lɛ eko. Akɛni wɔsɛɛ afi lɛ abaaye Kaimɔ lɛ March 22 lɛ hewɔ lɛ, March, April, kɛ May baafee nyɔji ni sa jogbaŋŋ ní okɛaatsu gbɛgbalɔi awamɔ nitsumɔ lɛ. Kɛ́ ohala nyɔɔŋ loo nyɔji ní obaasumɔ ni okɛtsu gbɛgbalɔi awamɔ nitsumɔ lɛ, ŋmalamɔ be ni okɛbaaya shiɛmɔ ni baaha oná ŋmɛlɛtswai ni ataoɔ lɛ oshwie shi.
10. Mɛni obaanyɛ ofee kɛ́ onyɛɛɛ okɛ ohe awo gbɛgbalɔi awamɔ nitsumɔ lɛ mli?
10 Kɛ́ onu he akɛ onyɛŋ okɛ ohe awo gbɛgbalɔi awamɔ nitsumɔ lɛ mli yɛ sɔɔmɔ afi ni baa lɛ mli po lɛ, obaanyɛ okɛ ekãa atsu shiɛmɔ nitsumɔ lɛ. Yaa nɔ okɛ onyɛmɔ fɛɛ ashiɛ, ní oná nɔmimaa akɛ Yehowa hiɛ sɔɔ osusuma muu fɛɛ ni okɛsɔmɔɔ lɛ lɛ. (Gal. 6:4) Wó mɛi ni kɛ amɛhe woɔ gbɛgbalɔi awamɔ nitsumɔ lɛ mli lɛ hewalɛ, ní ofĩ amɛ sɛɛ. Ekolɛ obaanyɛ oto gbɛjianɔ ni okɛ amɛ aya shiɛmɔ gbi kome yɛ otsi lɛ mli.
11. Mɛni hewɔ esa akɛ wɔkɛ hiɛdɔɔ atsu be ni wɔyɔɔ mli nɛɛ he nii lɛ?
11 Yehowa webii kɛ hiɛdɔɔ tsuɔ be ni wɔyɔɔ mli nɛɛ he nii. Nitsumɔ yɛ ni esa akɛ atsu—esa akɛ ashiɛ sanekpakpa lɛ. Adesai awala yɛ oshara mli, ni be ni eshwɛ lɛ faa dɔŋŋ. (1 Kor. 7:29-31) Suɔmɔ ni wɔyɔɔ kɛha Nyɔŋmɔ kɛ gbɔmɛi lɛ baatsirɛ wɔ koni wɔkɛ wɔnyɛmɔ fɛɛ ashiɛ. Hɛɛ, eji oti ni sa lɛɛlɛŋ akɛ wɔɔmia wɔhiɛ ní wɔto gbɛjianɔ jogbaŋŋ, ni wɔkɛ wɔhe awo gbɛgbalɔi awamɔ nitsumɔ lɛ mli kɛhoo kwraa lɛ nyɔɔŋ kome yɛ sɔɔmɔ afi hee lɛ mli!