Kpokpaa nɔ Kpee He Gbɛjianɔtoo Hee
1 Kpokpaa nɔ kpee he gbɛjianɔtoo hee ni baaje shishi yɛ February lɛ baawie saneyitso ni ji “Na Miishɛɛ Babaoo ni Yɔɔ Nɔ̃ Hamɔ Mli lɛ Mli Ŋɔɔmɔ.” (Bɔf. 20:35) Atsɔɔ miishɛɛ shishi akɛ “shihilɛ ni hi kɛ tsui ni nyɔɔ mɔ mli.” Ŋmɛnɛ, mɛi pii sháa nɔ fɛɛ nɔ ni baaha amɛna miishɛɛ lɛ kɛjɛɔ shihilɛ mli, ni kɛ amɛfee nakai lɛ, bei pii lɛ, esɛɛ etsɛɛɛ. No jeee anɔkwa miishɛɛ. Kɛlɛ, Yehowa tsɔɔ wɔ nii ni baaha wɔna he sɛɛ kɛya naanɔ. (Yes. 48:17; 1 Yoh. 2:17) Kpokpaa nɔ kpee he gbɛjianɔtoo hee lɛ baama bɔ ni wɔɔfee wɔná miishɛɛ babaoo kɛtsɔ mumɔŋ gbɛfaŋ nihamɔ nɔ lɛ nɔ mi.
2 Wɔbaakase gbɛi ni anyɛɔ atsuɔ he nii ni wɔbaanyɛ wɔtsɔ nɔ wɔkɛ wɔhe aha yɛ sɔɔmɔ nitsumɔ lɛ mli. Wiemɔi ni nɔkwɛlɔ gbɛfãlɔi lɛ kɛbaaha lɛ ekomɛi ayitso ji: “Nanemɛi ni Wɔkɛ Ninamɔ ni Esaaa lɛ Aaafee,” “Okɛ Bulɛ Aha Ŋwɛi Gbɛjianɔtoo ni Ji ‘Nikeenii yɛ Gbɔmɛi Ateŋ’ Lɛ,” kɛ “Na Anɔkwa Miishɛɛ Gbɛi Sɔrɔtoi lɛ Mli Ŋɔɔmɔ.” Mɛi ni miishwe ni abaptisi amɛ yɛ kpee lɛ shishi lɛ baasumɔ ni amɛkɛ onukpai asɛinɔtalɔ lɛ awie he koni eto gbɛjianɔ ni onukpai kɛ amɛ atĩ sanebimɔi kɛha baptisimɔ lɛ mli. Yehowa ni amɛaasɔmɔ yɛ wekukpaa kpakpa mli lɛ baaha mɛi hee ni ábaptisi amɛ lɛ ana miishɛɛ babaoo.
3 Hegbɛ ni Yehowa yɔɔ lɛ ni ayɔseɔ yɛ gbɛ ni ja nɔ lɛ hu kɛ anɔkwa miishɛɛ kɛ shweshweeshwe shihilɛ baa. Ehe miihia ni mɔ fɛɛ mɔ ale enɛ. No hewɔ lɛ, maŋshiɛmɔ ni abaaha yɛ kpokpaa nɔ kpee lɛ shishi lɛ yitso ji “Okɛ Nyɔŋmɔ Webii ni Yɔɔ Miishɛɛ lɛ Afee Ekome.” Kwɛmɔ ni ofɔ̃ mɛi fɛɛ ni yɔɔ anɔkwale lɛ he miishɛɛ lɛ anine ni amɛbabo wiemɔ nɛɛ toi. Amɛnako shweshweeshwe shihilɛ diɛŋtsɛ kɛ miishɛɛ ni sɛɛ tsɛɔ yɛ adesa nɔyeli shishi yɛ je ni yɔɔ Satan hewalɛ shishi nɛɛ mli. (Jaj. 8:9) Shi mɛɛ miishɛɛ po amɛbaana nɛkɛ yɛ be mli ni amɛkɛ Yehowa webii ni yɔɔ miishɛɛ lɛ bɔɔ lɛ!—Lala 144:15b, NW.
4 Yɛ shihilɛi ni yaa nɔ efiteɔ yɛ nibii agbɛjianɔtoo nɛɛ mli lɛ fɛɛ sɛɛ lɛ, miishɛɛ Nyɔŋmɔ lɛ haŋ mɛi ni naa miishɛɛ babaoo yɛ mumɔŋ nihamɔ mli lɛ anine anyɛ shi kɔkɔɔkɔ. (1 Tim. 1:11, NW) Kpokpaa nɔ kpee he gbɛjianɔtoo hee lɛ baaha ana enɛ faŋŋ yɛ anɔkwale mli. Kaaha eho ohe!