Gbɛ̀i Anɔ ni Oootsɔ Olɛɛ Osɔɔmɔ Nitsumɔ lɛ Mli
1 Yɛ nɔ ni fe afii 40 ni eho nɛ lɛ, sane ko ni yitso ji ‘Ani Oofee Bɔ ni Ooonyɛ Fe Fɛɛ?’ lɛ je kpo yɛ January 15, 1955, Watchtower lɛ mli. Ejɛ suɔmɔ mli etsɔɔ gbɛ ni Yehowa webii baanyɛ atsɔ nɔ, ni amɛha mɔdɛŋ ni amɛbɔɔ akɛ aŋkroaŋkroi yɛ shiɛmɔ nitsumɔ lɛ mli lɛ aya hiɛ bɔni afee ni amɛnyɛ amɛlɛɛ amɛ Maŋtsɛyeli shiɛmɔ nitsumɔ lɛ mli. Abaanyɛ akɛ nakai ŋaawoo kpakpa lɛ atsu nii ŋmɛnɛ hu, yɛ be mli ni wɔyaa nɔ wɔnáa hiɛyaa lɛ.
2 Esa akɛ kita ni fe fɛɛ: “Suɔmɔ [Yehowa, NW] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!” lɛ akanya wɔsɔɔmɔ muu lɛ fɛɛ. (Mar. 12:30) Wɔjieɔ suɔmɔ ni yeɔ emuu kpo wɔtsɔɔ Yehowa kɛtsɔ hegbɛi ni yɔɔ ni wɔkɛaalɛɛ e-Maŋtsɛyeli nitsumɔ lɛ mli ni wɔkɛaatsu nii kɛmɔ shi lɛ nɔ. Susumɔ gbɛ̀i ni nyiɛ sɛɛ nɛɛ ni ekolɛ obaanyɛ okɛlɛɛ osɔɔmɔ nitsumɔ lɛ mli lɛ he okwɛ.
3 Tsu Ogbɛnaa Nii Ahe Nii: Nyɛmimɛi hii ni ejɔɔ amɛhe nɔ lɛ baanyɛ abɔ mɔdɛŋ ni amɛhe asa akɛ asafoŋ sɔɔlɔi ni no sɛɛ lɛ amɛya hiɛ kɛshɛ onukpai asɔɔmɔ he. Nikasemɔi ni ji “Ani Oobɔ Mɔdɛŋ ni Oshɛ He?” kɛ “Ani Ohe Esa Akɛ Ooosɔmɔ?,” ni yɔɔ September 1, 1990, Buu-Mɔɔ lɛ mli lɛ ekanya nyɛmimɛi hii babaoo ni amɛkɛ amɛhe eha asafoŋ sɔ̃i ahe nitsumɔ. Bi onukpai ni yɔɔ nyɛ asafo lɛ mli lɛ kɛha ŋaawoi pɔtɛɛ kɛ gbɛ̀i anɔ ni oootsɔ oshɛ he ni ohe asa hu.
4 Aafɔ̃ nine aatsɛ onukpai kɛ asafoŋ sɔɔlɔi ni ji oshijafoi lɛ koni amɛkɛ hiɛdɔɔ asusu Sɔɔmɔ Tsɔsemɔ Skul gbɛbimɔ lɛ he. Obaanyɛ ole skul nɛɛ he nii kɛtsɔ nibii ni atsɛ yisɛɛ ni yɔɔ “Ministerial Training School” shishi, yɛ Watch Tower Publications Indexes kɛha 1986-1995, 1996, kɛ 1997 mli lɛ kanemɔ nɔ. Ani oona ‘shinaa wulu kɛ emli nitsumɔ’ ni agbele naa yɛ ohiɛ? (1 Kor. 16:9a) Nyɛmimɛi hii babaoo ni ŋɔ hegbɛ nɛɛ yoo sɔɔmɔ hegbɛi fɛɛ ni yɔɔ enɛ sɛɛ lɛ. Ŋmɛnɛ, amɛmiisɔmɔ yɛ Betel loo yɛ shiɛmɔ nitsumɔ lɛ mli akɛ gbɛgbalɔi krɛdɛɛi loo kpokpa nɔkwɛlɔi.
5 Shɛ́ Be-Fɛɛ Sɔɔmɔ lɛ He: Esa akɛ oblahii kɛ oblayei ni gbeɔ nɔtsamɔ skul naa, yeigbayei ni kwɛɔ shia, kɛ mɔ fɛɛ mɔ ni eshɛ be ni ekɛbaaba hejɔɔmɔ kɛjɛ nitsumɔ mli lɛ kɛ hiɛdɔɔ asusu gbɛgbamɔ nitsumɔ lɛ he. Tĩi nɔ ni aŋma ahɔ July 1998 Wɔ Maŋtsɛyeli Sɔɔmɔ lɛ mli lɛ mli, ni no sɛɛ lɛ, okɛ gbɛgbalɔi ni amɛshihilɛi tamɔ bo diɛŋtsɛ oshihilɛ lɛ agba he sane. Ekolɛ no baakanya bo koni olɛɛ osɔɔmɔ nitsumɔ lɛ mli kɛtsɔ gbɛgbamɔ nitsumɔ lɛ nɔ, tamɔ bɔ ni amɛfeɔ lɛ. (1 Kor. 11:1) Ani obaanyɛ olɛɛ onitsumɔ lɛ mli kɛshɛ ŋmɛlɛtswai 70 daa nyɔŋ nɔ koni osɔmɔ akɛ daa gbɛgbalɔ?
6 Nyɛmimɛi hii kɛ yei ni fa fe 17,000 miisɔmɔ yɛ nitsumɔhe niji kɛ Betel shiai ni yɔɔ jeŋ fɛɛ lɛ amli bianɛ. (om 116; w94-GA 6/15 28-31) Mɛni hewɔ okɛ okpokpaa nɔkwɛlɔ lɛ susuuu he okwɛɛɛ kɛji ekolɛ oji mɛi ni he baanyɛ asa kɛha Betel sɔɔmɔ hegbɛ ni ekaaa lɛ ateŋ mɔ kome?
7 Yaasɔmɔ yɛ He ni Hiamɔ lɛ Da Yɛ: Ani oyɛ shikpɔŋkuku ni afɔɔ mli nitsumɔ loo he ni nyɛmimɛi babaoo tsuɔ mli nii? Ani osusu osɔɔmɔ nitsumɔ lɛ ni ooolɛɛ mli lɛ he kɛtsɔ fã ni oofã kɛya he ni hiamɔ lɛ da yɛ, kɛji yɛ be kukuoo mli loo kwraa? Ekolɛ obaanyɛ ofã kɛyahi akrowa ko ni bɛŋkɛ ni nitsulɔi babaoo ahe hiaa yɛ jɛmɛ lɛ mli. (Mat. 9:37, 38) Esaaa akɛ akɛ he oyaiyeli feɔ enɛ. Ebiɔ ni akɛ sɔlemɔ asusu he. (Luka 14:28-30) Okɛ onukpai lɛ kɛ kpokpaa nɔkwɛlɔ lɛ agba oshihilɛ lɛ he sane. Amɛkɛ bo baasusu he kɛji ehi akɛ ofã amrɔ nɛɛ loo osaa ohe koni ofee nakai wɔsɛɛ. Kɛ oosumɔ ni oŋma Asafo lɛ koni etsɔɔ bo he ni obaanyɛ ofã kɛya lɛ, esa akɛ okɛ wolo ni o-Safo lɛ mli Sɔɔmɔ Ajinafoi Akuu lɛ waonaagbɛi yɔɔ shishi lɛ afata owolo lɛ he.
8 Wo Osɔɔmɔ lɛ Mli Hewalɛ: Ekolɛ, wɔ fɛɛ wɔbaanyɛ wɔtsu nii jogbaŋŋ yɛ shiɛmɔ nitsumɔ lɛ mli kɛtsɔ hewalɛ ni wɔkɛaawo wɔsɔɔmɔ nitsumɔ lɛ mli lɛ nɔ. Ani okɛ ohe woɔ nitsumɔ lɛ fãi lɛ fɛɛ mli, ní shia kɛ shia kɛ trukaa odaseyeli kɛ agbɛnɛ sɛɛsaramɔ kɛ Biblia mli nikasemɔ nitsumɔ lɛ fata he? Kɛ́ okɛ mɔ ko kaseɔ nii lɛ, ani obaanyɛ oha onitsɔɔmɔ he ŋaa lɛ aya ahiɛ? Ebaahi akɛ otĩ nɔ ni aŋma ahɔ July 1996 Wɔ Maŋtsɛyeli Sɔɔmɔ lɛ mli lɛ mli kɛha ŋaawoi ni obaanyɛ okɛtsu nii ni okɛkanya onikaselɔ lɛ kɛshɛ henɔjɔɔmɔ kɛ baptisimɔ he.
9 Wɔnaa gbɛ̀i ni wɔɔtsɔ nɔ wɔlɛɛ wɔsɔɔmɔ nitsumɔ lɛ mli, ní wɔha eya hiɛ hu lɛ he saji babaoo yɛ Organized to Accomplish Our Ministry wolo yitso 9 lɛ mli. Yɛ anɔkwale mli lɛ, esa akɛ wɔ fɛɛ wɔsumɔ akɛ wɔɔfee bɔ fɛɛ bɔ ni wɔɔnyɛ yɛ Nyɔŋmɔ sɔɔmɔ nitsumɔ lɛ mli. Mɛni hewɔ okɛ hiɛdɔɔ susuuu mumɔŋ otii ni mamɔ ohiɛ lɛ ahe? Feemɔ taakɛ 1 Timoteo 4:15 lɛ jieɔ yi lɛ: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ aná oshweremɔ faŋŋ.”