“Maŋtsɛyeli Wui Dumɔ” yɛ Mɛi ni Ayahaa Amɛ Woji Tɛtrɛbii Daa lɛ Agbɛfaŋ

¹ Lala 133 ni yɔɔ Sing Praises to Jehovah lɛ mli lɛ hiɛ yitso akɛ “Maŋtsɛyeli Wui Dumɔ.” Edamɔ Yesu abɛbua ni kɛ kaselɔfeemɔ nitsumɔ lɛ toɔ wui dumɔ he lɛ nɔ. (Mat. 13:​4-8, 19-23) Lala lɛ mli wiemɔi kaneɔ akɛ: “Wui ni oduɔ yɛ sũ kpakpa nɔ lɛ falɛ/Baanyɛ adamɔ onɔ titri yɛ bei babaoo mli.” Te wɔɔfee tɛŋŋ wɔha wɔshiɛmɔ nitsumɔ lɛ amɔ shi waa? Gbɛ kome ji ni wɔɔná mɔ ni wɔbaaha lɛ woji tɛtrɛbii daa koni wɔha eya nɔ nakai daa.

² Abaanyɛ atsu yiŋtoi babaoo he nii kɛtsɔ woji tɛtrɛbii ni akɛyahaa mɔ daa lɛ nɔ. (1) Mɔ ni yɔɔ wiemɔ lɛ he miishɛɛ ni obaayasara lɛ daa lɛ baaha oná okɛ lɛ teŋ wekukpaa ni naanyobɔɔ yɔɔ mli. (2) Ohaa nakai mɔ lɛ náa saji ni hereɔ mɔ yiwala kɛjɛɔ Buu-Mɔɔ kɛ Awake! lɛ mli daa. (3) Kɛtsɔ nyɛ sanegbaai anɔ lɛ obaanyɛ oye obua mɔ lɛ koni eshwe Ŋmalɛ naa anɔkwale ni baanyɛ aha afee Biblia mli nikasemɔ lɛ.​—⁠1 Pet. 2:⁠2.

³ Bɔ ni Ooofee Oná Mɔ ni Obaaha Lɛ Woji Tɛtrɛbii lɛ Daa: Be fɛɛ be ni mɔ ko baajie miishɛɛ kpo etsɔɔ yɛ woji tɛtrɛbii lɛ ahe lɛ, tsɔɔmɔ mli akɛ saji ni sa kadimɔ jeɔ kpo yɛ eko fɛɛ eko ni baa lɛ mli, ni obaaná he miishɛɛ akɛ okɛbaaba obaha lɛ amrɔ nɔŋŋ kɛ́ onine shɛ nɔ. Kɛ oshi mɔ lɛ otee lɛ, ŋmaa egbɛi kɛ adrɛs, gbi ni otee eŋɔɔ, be ni yɔɔ eko fɛɛ eko ni okɛha lɛ lɛ nɔ, sane ni ekɔɔ he, kɛ saji ni mɔ lɛ nya he titri.

⁴ Obaanyɛ okɛ mɛi fioo pɛ aje shishi koni oyaha amɛ woji tɛtrɛbii lɛ daa. No sɛɛ lɛ, bɔɔ mɔdɛŋ ni olɛɛ mli koni amɛyi afa kɛtsɔ mɛi krokomɛi ni ohaa amɛ woji tɛtrɛbii lɛ ni okɛ amɛ baafata he lɛ nɔ. Be mli ni onáa mɛi babaoo lolo lɛ, obaanyɛ ojara mli owo shikpɔŋkukuji amli bɔni afee ni efee mlɛo akɛ nine aaashɛ amɛ fɛɛ amɛnɔ. Ŋmalamɔ woji tɛtrɛbii lɛ ateŋ nɔ ni okɛha yɛ saramɔ lɛ eko fɛɛ eko mli lɛ kɛ be mli ni okɛha lɛ he saji jogbaŋŋ oshwie shi. Ŋmalamɔ saji ni nyɛgba kɛ bɔ ni oooya nɔ ótee mɔ lɛ miishɛɛ shi yɛ anɔkwale lɛ mli yɛ saramɔ ni baanyiɛ sɛɛ lɛ mli lɛ he saji fioo ko.

⁵ Okɛ Jarayelɔi kɛ Nitsulɔi Wuji Afata He: Niiashikpamɔ etsɔɔ akɛ shwapotsɛmɛi kɛ nitsulɔi wuji krokomɛi nyɛɔ amɛheɔ wɔ woji tɛtrɛbii lɛ daa. Onukpa ko po yahaa maŋnukpa ni yɔɔ emaŋ lɛ woji tɛtrɛbii lɛ daa. Shiɛlɔ ko kɛ tsumaa he majemɔ nibii anitsumɔtsɛ ni eye afii 80 lɛ bɔi nikasemɔ beni ekɛ woji tɛtrɛbii lɛ eyaha lɛ aahu afii nyɔŋma lɛ!

⁶ Nyɛmiyoo gbɛgbalɔ ko bote shwapo ko mli ni ena gbalashihilɛ mli hefatalɔi ni kɛ miishɛɛ fioo ko pɛ here lɛ hiɛmɛɛ lɛ. Shi kɛlɛ, akɛni gbalashihilɛ mli hefatalɔi lɛ hé woji tɛtrɛbii lɛ hewɔ lɛ, ekpɛ eyiŋ akɛ ekɛ amɛ baafata mɛi ni eyahaa amɛ woji tɛtrɛbii lɛ daa lɛ ahe. Etsɛɛɛ ni nyɛmiyoo lɛ basumɔ akɛ eeekpá amɛŋɔɔ yaa ejaakɛ amɛjieee naanyobɔɔ su kpo kwraa ni amɛwieee babaoo kwraa, kɛ́ ebi sane ni esa akɛ asusu he po. Shi nyɛmiyoo lɛ sɔle yɛ sane lɛ he ni yɛ naagbee lɛ eha gbalashihilɛ mli hefatalɔi lɛ Hii Shi Daa wolo lɛ eko. Beni ŋa lɛ kane egbe naa lɛ, ekɛ ekãa wie akɛ: “Agbɛnɛ, mína anɔkwale lɛ!” Aje Biblia mli nikasemɔ shishi, ni sɛɛ mli lɛ abaptisi gbalashihilɛ mli hefatalɔi lɛ. Gbɛgbalɔ lɛ tsuishiŋmɛɛ lɛ wo yibii kpakpa lɛɛlɛŋ.

⁷ Sɛɛsaramɔi Afeemɔ: Kɛ onine shɛ wolo tɛtrɛɛ hee nɔ lɛ, kanemɔ emli saji lɛ fɛɛ. Taomɔ saji otii ni mɔ fɛɛ mɔ ni oyahaa lɛ woji tɛtrɛbii lɛ baanya he. No sɛɛ lɛ, kɛ otee ekoŋŋ lɛ, obaanyɛ okɛɛ akɛ: “Beni mikane sane nɛɛ, misusu ohe kɛ bɔ ni oooná he miishɛɛ.” Shiɛlɔi fɛɛ baanyɛ aná woji tɛtrɛbii ni amɛkɛyahaa mɛi daa lɛ mli ŋɔɔmɔ yɛ afii ni amɛye lɛ fɛɛ sɛɛ. Gbekɛ bibioo po baanyɛ akɛɛ akɛ: “Eŋɔɔ minaa akɛ mibana bo ekoŋŋ. O-Buu-Mɔɔ kɛ Awake! heei lɛ ebashɛ shi. Misusuɔ akɛ, obaasumɔ sane nɛɛ ni yitso ji . . . lɛ.”

⁸ Ha ekpa saji ni baa lɛ gbɛ kɛtsɔ jwɛŋmɔ ni ooogbala kɛya akrabatsa ni yitso ji “Nɔ ni Nyiɛ Enɛ Sɛɛ” lɛ nɔ. Kɛ saji komɛi je kpo ­kɛtsara nɔ lɛ, ha ale enɛ ni owo nikanelɔ lɛ hewalɛ koni ekane eko fɛɛ eko ni baa lɛ. Ohiɛ akakpa nɔ akɛ, be fɛɛ be ni okɛ woji tɛtrɛbii lɛ baayaha mɔ ko ni oyahaa lɛ woji tɛtrɛbii lɛ daa lɛ, obaanyɛ okane lɛ akɛ sɛɛsaramɔ. Kwɛmɔ koni ohiɛ woji tɛtrɛbii ashɛɛ he woji koni oha ashɛ woji tɛtrɛbii lɛ yɛ hegbɛ fɛɛ hegbɛ ni oooná lɛ mli. Ni nɔ ni fe fɛɛ lɛ, kaimɔ akɛ oti ni ma wɔhiɛ ji ni wɔha nɛkɛ saramɔi nɛɛ atsɔ shia Biblia mli nikasemɔi.

⁹ Saramɔ Mɛi ni Oyahaa Amɛ Woji Tɛtrɛbii lɛ Daa lɛ Be Fɛɛ Be: Obaanyɛ oya mɛi ni oyahaa amɛ woji tɛtrɛbii lɛ daa lɛ aŋɔɔ be fɛɛ be ni sa​—⁠leebi yɛ otsi lɛ mli nitsumɔ gbii amli, beni hulu enyɔ shi kwraa, beni kpaako jeŋ ebɔi namɔ, loo yɛ otsi lɛ naagbee beni otsu nii yɛ shia kɛ shia nitsumɔ lɛ mli ogbe naa. Kɛ onyɛɛɛ ni oya mɛi ni oyahaa amɛ woji tɛtrɛbii lɛ daa lɛ aŋɔɔ yɛ hela ni emɔ bo hewɔ aloo beni otee hejɔɔmɔ lɛ, bi koni shiɛlɔ kroko ni yɔɔ oweku lɛ mli loo asafo lɛ mli lɛ kɛ woji tɛtrɛbii lɛ ayaha lɛ eha bo. Yɛ nakai gbɛ nɔ lɛ, mɛi ni oyahaa amɛ woji tɛtrɛbii lɛ daa lɛ, nine baashɛ amɛ woji tɛtrɛbii lɛ anɔ mra.

¹⁰ Gbɛ kome ni oootsɔ nɔ odu Maŋtsɛyeli wui lɛ ji ni okɛ Buu-Mɔɔ kɛ Awake! lɛ baayaha mɛi fɛɛ ni oyahaa amɛ woji tɛtrɛbii lɛ daa. Be mli ni otsɔɔ amɛ Ŋmalɛ naa anɔkwale lɛ, amɛbaanyɛ amɛnu Maŋtsɛyeli wiemɔ lɛ shishi koni yɛ naagbee lɛ amɛfata ohe kɛwo Maŋtsɛyeli lɛ he yibii.​—⁠Mat. 13:​8, 23.