Bɔ ni Weku Mli Bii Feɔ Ekome Koni Amɛná Mli Gbɛfaŋnɔ Kɛmɔ Shi—Yɛ Sɔɔmɔ Nitsumɔ lɛ Mli
1 Mɛni baanyɛ afe nɔ ni haa mɔ mli filiɔ lɛ babaoo fe enɛ akɛ aaana wumɛi kɛ ŋamɛi, fɔlɔi kɛ bii ni efee ekome kɛmiitsu nii yɛ Kristofoi asɔɔmɔ nitsumɔ lɛ mli, ni amɛmiijie Yehowa gbɛi lɛ yi yɛ faŋŋ mli lɛ? (Lala 148:12, 13) Esa akɛ wekui fɛɛ ato gbɛjianɔ koni amɛkɛ amɛhe awo shiɛmɔ nitsumɔ lɛ mli daa. Ani oweku lɛ yɛ gbi pɔtɛɛ ko daa otsi ni amɛkɛnáa gbɛfaŋnɔ yɛ sɔɔmɔ nitsumɔ lɛ mli? Kɛ nakai eji lɛ, no lɛ mɔ fɛɛ mɔ le nɔ̃ pɔtɛɛ ni ebaato he gbɛjianɔ ni ebaanyɛ ená mli gbɛfaŋnɔ kɛmɔ shi.—Abɛi 21:5a.
2 Dani gbi ni weku lɛ kɛ amɛhe baawo shiɛmɔ nitsumɔ lɛ mli lɛ aaashɛ lɛ, mɛni hewɔ nyɛfeee ekome koni nyɛkɛto gbɛjianɔ ni nyɛfee shiɛmɔ wiemɔi ni nyɛweku lɛ kɛbaatsu nii? Shiɛmɔ wiemɔi lɛ amli ni nyɛaati mli nyɛkwɛ lɛ baafee yelikɛbuamɔ diɛŋtsɛ, ni amɛbaanyɛ amɛha ekomefeemɔ mumɔ kpakpa aya nɔ yɛ weku lɛ mli. Kwɛ bɔ ni nyɔmɔwoo yɔɔ mli kɛji shiɛmɔ nitsumɔ lɛ fee weku lɛ mli bii sɔŋŋ asane ni mɔ fɛɛ mɔ esaa ehe jogbaŋŋ!
3 Nɔkwɛlɔ gbɛfãlɔ ko fata weku ko he yɛ woji tɛtrɛbii kɛhamɔ nitsumɔ lɛ mli. Beni ekɛ biyei lɛ ateŋ mɔ kome tsuɔ shia kɛ shia nitsumɔ lɛ, biyoo lɛ bi akɛ: “Okɛ mi baatsu nii kɛyashi mɛɛ be?” Kɛkɛ ni etsɔɔ mli akɛ ekɛ etsɛ baayatsa nitsumɔ lɛ nɔ. Eyɛ faŋŋ akɛ ekɛ etsɛ ná miishɛɛ waa yɛ sɔɔmɔ nitsumɔ lɛ ni amɛkɛ amɛhe wo mli yɛ ekomefeemɔ mli lɛ hewɔ. Mɛɛ weku mumɔ kpakpa nɛ!
4 Ekolɛ wekui komɛi baanyɛ afee ekome kɛtsu gbɛgbalɔi awalɔ nitsumɔ lɛ nyɔɔŋ kome yɛ afi lɛ mli. Aloo kɛ hoo lɛ amɛteŋ mɔ kome yɛ weku lɛ mli baanyɛ asɔmɔ kɛtsara nɔ akɛ gbɛgbalɔi awalɔ loo ekɛ ehe aha akɛ daa gbɛgbalɔ. Kɛ gbɛjianɔtoo kpakpa kɛ ekomefeemɔ yɛ lɛ, ekolɛ weku lɛ mli bii baanyɛ aha gbɛfaŋnɔ ni amɛnáa yɛ sɔɔmɔ nitsumɔ lɛ mli aŋkroaŋkro lɛ aya hiɛ kɛtsɔ sɛɛfimɔ ni amɛkɛaaha mɔ ni kɛ ehe ewo gbɛgbamɔ nitsumɔ lɛ mli lɛ nɔ. Eka shi faŋŋ akɛ abaajɔɔ weku lɛ mli bii fɛɛ yɛ nitsumɔ ni yaa hiɛ nɛɛ hewɔ kɛ niiashikpamɔi kpakpai ni anáa he miishɛɛ yɛ sɔɔmɔ nitsumɔ lɛ mli lɛ hewɔ.—Mal. 3:10.
5 Ní aaaná Gbɛfaŋnɔ ni mɔɔ shi yɛ sanekpakpa jajemɔ nitsumɔ lɛ mli kɛmɔ shi lɛ baaye abua wekui ni amɛfee mɛi ni bɛŋkɛ amɛhe kpaakpa, ni yɔɔ ekãa, ni woɔ yibii, ní yɔɔ miishɛɛ yɛ Yehowa sɔɔmɔ lɛ mli!—Okɛto Filipibii 2:1, 2 he.