Ná Hesai Pii yɛ Shiɛmɔ Nitsumɔ lɛ Mli—Taomɔ Mɛi ni Obaahã Amɛ Woji Tɛtrɛbii Daa Nyɔɔŋ Nɔ

Nɔ Hewɔ ni Ehe Hiaa: Mɛi ni nyaa wɔwoji tɛtrɛbii lɛ akanemɔ he lɛ ateŋ mɛi pii sumɔɔɔ ni wɔkɛ amɛ kaseɔ Biblia lɛ. Ekolɛ amɛsumɔɔ amɛjamɔ lɛ loo amɛnuɔ he akɛ amɛbɛ dekã kɛhã nikasemɔ. Kɛ̃lɛ, kɛ́ amɛtee nɔ amɛkane wɔwoji tɛtrɛbii lɛ, ekolɛ Nyɔŋmɔ Wiemɔ lɛ kasemɔ baaba amɛtsine. (1 Pet. 2:2) Ekolɛ sane pɔtɛ̃ɛ ko ni amɛbaakane lɛ baata amɛtsuiŋ, loo amɛshihilɛ baanyɛ atsake. Kɛ́ wɔyaa amɛŋɔɔ kpitiokpitio lɛ, ebaahã amɛna wɔ akɛ amɛnanemɛi, ni no baaye abua wɔ koni wɔle nibii ni amɛsumɔɔ kɛ nibii ni gbaa amɛnaa. Be ni yi aaawula shi lɛ, ekolɛ wɔkɛ amɛ baabɔi Biblia lɛ kasemɔ.

Bɔ ni Obaafee lɛ Ohã:

Daa nyɔɔŋ nɔ lɛ, too be koni oyahã lɛ Buu-Mɔɔ kɛ Awake! hee ni eba lɛ eko. Obaanyɛ oya eŋɔɔ yɛ bei krokomɛi amli yɛ nyɔɔŋ lɛ mli koni ojie sane ko ni yɔɔ woji tɛtrɛbii ni oshi ohã lɛ eko mli lɛ yi ohã lɛ ni ekane, loo ohã lɛ woji ni akɛhãa yɛ nakai nyɔɔŋ lɛ nɔ lɛ eko. Ŋmalamɔ saramɔ lɛ he saji ni sa oshwie shi.—Kwɛmɔ January 2014 Wɔ Maŋtsɛyeli Sɔɔmɔ lɛ, bf. 3 lɛ.
Saamɔ ohe be fɛɛ be dani oya eŋɔɔ. Kɛ́ otee lɛ, kaayahã lɛ woji tɛtrɛbii lɛ kɛkɛ, moŋ lɛ okɛ lɛ agba sane ni obɔ mɔdɛŋ ohã naanyobɔɔ kpakpa ahi okɛ lɛ teŋ, bɔ ni afee ni enya he akɛ okɛ lɛ akase nii.
Taomɔ gbɛi anɔ ni obaatsɔ oje nikasemɔ shishi. Kɛ́ mɔ ko ni ohãa lɛ woji tɛtrɛbii daa nyɔɔŋ nɔ lɛ bi bo sane ko ni Biblia lɛ wieɔ he lɛ, okɛ wolo ko ni wɔkɛ mɛi kaseɔ ni wieɔ sane lɛ he lɛ ayahã lɛ, ni nyɛfee ekome kɛsusu he. Dani obaashi lɛ, bi lɛ sane ko ni kɔɔ esanebimɔ lɛ he, koni oku osɛɛ okɛ lɛ ayasusu he. Kɛ́ okɛ lɛ fɔɔ sanegbaa kpitiokpitio kɛtsaraa nɔ kɛjɛɔ Biblia lɛ loo woji ni wɔkɛ mɛi kaseɔ lɛ eko mli lɛ, etsɔɔ akɛ okɛ lɛ miifee Biblia mli nikasemɔ. Ani ohã shĩatsɛ lɛ Sanekpakpa wolo bibioo lɛ eko, ni otsɔɔ lɛ bɔ ni wɔfeɔ wɔkɛ mɛi kaseɔ Biblia lɛ kuku? Ani ojie Mɛni Hewɔ Esa akɛ Okase Biblia Lɛ? kɛ Mɛni Yaa Nɔ yɛ Biblia Nikasemɔ Feemɔ Mli? vidioi lɛ otsɔɔ lɛ? Kɛ́ be ko ni eho lɛ, mɔ lɛ ekpɛlɛɛɛ ni akɛ lɛ kaseɔ Biblia lɛ po lɛ, nibii baanyɛ atsake. Ani ehe baahia ni oku osɛɛ oya eŋɔɔ ekoŋŋ?

Kaa Enɛ Okwɛ yɛ Nyɔɔŋ nɛɛ Mli:

Ŋmalamɔ mɛi ni obaasumɔ ni ohã amɛ woji tɛtrɛbii ni baa daa nyɔɔŋ nɔ lɛ eko lɛ agbɛ́i. Hã amɛ woji tɛtrɛbii ni eba yɛ nyɔɔŋ nɛɛ nɔ lɛ eko, ni okɛɛ amɛ akɛ obaabahã amɛ nɔ ni baaba yɛ wɔsɛɛ nyɔɔŋ lɛ nɔ lɛ eko.