Ani Kponɔgbɛ Nii Kɛkɛ Onaa?
1 Yɛ be mli ni wɔtsuɔ wɔshiɛmɔ nitsumɔ lɛ he nii lɛ, ekolɛ mɛi komɛi aklɛŋklɛŋ nifeemɔ baaha wɔshashao shi akɛ wɔkɛ amɛ aaagba sanekpakpa lɛ he sane. Ákɛ nɔkwɛmɔnɔ lɛ, te obaafee onii oha tɛŋŋ kɛ nuu ko ni hiɛ yɔɔ laŋlaŋ kpɛ́ɔ bo daa gbi kɛ́ oba enaanyo ko ni ejie miishɛɛ kpo yɛ anɔkwale lɛ he lɛ ŋɔɔ lɛ? Nyɛmi yoo ko ni ná enɛ mli niiashikpamɔ lɛ kpɛ eyiŋ akɛ ebaanina nuu lɛ, ni ekɛ lɛ awie. Ekɛ mlifu ŋa lɛ. Shi naakpɛɛ sane ji akɛ, ebo Biblia mli shɛɛ sane lɛ toi, ni ekɛ miishɛɛ kpɛlɛ koni akɛ lɛ akase nii. Akɛni nyɛmi yoo lɛ damɔɔɔ kponɔgbɛ nii ni enaa lɛ nɔ ekojooo hewɔ lɛ, gbɛ lɛ gbele kɛha nuu lɛ kɛ eŋa ni amɛkase anɔkwale lɛ.
2 Nyɛmi yoo kroko hu tsui fã klɛŋklɛŋ beni ena oblanuu ko kɛ eyitsɔi kakadaŋŋ lɛ, shi be fɛɛ be ni ebaaba shwapo lɛ mli he ni etsuɔ nii lɛ yɛ lɛ, eyeɔ lɛ odase kuku. Mɔdɛŋ ni ebɔ lɛ wo yibii, ni amrɔ nɛɛ oblanuu lɛ ji Odasefonyo ni abaptisi lɛ. Mɛni baaye ebua wɔ koni wɔkɛ oyaiyeli akamu sane naa akɛ mɛi ni tamɔ nakai lɛ boŋ sane lɛ toi?
3 Kasemɔ Yesu Nɔkwɛmɔnɔ Lɛ: Yesu le akɛ ekɛ ewala baafɔ̃ shi eha mɛi fɛɛ. Enɛ hewɔ lɛ, ehaaa mɛi krokomɛi akponɔgbɛ nifeemɔ aje enijiaŋ wui. Eyɔse akɛ, mɛi ni jeŋba esaaa lɛ po baasumɔ ni amɛtsake, kɛ́ akɛ yelikɛbuamɔ kpakpa kɛ nibii ni he hiaa lɛ ha amɛ. (Mat. 9:9-13) Ebɔ mɔdɛŋ ni eye ebua niiatsɛmɛi kɛ ohiafoi fɛɛ. (Mat. 11:5; Mar. 10:17-22) Eba akɛ wɔdamɔŋ kponɔgbɛ nibii ni wɔnaa yɛ mɛi krokomɛi ahe lɛ anɔ wɔkojoŋ yɛ wɔsɔɔmɔ nitsumɔ lɛ mli, ni wɔyɔseee nɔ ni baanyɛ afee tsui kpakpa lɛ. (Mat. 7:1; Yoh. 7:24) Mɛni baanyɛ aye abua wɔ koni wɔkase Yesu nɔkwɛmɔnɔ ni nɔ bɛ lɛ?
4 Kɛtsɔ Biblia lɛ kasemɔ nɔ lɛ, wɔbale akɛ, Nyɔŋmɔ Wiemɔ lɛ yɛ hewalɛ ni ekɛaatsake susumɔi, jeŋbai, kɛ sui. (Efe. 4:22-24; Heb. 4:12) No hewɔ lɛ, esa akɛ wɔhiɛ jwɛŋmɔ ni ja, ni wɔshi nɔ ni eshwɛ lɛ wɔha Yehowa, Mɔ ni le nɔ ni yɔɔ adesai atsuii amli lɛ.—1 Sam. 16:7; Bɔf. 10:34, 35.
5 Eba akɛ, gbɔmɛi srɔtoi fɛɛ ni wɔkɛ amɛ gbaa sanekpakpa lɛ he sane, ni nibii ni wɔnaa yɛ amɛhe yɛ kponɔgbɛ lɛ kɔɔɔ he eko lɛ aha nikpamɔ nitsumɔ wulu lɛ aya hiɛ yɛ nɛkɛ naagbee gbii nɛɛ amli.—1 Tim. 2:3, 4.