“Nyɛshia Kpe”
1 Beni Yesu etsɔɔ bɔ ni nibii ni naa wa ni baa lɛ baakadi nibii agbɛjianɔtoo nɛɛ naagbee gbii lɛ sɛɛ lɛ, ewo ekaselɔi lɛ hewalɛ koni ‘amɛshi kpe.’ (Mar. 13:33) Mɛni hewɔ esa akɛ Kristofoi ashi kpe? Ejaakɛ oshara be ni mli wa fe fɛɛ yɛ adesai ayinɔsane be mli lɛ mli wɔyɔɔ lɛ. Wɔnyɛŋ wɔha ni mumɔŋ wɔ̀ aye wɔ. No haŋ wɔhiɛ asɔ nitsumɔ ni Yehowa kɛha wɔ ni wɔtsu yɛ nɛkɛ naagbee be nɛɛ mli lɛ. Mɛɛ nitsumɔ ni?
2 Yehowa eha ewebii miijaje e-Maŋtsɛyeli lɛ—adesai ahiɛnɔkamɔ kome pɛ lɛ—he sanekpakpa lɛ yɛ shikpɔŋ nɔ fɛɛ. Nyɔŋmɔ gbɛjianɔtoo lɛ ni wɔkɛnyiɛɔ gbagbalii lɛ haa ayɔseɔ wɔ akɛ anɔkwa Kristofoi ni hiɛ yɔɔ bei ni wɔyɔɔ mli nɛɛ ahe kɛ bɔ ni ehe hiaa ni wɔye wɔbua mɛi krokomɛi koni amɛnu “naanɔ wala wiemɔi” lɛ. (Yoh. 6:68) Kɛ wɔkɛ wɔhe wo nitsumɔ ni he hiaa fe fɛɛ nɛɛ mli kɛ ekãa lɛ, wɔyeɔ he odase akɛ wɔmiishi kpe yɛ mumɔŋ.
3 Aawo Wɔ Hewalɛ Koni Wɔshiɛ: Ákɛ Yehowa Odasefoi lɛ, esa akɛ wɔná jwɛŋmɔ ni ja yɛ wɔsɔɔmɔ nitsumɔ lɛ he. Suɔmɔ ni wɔyɔɔ kɛha Nyɔŋmɔ kɛ naanyo gbɔmɔ lɛ woɔ wɔ hewalɛ koni wɔkɛ wɔhe awo shiɛmɔ nitsumɔ lɛ mli. (1 Kor. 9:16, 17) Kɛ wɔfee nakai lɛ, wɔbaahere wɔ kɛ mɛi ni boɔ wɔ toi lɛ fɛɛ yiwala. (1 Tim. 4:16) Nyɛhaa efea wɔfaishitswaa akɛ wɔkɛ wɔhe baawo mli daa bɔ ni wɔɔnyɛ koni wɔkɛ wɔhe awo mli be kakadaŋŋ bɔ ni he baahia yɛ nɔyeli ni hi fe fɛɛ ni adesai baanyɛ aná yɛ amɛshihilɛ mli lɛ he shiɛmɔ mli—Nyɔŋmɔ Maŋtsɛyeli lɛ!
4 Anɔkwa sane ko ni he hiaa lɛ ji nɔ ni haa wɔnuɔ bɔ ni wɔsɔɔmɔ nitsumɔ lɛ he hiaa ha lɛ waa—amanehulu kpeteŋkpele lɛ baafɛ́ yɛ be mli ni wɔkɛ wɔhe woɔ nitsumɔ nɛɛ mli lolo lɛ. Gbi lɛ kɛ ŋmɛlɛtswaa lɛ ni wɔleee lɛ biɔ ni wɔya nɔ wɔshi kpe ni wɔfee klalo be fɛɛ be, ni wɔkɛ wɔhiɛ afɔ̃ Yehowa nɔ kɛtsɔ sɔlemɔ nɔ. (Efe. 6:18) Bɔ ni atsuɔ shiɛmɔ nitsumɔ lɛ ahaa lɛ miiya hiɛ be fɛɛ be. Shi etsɛŋ ni gbi ko lɛ abaatsu odaseyeli nitsumɔ ni fe fɛɛ yɛ adesai ayinɔsane be mli kɛyashɛ naagbee kwraa lɛ he nii.
5 Okɛ anɔkwayeli aye fãmɔ ni Yesu kɛha akɛ ‘ashi kpe’ lɛ nɔ. Amrɔ nɛɛ enɛ mli ebawa waa fe bei fɛɛ ni eho. Eba akɛ wɔkɛ hiamɔ henumɔ baahere nɔ. Nyɛhaa wɔyaa nɔ wɔhia shi akɛ mɛi ni tɔrɔɔɔ dãa yɛ mumɔŋ, ní hiɛ yɔɔ amɛhe nɔ, ní feɔ ekãa yɛ Yehowa sɔɔmɔ mli. Hɛɛ, eba akɛ ‘wɔɔshi kpe ni wɔhiɛ akã shi.’—1 Tes. 5:6.