Ani Oosumɔ ni Otsu Babaoo?
1 Yesu kɛ Maŋtsɛyeli lɛ to jwetrii ni jara wa waa he. (Mat. 13:44-46) Nitsumɔ ni kɔɔ Maŋtsɛyeli lɛ he shɛɛ saji lɛ gbɛɛ-kɛ-shwamɔ he lɛ hu ji jwetri ni jara wa waa. Ehe miihia ni nɛkɛ sɔɔmɔ nitsumɔ nɛɛ aye klɛŋklɛŋ gbɛhe yɛ wɔ shihilɛi amli, kɛji akɛ wɔhe ni wɔkɛaawo mli kɛmɔ shi lɛ baabi he kɛ afɔleshaa ko po. (Mat. 6:19-21) Ani oosumɔ ni otsu babaoo yɛ Maŋtsɛyeli sɔɔmɔ lɛ mli?
2 Susumɔ Nibii ni He Hiaa Nɛɛ Ahe Okwɛ: Nibii babaoo ahe miihia bɔni afee ni wɔlɛɛ gbɛfaŋnɔ ni wɔnáa yɛ sɔɔmɔ nitsumɔ lɛ mli ákɛ aŋkroaŋkro: (1) fai shi ni aaatswa akɛ akɛ Maŋtsɛyeli lɛ sɛɛtiumɔ baaye klɛŋklɛŋ gbɛhe yɛ shihilɛ mli (Mat. 6:33); (2) hemɔkɛyeli namɔ kɛ hekɛnɔfɔɔ yɛ Yehowa mli (2 Kor. 4:1, 7); (3) Nyɔŋmɔ yelikɛbuamɔ sɛɛgbɛ taomɔ kɛtsɔ anɔkwa sɔlemɔ kɛ he ni akaa yɛ sɔlemɔ mli lɛ nɔ (Luka 11:8-10); (4) ni wɔɔya nɔ ni wɔtsu nitsumɔi ni kɛ wɔsɔlemɔi lɛ kpãa gbee.—Yak. 2:14, 17.
3 Gbɛ̀i Anɔ ni Wɔɔtsɔ Wɔlɛɛ Wɔsɔɔmɔ lɛ Mli: Wɔteŋ mɔ fɛɛ mɔ baanyɛ ekɛfee oti ni ma ehiɛ akɛ ebaaná gbɛfaŋnɔ ko yɛ sɔɔmɔ nitsumɔ lɛ mli daa nyɔŋ nɔ. Shi ani osusu hegbɛ fɛɛ hegbɛ ni oooŋɔ koni oye trukaa odase, ní ooobɔ mɔdɛŋ koni ohiɛkpamɔi afee nɔ ni mɔɔ shi, ni oha bɔ ni osɛɛkuu kɛ saramɔ mɔɔ shi lɛ aya hiɛ, kɛ shia Biblia mli nikasemɔi ni yaa hiɛ be fɛɛ be lɛ hu he? Ani obaanyɛ ofee gbɛgbalɔi awalɔ loo daa gbɛgbalɔ aloo ni obaasɔmɔ yɛ he ni hiamɔ lɛ da yɛ? Kɛ oji nyɛminuu ni abaptisi lɛ lɛ, ani obaanyɛ oya hiɛ ni ohe asa akɛ asafoŋ sɔɔlɔ loo onukpa? (1 Tim. 3:1, 10) Ani obaanyɛ olɛɛ osɔɔmɔ lɛ mli kɛtsɔ gbɛ ní ooobi kɛha Betel nitsumɔ loo sɔɔmɔ akɛ gbɛgbalɔ krɛdɛɛ loo Sɔɔmɔ Tsɔsemɔ Skul lɛ yaa?—Luka 10:2.
4 Awo nyɛminuu ko ni yɔɔ be fɛɛ nitsumɔ, ni ekɛ ebe babaoo woɔ kpɔiaŋgbɔlemɔ mli nifeemɔi amli lɛ hewalɛ koni ekɛ ehe awo daa gbɛgbamɔ nitsumɔ lɛ mli. Ekɛ ehe wo gbɛgbalɔi awalɔ nitsumɔ lɛ mli ni etsake egbɛjianɔtoi koni ekɛ ehe awo daa gbɛgbamɔ nitsumɔ lɛ mli. Sɛɛ mli lɛ etee Sɔɔmɔ Tsɔsemɔ Skul lɛ eko ni no saa lɛ kɛha enitsumɔ akɛ kpokpaa nɔkwɛlɔ ni eji amrɔ nɛɛ. Eyɛ miishɛɛ waa akɛ ebo hewalɛwoo ni akɛha lɛ lɛ toi, ni eyɛ nɔmimaa akɛ eyɛ miishɛɛ babaoo yɛ eyiŋ ni ekpɛ akɛ ebaafee babaoo yɛ Maŋtsɛyeli sɔɔmɔ lɛ mli lɛ hewɔ.
5 Yehowa jɔɔ mɛi ni kɛ amɛhe haa lɛ. (Yes. 6:8) Kaaha nɔ ko miitsĩ onaa yɛ osɔɔmɔ nitsumɔ lɛ ni ooolɛɛ mli kɛ miishɛɛ ni da kɛ hejɔɔmɔ ni oooná yɛ nakai feemɔ mli lɛ hewɔ.