Odaseyeli Nitsumɔ lɛ ní Wɔɔwo Mli Hewalɛ Beni Naagbee lɛ Bɛŋkɛɔ Nɛɛ
1 Ŋmaakpamɔ be lɛ ji miishɛɛ be. Eji nitsumɔ dɛŋdɛŋ be hu. Be fioo pɛ yɔɔ ni akɛbaabua yibii lɛ anaa. Esaaa akɛ nitsulɔi lɛ kɛ amɛnitsumɔ lɛ shwɛɔ.
2 Beni Yesu wieɔ yɛ abɛbua mli lɛ, ekɛ ‘nibii agbɛjianɔtoo lɛ naagbee lɛ’ to ŋmaakpamɔ be he. (Mat. 13:39) Wɔyɛ nibii agbɛjianɔtoo nɛɛ naagbee gbii lɛ amli, ni be ni eshwɛ ni akɛbaaye odase “atsɔɔ je nɛŋ fɛɛ” lɛ fáaa. (Mat. 24:14) Beni naagbee lɛ bɛŋkɛɔ kpaakpa lɛ, ehe miihia ni wɔwo gbɛfaŋ nɔ ni wɔnaa yɛ shiɛmɔ nitsumɔ lɛ mli lɛ mli hewalɛ. Mɛni hewɔ? Yesu tsɔɔ mli akɛ: “Nikpamɔ lɛ fá moŋ, shi nitsulɔi lɛ fáaa.”—Mat. 9:37, 38; Rom. 12:11.
3 Tsu kɛ Hehiamɔ: Beni Yesu je eshiɛmɔ nitsumɔ kpele lɛ shishi lɛ, no mli lɛ, afii etɛ-kɛ-fã pɛ eyɔɔ ni ekɛbaatsu nɔ ni akɛwo edɛŋ akɛ etsu lɛ he nii kɛgbe naa. Ekɛ hehiamɔ henumɔ shiɛ, ni ekɛɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ . . . ejaakɛ no hewɔ atsu mi.”—Luka 4:43.
4 Yesu dũ hehiamɔ henumɔ ni tamɔ nakai nɔŋŋ ewo ekaselɔi lɛ amli. (Mar. 13:32-37) No hewɔ ni “amɛfɔ̃ɔɔ nitsɔɔmɔ kɛ Yesu Kristo shiɛmɔ yɛ sɔlemɔwe lɛ kɛ shiai be fɛɛ be” lɛ. (Bɔf. 5:42) Amɛhaaa nibii ni he ehiaaa tsɔ lɛ aye klɛŋklɛŋ gbɛhe yɛ amɛshihilɛi amli. Yɛ bɔ ni amɛyifaaa lɛ fɛɛ sɛɛ lɛ, amɛnyɛ amɛshiɛ sanekpakpa lɛ ‘amɛtsɔɔ bɔɔ nii fɛɛ ni yɔɔ ŋwɛi shishi lɛ.’—Kol. 1:23.
5 Akɛni “nibii fɛɛ anaagbee lɛ eshɛ eta” hewɔ lɛ, wɔyɛ yiŋtoo kpakpa hewɔ ni esa akɛ wɔná nakai hehiamɔ henumɔ lɛ nɔŋŋ eko bianɛ. (1 Pet. 4:7) Yehowa eto gbi kɛ ŋmɛlɛtswaa ni ekɛ nibii agbɛjianɔtoo nɛɛ baaba naagbee. (Mat. 24:36) Akɛ be ni eshwɛ lɛ baatsu shiɛmɔ nitsumɔ lɛ agbe naa. No hewɔ ni wɔyaa nɔ wɔbɔɔ wɔhe mɔdɛŋ koni wɔkɛ sanekpakpa lɛ ayashɛ mɛi babaoo aŋɔɔ lɛ.
6 Kɛ́ wɔwo gbɛfaŋ nɔ ni wɔnáa yɛ odaseyeli nitsumɔ lɛ mli lɛ mli hewalɛ beni naagbee lɛ bɛŋkɛɔ lɛ, no lɛ taakɛ Yesu fee lɛ, wɔbaanyɛ wɔkɛ tsui ni nyɔɔ mɔ mli akɛɛ Yehowa akɛ: ‘Wɔgbe nitsumɔ ni okɛha wɔ akɛ wɔtsu lɛ naa.’—Yoh. 17:4.