Asafoŋ Sɔɔlɔi Kɛ Sɔɔmɔ ni Sɛɛnamɔ Yɔɔ He Haa
1 “Amɛjie amɛhe kpo amɛtsɔɔ akɛ, amɛji hii ni ejɔɔ amɛhe nɔ yɛ anɔkwale mli, mɛi ni amɛjie hemɔkɛyeli ni amɛyɔɔ lɛ kpo amɛtsɔɔ kɛtsɔ ekãa ni amɛkɛsɔmɔɔ yɛ Maŋtsɛyeli sɔɔmɔ nitsumɔ lɛ mli lɛ nɔ, kɛ agbɛnɛ hu, kɛtsɔ yelikɛbuamɔ ni amɛkɛhaa mɛi krokomɛi bɔni afee ni amɛfee shiŋŋ yɛ hemɔkɛyeli lɛ mli lɛ nɔ.” Nakai ji bɔ ni Organized to Accomplish Our Ministry wolo lɛ wie yɛ asafoŋ sɔɔlɔi lɛ ahe yɛ baafã 57 lɛ. Eji anɔkwale akɛ mumɔŋ nɔkwɛmɔnɔ ni wɔ asafoŋ sɔɔlɔi lɛ feɔ lɛ ji nɔ ko ni esa akɛ akaseɔ. Ní wɔkɛ amɛ kɛ onukpai lɛ aaatsu nii yɛ ekomefeemɔ mli lɛ ‘haa gbɔmɔtso lɛ daa, ni emaa ehe yɛ suɔmɔ mli.’—Efe. 4:16.
2 Asafoŋ sɔɔlɔi lɛ tsuɔ nitsumɔ ko ni he hiaa waa yɛ asafo lɛ mli. Susumɔ amɛ nitsumɔ ni he hiaa lɛ fɛɛ he okwɛ! Amɛtsuɔ shika he akɔntaabuu he nii, woji wuji, woji tɛtrɛbii, woji ashɛɛ, kɛ shikpɔŋkukuji ahe nitsumɔi; amɛkpeɔ mɛi kɛbaa kpee shishi, ni amɛhaa amɛ sɛi, amɛtsuɔ tsɔnei ni awieɔ awoɔ mli ahe nitsumɔ; ni amɛyeɔ amɛbua kɛ Maŋtsɛyeli Asa lɛ nɔ saamɔ. Amɛnáa Teokrase Sɔɔmɔ Skul lɛ kɛ Sɔɔmɔ Kpee lɛ mli gbɛfaŋnɔ. Amɛteŋ mɛi komɛi po nyɛɔ amɛhaa maŋshiɛmɔi loo amɛkwɛɔ asafoŋ kpeei komɛi anɔ. Taakɛ gbɔmɔtso diɛŋtsɛ henii yɔɔ lɛ, asafoŋ sɔɔlɔi tsuɔ nitsumɔi ni he hiaa wɔ lɛ ahe nii.—1 Kor. 12:12-26.
3 Kɛ́ aakwɛ bɔ ni asafoŋ sɔɔlɔi kɛ onukpai lɛ feɔ ekome jogbaŋŋ ákɛ sɔɔlɔi akuu kome lɛ fã, ni amɛkɛ bulɛ miiha amɛhe ni amɛnuɔ amɛhe shishi lɛ, ewoɔ mɛi krokomɛi hewalɛ koni amɛfee nakai nɔŋŋ. (Kol. 2:19) Kɛtsɔ anɔkwayeli ni amɛkɛtsuɔ amɛsɔ̃i ahe nii yɛ otsi fɛɛ otsi mli lɛ nɔ, kɛ agbɛnɛ hu kɛtsɔ mɔ hesusumɔ kpo ni amɛjieɔ amɛtsɔɔ mɛi krokomɛi lɛ anɔ lɛ, amɛhaa asafo lɛ yaa hiɛ yɛ mumɔŋ.
4 Mɛni wɔbaanyɛ wɔfee koni wɔkɛtsɔɔ hiɛsɔɔ ni wɔyɔɔ kɛha asafoŋ sɔɔlɔi ni tsuɔ nii waa lɛ? Esa akɛ wɔle nii ni amɛtsuɔ lɛ jogbaŋŋ, ni wɔfee klalo akɛ wɔkɛ amɛ baafee ekome yɛ be mli ni wɔyelikɛbuamɔ he hiaa amɛ lɛ. Wɔbaanyɛ wɔtsɔ wiemɔ aloo nifeemɔ nɔ wɔha amɛle akɛ wɔhiɛ sɔɔ amɛnitsumɔ lɛ. (Abɛi 15:23) Mɛi ni tsuɔ nii waa yɛ wɔgbɛfaŋ lɛ sa yijiemɔ diɛŋtsɛ.—1 Tes. 5:12, 13.
5 Nyɔŋmɔ Wiemɔ lɛ etsɔɔ nii ni asafoŋ sɔɔlɔi tsuɔ kɛ nibii ni ataoɔ yɛ amɛdɛŋ lɛ amli. (1 Tim. 3:8-10, 12, 13) Amɛsɔɔmɔ krɔŋkrɔŋ ní sɛɛnamɔ yɔɔ he lɛ ji nɔ ko ni he hiaa waa kɛha asafo lɛ nɔyaa. Hewalɛwoo he miihia gbɔmɛi ni tamɔ nɛkɛ daa gbi, ejaakɛ “amɛyɛ babaoo feemɔ yɛ Nuntsɔ lɛ nitsumɔ lɛ mli.”—1 Kor. 15:58.