Sanebimɔ He

◼ Esa ákɛ akɛ Nilee wolo lɛ atsu nii koni akɛ mɔ aŋkro afee Biblia mli nikasemɔ ni ato he gbɛjianɔ lɛ kɛyashi mɛɛ be?

Yehowa miijɔɔ egbɛjianɔtoo lɛ ŋmɛnɛ. Wɔnaa enɛ he odaseyeli daa afi, yɛ be mli ni mɛi heei akpei abɔ kɔɔ shidaamɔ kɛhaa anɔkwale lɛ. Nilee wolo lɛ miitsu nii akɛ dɛŋdade ni mɔɔ shi jogbaŋŋ yɛ enɛ he nitsumɔ mli. January 15, 1996 Buu-Mɔɔ ni je kpo lɛ tsɔɔ mli akɛ, afee wolo nɛɛ koni eye ebua Biblia mli nikaselɔ lɛ ni eya hiɛ oyayaayai, ekolɛ kɛyashi he ni abaanyɛ abaptisi lɛ yɛ nyɔji fioo komɛi asɛɛ.

Yɛ enɛ hewɔ lɛ, nakai Buu-Mɔɔ lɛ nɔŋŋ, baafa 17 lɛ wo ŋaa akɛ: “Beni mɔ ko egbe e-Biblia lɛ kasemɔ yɛ Nilee wolo lɛ mli lɛ naa ni abaptisi lɛ lɛ, ehe ebahiaŋ akɛ aaaje gbɛ akɛ lɛ akase wolo ni ji enyɔ.”

Ni mɔ ni abaptisiii lɛ beni akase Nilee wolo lɛ agbe naa lɛ hu? July 1996 Wɔ Maŋtsɛyeli Sɔɔmɔ, baafa 6, kuku 23 lɛ kai wɔ yɛ sane oti ni akɛha yɛ Buu-Mɔɔ lɛ mli lɛ he, ní kɔɔ woji krokomɛi ni akɛ nakai nikaselɔ lɛ nɔŋŋ ni akɛ lɛ egbe Nilee wolo lɛ kasemɔ naa lɛ ekaseŋ lɛ he. Ani enɛ tsɔɔ akɛ wɔbɛ he miishɛɛ akɛ wɔɔye wɔbua Biblia mli nikaselɔ ko ni eya hiɛ fe nɛkɛ? Dabi. Wɔmiisumɔ ni mɛi anine ashɛ anɔkwale lɛ he shishijee nilee lɛ nɔ. Ni kɛlɛ, aakpa gbɛ akɛ, nitsɔɔlɔ ni he esa lɛ baanyɛ aye abua nikaselɔ anɔkwafo lɛ koni ená nilee ni fa saŋŋ koni ekpɛ eyiŋ yɛ nilee mli akɛ ebaasɔmɔ Yehowa yɛ be kuku ko sɛɛ. Eeenyɛ efee akɛ, yɛ shihilɛi sɔrɔtoi amli ni Biblia mli nikaselɔi komɛi yɔɔ hewɔ lɛ, amɛbaasumɔ po akɛ amɛkase babaoo fe shikome daa otsi.

Eji anɔkwale akɛ, nikaselɔi komɛi ahiɛyaa lɛ baafee blɛoo fe mɛi krokomɛi. Shi, kɛ agbe Nilee wolo lɛ kasemɔ ni ekolɛ akɛ be babaoo ni fa fe bɔ ni eji diɛŋtsɛ lɛ ekase lɛ naa, ni mɔ lɛ ekpɛko eyiŋ akɛ eesumɔ ni ekɛ asafo lɛ abɔ lɛ, no lɛ shiɛlɔ lɛ baafee jogbaŋŋ akɛ ekɛ onukpai ni yɔɔ Asafoŋ Sɔɔmɔ Ajinafoi Akuu lɛ mli lɛ ateŋ mɔ kome agba shihilɛ lɛ he sane. Kɛ shihilɛi komɛi yɛ ni ha eba lɛ nakai loo shihilɛ ko ni yɔɔ sɔrɔto kwraa yɛ lɛ, no lɛ abaanyɛ akɛ yelikɛbuamɔ kroko aha. Enɛ kɛ shishitoo mla ni yɔɔ nɔ ni aŋma yɛ January 15, 1996 Buu-Mɔɔ baafa 17 lɛ kukuji 11 kɛ 12 lɛ kpaa gbee.

Esa akɛ anɔkwale lɛ shishijee nilee ni aaale po lɛ akanya nikaselɔ lɛ koni eya Kristofoi akpeei. Enɛ baanyɛ aha nikaselɔ lɛ kɛ odaseyeli ni yɔɔ faŋŋ aha akɛ eesumɔ ni esɔmɔ Yehowa. Kɛ akɛ be saŋŋ etsu nii ni akɛkase Nilee wolo lɛ agbe naa, ni anaaa mumɔŋ hiɛsɔɔ ni tamɔ nɛkɛ lɛ, no lɛ ebaafee nɔ ni nilee yɔɔ mli akɛ afɔ̃ɔ nikasemɔ lɛ feemɔ.