Kasemɔ Yehowa Jalɛsaneyeli Lɛ
1 “Yehowa sumɔɔ jalɛsaneyeli.” (Lala 37:28) No hewɔ lɛ, eyɛ mli akɛ ewo akpɔ akɛ ebaakpata jeŋ fɔŋ nɛɛ hiɛ moŋ, shi eto gbɛjianɔ koni atsɔ hiɛ abɔ kɔkɔ. (Mar. 13:10) Enɛ haa mɛi náa hegbɛ koni amɛtsake ni ahere amɛyiwala. (2 Pet. 3:9) Ani wɔbɔɔ mɔdɛŋ koni wɔkase Yehowa jalɛsaneyeli lɛ? Ani amanehulu kɛ piŋmɔ shihilɛ ni adesa weku lɛ yɔɔ mli lɛ tsirɛɔ wɔ koni wɔjaje Maŋtsɛyeli hiɛnɔkamɔ lɛ wɔtsɔɔ mɛi krokomɛi? (Abɛi 3:27) Suɔmɔ ni wɔyɔɔ kɛha jalɛsaneyeli lɛ baatsirɛ wɔ koni wɔkɛ ekãa atsu shiɛmɔ nitsumɔ lɛ kɛmɔ shi.
2 Okɛ Hiɛaŋkwɛmɔ Akashiɛ: Wɔtsɔɔ Nyɔŋmɔ yiŋtoo ni wɔjajeɔ wɔtsɔɔ mɔ fɛɛ mɔ ni hiɛaŋkwɛmɔ bɛ mli lɛ nɔ ‘wɔfeɔ nɔ ni ja.’ (Mika 6:8) Esa akɛ wɔte shi wɔshi sú ni adesai ni yeee emuu yɔɔ, ni ji hiɛ ni atsɔɔ akojoɔ mɛi yɛ bɔ ni amɛji yɛ kponɔgbɛ lɛ. (Yak. 2:1-4, 9) Yehowa “sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) Nyɔŋmɔ wiemɔ ni ji anɔkwale lɛ baanyɛ aha mɛi afee tsakemɔi ni sa kadimɔ yɛ amɛshihilɛi amli. (Heb. 4:12) Anɔkwa sane nɛɛ ni wɔɔyɔse lɛ baanyɛ atsirɛ wɔ koni wɔkɛ hekɛnɔfɔɔ abɛŋkɛ aŋkroaŋkroi, ní mɛi ni be ko ni eho lɛ amɛkpoo akɛ amɛaabo toi lɛ po fata he.
3 Nyɛmiyoo ko ni tsuɔ nii yɛ shwapo ko mli lɛ yashe bɔ ni nihelɔ ko ni fɔɔ nihemɔ yɛ shwapo lɛ mli lɛ gbɔmɔtsoŋ puemɔ ji lɛ gbeyei yɛ gbɛ ko nɔ. Kɛlɛ, yɛ be ni sa mli lɛ, nyɛmiyoo lɛ bɔ mɔdɛŋ ni eye Paradeiso ni Nyɔŋmɔ ewo he shi lɛ he odase etsɔɔ lɛ. Nuu lɛ ha hetoo faŋŋ akɛ eheee adesãi eyeee, ni eji mɔ ko ni etse ehe, ni feɔ nɔ ni esumɔɔ, ni akɛ eji mɔ ko ni kɛ tsofai fɔji tsuɔ nii. Shi nyɛmiyoo lɛ nijiaŋ ejeee wui. Gbi ko lɛ nuu lɛ bi nyɛmiyoo lɛ nɔ ni esusuɔ yɛ eyitsɔi kakadaŋŋ lɛ he, no hewɔ lɛ nyɛmiyoo lɛ kɛ ŋaa tsu nii ni etsɔɔ lɛ nɔ ni Biblia lɛ kɛɔ yɛ sane lɛ he. (1 Kor. 11:14) Nɔ ni fee nyɛmiyoo lɛ naakpɛɛ kɛ miishɛɛ ji akɛ, enɔ jetsɛremɔ lɛ nuu lɛ shɛ etsɛŋ ni eku eyitsɔi hu! Ebi koni akɛ lɛ akase Biblia lɛ, ni nyɛmiyoo lɛ to gbɛjianɔ ni nyɛminuu ko kɛ lɛ bɔi nikasemɔ, ni etee ehiɛ kɛyashɛ henɔjɔɔmɔ kɛ baptisimɔ he. Taakɛ nɛkɛ nuu nɛɛ ji lɛ, gbɔmɛi babaoo ni sɔmɔɔ Yehowa ŋmɛnɛ lɛ daa mɛi ni kɛ Maŋtsɛyeli shɛɛ sane lɛ baha amɛ lɛ ashi yɛ mɔdɛŋ ni amɛtee nɔ amɛbɔ kɛ mɛi ahiɛaŋ ni amɛkwɛɛɛ lɛ.
4 Etsɛŋ ni Yehowa baajie efɔŋfeemɔ kɛjɛ shikpɔŋ lɛ fɛɛ nɔ. (2 Pet. 3:10, 13) Eba akɛ, yɛ be ni eshwɛ ni faaa nɛɛ mli lɛ, wɔbaakase Yehowa jalɛsaneyeli lɛ kɛtsɔ mɛi fɛɛ ni wɔɔha amɛná hegbɛ koni amɛye amɛhe kɛjɛ hiɛkpatamɔ ni baa Satan jeŋ fɔŋ nɛɛ nɔ lɛ mli.—1 Yoh. 2:17.