Nyɛhaa Wɔyaa Hiɛ yɛ Sɔɔmɔ Nitsumɔ lɛ Mli
1 Bɔfo Paulo wo Kristofoi aŋaa koni amɛnyiɛ Nyɔŋmɔ gbɛ lɛ nɔ, ni ‘amɛteke nɔ fe tsutsu lɛ.’ (1 Tes. 4:1) Mɛni enɛ biɔ ni wɔfee? Nɔ ni sa feemɔ ji akɛ, wɔya nɔ wɔtao gbɛ̀i anɔ ni wɔɔtsɔ wɔya hiɛ yɛ Nyɔŋmɔ sɔɔmɔ mli, ní wɔbɔ mɔdɛŋ be fɛɛ be akɛ ‘wɔɔgbe wɔsɔɔmɔ lɛ naa kwraa.’—2 Tim. 4:5.
2 Yiŋtoo ni Yɔɔ Sɛɛ: Shwelɛ ni wɔyɔɔ akɛ wɔsɔmɔ wɔ-Bɔlɔ lɛ kwraa kɛmɔ shi lɛ ji nɔ ni tsirɛɔ wɔ koni wɔya hiɛ yɛ wɔsɔɔmɔ nitsumɔ lɛ mli. Wɔmiisumɔ ni wɔdara yɛ mumɔŋ, ní wɔtao gbɛ̀i anɔ ni wɔɔtsɔ wɔha wɔsɔɔmɔ nitsumɔ lɛ aya hiɛ. Gbɛjianɔ kpakpa ni wɔɔto, kɛ jwɛŋmɔ ni ja ní wɔɔná lɛ baaye abua wɔ koni wɔshɛ teokrase otii ahe.—Lala 1:1, 2; Fil. 4:6; Heb. 10:24, 25.
3 Wɔsɔɔmɔ nitsumɔ lɛ mli ní wɔɔlɛɛ lɛ biɔ ni wɔná he-kɛ-afɔleshaa su. Kɛ́ wɔkɛ hiɛdɔɔ jwɛŋ nɔkwɛmɔnɔ kpakpa ni Yesu fee lɛ nɔ lɛ, wɔbaanyɛ wɔná su nɛɛ. (Mat. 20:28) Yesu ná miishɛɛ waa akɛ esɔmɔ mɛi krokomɛi yɛ esɔɔmɔ nitsumɔ lɛ mli. (Bɔf. 20:35) Wɔbaanyɛ wɔkase Yesu nɔkwɛmɔnɔ lɛ kɛtsɔ mɛi ahe miishɛɛ ní wɔɔná, kɛ klalo ní wɔɔfee akɛ wɔkɛ hegbɛi ni wɔnine baashɛ nɔ lɛ baatsu nii koni wɔya hiɛ yɛ wɔsɔɔmɔ nitsumɔ lɛ mli lɛ nɔ.—Yes. 6:8.
4 Gbɛfaŋnɔ ni Esa akɛ Fɔlɔi Atsu: Fɔlɔi baanyɛ adu shwelɛ ni ayɔɔ akɛ asɔmɔ mɛi krokomɛi ní alɛɛ sɔɔmɔ nitsumɔ lɛ mli lɛ amɛwo amɛbii lɛ amli kɛjɛ amɛgbekɛbiiashi tɔɔ. Gbekɛbii lɛ baayɔse mɔdɛŋ ni weku lɛ mli bii lɛ bɔɔ lɛ, kɛ ekãa ni amɛkɛlɛɛɔ amɛsɔɔmɔ nitsumɔ lɛ mli lɛ. Beni nyɛminuu ko ji gbekɛ nuu fioo lɛ, enii kɛ lɛ fee ekome kɛtsu teokrase nitsumɔi, ni enɛ tsirɛ lɛ koni eya hiɛ yɛ sɔɔmɔ nitsumɔ lɛ mli. Akɛni enii yɛ miishɛɛ ni ebɔɔ mɔdɛŋ waa hewɔ lɛ, enɛ tsirɛ lɛ ni etao gbɛ̀i anɔ ni eeetsɔ esɔmɔ enyɛmimɛi lɛ. Amrɔ nɛɛ eji asafoŋ sɔɔlɔ.
5 Aatao Nyɛmimɛi Hii: “Kɛ́ mɔ ko miitao eya hiɛ . . . lɛ, eetao nitsumɔ kpakpa.” (1 Tim. 3:1, NW) Wiemɔi nɛɛ woɔ nyɛmimɛi hii hewalɛ koni amɛya hiɛ ní amɛhe asa kɛha sɔɔmɔ hegbɛi krokomɛi ahe nitsumɔ yɛ Yehowa asafo lɛ mli. Enɛ feemɔ biii ni amɛná hesaai loo nyɛmɔi krɛdɛɛi komɛi dã. Esa akɛ nyɛmi nuu ni miisumɔ ni eya hiɛ lɛ atao Maŋtsɛyeli lɛ tsutsu, ni ekɛ ehe awo shiɛmɔ nitsumɔ lɛ mli kɛ ekãa. (Mat. 6:33; 2 Tim. 4:5) Esa akɛ ebɔ mɔdɛŋ efee nɔkwɛmɔnɔ kpakpa eha mɛi krokomɛi.
6 Jeŋ Fɛɛ: Yehowa miiwo nikpamɔ nitsumɔ lɛ foi. (Yes. 60:22) Ehe miihia waa ni mɛi fɛɛ ni kaseɔ Yesu nɔkwɛmɔnɔ lɛ atsu amɛsɔɔmɔ nitsumɔ lɛ jogbaŋŋ kɛmɔ shi. Jeŋ muu fɛɛ sɔɔmɔ afi akɔntaabuu kɛha afi 2006 lɛ tsɔɔ akɛ abaptisi mɛi 248,327. Kɛ́ aja mli lɛ, no tsɔɔ akɛ abaptisi mɛi heei ni fa fe 680 daa gbi! Eba akɛ wɔ fɛɛ wɔɔtao gbɛ̀i anɔ ni wɔɔtsɔ wɔtsu wɔsɔɔmɔ nitsumɔ lɛ jogbaŋŋ kɛmɔ shi!