Sanebimɔ He
◼ Amrɔ nɛɛ ni wɔnine eshɛ Nilee Ni Kɛ Mɔ Yaa Naanɔ Wala Mli wolo lɛ nɔ lɛ, esa akɛ afee shia Biblia mli nikasemɔ kɛyashi mɛɛ be?
Wɔ Maŋtsɛyeli Sɔɔmɔ kɛha September 1993 lɛ wo ŋaa koni aya nɔ akɛ mɛi heei ni yɔɔ wiemɔ lɛ he miishɛɛ lɛ afee shia Biblia mli nikasemɔ kɛyashi beni aaagbe woji enyɔ kasemɔ naa. Amrɔ nɛɛ ni wɔnine eshɛ Nilee wolo lɛ nɔ lɛ, etamɔ nɔ ni nilee yɛ mli akɛ aaafee tsakemɔ yɛ gbɛtsɔɔmɔ nɛɛ mli, taakɛ atsɔɔ yɛ January 15, 1996 Buu-Mɔɔ ni je kpo lɛ baafai 13 kɛ 14 lɛ mli lɛ.
Afee Nilee wolo lɛ koni eye ebua mɛi ni “hiɛ naanɔ wala he jwɛŋmɔ kpakpa” lɛ koni amɛkase nɔ ni ehe hiaa ni amɛle, bɔni afee ni amɛjɔɔ amɛhe nɔ amɛha Yehowa ni abaptisi amɛ. (Bɔf. 13:48, NW) No hewɔ lɛ, kɛ agbe wolo hee nɛɛ kasemɔ naa lɛ, ehe ebahiaŋ akɛ akɛ nakai nikaselɔ lɛ nɔŋŋ aaakase wolo ni ji enyɔ. Be mli ni o-Biblia mli nikaselɔi lɛ jeɔ shishi akɛ amɛaamɔ anɔkwale lɛ mli lɛ, obaanyɛ owo amɛ hewalɛ fiofio koni amɛha amɛnilee lɛ aye emuu kɛtsɔ Yehowa Odasefoi akpeei ni amɛaaya kɛ agbɛnɛ Biblia lɛ kɛ Kristofoi awoji sɔrɔtoi lɛ akanemɔ nɔ.
Kɛ ole sanebimɔi ni yɔɔ Organized to Accomplish Our Ministry wolo lɛ baafai 175 kɛyashi 218 lɛ jogbaŋŋ lɛ, enɛ baanyɛ aye abua. Eyɛ mli akɛ esaaa akɛ otsɛɔ saji asɛɛ kɛjɛɔ sanebimɔi nɛɛ amli loo ni okɛ Biblia mli nikaselɔ lɛ tĩɔ nomɛi amli moŋ, shi eeefee nɔ ni hi akɛ oooma saji otii ni yɔɔ Nilee wolo lɛ mli lɛ anɔ mi koni no aye abua nikaselɔ lɛ ni etsɔɔ Biblia mli shishijee anɔkwalei lɛ ahe nilee kpakpa ni eyɔɔ, be mli ni onukpai lɛ kɛ mɛi ni abaabaptisi amɛ lɛ tĩɔ sanebimɔi lɛ amli lɛ.
Ehe ehiaaa akɛ aaawie saji ni akɛgbe saji ni yɔɔ Nilee wolo lɛ mli lɛ yi, ni akɛ saji ni bɛ nikasemɔ lɛ mli loo naataomɔ saji krokomɛi miiwo mli koni akɛfi Biblia mli nitsɔɔmɔi asɛɛ, loo ni akɛkpa amale tsɔɔmɔi ahe mama. Nɔ ni enɛ baafee kɛkɛ ji akɛ ebaaha akɛ be kakadaŋŋ afee nikasemɔ lɛ. Yɛ no najiaŋ lɛ, ayɛ hiɛnɔkamɔ akɛ abaanyɛ agbe wolo lɛ kasemɔ naa mra, ekolɛ yɛ nɔ ni shɛɔ nyɔji ekpaa mli. Enɛ maa bɔ ni ehe hiaa ni wɔkase saji lɛ jogbaŋŋ kɛtsɔ hiɛ, bɔni afee ni wɔnyɛ wɔkɛha ni efee faŋŋ ni ekɔ otii lɛ pɛ ahe lɛ nɔ mi. Esa akɛ awo nikaselɔ lɛ hu hewalɛ koni ekase kɛtsɔ hiɛ, ni etao ŋmalɛi ni aŋmalako emli wiemɔi lɛ, ni ebɔ mɔdɛŋ enu nɔ ni wolo lɛ tsɔɔ lɛ shishi jogbaŋŋ yɛ yitso fɛɛ yitso mli.
Buu-Mɔɔ lɛ ema bɔ ni ehe hiaa akɛ Yehowa Odasefoi aaafee Biblia mli nikasemɔi babaoo ni mɔɔ shi yɛ be kuku mli lɛ nɔ mi. (Kwɛmɔ Yesaia 60:22.) Nilee wolo lɛ ni akɛaatsu nii jogbaŋŋ kɛmɔ shi lɛ baanyɛ aye abua mɛi heei lɛ, ni amɛna nilee ni kɛ mɔ yaa naanɔ wala mli, ni amɛkɛtsu nii.—Yoh. 17:3.