Awoɔ Anɔkwayeli He Nyɔmɔ
1 Akɛɔ wɔ yɛ Hebribii 11:6 akɛ, Nyɔŋmɔ ji “mɛi ni taoɔ esɛɛgbɛ lɛ anyɔmɔwolɔ.” Gbɛ kome ni etsɔɔ nɔ ewoɔ etsuji ni etu amɛhe amɛha lɛ, ni ‘amɛye anɔkwa yɛ nii fioo mli’ lɛ nyɔmɔ ji ‘ehaa amɛyeɔ nii pii anɔ.’ (Mat. 25:23) Yɛ gbɛ kroko nɔ lɛ, bei pii lɛ, Yehowa woɔ nitsumɔi kpakpai ahe nyɔmɔ kɛtsɔ sɔɔmɔ hegbɛi babaoo ni ekɛhaa edasefoi anɔkwafoi lɛ nɔ.
2 Awo bɔfo Paulo anɔkwayeli lɛ he nyɔmɔ kɛtsɔ shiɛmɔ nitsumɔ ni akɛwo edɛŋ, ní no kɛ lɛ tee Europa kɛ Asia Bibioo lɛ mli maji kɛ akrowai amli lɛ nɔ. (1 Tim. 1:12) Eyɛ mli akɛ ekɛ mɔdɛŋbɔɔ babaoo tsu nii yɛ esɔɔmɔ nitsumɔ ni eeegbe naa kwraa lɛ mli moŋ, shi Paulo bu hegbɛ ni enine eshɛ nɔ lɛ waa diɛŋtsɛ. (Rom. 11:13; Kol. 1:25) Ejie etsuiŋ hiɛsɔɔ lɛ kpo kɛtsɔ ekãa ni ekɛtao hegbɛi koni ekɛshiɛ lɛ nɔ. Yɛ nii ni ekɛ ekãa tsu nɛɛ hewɔ lɛ, etsɔɔ faŋŋ akɛ eeehi shi yɛ ehemɔkɛyeli lɛ naa. Enɔkwɛmɔ nɔ lɛ tsirɛɔ wɔ koni wɔbu wɔ sɔɔmɔ hegbɛi lɛ akɛ jwetri.
3 Yehowa Kɛ Sɔɔmɔ Nitsumɔ ko Eha Wɔ: Mɛɛ gbɛ nɔ wɔjieɔ jwɛŋmɔ ni tamɔ nɛkɛ ni Paulo jie lɛ kpo nɛɛ nɔŋŋ kpo yɛ hegbɛ ni nyɔmɔwoo yɔɔ mli nɛɛ he? Wɔtaoɔ gbɛ̀i ni wɔɔtsɔ nɔ wɔkɛ wɔhe awo shiɛmɔ nitsumɔ lɛ mli babaoo. Wɔkɛ hegbɛ fɛɛ hegbɛ ni wɔnaa lɛ tsuɔ nii ni wɔkɛyeɔ odase trukaa ni wɔyeɔ odase yɛ shinaai anaa hu. Wɔdiɔ mɛi fɛɛ ni wɔnaaa amɛ yɛ shia lɛ asɛɛ, ni wɔfeɔ sɛɛsaramɔi yɛ mɛi fɛɛ ni yɔɔ wiemɔ lɛ he miishɛɛ lɛ aŋɔɔ. Ni wɔyeɔ gbɛjianɔ ni wɔtoɔ koni wɔkɛ mɛi afee shia Biblia mli nikasemɔi lɛ nɔ.
4 Paulo wo ŋaa yɛ wɔ shiɛmɔ nitsumɔ lɛ he akɛ: “Kã he kɛ hehiamɔ.” (2 Tim. 4:2, NW) Nɔ ko ni akɛ hehiamɔ feɔ lɛ biɔ ni agbala jwɛŋmɔ kɛya nɔ amrɔ nɔŋŋ. Ani wɔtsuɔ wɔ shiɛmɔ nitsumɔ lɛ he nii kɛ hehiamɔ su, ni wɔhaa ebaa klɛŋklɛŋ gbɛhe yɛ wɔ shihilɛi amli? Akɛ nɔkwɛmɔ nɔ lɛ, wɔsumɔŋ ni wɔŋmɛ gbɛ koni wɔ hiɛtserɛjiemɔ nifeemɔi kɛ wɔ aŋkroaŋkro nibii krokomɛi asɛɛdii yɛ otsi lɛ naagbee lɛ tsĩɔ be ni esa akɛ wɔtu wɔhe wɔha yɛ shiɛmɔ nitsumɔ lɛ mli lɛ naa. Akɛni wɔyɔɔ nɔmimaa akɛ nibii agbɛjianɔtoo nɛɛ naagbee lɛ miibɛŋkɛ oyayaayai hewɔ lɛ, wɔyɛ nɔmimaa hu akɛ Maŋtsɛyeli lɛ he sanekpakpa lɛ shiɛmɔ lɛ ji nitsumɔ ni he hiaa fe fɛɛ ni wɔbaanyɛ wɔtsu.
5 Anɔkwa ni wɔyeɔ wɔhaa Nyɔŋmɔ kɛ nitsumɔ ni ekɛ wo wɔdɛŋ ni wɔɔtsu daa lɛ ji nɔ ni tsɔɔ anɔkwayeli ni wɔkɛhaa lɛ. Nyɛhaa wɔgbea wɔ sɔɔmɔ lɛ naa kwraa bɔni afee ni Yehowa awo wɔ anɔkwayeli lɛ he nyɔmɔ yɛ gbɛ ni da nɔ.