‘Okɛ Hehiamɔ Henumɔ Ashiɛ Wiemɔ Lɛ’
1 Kɛ onine shɛ nɔ ko nɔ, ní aŋma yɛ nɔ akɛ “EHE MIIHIA” lɛ, te ofeɔ onii yɛ he ohaa tɛŋŋ? Wiemɔ ni ji “ehe miihia” lɛ tsɔɔ akɛ “esa akɛ atsu he nii amrɔ nɔŋŋ.” Yiŋtoo kpakpa nɛɛ hewɔ ni bɔfo Paulo wo Kristofoi ŋaa koni amɛkɛ ‘hehiamɔ henumɔ ashiɛ wiemɔ lɛ.’ (2 Tim. 4:2) Ani ohereɔ nɔ kɛtsɔ nitsumɔ nɛɛ he nii ni otsuɔ amrɔ nɔŋŋ lɛ nɔ?
2 Ekolɛ abɔ Paulo amaniɛ akɛ enyɛmimɛi lɛ ateŋ mɛi komɛi miijie subaŋ ko kpo, ni ji akɛ, ‘amɛhaa amɛ mɔdɛŋbɔɔ lɛ naa baa shi’ akɛ Kristofoi. (Rom. 12:11) Enɛ haaa nitsumɔi ni amɛtsuɔ lɛ awo yibii babaoo, ni nakai nɔŋŋ ehaaa amɛná miishɛɛ babaoo ni kulɛ esa akɛ amɛná yɛ be mli ni amɛyeɔ amɛbuaa mɛi krokomɛi lɛ.
3 Bɔ ni Yesu Susuɔ Shiɛmɔ Nitsumɔ lɛ He Ehaa: Kwɛ bɔ ni Yesu ná miishɛɛ beni ekɛ ehe woɔ eshiɛmɔ nitsumɔ lɛ mli lɛ! Ekɛɛ: “Miŋmãa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.” Yesu nɔkwɛmɔnɔ lɛ kanya ekaselɔi lɛ ní ewo amɛ hewalɛ lɛ kɛtsɔ kɛɛmɔ ni ekɛɛ amɛ akɛ ‘ŋmɔji lɛ egba futaa momo ni sa kpamɔ’ lɛ nɔ lɛ. (Yoh. 4:34, 35) Hehiamɔ henumɔ ni ejie lɛ kpo yɛ eshiɛmɔ nitsumɔ lɛ mli fɛɛ lɛ bafee faŋŋ beni ekɛɛ ekaselɔi lɛ koni ‘amɛkpa nikpamɔ Nuntsɔ lɛ fai, koni ewo nitsulɔi agbɛ kɛba enikpamɔ lɛ mli’ lɛ. (Mat. 9:38) Yesu hiɛ sɔ akɛ akɛ fãmɔ eha lɛ koni eshiɛ, ni etswa efai shi akɛ ehaŋ nɔ ko kwraa atsĩ enaa yɛ enɛ feemɔ mli.
4 Ni Wɔ Hu? Ŋmɛnɛ, ehe ebahia waa diɛŋtsɛ fe tsutsu ko ní wɔya hiɛ yɛ shiɛmɔ nitsumɔ lɛ mli. Yɛ je lɛŋ hei srɔtoi babaoo lɛ, ŋmɔji lɛ eshɛ kpamɔ. Yɛ shikpɔji ni etamɔ nɔ ni aye odase kɛmɔ shi jogbaŋŋ yɛ jɛmɛ lɛ, abaptisiɔ mɛi akpei abɔ daa afi. Akɛni nibii agbɛjianɔtoo nɛɛ naagbee lɛ miibɛŋkɛ oyayaayai hewɔ lɛ, ayɛ “babaoo feemɔ yɛ Nuntsɔ lɛ nitsumɔ lɛ mli.” (1 Kor. 15:58, NW) Ehe miihia ni wɔmia wɔhiɛ waa diɛŋtsɛ fe bei fɛɛ ni eho yɛ be mli ni wɔgbaa mɛi krokomɛi Maŋtsɛyeli lɛ he shɛɛ sane lɛ.
5 Nyɛhaa wɔkɛ wɔhe awoa sanekpakpa ni wɔkɛyahaa mɛi krokomɛi lɛ mli waa kɛmɔ shi, yɛ shia kɛ shia kɛ he fɛɛ he ni wɔɔnyɛ wɔna gbɔmɛi yɛ hu yɛ shikpɔŋkuku lɛ mli. Kɛ wɔkɛ wɔhe wo shiɛmɔ nitsumɔ lɛ mli waa kɛmɔ shi bɔ ni wɔɔnyɛ lɛ, wɔjieɔ lɛ kpo yɛ faŋŋ mli akɛ wɔkɛ Maŋtsɛyeli lɛ eye klɛŋklɛŋ gbɛhe yɛ wɔshihilɛi amli. (Mat. 6:33) Wɔbaaná miishɛɛ waa yɛ be mli ni wɔkɛ hehiamɔ henumɔ shiɛɔ wiemɔ lɛ yɛ anɔkwayeli mli lɛ.